मात्ति 25
25
एखेङ् थाङ् मेन्छेङ्लेहा मामुचिगा ताप्चेॽया
1येसुङा लुचि, “वालोक्का राज्या च्हेन थाङ्स्योङ्बा तुप्से खेखुमा एखेङ् थाङ् मेन्छेङ्लेहा मामुचिगा चेॽयानुङ् तोङ्मेॽना॥ ङ्खा मामुचि उङ्चि कुप्पिचि ङ्खेतुचिहोङ् थाङ्स्योङ्बा तुप्से ङ्ख्या॥#लुका १२:३५ 2ङ्खाचिबे फा जाना बुद्दिमानि न्हाङ् फा जाना च्हेन मुर्खा मामुचि न्साया॥ 3ङ्खा मुर्खा मामुचिङा उङ्चि कुप्पि गो ङ्खेतुचि, ङ्खाॽनिङ्गो किवा च्हेन ङ्खेतुनिन॥ 4बुद्दिमानि मामुचिङा च्हेन उङ्चि कुप्पि नुङ् बात्तालबे किवा चा ङ्खेतु॥ 5थाङ्स्योङ्बा तामा ढिलो चोगानाङा ङ्खाचि घाक तुखुॽवा लासाङ् ङ्ङिप्साख्या॥
6 “सेॽनिलुम्बे खाॽलाना सेम्ला खेप्सा ‘सोयानुम, थाङ्स्योङ्बा! उङ् तुप्से तायानि॥’ 7न्हाङा ङ्खा घाक मामुचि म्बोगाहोङ् उङ्चि कुप्पिचि त्यार न्जोगुचि॥ 8ङ्खा मुर्खा मामुचिङा च्हेन बुद्दिमानि मामुचि न्लुचि, ‘न्निङ्गा किवा कानिङ् चा मिमिक पियाघायि, आनिङ्गा कुप्पिचि न्सेहेक्साहाचि॥’ 9ङ्खाॽनिङ्गो ङ्खा बुद्दिमानि मामुचिङा पोलोवा म्बिचि, ‘कानिङ्नुङ् न्निङ्दा खोॽमाहा किवा मान्हा, दोकानबे खेइघोङ् इनारायानुम॥’
10 “ङ्खाचि किवा इन्से ङ्ख्यानिङ् थाङ्स्योङ्बा तायाब्या, न्हाङ् त्यार न्लेक्साहाचि उङ्नुङ् थाङ्छेङ्गा होक्ता चासे ङ्ङुया, न्हाङा वालाम्बुङ् छेक्ताख्या॥
11 “मिहेक्साङ् ङ्खा मुर्खा मामुचि न्दायाब्या न्हाङ् खाॽला कासाङ् ङ्ङोक्ता, ‘हाङ्बा, हाङ्बा, आनिङ्गा लागि चा वालाम्बुङ् होसाब्या!’ 12ङ्खाॽनिङ्गो थाङ्स्योङ्बाङा पोलोवा पिचि, ‘जेप्पा लुमेॽनेनिन, का न्निङ्दा चिनान्जोङ्मेॽनेनिन्हा!’#लुका १३:२५
13 “न्हाङामाङ् न्निङ्दा चेन्चेन वायानि, इजाङ्बाङ्निङ् का हेॽना लेन नुङ् इखिङ्बेला तामेङ्ना बाङ्ना चेॽया न्निङ्दा था मान्ना॥
साम्मेङ् याङ्गा ताप्चेॽया
(लुका १९:११-२७)
14 “वालोक्का राज्या च्हेन खाॽलाना ओम॥ एको याॽमिङा उङ् माङ्दुना खाम्युकपे खेॽमाहाक्निङ् ओन्दाङ् उका नोकोरचि काचिहोङ् उका याङ्सा जिम्मा पिचि॥ 15उङा नोकोरचिगा योग्याताङा भ्याबान्जोगुनुङ् एको फा साम्मेङ् याङ्, हेकोना हिच्चि न्हाङ् हेकोना एको पिओचिहोङ् उङ् खेब्या॥ 16न्हाङा फा साम्मेङ् याङ् तोक्खुबाङा तोक्तुहोङ् सोलोक ख्याहोङ् बेपार चोगुहोङ् हेकोहा फा साम्मेङ् याङ् उबुचि॥ 17ङ्खाॽलामाङ् न्ना हिच्चि याङ् तोक्खुबाङा चा हेकोहा हिच्चि याङ् उबुचि॥ 18ङ्खाॽनिङ्गो एको साम्मेङ् याङ् तोक्खुबाङा च्हेन होॽलुम खोन्दुहोङ् न्ना याङ् चुमोओ॥
