एप्पा चोङ्सा 2
2
पेन्तिकोसमि यिडे़ॽ पबित्रा होङ्निवा लेम्बॽआ
1पेन्तिकोस#२:१पेन्तिकोसयेसु खिरिस्ट येःॽमाबाङ हिङ्बोक्पॽआ पचास याक लिबॽआ याक पेन्तिकोसमि याक लुन्डुजे। चाडमि पचास याकपेॽ मोबेॽ खोजि सुप्सामि लुमे चाडमि यिडे़ॽ यरुसलेमबेॽ परभु येसुबेॽ बिस्वास ले़ःॽखुबाजि इक्को ठाउँबेॽ सुम्बॽआ ले़टामे। 2मोडोक्पेॽ थाङ्सिरिॽटुबाङ हाजोक्टोॽ मोबेॽ बेॽए हिॽवाबाडोॽ मुगा, मोबा मो हिॽवाबा चोङ्साजि पेम्बॽआ खिम इॽठुप लिसा। 3मो मिराप्लावाडोॽ खाङ्मुसा। मोबा मो खोरो खोरो लिनुङ चोङ्साजिमि निन्डवाँबेॽ पेना। 4मोबा पबित्रा होङ्निवा माहाजिबेॽ लेन्नुङ मोमि सक्तिडे़ॽ लुमेॽपॽआडोॽ खोजि खोरो खोरो खाप्लाबेॽ यामुबोगामि।
5मोडोक्पेॽ यरुसलेमबेॽ मक्खाम्डेमबेॽहा चोप देसबाङ लेम्बॽआ यहुदि धरममि याॽमिजि टुसामे। 6इगो खा खेम्नुङ बेॽलो याॽमिजि मोबेॽ सुप्सामि। चोप ठाउँबाङ लेम्बॽआ यहुदिजिडे़ॽ चाहिँ खोजिटाङ्बामि खाप्लाबेॽ माहाजि काबॽआ खेप्सुजि। 7मोबा माहाजि बेॽलो खरि मिन्साङ काबोगामि “इघा चोप याॽमिजिगो गालिलिजि ने़ॽनेन्डे ? 8तर इघाजिडे़ॽ कानिङ्मिनोॽ खाप्लाबेॽ यामुबॽआ कानिङे़ॽ खेम्मे़ॽनिङ्सिन्डुङ्मे! 9कानिङ्गो पारथिजि, मादिजि, एलामिजि, मेसोपोटामिया, यहुदिया, कापाडोकिया, पोन्टस, एसिया, 10फिरिगिया, पामफिलिया, मिस्रा देस, कुरेनि के़क्पेॽ सिॽइहा लिबियाराजिबाङ, मोबा रोमबाङ लेम्बॽआजि टुन्डिङ्मा। 11मोबा केरेट पोङ्बोङ्मानुङ अराब देसबाङ लेम्बॽआजिसो टुन्डिङ्मा। कानिङ यहुदिजिनुङ यहुदि धरम लाघुबा अयहुदि जातिहा याॽमिजि ले़न्डिङ्मा। इघाजिडे़ॽको कानिङ चोपमि खाप्लाबेॽ निवाहाङ्डे़ॽ ले़ःॽपॽआ खरिहा योम्बोकमि टुम्बेॽहा खा लुबॽआ कानिङे़ॽ खेम्मे़ॽनिङ्सिन्डुङ्मा।”
12माहाजि खरि मिन्नुङ इमाङ ले़ःॽमे ले़ःॽमे लिसामि, मोबा “इगो इमाङ्डे ?” लुनुङ माहाजि सिम्घुसे़ॽचुसामि। 13तर इन्डोगे़ॽ चाहिँ माहाजि इःजोसुजि “इघाजिगो इडे़ॽ सेॽखे़टामे ले़!”
