मात्ति 24
24
ताहेक्साहा तुखिगा उतुम्बे
(मार्कुस १३:१-१३; लुका २१:५-१९)
1न्हाङा येसु निङ्वाफुमापाङ्भाङ् लोङ्खेॽमास्यानिङ् निङ्वाफुमापाङ्बेॽहा उचुन्हा पाङ्चि सोॽमेमागा उका चेलाचि येसुगा उयुम्बे न्दाया॥ 2न्हाङ् येसुङा लुचि, “न्निङ्दा खा घाक निमासिइवाघा? जेप्पा का न्निङ्दा लुमेॽनेनिन, खा पाङ्चिगा एको लुङ्खाक छोङ्बे हेकोना लुङ्खाक चा राहान्जोङ्मेन्ना, घाक ङ्होन्नाहाङ्मेहा॥”
3मिहेक्साङ् येसु जाइतुन कोङ्गुबे युङामासानिङ् उका चेलाचि न्दायाहोङ् स्वाक न्छिम्दु, “कानिङ् लुया, खा चेॽया हेॽनिङ् लेङ्मेहा? न्हाङ् न्दा लान्दाराॽमाना बेला नुङ् कायुङ्लेन मेन्धेक्साना भोङ् कानिङ् इमिन था तोक्मा यास्वाम्ङाहा?”
4न्हाङ् येसुङा पोलोवा पिचि, “थाङ्थाङ् वायानि! इसाङा चा न्निङ्दा लेम्चामा न्दोक्तिगान्नि॥ 5इजाङ्बाङ्निङ् प्याक याॽमिचि ‘कामाङ् खिरिस्टङान’ कासाङ् आका आनिङ्बे न्दामे, न्हाङ् ङ्खाचिङा प्याक याॽमिचि न्लेमुच्वाचि॥
6 “न्निङ्दा लाडाइ लेक्साना नुङ् लाडाइ लेङ्माहा हाल्ला खेप्स्वाम्गानिङ् ङ्गिसितानिन॥ ङ्खा घाक चेॽया गो लेङ्मामाङ् पोर्ने ओम, ङ्खाॽनिङ्गो ङ्खिङ्बेलाक्माङ् कायुङ्लेन म्मेम्मेन्ना॥ 7इजाङ्बाङ्निङ् जातिगा बिरुद्दाबे जाति, न्हाङ् खाम्युक्का बिरुद्दाबे खाम्युक म्बोङ्मे॥ ठोङ्-ठोङ्बे आनिकाल पोक्त्वा न्हाङा लुक्लिबा ङ्खेमे॥ 8खा घाक को तुखिगा सुरु से ओम॥
9 “न्हाङा ङ्खाचिङा न्निङ्दा लाबिॽवागाहोङ् दान्डा पिसे खेतिॽवागा, न्हाङ् सिसिॽवागा॥ न्निङ्दा का बिस्वास चोगाघाङा घाक जातिगा याॽमिचिङा इसितिॽवागा॥ #
मात्ति १०:२२
10 “ङ्खिङ्बेला प्याकङा बिस्वास न्लेप्तिॽवा, एकोङा हेकोना धोका पिवा न्हाङ् इसित्वा॥ 11न्हाङा निङ्वाफुमाभाङ् चेक्खुबाङान कासाङ् लेम्चाखुबा प्याक याॽमिचि न्दामे न्हाङ् ङ्खाचिङा प्याक याॽमिचि न्दोम्सिॽमेत्वाचि॥
12 “घाक ठोङ्बे इसिॽहा चेॽया पुसाङ् ख्यानाङा लुङ्मा तुक्खुसाचामाना चेॽया चा मान्दिसाङ् खेमे॥ 13ङ्खाॽनिङ्गो आखेरि सोम्मा बिस्वासपे वान्नुङ्खुबाचि च्हेन ङ्हिङ्मेमेहा॥#मात्ति १०:२२ 14न्हाङा निङ्वाफुमागा राज्यागा खा नुसाला कायुङ्लेन भोरि घाक जातिगा याॽमिचिबे गाबाहिगा लागि पार्चार चोङ्मे, न्हाङ् कायुङ्लेन मेम्मेॽना॥