19 “माङ्फा हेक्साङ् उङ्चिगा मालिक लासारायाहोङ् उका याङ्गा हिसाब नाक्तुचि॥ 20न्हाङ् न्ना फा याङ् तोक्खुबाङा हेकोहा फा याङ् ताचिहोङ् खाॽला लु, ‘आहाङ्बा, न्दा का फा साम्मेङ् याङ् पियामासाङ्गा॥ सो, का हेकोहा फा याङ् उबुक्सुङ्चिङ्हा॥’ 21मालिकङा न्ना नोकोर लु, ‘स्याबास, उचुन्ना नुङ् बिस्वास योग्या नोकोर! न्दा मिॽयाङ् चेॽयाबे बिस्वास योग्या लेक्सागा, हाकु का न्दा प्याक चेॽयागा जिम्मा पिमेॽनेन्हा॥ न्दा कानुङ् चोन्दास्या!’ 22न्हाङा हिच्चि याङ् तोक्खुबाङा चा तायाहोङ् खाॽला लु, ‘आहाङ्बा, न्दा का हिच्चि याङ् पियामासाङ्गा, सो का हेकोहा हिच्चि याङ् उबुक्सुङ्चिङ्हा॥’ 23मालिकङा न्ना लु, ‘स्याबास, उचुन्ना नुङ् बिस्वास योग्या नोकोर! न्दा मिॽयाङ् चेॽयाबे बिस्वासि लेक्सागा, हाकु न्दा प्याक चेॽयागा जिम्मा पिमेॽनेन्हा॥ न्दा चा कानुङ् चोन्दास्या!’
24 “न्हाङा एको याङ् तोक्खुबा चा तायाहोङ् लु, ‘आहाङ्बा, न्दा ङ्ङेन्दुगान्हा ठोङ्भाङ् चाचिॽया खोम्खुबा न्हाङ् न्थाबुगान्हा ठोङ्भाङ् चाचिॽया पोक्खुबा न्दा छाक्ना याॽमिगान भोङ् का था वाया॥ 25न्हाङामाङ् का किसिताङ् न्हाङ् ङ्गा याङ् का खामहोङ्बे चुमुक्साङ्ना॥ सो, ङ्गा याङ् नाबे वेॽना॥’ 26न्नागा मालिकङा न्ना पोलोवा पि, ‘न्दा इसिॽना नुङ् पोम्ना नोकोर! ङ्ङेन्दुङान्हा ठोङ्भाङ् खोम्खुबा न्हाङ् न्थाबुङानाहा ठोङ्भाङ् चाचिॽया पोक्खुबाङान बाङ्ना न्दा था वायानाभोङ्, 27न्दा आका याङ् ब्याजपे तिमा पोर्ने साया, न्हाङा का लान्दाराॽङानिङ् आका याङ् ब्याज नुङ् तोक्तुङ्बि॥’ 28न्हाङा उङा लुचि, ‘हाकु, ना नोकोरनुङ् वान्नेॽना याङ् नाप्तानुम न्हाङ् एखेङ् याङ् वाखुबा पियानुम॥ 29इजाङ्बाङ्निङ् इसानुङ् वान्ने, न्ना हाकुचा पिमे, न्हाङ् न्नानुङ् प्याक लेङ्मे॥ ङ्खाॽनिङ्गो इसानुङ् मान, न्नानुङ् मिॽयाङ् वेॽहा चा नाप्निमे॥#मात्ति १३:१२; मार्कुस ४:२५; लुका ८:१८ 30हाकु न्ना काम लामेन्जोक्खुबा नोकोर पाखा कुइम्नाबे लेप्ताहाक्सानुम॥ न्नाबे याॽमिचि केङ् छिम्साङ् ङ्हाम्नुङ्मे॥’#मात्ति ८:१२; २२:१३; लुका १३:२८
निरिक्का लेन
31 “याॽमिगा उच्या घाक वालोक्दुतचिनुङ् उका माहिमाबे तामेहोङ् उका माहिमानुङ्ना हाङ्युक्थामबे युङ्मे॥ #
मात्ति १६:२७; १९:२८ 32ङ्खिङ्बेला घाक जातिगा याॽमिचि उका ओन्दाङ् ङ्येम्मे, न्हाङा गोठालाङा सामुङ्चि नुङ् मेन्ध्वाकचि फोक्स्वाचिहा लोॽवा उङा याॽमिचि फोक्स्वाचि॥ 33उङा सामुङ्चि उका छुप्ताङ् पोटि नुङ् मेन्ध्वाकचि फेक्साङ्पोटि युक्स्वाचि॥ 