पत्रुसमि लम्बवाँ
14तर पत्रुसडे़ॽ इक्पोङ इक्को एप्पा चोङ्साजिनुङ येःप्नुङ बेॽए सेम्लाडे़ॽ चोबे़ॽ खेम्हेरो लुबेॽटुजि, “होउ यहुदि लङ्गामजिनुङ यरुसलेमबेॽ पेङ्घुबा वावानिसानुङ नानुसाजि, इगोबेॽ इमाङ लिबॽआ ले़ये लुनुङ लुनिम्ने़, के़ए़ खा खेप्सानुमे! 15इघा याॽमिजि हे़निङे़ॽ मिॽपॽआडोॽ अङ्गुरमि मद्यडे़ॽ सेॽखे़ॽपॽआ ने़ॽनिहाजि। इन्ढोङ्होङ हागोगो माक्मिॽए नोक्चि बोङ्रेॽनोॽ काटे। 16तर इगोगो योएल लुमे अगमबक्ताडे़ॽ धारमिक नेॽचिराबेॽ साप्पॽआ खा पुरा लिटे़ लङ्गामजि नुरोॽ खेप्सानुमो,
17‘निवाहाङ्डे़ॽ लुबॽआ ले़ये,
ए़क्साङ्ए याकपेॽ के़ए़ होङ्निवा चोप जातिहा याॽमिजिसोक्पेॽ ओप्मिनुङे,
मोबा हे़निङ्मि पसाजिडे़ॽ अगमबानि इःन्डुजिहा, मोबा हे़निङ्मि वेन्जा पसाजिडे़ॽ सेन्जिसेम्माङ माॽइन्डुजे, हे़निङ्मि,
टुबाटुमाजिडे़ॽ सेम्माङ माॽइन्डुजे।
18मो यिडे़ॽ के़ए़ योम्बोक ले़ःॽखुबा मेॽनामिॽनुङ वडाङ्पसाजिसोक्पेॽ, के़ए़ होङ्निवा ओप्मिनुङे
मोबा माहाजिडे़ॽ निवाहाङ्मि खा इःन्डुजे।
19मोबा के़ॽ नान्द्रुङ्माबेॽ खरिहा चिङ्गा खाङ्मुनुङे।
मोडोक्नोॽ मक्खाम्डेमबेॽसो खरिहा चिङ्गा खाङ्मुनुङ्हा, अथबा हरि, मिनुङ मे़क्खुमि मुस्लो हे़निङ खाङ्मेॽनिम्ने़।
20परभुमि मो महाननुङ खरिहा याक लेम्मा याक्लो
नमडे़ॽ उज्यालो मे़ॽनिङ्मा लिनुङ सेन्जुगुप लिये, ला चाहिँ हरिडोॽमा हररामा लिये।
21मोबा असे़ॽ परभुमि निङ्बेॽ बिस्वास ले़न्डुए खो हिङ्इये’।
22“होउ इस्राएलिजि, इगो खा हे़निङे़ॽ खेप्सानुमे। येसुबाङ निवाहाङ्डे़ॽ खरिहानुङ सक्तिनुङ्हा योम्बोक हे़निङ्मि रुम्बेॽ ले़ःॽपॽआगो, हे़निङे़ॽ लेन्डानुमे। माहा चिङ्गाबाङ निवाहाङ्डे़ॽनोॽ येसु पाङ्इटुए लुनुङ पक्का ले़ःॽपेटुए। 23निवाहाङ्डे़ॽ खोमि योजनानुङ निवाबेॽ मिॽपॽआडोक्नोॽ येसु हे़निङ्मि हुकपेॽ पिसा, मोबा हे़निङे़ॽ खो मङे़हा याॽमिजिमि हुकपेॽ पिनुङ काप्सिङ्सोक्पेॽ किङ्नेमेॽटानुम।
24“तर निवाहाङ्डे़ॽ येसु सिघे़ॽपॽआबाङ हिङ्बोॽइटुए। इन्ढोङ्होङ खो सिमवाडे़ॽ मे़से़क्हेसु। 25हाङ्बा दाउदडे़ॽ येसुमि टुम्बेॽ इडोॽ लुबॽआ ले़टे़,
के़ए़ परभु सानिङ्नोॽ के़ए़ पोम्बेॽ खाक्सुङ।
खो के़ए़ चुप्थिङ्लाम टुये, मोडोगे़ॽ के़ॽ किस्सिमा पाप्निबा।
