मात्ति 27
27
येसु तायेन्राङ्बा पिलातासकाबे ङ्खेतुना
(मार्कुस १५:१; लुका २३:१-२; युहान्ना १८:२८-३२)
1भेनिक कुचिक्कुचिक्पे खाङ्खाङ् हाङ्खुबाचि नुङ् याहुदि हाङ्गुम्बाचिङा येसु सिमाना भोङ् येसुगा बिरुद्दाबे चेॽया ङ्हुप्तु॥ 2न्हाङा ङ्खाचिङा येसु न्थुन्धेतुहोङ् रोमि माडा-खाङ्खाङ्बा पिलातास जिम्मा म्बि॥
याहुदा स्याना
(सेगुम्पाक १:१८-१९)
3न्हाङा येसु लाप्मेखुबा याहुदाङा येसु सिमाना दान्डा म्बिना चेॽया खेप्सुहोङ् इसिॽनुङ् एता॥ न्हाङ् ङ्खा सुम्खेङ् युप्पा याङ् लाम्बिॽमागा खाङ्खाङ् हाङ्खुबाचि नुङ् याहुदि हाङ्गुम्बाचिगाबे ख्याहोङ् 4खाॽला लुचि, “का इहाचा मेङ्खोक्निखुबा धोका पिङ्होङ् पाप चोगुक्सुङ्हा॥”
ङ्खिङ्बेला ङ्खाचिङा खाॽलाना पोलोवा म्बि, “कानिङ् इ लुमेकाहा, ङ्खा गो न्दा आफाइ निसु॥”
5खा चेॽया खेप्सुहोङ् याहुदाङा ङ्खा याङ् निङ्वाफुमापाङ् होङ्बे लेप्ताहाक्सोओ, न्हाङा न्नाभाङ् लोन्दाख्याहोङ् छुयास्या॥
6खाङ्खाङ् हाङ्खुबाचिङा ङ्खा युप्पा याङ् ङ्गोबुहोङ् खाॽला ङ्गाया, “खा गो हेलिगा ओमेन ओम, खा निङ्वाफुमापाङ्गा याङ् युङ्मानाबे एम्मा एङ्गा धार्मिक नियामङा म्बिमेन्हा॥” 7न्हाङा ङ्खाचि साल्लाहा न्जोगाहोङ् ङ्खा याङ्ङा हेकोहा खाम्युकपाहाङ् न्दायाहा याॽमिचिगा लास हुम्मागा कुमालेगा लाम्धाङ् ङ्ङिनु॥ 8न्हाङामाङ् हेन्सेन चा न्ना लाम्धाङ् “हेलिङा इनाना लाम्धाङ्” न्ल्वाना॥#सेगुम्पाक १:१८-१९
9खाॽला निङ्वाफुमाभाङ् चेक्खुबा यार्मियाङा चेक्तुक्साहा खा चेॽया पुरा लेक्सा, “इजिरेलिचिङा ङ्युक्सुहा उका ओमेन सुम्खेङ् युप्पा याङ् साया, ङ्खा ङ्खाचिङा न्दाप्तु॥ 10न्हाङा हाङ्बा निङ्वाफुमाङा का आग्गे पियाङ्हा लोॽवा ङ्खाचिङा ङ्खा याङ्ङा कुमालेगा रोपा ङ्ङिनु॥”#जाकारिया ११:१२-१३
पिलातासका उयुम्बे येसु
(मार्कुस १५:२-१५; लुका २३:३-५,१३-२५; युहान्ना १८:२९–१९:१६)
11येसु च्हेन रोमि माडा-खाङ्खाङ्बा पिलातासका ओन्दाङ् येबा न्हाङ् पिलातासङा येसु छिम्दु, “इना न्दा याहुदिचिगा हाङ्गान्यि?”
