मात्ति 26
26
येसु सिमागा न्जोगुना
(मार्कुस १४:१-२; लुका २२:१-२; युहान्ना ११:४५-५३)
1येसुङा खा घाक चेॽया लुइचिहोङ् उका चेलाचि खाॽला लुचि, 2“न्निङ्दा था वान्ने, हाकु हिच लेन हेक्साङ् फोङ्होक्नाम तामे, न्हाङा याॽमिगा उच्या कुरुसपे छुॽनेम्मागा न्लाब्वा॥”#पारास्थान १२:१-२७
3ङ्खिङ्बेला खाङ्खाङ् हाङ्खुबाचि नुङ् याहुदि हाङ्गुम्बाचि काइयाफा बाङ्ना मा-हाङ्खुबागा पाङ्बे न्छुप्सा॥ 4न्हाङा ङ्खाचिङा येसु इमिन स्वाक लाप्माहोङ् सिमाना भोङ् चेॽया ङ्हुप्तु॥ 5ङ्खाॽनिङ्गो ङ्खाचिङा ङ्गाया, “ना होक्नामगा बेला खा काम चोक्मा न्लेङ्मेन्हा, मानुङ्गो खा याॽमिचिबे खाइलाबाइला माच्चाचोङ्मेहा॥”
बेथानियाबे येसु आत्तारङा तुक्तुना
(मार्कुस १४:३-९; युहान्ना १२:१-८)
6येसु बेथानिया तेनबेॽना सिमोन कोरिगा#२६:६ सिमोन ओन्दाङ् कोरङा याक्सुहोङ् नुयाना याॽमि साया॥ पाङ्बे वायानिङ्, 7एको मामुङा प्याक ओमेन आखुबा आत्तार छेङ्रोक्का बात्तालबे ताहोङ् न्नाबे ताया॥ न्हाङ् येसुङा चाम्योङ्बा चामास्यानिङ् ङ्खा आत्तारङा येसुगा उटुखुरुकपे तुक्तेन्दुबि॥#लुका ७:३७-३८ 8खा न्निसुहोङ् चेलाचिगा तुक्नुङ् उङ्चि लोक खोता न्हाङ् खाॽला ङ्गाया, “खिङाहा आत्तार नाङा इजाङ् खाॽला खेरा एन्द्वाहा? 9खा गो इन्चामाहोङ् प्याक याङ् तायाबि, न्हाङ् ङ्खा याङ् तुखिसुम्बाचि हाम्बिॽमाचिहोङ् लेक्साबि॥”
10ङ्खाॽनिङ्गो येसुङा खा चेॽया था तोक्तुहोङ् ङ्खाचि खाॽला लुचि, “न्निङ्दा ना मामु इजाङ् तुखि पिवाम्गाना? नाङा आका लागि एको उचुन्ना काम चोगुक्सुना॥ 11इजाङ्बाङ्निङ् तुखिसुम्बाचि गो साधाइ न्निङ्दानुङ् ङ्वामे, ङ्खाॽनिङ्गो का च्हेन साधाइ न्निङ्दानुङ् ङ्वामेङान॥#ब्यावास्था १५:११ 12उङा आत्तारङा तुक्ताङ्होङ् आका सालुङ् हुम्मागा लागि त्यार चोगुना ओम॥ 13जेप्पा का न्निङ्दा लुमेॽनेनिन, कायुङ्लेन घाकपे हेॽने-हेॽने खा नुसाला पार्चार चोङ्मे, ङ्खा-ङ्खा ठोङ्बे ना मामुङा चोगुहा काम मिसाङ् याॽमिचिङा खा साला न्लेन्द्वाहा॥”
येसु लाप्मेमागा याहुदा त्यार लेक्साना
(मार्कुस १४:१०-११; लुका २२:३-६)
14न्हाङा एहिच चेलाचि माध्येबे याहुदा इस्कारियोत च्हेन खाङ्खाङ् हाङ्खुबाचिगाबे ख्या, 15न्हाङ् खाॽला लुचि, “येसु लाम्बिॽनेनिन भोङ् न्निङ्दा का इहा पिमेकाहा?” न्हाङा ङ्खाचिङा न्ना सुम्खेङ् युप्पा याङ्#२६:१५ ङ्खिङ्बेला फा मोनाम काम चोगाहागा जेला सुम्खेङ् युप्पा याङ् साया॥ म्बि॥#जाकारिया ११:१२ 16ङ्खिङ्बेला नाहाङ्तो याहुदा इस्कारियोतङा येसु लाम्बिॽमाचिगा माउका सोॽमा तारोक्तु॥
येसु नुङ् चेलाचिगा हेक्साङ्ना होक्ता
(मार्कुस १४:१२-२६; लुका २२:७-२३; युहान्ना १३:२१-३०; १ कोरिन्थि ११:२३-२५)
17हाकु खामिर मेएन्लेहा चालेप्पा चामाना होक्नामगा इम्ना लेन येसुगा चेलाचि उङ् वायानाबे तायाचिहोङ् छिम्दाचु, “ङ्गा लागि फोङ्होक्नामगा होक्ता हेॽने त्यार चोक्चुङ्?”