26मोडोगे़ॽ के़ए़ निवा बेॽलो साप्थाङ्इये
मोबा का साप्थाङ्मानुङ निवाहाङ्मि ओहाङ ले़नुङे।
का सिमा सिॽङाहोङ्सो फेरि हिङ्इङे लुमे आसाबेॽ हिङ्इङे।
27इन्ढोङ्होङ निवाहाङ्डे़ॽ, के़ए़ होङ्निवा पातालबेॽ याःॽयासुनिबा।
हे़ने़ॽ हे़ने़ए़ पबित्रा याॽमिमि हिङा किम्घे़ॽमेॽटुनिबा।
28हे़ने़ॽको का चाइबानोक्मा राम खाङ्मेटिङे।
हे़न्नुङ टुमाबेॽ का साप्थाङ्इङे#भजनसङ्ग्रह १६:८,११ ।”
29के़ॽ लुहेनुङे “होउ वावानिसानुङ नानुसाजि, हागो के़ॽ कानिङ्मि टुबा दाउदमि टुम्बेॽ पक्का ले़ःॽनुङ लुहेनुङे। खो सिघे़ॽनुङ खोमि येःॽमा आयुरोसो टुसिये। 30मोडोगे़ॽ दाउद अगमबक्ता ले़टे़न्से़ॽ, खोमि बङ्सबाङ्नोॽ इक्को याॽमि निवाहाङ्डे़ॽ हाङ्बा टोङ्नुङ युङ्इन्डुए लुमे हेन्ज्रुङ निवाहाङ्डे़ॽ पिबॽआ ले़ये लुनुङ दाउदडे़ॽ लेसुए। 31निवाहाङ्डे़ॽ इमाङ ले़न्डुहा लुमे खा दाउदडे़ॽ याक्लोनोॽ खाङ्डोक्नुङ खोसे़ॽ लुसु, खिरिस्ट सिबॽआबाङ हिङ्बोक्मे खामि टुम्बेॽ इडोॽ लुटुए, ‘खो चाहिँ पातालबेॽ याःॽयानिबा, मोबा खोमि हिङासो किम्घे़ॽनिबा।’
32“मोनोॽ येसु निवाहाङ्डे़ॽ फेरि हिङ्रिक टोङ्इटुए मो खा खाङ्खुबा कानिङ चोप साक्छिजि टुन्डिङ्मा। 33निवाहाङ्डे़ॽ येसु बेॽएम्मा टोङ्नुङ खोमि चुप्थिङ्लाम युङ्इटुए। मोबा खोसे़ॽ हे़न्ज्रुङ हे़म्बॽआडोक्नोॽ पबित्रा होङ्निवा पिसु। मोबा माहा होङ्निवानोॽ परभु येसुडे़ॽ कानिङ हाङ्बिटे़नुङ ‘इडोॽ लिमे़ॽनिङ्सिहा’ माहा खानोॽ हे़निङे़ॽ खाङ्मे़ॽनिङ्सिन्डानुमे मोबा खेम्मे़ॽनिङ्सिन्डानुमे। 34-35हाङ्बा दाउदगो येसुडोक्नोॽ थाङ्सिरिॽटु मे़ङ्खडा तर खोसे़ॽ इडोॽ लुबॽआ ले़ये, निवाहाङ के़ए़ परभुडे़ॽ इडोॽ लुसु, ‘के़ॽ हे़ने़हा सतुरजि हे़ने़हा राङ्फे़क्माहोङ्बेॽमु मे़युङ्रेॽलो हे़न के़ए़ चुप्थिङ्लाम पेने!#भजनसङ्ग्रह ११०:१ ’
36“मोडोगे़ॽ चोप इस्राएलि याॽमिजि हे़निङे़ॽ इगो खा नुरोॽ लेसानुमे, हे़निङे़ॽ काप्सिङ्बेॽ किङ्नेबॽआ येसुनोॽ निवाहाङ्डे़ॽ परभुनुङ मुक्ति पिघुबा खिरिस्ट टोङ्इटुए।”
37पत्रुसमि खा खेम्नुङ खोजिमि निवा टुगा मोबा माहाजिडे़ॽ पत्रुसनुङ हाइखा एप्पा चोङ्साजि सिप्सुजि, “होउ वावानिसाजि, हागो कानिङे़ॽ इमाङ्डे ले़ःॽमे ?”