किॽमालुलुना तुखिगा लेन
(मार्कुस १३:१४-२३; लुका २१:२०-२४)
15 “न्हाङामाङ् जोबो न्निङ्दा निङ्वाफुमाभाङ् चेक्खुबा दानिएलङा कायाना ‘निङ्वाफुमापाङ्गा पाबित्तारा ठोङ्बे नास चोक्खुबा छिप्पाकेकेक्ना थोक येबाना निस्वाम्गा’ #
दानिएल ९:२७; ११:३१; १२:११ (नागा तुम्बिला पोढा चोक्खुबाचिङा ङ्ङासुनि), 16ङ्खिङ्बेला याहुदियाबे वाखुबाचि चोम्कोङ् पोटि न्लुङ्खेॽनि॥ 17पाङ्गा तोप्पारिक वाखुबाचि उङ्चि युबाक लाल्लासे मो ङ्ङुङ्निन्नि॥#लुका १७:३१ 18रोपाबे वाखुबाचि वाॽमाहा तेक लाल्लासे पाङ्बे न्लाङ्खेॽनिन्नि॥ 19ङ्खिङ्बेला फोकपे पिछा वाखुमा नुङ् नु उङ्मेखुमा मामुचि गो झान बिजोक न्लेङ्मेहा॥ 20ङ्खाॽनिङ्गो चुङ्गा बेला नुङ् आराम चोक्माना लेनबे लुक्मा पोरान्जोक्निन्निभोङ् पार्थाना चोगानि॥#२४:२० चुङ्गा बेला इजिरेलबे प्याक वासिक तामेहोङ् तुक्नुङ् चुङ् तुङ्मे न्हाङ् लाम्मा छाक्नुङ् लेङ्मे॥ न्हाङ् याहुदिचि आराम चोक्माना लेनबे हिच किलोमिटार हिङ्से न्लाम्मे॥ ङ्खोङ्माङ् चुङ्गा बेला नुङ् आराम चोक्माना लेन उङ्चि सात्तुरचिभाङ् लुङ्खेॽमा छाक्नुङ् साया॥ 21इजाङ्बाङ्निङ् ङ्खिङ्बेला खाॽलाहा तुखि लेङ्मे, ङ्खाॽलाहा आङ्मायि मेयामाहा तुखि गो कायुङ्लेनगा उथुक नाहाङ्तो खिङ् सोम्मा हेॽनिङ्चा न्लेक्सामान न्हाङ् न्लेङ्मेन्हा चा॥#दानिएल १२:१; पार्कास ७:१४ 22निङ्वाफुमाङा ङ्खा लेनचि न्छुसुन्चिन्निङ्बि इसा चा याॽमि ङ्हिङानिन्बि, ङ्खाॽनिङ्गो न्सेगाहाचिगा लागि ङ्खा लेन छुस्वाचिहा॥
23 “ङ्खिङ्बेला न्निङ्दा याॽमिचिङा ‘सोयानुम, खिरिस्ट नाबे वेॽना’, ‘न्नाबे वेॽना’ लुइगाभोङ् पात्ते न्जोगानुम्निन॥ 24इजाङ्बाङ्निङ् का खिरिस्टङान, का निङ्वाफुमाभाङ् चेक्खुबाङान कासाङ् लेम्चाखुबाचि प्याक न्दामे, न्हाङा ङ्खाचिङा न्सेगाहा याॽमिचि भाड्का चोक्मागा आच्चाम्माहा काम नुङ् चिङ्गो न्सोॽमेत्वाचि॥
25 “खेप्सानुम, खा चेॽया लेङ्मा हाक्निङ् ओन्दाङ् का न्निङ्दा लुन्नुङ्नेनिन्हा॥ 26याॽमिचिङा न्निङ्दा, ‘सोयानुम, खिरिस्ट इसा चा मेॽनिङ्ना सुन्नेना ठोङ्बे वेॽना’ लुइगाभोङ्चा न्निङ्दा न्नाबे ङ्ख्यानिन॥ ङ्खाचिङा ‘सोयानुम, खिरिस्ट कोठा होङ्बे युङामाना’ लुइगाभोङ्चा बिस्वास न्जोगानुम्निन॥ 27इजाङ्बाङ्निङ् इमिन नाम्लोनभाङ् बिजुलि चाम्काचोङ्मेॽनिङ् नाम्युङ् सोम्मा ओम लेङ्मे, याॽमिगा उच्या तामेॽनिङ्चा ङ्खाॽलामाङ् लेङ्मेहा॥#लुका १७:२३-२४ 28हेॽने सिनो वान्ने, न्नाबेॽमाङ् गिद्दाचि चा न्छुम्मेहा!#लुका १७:३७