18येसुङा ङ्खाचि लुचि, “साहारबे एको याॽमिगाबे ख्याचि, न्हाङ् न्ना लुयाचु, ‘चिन्खुबाङा खाॽला कायामा, आका बेला तायाब्यामा॥ का आका चेलाचिनुङ् म्बाङ्बे फोङ्होक्नाम मानाचोग्वाङ्ना॥’ ” 19ङ्खा चेलाचि येसुङा लुचिहा लोॽवा ख्याचि न्हाङ् फोङ्होक्नामगा होक्ता त्यार चोगाचु॥
20नाॽमासेक लेक्साहोङ् येसु एहिच चेलाचिनुङ् चासे#२६:२० चाम्योङ्बा चासे युङा॥ 21न्जामास्यानिङ् उङा खाॽला लुचि, “जेप्पा का न्निङ्दा लुमेॽनेनिन, न्निङ्दा माध्येबे एकोङा का लाप्मेमेकाहा॥”
22खा चेॽयाङा चेलाचिगा तुक्नुङ् उङ्चि निङ्वा तुगाहोङ् घाकङा एको-एको चोक्साङ् न्छिम्दु, “हाङ्बा, न्ना काङान?”
23येसुङा लुचि, “कानुङ् सोरि इसाङा थालबे चालेप्पा लुम्मासिम्मे न्नाङा का लाप्मेमेङ्ना॥#छेम ४१:९ 24याॽमिगा उच्या गो धार्मासाप्लाबे छेप्ताहा लोॽवामाङ् खेमे॥ ङ्खाॽनिङ्गो धिक्कार न्ना याॽमि! इसाङा याॽमिगा उच्या लाप्मेत्वा॥ न्ना याॽमिगा गो वाम माङ् न्लेक्सान्निङ्बि उचुन लेक्सासायाबि॥”
25न्हाङा उङ् लाप्मेखुबा याहुदाङा छिम्दु, “चिन्खुबा, न्दा कायागाना याॽमि काङान?”