येसुङा पोलोवा पि, “न्दामाङ् ङ्खाॽला कामासिमेका॥”
12न्हाङा खाङ्खाङ् हाङ्खुबाचि नुङ् याहुदि हाङ्गुम्बाचिङा येसु प्याक आप्दिक ङ्ङेन्दु, ङ्खाॽनिङ्गो उङा इहाचा पोलोवा म्बिन्चिन॥
13न्हाङा पिलातासङा छिम्दु, “ङ्खाचिङा खिङ्हा आप्दिक ङ्ङेम्मासिमेका, न्दा ङ्खेप्स्वागान्हा?” 14ङ्खाॽनिङ्गो येसुङा एको चेॽयागा चा पोलोवा म्बिन्चिन॥ खा निसुहोङ् माडा-खाङ्खाङ्बा चा आच्चाम्मा एता॥
15याहुदिचिगा फोङ्होक्नामगा बेलाबे माडा-खाङ्खाङ्बाङा याॽमिचिङा न्सेगुना एको छेक्पा लेन्नाहाङ्माना चालान साया॥ 16ङ्खिङ्बेला उनिङ् हिसाना बाराब्बा बाङ्ना किॽमालुलुना एको याॽमि छेक्पाङ्बे वाया॥ 17ङ्खोङ्माङ् याॽमिचि न्छुप्साना बेला पिलातासङा ङ्खाचि छिम्दुचि, “लु कायानि, का इसा ल्याहाक्सुङ्? बाराब्बा येम खिरिस्ट बाङ्ना येसु येम?” 18इजाङ्बाङ्निङ् याहुदि हाङ्गुम्बाचिङा उङ्चि नाहेम्माङा येसु काबे जिम्मा पियाहा बाङ्ना चेॽया उङा था वाया॥
19निरिक चोक्माना युक्थामबे पिलातास युङामासानिङ् उहिङ्खुमाङा खाॽलाना सालेन हाक्तु, “न्ना धार्मोति याॽमि इच्चा न्जोगुन, इजाङ्बाङ्निङ् खेम सेॽनि का न्ना याॽमिगा उतुम्बे सेम्माङ् माक्तुङ्होङ् तुक्नुङ् तुखि चायामाङ्ना॥”
20ङ्खाॽनिङ्गो खाङ्खाङ् हाङ्खुबाचि नुङ् याहुदि हाङ्गुम्बाचिङा च्हेन याॽमिचि म्बोगुचिहोङ् “बाराब्बा लेहाक्सु न्हाङ् येसु च्हेन सिसु” ङ्गामेतुचि॥ 21माडा-खाङ्खाङ्बाङा फेरि ङ्खाचि छिम्दुचि, “खा हिप्पाङ्बे का इसा ल्याहाक्सुङ् मितिमिघा?”
ङ्खाचिङा ङ्गाया, “बाराब्बा लेताब्या!”
22न्हाङा पिलातासङा फेरि छिम्दुचि, “ङ्खाॽलाभोङ् खिरिस्ट बाङ्ना येसु च्हेन इ चोगुङ्?”
ङ्खाचि घाकङा पोलोवा म्बि, “न्ना कुरुसपे छुएन्दु!”
23पिलातासङा फेरि छिम्दुचि, “इजाङ्? नाङा इहा इसिॽहा काम चोगुक्सुहा?”
ङ्खाॽनिङ्गो ङ्खाचिङा झान तुक्नुङ् ओक्साङ् ङ्गाया, “न्ना कुरुसपे छुएन्दु!” 24ङ्खाॽनिङ्गो पिलातासङा “हाकु आका इच्चा लान्जोङ्मेन्हा” बाङ्ना चेॽया था तोक्तु॥ न्हाङ् “खाइलाबाइला लेङ्मेहा लोप्पि” भोङ् किसिॽमाङा घाक्का उयुम्बे माङ्च्वा याङुहोङ् उमुकचि वासिसाङ् खाॽला काया, “सोयानुम, ना याॽमि सिसानागा आप्दिक काबे मेन्ना न्निङ्दा छोङ्बेॽमाङ् आनि॥”#ब्यावास्था २१:६-९
25ङ्खिङ्बेला घाक याॽमिचिङा खाॽलाना पोलोवा म्बि, “न्ना सिसानागा आप्दिक कानिङ् नुङ् आनिङ्गा च्याचिछोङ्बेॽमाङ् आनि!”