34न्हाङा हाङ्ङा उका छुप्ताङ् पोटिक्हाचि खाॽला ल्वाचि, ‘आबानि, आका आप्पा निङ्वाफुमाभाङ् आसिक तोक्खुबा याॽमिचि! कायुङ्लेनगा उथुकपाहाङ् न्निङ्गा लागि त्यार चोगाना राज्याबे चोक्तोक चोगानुम॥ 35इजाङ्बाङ्निङ् का साकङा स्यामासाङ्निङ् न्निङ्दा चाम्योङ्बा पियागा, वेॽमा स्यामासाङ्निङ् माङ्च्वा पियागा न्हाङ् का पोर्देसि सायाङ्निङ् न्निङ्गा पाङ्बे बास याक्मा पियागा॥ 36का नाङ्गायि सायाङ्निङ् तेक वाॽमेतागा, तुगाब्यामासाङ्निङ् का सोसे ताइगा, छेक्पाङ्बे आयामासाङ्निङ् का तुप्से ताइगा॥’
37 “न्हाङा धार्मोति याॽमिचिङा उङ् पोलोवा म्बिवा, ‘ओ हाङ्बा, कानिङ् हेॽनिङ् न्दा साक्ङास्यागाना निनेनिन्होङ् चाम्योङ्बा पिॽनेनिन्हा? हेॽनिङ् वेॽमा स्यागाना निनेनिन्होङ् माङ्च्वा उङ्मा पिॽनेनिन्हा? 38हेॽनिङ् न्दा पोर्देसि लेक्सागाना निनेनिन्होङ् कानिङ् बास याक्मा पिॽनेनिन्हा? हेॽनिङ् नाङ्गायि सायागाना निनेनिन्होङ् तेक वाॽमेनेनिन्हा? 39हेॽनिङ् न्दा तुगाब्यागाहोङ् कानिङ् सोसे ताइङ्हा? न्हाङा हेॽनिङ् छेक्पाङ्बे आयागाना निनेनिन्होङ् तुप्से ताइङ्हा?’ 40न्हाङा हाङ्ङा ङ्खाचि खाॽलाना पोलोवा पिवाचि, ‘जेप्पा का न्निङ्दा लुमेॽनेनिन, आका याॽमिचिबे घाक हाक्निङ् मिना न्निङ्दा इ चोगुम्गा, ङ्खा कामाङ् चोगाघा ओम॥’
41 “न्हाङा उका फेक्साङ् पोटिहा याॽमिचि ल्वाचि, ‘ओ निङ्वाफुमाभाङ् साराप तोक्खुबाचि! आयुम्भाङ् खेब्यानि, दियाबालास नुङ् उका दुतचिगा लागि त्यार चोगाना हेॽनिङ्चा मेन्सिखुबा मिबे ख्यानि! 42इजाङ्बाङ्निङ् का साकङा स्यामासाङ्निङ् न्निङ्दा चाम्योङ्बा म्बियागान, वेॽमा स्यामासाङ्निङ् न्निङ्दा माङ्च्वा म्बियागान॥ 43का पोर्देसि सायाङ्निङ्, बास याक्मा म्बियागान॥ नाङ्गायि सायाङ्निङ् तेक ङ्वाॽमेतागान, तुगाब्यामासाङ्निङ् नुङ् छेक्पाङ्बे वायाङ्निङ्, न्निङ्दा का सोसे न्दाइगान॥’
44 “न्हाङा ङ्खाचिङा चा खाॽलाना पोलोवा म्बिवा, ‘हाङ्बा हेॽनिङ् कानिङ् न्दा साक्ङास्यागाना, वेॽमा स्यागाना, पोर्देसि लेक्सागाना, नाङ्गायि सायागाना, तुगाब्यागाना नुङ् छेक्पाङ्बे आयागाना निनेनिन्होङ् न्दा न्सोॽनेनिन्ना?’ 45ङ्खिङ्बेला उङा ङ्खाचि खाॽलाना पोलोवा पिवाचि, ‘जेप्पा का न्निङ्दा लुमेॽनेनिन, खा आका आफुआनुन्छा आनाआनुन्छाचिबे घाक हाक्निङ् मिना न्निङ्दा इ न्जोगुम्गान, ङ्खा कामाङ् न्जोगान्हा ओम॥’ 46न्हाङा ङ्खाचिङा हेॽनिङ्चा मेमेन्माना दान्डा न्दोक्त्वा, ङ्खाॽनिङ्गो धार्मोति याॽमिचिङा च्हेन हेॽनिङ्चा मेन्सिमाना हिङ्लुङ् न्दोक्त्वाना॥”#दानिएल १२:२
Currently Selected:
मात्ति 25: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