येसुङा लु, “न्दा आफाइ कामासिम्मेकाना॥”
26ङ्खाचिङा न्जामास्यानिङ् येसुङा चालेप्पा कोबुहोङ् निङ्वाफुमा नुनिङ्वा पि, न्हाङा एगुहोङ् उका चेलाचि खाॽला लुसाङ् पिचि, “ताप्तुम्घोङ् चायानुम, ना आका सालुङ् ओम॥”
27न्हाङा उङा खोरेक चा याङुहोङ् निङ्वाफुमा नुनिङ्वा पि, न्हाङा चेलाचि खाॽला लुसाङ् पिचि, “न्निङ्दा घाकङा नाभाङ् उङानुम॥ 28इजाङ्बाङ्निङ् खा ओछोङा कारारगा आका हेलि ओम॥ खा प्याक याॽमिचिगा पाप छेमागा लागि याङ्मेहा॥#पारास्थान २४:८; यार्मिया ३१:३१-३४ 29का न्निङ्दा लुमेॽनेनिन, हाकु नाहाङ्तो आका आप्पागा राज्याबे न्निङ्दानुङ् ओछोङा सिम्लेॽमाङ्गा माध मेउङ्ले सोम्मा फेरि का सिम्लेॽमाङ्गा माध ङ्ङुङ्वाङान्हा॥”
30न्हाङा एको छेम न्लुतुहोङ् उङ्चि जाइतुन कोङ्गुपोटि ङ्ख्या॥
पात्तुरुसङा येसु इन्कार चोगुना चेॽयागा उतुम्बे
(मार्कुस १४:२७-३१; लुका २२:३१-३४; युहान्ना १३:३६-३८)
31न्हाङा येसुङा ङ्खाचि खाॽला लुचि, “हेन सेॽनि न्निङ्दा घाकङा का नाॽनामेकाहोङ् लुक्तिखेइवाघा॥ इजाङ्बाङ्निङ् धार्मासाप्लाबे खाॽला छेप्तामा–
‘का गोठाला सिस्वाङ्,
न्हाङा बागालबेॽहा घाक सामुङ्चि ङ्हिङ्खेमेहा॥’ #
जाकारिया १३:७
32 “ङ्खाॽनिङ्गो का स्याङ्नाभाङ् हिङ्गिलिक लेङ्मेङ्होङ् न्निङ्दा हाक्निङ् ओन्दाङ् गालिलबे खेमेङ्ना॥” #
मात्ति २८:१६
33पात्तुरुसङा पोलोवा पि, “घाकङा न्नाॽयागाभोङ्चा का च्हेन हेॽनिङ्चा न्नाॽनामेॽनेन्ना॥”
34येसुङा लु, “पात्तुरुस, जेप्पा का न्दा लुमेॽनेन, हेन सेॽनि तितिॽलिङ्वा कामा हाक्निङ् ओन्दाङ् ‘का उङ् चिनान्जोग्वाङान्ना’ कासाङ् सुम्मा का इन्कार चोङ्मेङ्गाना॥”
35ङ्खाॽनिङ्गो पात्तुरुसङा उङ् लु, “मेन्ना, का गो न्दानुङ् सिमा पोराचोक्होङ्चा न्दा इन्कार न्जोङ्मेॽनेन्ना॥” हेकोहा घाक चेलाचिङा चा ङ्खाॽलामाङ् न्लु॥
गेतास्मानिबे येसुगा पार्थाना
(मार्कुस १४:३२-४२; लुका २२:३९-४६)
36न्हाङा येसु उका चेलाचिनुङ् गेतास्मानि बाङ्ना ठोङ्बे ख्या॥ न्नाबे न्दासुहोङ् चेलाचि खाॽला लुचि, “न्निङ्दा नाबे वायानि, का च्हेन मियोरोक खेमेङ्होङ् पार्थाना चोङ्मेङ्ना॥” 37येसुङा पात्तुरुस नुङ् जाब्दियागा हिप्पाङ् उच्याचि उङ्नुङ् खेतुचि, न्हाङ् तुखिङा ओक्खिपिक्खि लेक्सा॥ 38न्हाङा उङा ङ्खाचि लुचि, “आनिङ्वा तुखिङा ओक्खिपिक्खि लेक्साहोङ् आलुङ्मा पेघेक्साना लोॽवा लेक्सामा॥ न्निङ्दा नाबे कानुङ् चेन्चेन वायानि॥”
39न्हाङा उङ् फेरि मियोरोक ख्याहोङ् खामबे फोप्ताहोङ् खाॽला कासाङ् पार्थाना चोगा, “ओ आप्पा, लेङ्मा यामेहाभोङ् खा का छोङ्बे आहेक्साहा तुखि का आङ्मा पोरान्जोक्निन्नि॥ ङ्खाॽनिङ्गो आनिङ्वा लोॽवा मेन्ना, ङ्गा निङ्वा लोॽवा लेङ्नि॥”