26न्हाङा पिलातासङा ङ्खा याॽमिचिगा लागि बाराब्बा लेतुबिचि, न्हाङ् येसु च्हेन कोर्रा एम्माहोङ् कुरुसपे छुॽनेम्मागा काङ्बाचि जिम्मा पिचि॥
काङ्बाचिङा येसु खिजे न्जातुना
(मार्कुस १५:१६-२०; युहान्ना १९:२-३)
27न्हाङा पिलातासका काङ्बाचिङा येसु हाङ्पाङ्बे ङ्खेतुहोङ् घाक काङ्बाचि उका उयुम्बे न्छुप्सा॥ 28ङ्खाचिङा येसुगा तेक म्फुक्सुबिहोङ् हाङ्ङा वाॽमाहा लोॽवाहा बाइजानि राङ्गा तेक ङ्वाॽमेतु॥ 29ङ्खाचिङा तिङ्गिभाक्का मुकुट् न्जोगुहोङ् उटुखुरुकपे म्फोम्मेतु॥ न्हाङ् उका छुप्ताङ् उमुकपे मिक्लागा डाङ्गाक ङ्याङ्मेतुहोङ् उका ओन्दाङ् लाङ्छुकपे युङ्साङ् खाॽला खिजे न्जातु, “ओ याहुदिचिगा हाङ्, सेमेॽनेन्नायो!” 30न्हाङा ङ्खाचिङा उङ् न्थोक्तु न्हाङ् न्ना डाङ्गाक न्नाप्तुहोङ् उटुखुरुकपे म्मोक्तु॥ 31खाॽला ङ्खाचिङा उङ् खिजे न्जातिहोङ् ङ्खा तेक म्फुक्सुबि न्हाङ् उका तेक ङ्वाॽमेतुहोङ् कुरुसपे छुॽनेम्मागा ङ्खेतु॥
येसु कुरुसपे न्छुएन्दुना
(मार्कुस १५:२१-३२; लुका २३:२६-४३; युहान्ना १९:१७-२७)
32ङ्खेॽमास्यानिङ् कुरेनि साहारबेॽना सिमोन बाङ्ना एको याॽमि न्दुप्सु, ङ्खाचिङा न्ना जोबारजोस्ति येसुगा कुरुस ङ्खुॽमेतु॥ 33न्हाङा ङ्खाचि गाल्गाथा बाङ्ना ठोङ्बे न्दासु॥ (गाल्गाथा बाङ्ना च्हेन “खाप्पारे ठोङ्” ओम॥) 34न्नाबे न्दासुहोङ् ङ्खाचिङा येसु खिक्हा सिधाक फासाहा सिम्लेॽमाङ्गा माध ङ्ङुङ्मेतु॥ ङ्खाॽनिङ्गो येसुङा ङ्खा चाखा से चोगु, उङ्मा ङ्गाक्सान॥#छेम ६९:२१
35न्हाङा ङ्खाचिङा येसु कुरुसपे न्छुएन्दुहोङ् उका ओतेक उङ्चि-उङ्चिबे चिठ्ठा ङ्ङेन्दुहोङ् ङ्हाप्सु॥#छेम २२:१८ 36न्हाङा ङ्खाचि न्नाबे ङ्युङाहोङ् येसु कुमा न्दारोक्तु॥ 37येसुगा उटुखुरुक छोङ्बे ङ्खाचिङा “ना येसु याहुदिचिगा हाङ् ओम” भोङ् उका बिरुद्दाबे आप्दिक एन्दाना छेप्फा ङ्युक्सुबि॥ 38येसु न्छुएन्दुनिङ् ङ्खाचिङा हिप्पाङ् खुसुबाङ्चि चा, एको उका छुप्ताङ् पोटि न्हाङ् हेकोना फेक्सालाङ् पोटि न्छुएन्दुचि॥
39न्नाभाङ् लाम्खुबा घाक याॽमिचिङा उङ्चि टुखुरुक योङ्साङ् येसु खिजेचासाङ् खाॽला न्लु,#छेम २२:७; १०९:२५ 40“ओ निङ्वाफुमापाङ् होराहाक्स्वागाहोङ् फेरि सुम्ना लेनबे चोक्खुबा, न्दा आफाइ हिङा॥ न्हाङा न्दा निङ्वाफुमागा उच्यागान भोङ्, लु कुरुसपाहाङ् मो उक्सा!”#मात्ति २६:६१; युहान्ना २:१९