38मोबा पत्रुसडे़ॽ लुसुजि, “हे़निङ्मि पापबाङ आम्लाङ टोक्मामि लागि पाप ले़ःॽमा लेडानुमे, मोबा येसु खिरिस्टमि निङ्बेॽ बप्तिस्मा लासानुमे! मोबा हे़निङे़ॽ निवाहाङ्बाङ पबित्रा होङ्निवामि बरदान चुप्मिन्डानुमे। 39इन्ढोङ्होङ इगो पबित्रा होङ्निवामि हेन्ज्रुङ हे़म्बॽआगो हे़निङ्नुङ हे़निङ्मि पसाजि, मोबा ओः टुघुबाजिमि लागिसो ले़ये।”
40मोबा पत्रुसडे़ॽ हाइखा बेॽलो खामि साक्छि पिसाङ नुरोॽ अरति पिसाङ लुसुजि, “इगो मङे़हा याॽमिजिडे़ॽ चुप्मे दन्डाबाङ हे़निङ हिङ्जासानिङे।” 41बेॽलो याॽमिजिडे़ॽ पत्रुसमि खा खेम्नुङ बिस्वास ले़टुजि मोबा मो याकनोॽ बप्तिस्मा लाघुबा याॽमिजि सुम्बोङ हजारडोॽ लिसामि। 42मोबा माहाजिडे़ॽ एप्पा चोङ्साजिनुङ चिनामे, सोरि सङ्गति ले़टामे। मोबा सानिङ्नोॽ सोरि सोरि पारथना ले़टामेनुङ परभु भत्तेर चासामे।
बिस्वासिजिमि सङ्गति
43मोबा एप्पा चोङ्साजिडे़ॽ खरिहा योम्बोक ले़ःॽसाङ बेॽलो चिङ्गा खाङ्मुसुजि। मोडोगे़ॽ याॽमिजि निवाहाङ्नुङ किस्सिबुगामि। 44मोबा बिस्वास ले़ःॽखुबाजि सोरि पेनामे। खोजिमि चोप कोक्नाम साझे ले़टहा। 45मोबा माहाजिडे़ॽ खोजिमि याङ्सरावानुङ कोक्नाम इन्जानुङ इमाङ मे़ङ्काप्खुबा याॽमिजि हाबेॽटुजे। 46खोजि इक्को निवा लिनुङ सानिङ्नोॽ मन्दिरबेॽ सुम्नुङ सङ्गति ले़टामे। खोजि खिम-खिमबेॽ सोरि पेन्नुङ साप्थाङ्मानुङ परभु भत्तेर चासामे। 47खोजि सानिङ्नोॽ निवाहाङ्मि ओहाङ ले़टामे। माहाजि हाइखा याॽमिजिडे़ॽसो नेन्जोसुजे। निवाहाङ्मि बिस्वासबेॽ हिङ्घुबाजि बेॽलो बेॽलो लिसामि।
Currently Selected:
एप्पा चोङ्सा 2: YAMP
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