40न्हाङा उङ् लासाआबानिङ् उका चेलाचि ङ्ङिप्साख्यामासाहा तुप्सुचि॥ न्हाङ् येसुङा पात्तुरुस लु, “इना न्निङ्दा ए घान्टा चा मेइम्ले चेन्चेन वामा ङ्यासिगान्हा? 41न्निङ्दा ‘कानिङ् जाचका बेला पापपे फासान्जोगिङान्नि’ भोङ् चेन्चेन वाइघोङ् पार्थाना चोगानि॥ न्निङ्दा आत्माबे को जेप्पा त्यारिसिगान, ङ्खाॽनिङ्गो न्निङ्दा सालुङ्बे च्हेन काम्जोरसिघा॥”
42येसु फेरि ख्याहोङ् पार्थाना चोगा, “ओ आप्पा, का छोङ्बे आहेक्साहा खा तुखि का मेआङ्ले न्लेङ्मेन्हाभोङ् ङ्गा निङ्वा लोॽवामाङ् लेङ्नि॥” 43उङ् फेरि लासारायानिङ् ङ्खाचि ङ्ङिप्सामासाहा तुप्सुचि, युॽमाङा उङ्चि मिक होमा ङ्यासुन्चिनिन॥
44न्हाङा येसु फेरि सुम्ना खेप ङ्खाचि नाओचिहोङ् पार्थाना चोक्से ख्या न्हाङ् ओन्दाङ्ना लोॽवा पार्थाना चोगा॥ 45न्हाङा उका चेलाचि ङ्वायानाबे लासारायाहोङ् खाचि लुचि, “न्निङ्दा हाकुचा आराम चोक्साङ् इप्सिनेसिघा? सोयानुम, याॽमिगा उच्या पापिचिगा मुकपे आमाना बेला तायाब्याना॥ 46हाकु पोगानि, खेइ! सोयानुम का लाॽमेखुबा याॽमि तायाब्यामाना॥”
येसु न्लाबुना
(मार्कुस १४:४३-५०; लुका २२:४७-५३; युहान्ना १८:३-१२)
47येसु ङ्खाॽला चेक्मास्यानुङ् एहिच चेलाचि माध्येबेॽना एको याहुदा बाङ्ना चेला न्नाबे ताया॥ उङ्नुङ् साम्बेक नुङ् डाङ्गाक काप्खुबा प्याक याॽमिचि ङ्वाया॥ ङ्खाचि खाङ्खाङ् हाङ्खुबाचि नुङ् याहुदि हाङ्गुम्बाचिङा म्बाक्सुक्साचि॥ 48याहुदाङा ङ्खा याॽमिचि खाॽलाना चिङ्गो पिक्साचि “का इसा उम्मा चोग्वाङ्, न्नामाङ् येसु ओम, न्निङ्दा लाबानुम॥” 49न्हाङा याहुदा येसुगाबे ख्याहोङ् खाॽला लु, “चिन्खुबा सेवायो!” न्हाङ् उङा उम्मा चोगु॥
50येसुङा न्ना खाॽला लु, “हाओ काम्निभाक! न्दा इहा चोक्से तायागा, ङ्खा हानि चोगि॥”
न्हाङा ङ्खाचिङा ओन्दाङ् न्दायाहोङ् येसु न्लाबु॥
51खा निसुहोङ् येसुनुङ् वाखुबाचि माध्येबे एकोङा साम्बेक फिगुहोङ् खाङ्खाङ् हाङ्खुबागा नोकोरगा उनाभाक चेन्धाक्तुबि॥ 52ङ्खाॽनिङ्गो येसुङा न्ना खाॽला लु, “ङ्गा साम्बेक उसुप्पे एन्दु, इजाङ्बाङ्निङ् साम्बेक साङ्खुबाचि, साम्बेकङामाङ् नास न्लेङ्मेहा॥ 53न्दा इ मिमेकाना? इना का नाक्तुङ्भोङ् आप्पाङा आका लागि सोलोक एहिच पाल्टान हाक्निङ्चा प्याक वालोक्दुतचि म्बाङ्बिमेङान्हायि? 54ङ्खाॽनिङ्गो का ङ्खाॽला नाक्तुङ्भोङ् गो धार्मासाप्लाबे ‘खाॽला लेङ्मेहा’ भोङ् छेप्ताहा चेॽया इमिन पुरा लेङ्माहा?”