41ङ्खाॽलामाङ् खाङ्खाङ् हाङ्खुबाचि, धार्मासाप्ला चिन्खुबाचि नुङ् याहुदि हाङ्गुम्बाचिङा चा येसु खिजे न्जातु॥ 42ङ्खाचिङा ङ्गाया, “न्नाङा हेकोहाचि गो हिङ्मेतुचि, उङ् आफाइ च्हेन हिङ्मेॽमा ङ्यास्वान्ना॥ ना इजिरेलिचिगा हाङ् ओमभोङ् कुरुसपाहाङ् मो उङ्नि न्हाङा कानिङ् बिस्वास चोग्वाम्ङाना॥ 43नाङा निङ्वाफुमाबे बिस्वास चोगुक्सा न्हाङ् ‘का निङ्वाफुमागा उच्याङान’ कायाघोन्दा॥#छेम २२:८ निङ्वाफुमा नानुङ् चोन्दास्यामानाभोङ् हाकु उङामाङ् हिङ्मेतुनि॥”
44न्हाङा उङ्नुङ् सोरि कुरुसपे न्छुएन्दुचिहा ङ्खा खुसुबाङ्चिङा चा ङ्खाॽलामाङ् खिजे चाताचु॥
येसु स्याना
(मार्कुस १५:३३-४१; लुका २३:४४-४९; युहान्ना १९:२८-३०)
45हाकु लेन्लुम नाहाङ्तो लेॽनिगा सुम मोक्तुनिङ् सोम्मा खाम्युक भोरि कुइम लेक्सा॥ 46सुम मोक्तुनिङ् लोप्पि येसु माडा सेम्लाङा खाॽला कासाङ् ओक्ता, “इलोइ, इलोइ लामा साबाखाथानि?” नागा तुम्बिला ओम “ओ आका निङ्वाफुमा, ओ आका निङ्वाफुमा, का इजाङ् नासिॽयाङ्गाना?”#२७:४६ खा छेप्ताहा चेॽया आरामेइक चेॽया ओम॥#छेम २२:१ 47येसु ओक्ताना ङ्खेप्सुहोङ् न्नाबे ङ्येबाहा इखिङ् याॽमिचि खाॽला ङ्गाया, “ना याॽमिङा गो निङ्वाफुमाभाङ् चेक्खुबा एलिया काॽमासिमेॽना!”
48ङ्खाचि माध्येबे एको लुक्साङ् ख्याहोङ् सुहा सिम्लेॽमाङ्गा माधपे झुम्रो लुप्सु न्हाङ् डाङ्गाक्का ओछोमबे युक्सुहोङ् उङ्मागा येसु पि॥#छेम ६९:२१ 49ङ्खाॽनिङ्गो हेकोहा इखिङ्ङा च्हेन ङ्गाया, “हाकुन्नियो, ना हिङ्मेसे वालोकपाहाङ् एलिया तामेॽनायेम, सोम्सोम!” 50न्हाङा येसु फेरि माडा सेम्लाङा ओक्ता न्हाङ् ओसोक्मा लेहाक्सु॥
51ङ्खिङ्बेलामाङ् निङ्वाफुमापाङ्बे छुयाना पार्दा तोन्धाङ् मो सोम्मा छिनाख्याहोङ् हिच भाक लेक्सा, न्हाङ् ताम्दाङ्फुमा योङ्मा तारोक्तु, माम्माहा लुङ्खाकचि म्बेगाभोक्सा,#पारास्थान २६:३१-३३ 52सियापाङ्चि ङ्होसा न्हाङा निङ्वाफुमागा न्स्याहा प्याक याॽमिचिगा सालुङ् हिङ्गिलिक न्लेक्सा॥ 53न्हाङा येसु स्यानाभाङ् हिङ्गिलिक लेक्साहोङ् ङ्खाचि सियापाङ्भाङ् पाखा न्लोन्दा, न्हाङा पाबित्तारा साहारबे ङ्ङुया न्हाङ् प्याक याॽमिचिगाबे ङ्ङोता॥