याॽमिगा उच्या तामाना लेन
(मार्कुस १३:२४-२७; लुका २१:२५-२८)
29 “ङ्खा तुखिगा लेन म्मेम्मेहोङ् सोलोक नाम कुइम लेङ्मे, लाङा ओम ओॽमा लेप्तिॽवा, चोक्चोकिचि ताङ्खेङ्भाङ् ङ्ङाॽनुङ्मे न्हाङा ताङ्खेङ्बेॽहा साक्तिचि ङ्योङ्मे॥ #
यासाइया १३:१०; ३४:४; इजिकिएल ३२:७; योएल २:१०-३१; ३:१५; पार्कास ६:१२-१३
30 “न्हाङा याॽमिगा उच्यागा चिङ्गो ताङ्खेङ्बे ओमे॥ ताम्दाङ्फुमाबेॽहा घाक जातिगा याॽमिचि इब्बे-इब्बे ङ्हाम्मे, न्हाङा ङ्खाचिङा याॽमिगा उच्या ताङ्खेङ्बेॽहा खिम्फुरुम्माबे साक्ति नुङ् माडा माहिमाबे तायेॽना न्निस्वा॥ #
दानिएल ७:१३; जाकारिया १२:१०-१४; पार्कास १:७ 31न्हाङा उङा उका वालोक्दुतचि तुराहिगा माडा सेम्लानुङ् ताङ्खेङ् नुङ् ताम्दाङ्फुमागा कुना-कुनाबे पाक्स्वाचि न्हाङ् ङ्खाचिङा न्सेगाहाचि न्छुप्सुरावाचि॥
वेक्पुगा उथाप्पाहाङ् चिन्दुचिहा
(मार्कुस १३:२८-३१; लुका २१:२९-३३)
32 “वेक्पुगा उथाप्पाहाङ् एको चेॽया चिन्दानि॥ न्नागा ह्वाक पाहाङ् मिमिॽहा टुसा केमेहोङ् पालुवा फेराचोङ्मेॽनिङ् न्निङ्दा नाम्तुक्नाम लाचोगाना था तोक्त्वाम्गा॥ 33ङ्खाॽलामाङ् का लुॽनेनिन्हा खा घाक चेॽया लेक्साहा निस्वाम्गानिङ्, उङ् तामाना बेला लेक्साब्यामाना, वालाम्बुङ्बे तायाब्यामाना बाङ्ना चेॽया था तोक्तानुम॥ 34जेप्पा का न्निङ्दा लुमेॽनेनिन, खा घाक चेॽया पुरा मेलेङ्ले सोम्मा ना पुस्तागा याॽमिचि ङ्वान्नुङ्मेहा॥ 35ताङ्खेङ् नुङ् ताम्दाङ्फुमा मान्दिमेचि, ङ्खाॽनिङ्गो आका चेॽया हेॽनिङ्चा म्मान्दिमेनाहा॥
थाङ्थाङ् वामाना उतुम्बे
(मार्कुस १३:३२-३७; लुका १७:२६-३०,३४-३६)
36 “न्ना लेन नुङ् न्ना बेला हेॽनिङ् तामेॽना बाङ्ना चेॽया इसाङा चा था मान्ना॥ वालोक्दुतचिङा चा था मान न्हाङ् उच्याङा चा था मान्ना॥ खा चेॽयागा उतुम्बे निङ्वाफुमा पाङा से था वान्नेॽना॥ 37याॽमिगा उच्या तामाना लेन नोआगा लेनबे लेक्साहा लोॽवा लेङ्मेहा॥