55ङ्खिङ्बेला येसुङा उङ् लाप्से ताखुबा याॽमिचि खाॽला लुचि, “इना का खुसुबाङ्ङान्होङ् न्निङ्दा डाङ्गाक नुङ् साम्बेक ताम्चिम्गाहोङ् का लाप्से ताइघा? का लेन्लेन निङ्वाफुमापाङ्बे चिन्साङ् वायाङ्निङ् न्निङ्दा का न्लाबागान॥#लुका १९:४७; २१:३७ 56ङ्खाॽनिङ्गो निङ्वाफुमाभाङ् चेक्खुबाचिङा धार्मासाप्लाबे न्छेप्तुहा चेॽया पुरा लेङ्निभोङ्माङ् खा घाक लेक्साहा ओम॥”
न्हाङा ङ्खिङ्बेलामाङ् घाक चेलाचिङा उङ् न्नाओहोङ् न्लुक्ताख्या॥
येसु माछुम्मागा उयुम्बे
(मार्कुस १४:५३-६५; लुका २२:५४-५५,६३-७१; युहान्ना १८:१३-१४,१९-२४)
57न्हाङा येसु लाप्खुबाचिङा उङ् मा-हाङ्खुबा काइयाफागा पाङ्बे ङ्खेतु॥ न्नाबे धार्मासाप्ला चिन्खुबाचि नुङ् याहुदि हाङ्गुम्बाचि न्छुप्सामासा॥ 58ङ्खाॽनिङ्गो पात्तुरुस च्हेन येसुगा उयुम्बे मेङ्खेॽले योरोक-योरोक चुम्साङ् मा-हाङ्खुबागा पाङ्गा चारामबे तासु॥ न्हाङा हाकु इलेङ्मेहा लोप्पिभोङ् सोॽमागा ख्याहोङ् पालेचिनुङ् युङा॥ 59खाङ्खाङ् हाङ्खुबाचि नुङ् याहुदि माछुम्मागा घाक याॽमिचिङा येसु सिमागा उका बिरुद्दाबे मेनाहा आप्दिक योक्मा न्दारोक्तु॥ 60न्नाबे प्याक मेन्हा आप्दिक एन्खुबाचि न्दाया, ङ्खाॽनिङ्गो ङ्खाचिङा इहाचा पार्मान न्दोक्तुनिन॥ आखेरिबे हिप्पाङ् याॽमिचि ओन्दाङ् तायाचिहोङ् खाॽला कायाचि, 61“ना याॽमिङा गो ‘निङ्वाफुमापाङ् होराहाक्स्वाङ्होङ् सुम लेनबे फेरि चोक्मा यास्वाङ्ना’ कायामाना॥”#युहान्ना २:१९
62न्हाङा मा-हाङ्खुबा पोगाहोङ् येसु छिम्दु, “हाओ, न्दा इजाङ् इच्चा ङ्गामेकान्ना? खा याॽमिचिङा ङ्गा बिरुद्दाबे ङ्गायाहा साचिगा उतुम्बे ङ्गा कामाहा इहाचा मान्हा?” 63ङ्खाॽनिङ्गो येसु स्वाक वाया॥ फेरि मा-हाङ्खुबाङा लु, “हिङ्गिलिक्ना निङ्वाफुमागा उनिङ्बे कासाम चासाङ् काया, इना न्दा निङ्वाफुमागा उच्या खिरिस्टकान?”