54न्नाबे रोमि केप्टेन न्हाङ् उङ्नुङ् येसु कुखुबा काङ्बाचिङा लुक्लिबा ख्याना नुङ् न्नाबे लेङ्मास्याहा चेॽया न्निसुहोङ् तुक्नुङ् किसिसाङ् खाॽला ङ्गाया, “जेप्पा ना याॽमि गो निङ्वाफुमागा उच्यामाङ् सायामाना॥”
55न्नाबे गालिलभाङ् न्दायाहा प्याक मामुचि चा ङ्वाया, ङ्खाचिङा न्नाबे लेक्साहा घाक चेॽया माङ्दुन्धाङ् न्सोॽमास्या॥ ङ्खाचि उका सेवा चोक्साङ् फासाङ् गालिलभाङ् येसुगा हेक्साङ् लान्जोगामासा॥ 56ङ्खाचिबे मारियाम माग्दालिनि, याकुब नुङ् योसेफका उमा मारियाम न्हाङ् जाब्दियागा उहिङ्खुमा (याकुब नुङ् युहान्नागा उमा) न्साया॥#लुका ८:२-३
येसुगा लास सियापाङ्बे ङ्युक्सुना
(मार्कुस १५:४२-४७; लुका २३:५०-५६; युहान्ना १९:३८-४२)
57नाॽमासेकङा आरिमाथिया साहारभाङ् योसेफ बाङ्ना एको थुङ्दुना याॽमि ताया॥ उङ् चा येसुगा चेला साया॥ 58न्नाङा पिलातासकाबे ख्याहोङ् येसुगा लास नाक्तु॥ न्हाङ् पिलातासङा उङ् लास खेॽमाना आग्गे पि॥ 59योसेफङा येसुगा लास खेतुहोङ् एको ओछोङा सुतिगा तेकङा कितु॥ 60न्हाङा उका लागि लुङ्खाकपे खोन्दुना ओछोङा सियापाङ्बे न्ना लास युक्सु, न्हाङ् सियापाङ्गा उयाबे माडा लुङ्खाकङा एप्तोओहोङ् उङ् न्नाभाङ् ख्या॥ 61मारियाम माग्दालिनि नुङ् हेकोना मारियाम च्हेन सियापाङ्गा उयुम्बे युङामासाचि॥
काङ्बाचिङा सियापाङ् ङ्गुसुना
62न्नागा हेक्साङ्ना लेन आराम चोक्माना लेन खाङ्खाङ् हाङ्खुबाचि नुङ् फारिसिचि पिलातासकाबे ङ्ख्याहोङ् खाॽला न्लु, 63“आहाङ्बा, कानिङ् खा चेॽया मितुनेसुम्ङा, न्ना लेम्चाखुबाङा हिङ्गिलिक सायानिङ् ‘का सिमेङ्होङ् सुम्ना लेनबे फेरि हिङ्गिलिक लेङ्मेङ्ना’ कायामाना॥#मात्ति १६:२१; १७:२३; २०:१९; मार्कुस ८:३१; ९:३१; लुका ९:२२; १८:३१-३३ 64न्हाङामाङ् सुम्ना लेन सोम्मा न्ना सियापाङ् उचुन कुमेतुचि॥ मानुङ्गो उका चेलाचि सेॽनि न्दामेहोङ् उका लास ङ्खुसेत्वा न्हाङा ‘स्यानाभाङ् हिङ्गिलिक लेक्सामाना’ भोङ् याॽमिचि न्ल्वाचि, न्हाङ् न्ना धोका ओन्दाङ्ना हाक्निङ् इसिॽना लेङ्मेॽना॥”
65पिलातासङा ङ्खाचि लुचि, “ख्यानि, न्निङ्गा काङ्बाचि ङ्वान्दिॽने, ङ्खाचि खेतानुम्चिम्घोङ् यासुम्गानुङ् न्ना सियापाङ् उचुन कुसानुम॥” 66न्हाङा ङ्खाचि ङ्ख्याहोङ् सियापाङ्गा उया एप्ताना लुङ्खाकपे लाहाछाप ङ्ङेन्दुहोङ् काङ्बाचि ङ्गुमेतुचि॥
Currently Selected:
मात्ति 27: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