#उथुक ६:५-८ 38इजाङ्बाङ्निङ् जाल्पार्लाया लेङ्मा हाक्निङ् ओन्दाङ्, नोआ होङ्गाॽवाबे उमाना बेला मेलेङ्ले सोम्मा याॽमिचि चामा-उङ्मा नुङ् थाङ् छेङ्माहा काम न्जोक्मास्या॥ 39न्हाङ् जाल्पार्लाया तायाहोङ् ङ्खाचि घाक माङ्च्वाङा मेलुम्सिॽले सोम्मा इमिन ङ्खाचिङा इहाचा था म्मायान, याॽमिगा उच्या चा ङ्खाॽलामाङ् इसाङा चा था मेन्दोक्ले तामेॽना॥#उथुक ७:६-२४ 40ङ्खिङ्बेला लाम्धाङ्बे हिप्पाङ् काम चोङ्नेहेङ्मेचि, ङ्खाचिबे निङ्वाफुमाङा एको खेत्वा, हेकोना छोन्नेक्मे॥ 41हिप्पाङ् मामुचिङा डेङ्खा नान्हेङ्मेचु, ङ्खाचिबे एको निङ्वाफुमाङा खेत्वा न्हाङ् हेकोना छोन्नेक्मे॥
42 “न्हाङामाङ् न्निङ्दा चेन्चेन लेक्सिघोङ् वायानि, इजाङ्बाङ्निङ् न्निङ्गा हाङ्बा हेॽना लेन तामे, न्ना न्निङ्दा था न्दोक्त्वाम्गान्ना॥ 43ङ्खाॽनिङ्गो खा चेॽया आसानुम, खुसुबाङ् सेॽनि इबेलाक तामेॽना बाङ्ना चेॽया पाङ्गा उह्वाङ्बाङा था तोक्तुनिङ्बि, उङ् मेइम्ले चेन्चेन वायाबि न्हाङ् खुसुबाङ् पाङ्बे उमेॽमा म्बिन्बि॥ 44न्हाङामाङ् न्निङ्दा चा चेन्चेन वायानि॥ याॽमिगा उच्या न्निङ्दा म्मितुम्गान्ना बेलाक्पे तामेॽना॥#लुका १२:३९-४०
लुयाहा येन्खुबा नुङ् मेयेन्खुबा नोकोर
(लुका १२:४१-४८)
45 “निङ्वाङा चोना नुङ् बुद्दिमानि नोकोर इमिन्ना याॽमि लोप्पि? न्ना खाॽलाना याॽमि ओम, पाङ्गा उह्वाङ्बाङा उङ् पाङ्बेॽहा घाक कामगा जिम्मा पिइवाहोङ्, उङा हेकोहा घाक नोकोरचि ठिक-ठिक बेलाबे चाम्योङ्बा पिवाचि॥ 46न्हाङ् उह्वाङ्बा लान्दारामेॽनिङ् चा ङ्खाॽला चोक्मास्याना तुप्सुभोङ्, न्ना नोकोर आसिक तोक्खुबा ओम॥ 47का जेप्पा लुमेॽनेनिन, ह्वाङ्बाङा उका घाक याङ्सागा जिम्मा न्ना नोकोर पिवाहा॥ 48ङ्खाॽनिङ्गो न्ना नोकोर इसिॽनाभोङ्, उङा ‘पाङ्ह्वाङ्बा ढिलो लान्दारामेॽना’ मिसाङ् 49उङ्नुङ् काम चोक्खुबा नोकोरचि मोक्मा तारोक्तुचि न्हाङा सिङ्घोखुबाचिनुङ् चामा-उङ्मा तारोक्तुभोङ्, 50न्ना नोकोरगा पाङ्ह्वाङ्बा उङा म्मितुन्ना लेन नुङ् म्मितुन्ना बेलाबे तान्दिमेहोङ् 51न्ना तुक्नुङ् दान्डा पिवा न्हाङ् किहि काप्खुबाचिगा उलुम्बे लेप्ताहाक्स्वा॥ न्नाबे याॽमिचि साधाइ उङ्चि केङ् छिम्साङ् ङ्हाम्मेहा॥”
Currently Selected:
मात्ति 24: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