64येसुङा पोलोवा पि, “न्दा आफाइ कायाब्यागा॥ ङ्खोङ्चा का न्निङ्दा लुमेॽनेनिन, हाकु नाहाङ्तो याॽमिगा उच्या घाक हाक्निङ् साक्तिसालि निङ्वाफुमागा छुप्ताङ् पोटि युङाना नुङ् ताङ्खेङ्बेॽहा खिम्फुरुम्माबे तायाना निस्वाम्गाना!”#दानिएल ७:१३
65खा चेॽया खेप्सुहोङ् मा-हाङ्खुबा ङ्खुम्दिन्नुङ् एता न्हाङ् ओतेक छिन्हाङ्साङ्#२६:६५ याहुदिचिगा चालानबे तेक छिन्मा बाङ्ना च्हेन, निङ्वाफुमा निन्दा न्जोगुहा चेॽया खेम्माहोङ् निङ्वा तुगाना नुङ् लोक खोताना बाङ्ना चेॽयागा चिङ्गो साया॥ खाॽला काया, “नाङा निङ्वाफुमागा निन्दा चोगुना॥ हाकु कानिङ् हेकोहा इहा पार्मान चाहाचोगाहा? न्निङ्दा लोप्माङ् नाङा निङ्वाफुमागा निन्दा चोगुना खेप्सिम्गा, 66लु कायानि, न्निङ्दा इ काइवाघा?”
ङ्खाचिङा पोलोवा म्बि, “ना गो सिमायि पोर्ने याॽमि ओम॥”
67न्हाङा ङ्खाचिङा येसुगा उनाचिकपे न्थोक्तु, ङ्ङुबु न्हाङा इखिङ्ङा गो खाॽला लुसाङ् म्फेक्तु, 68“ओ खिरिस्ट, लु हाकु आगाम्बानि चोगु! न्दा इसाङा मोक्तागाना?”
पात्तुरुसङा येसु इन्कार चोगुना
(मार्कुस १४:६६-७२; लुका २२:५६-६२; युहान्ना १८:१५-१८,२५-२७)
69ङ्खिङ्बेला पात्तुरुस पाखा चारामबे युङामासा॥ एको नोकोरनि तायाहोङ् लु, “न्दा चा गालिलबेॽना येसुनुङ् वायागाना मेन्नायि?”
70ङ्खाॽनिङ्गो पात्तुरुसङा घाक्का ओन्दाङ् इन्कार चोक्साङ् खाॽला लु, “न्दा इ कामासिम्मेकाना, का था मान्ना॥”
71न्हाङा उङ् पाखा गेट् पोटि ख्या॥ न्नाबे हेकोना एको नोकोरनिङा निसुहोङ् न्नाबे ङ्वायाहा याॽमिचि लुचि, “ना याॽमि चा नासारातपेॽना येसुनुङ् वायाना!”
72पात्तुरुसङा फेरि कासाम चासाङ् लु, “जेप्पा का न्ना याॽमि चिनान्जोग्वाङान्ना!”
73मिहेक्साङ् न्नाबे ङ्येबामासाहा याॽमिचि चा पात्तुरुसका उयुम्बे न्दायाहोङ् खाॽला न्लु, “जेप्पा न्दा चा उका चेलाचिबे एकोगान, इजाङ्बाङ्निङ् ङ्गा चेक्तायि गालिलबेॽहा याॽमिचिगा लोॽवाना!”
74न्हाङा पात्तुरुसङा फेरि चा कासाम चासाङ् खाॽला काया, “का लेम्चाॽनेनिन्हा ओमभोङ् निङ्वाफुमागा दान्डा का छोङ्बेॽमाङ् आनि, का न्ना याॽमि चिनायि न्जोग्वाङान्ना!” न्हाङ् सोलोक तितिॽलिङ्वा काया॥
75ङ्खिङ्बेला येसुङा लुहा खा चेॽया उङा मितुरोक्तु “तितिॽलिङ्वा कामा हाक्निङ् ओन्दाङ् न्दा सुम्मा का इन्कार चोङ्मेङ्गाना॥” न्हाङा पात्तुरुस पाखा लोन्दाख्याहोङ् इब्बे-इब्बे हाबा॥
Currently Selected:
मात्ति 26: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
