मात्ति 23
23
धार्मासाप्ला चिन्खुबाचि नुङ् फारिसिचिगा बिरुद्दाबे चेतावानि
(मार्कुस १२:३८-३९; लुका ११:४३,४६; २०:४५-४६)
1न्हाङा येसुङा न्नाबे न्छुप्साहा प्याक याॽमिचि नुङ् उका चेलाचि खाॽला लुचि, 2“धार्मासाप्ला चिन्खुबाचि नुङ् फारिसिचिङा मोसागा ब्यावास्था चिन्माना चोक्तोक न्दोक्तुक्सु॥ 3ङ्खोङ्माङ् ङ्खाचिङा लुइघा घाक चेॽया खेप्सानुम न्हाङ् पालाना चोगानुम, ङ्खाॽनिङ्गो ङ्खाचि इमिन न्जोङ्मे ङ्खाॽला च्हेन न्जोगानिन, इजाङ्बाङ्निङ् ङ्खाचिङा याॽमिचि चिन्मा गो न्जिन्द्वाचि, ङ्खाॽनिङ्गो उङ्चि च्हेन ङ्खाॽला न्जोङ्मेनिन॥ 4ङ्खाचिङा याॽमिचि च्हेन खुॽमा मेयामाहा, लिहा भारि न्थुन्द्वाहोङ् फाक्ताङ्बे ङ्खुॽमेत्वाचि, ङ्खाॽनिङ्गो उङ्चिङा च्हेन ङ्खा पोक्मागा एको उङ्चि मुक खेॽवाङा चा न्दोक्तिॽवानिन॥ 5ङ्खाचि घाक चेॽया सोॽमेमागा से न्जोङ्मे॥ ङ्खाचिङा उङ्चि तुवाबे नुङ् मुकपे ङ्वाचिहा ब्यावास्था छेप्ताहा जान्तारचि माम्माहा न्जोग्वाचि, न्हाङ् उङ्चि वाॽमाहा तेकपे केङ्गेहा-केङ्गेॽहा फुर्का ङ्ङेन्द्वा॥#निप १५:३८; ब्यावास्था ६:८; मात्ति ६:१ 6ङ्खाचि होक्ताबे घाक हाक्निङ् उचुन्हा ठोङ्बे नुङ् छुम्पाङ्बे माम्माहा याॽमिचि युङ्माहा ठोङ्चिबे युङ्मा म्मिमे॥ 7न्हाङा बाजारखाबे याॽमिचिङा सेमेॽनि न्हाङ् ‘चिन्खुबा’ लुॽनि भोङ् म्मिमे॥
8 “ङ्खाॽनिङ्गो न्निङ्दा इसाङा चा ‘चिन्खुबा’ न्लुइगान्नि, इजाङ्बाङ्निङ् न्निङ्गा चिन्खुबा एको सेॽना, न्हाङा न्निङ्दा घाक फुनुन्छा नानुन्छासिगान॥ 9ना ताम्दाङ्फुमाबे न्निङ्दा इसा चा ‘आप्पा’ न्लुयानुम्चिम्निन, इजाङ्बाङ्निङ् न्निङ्गा पा एको सेॽना, उङ् वालोकपे वान्नेॽना॥ 10न्निङ्दा इसाङा चा ‘चिन्खुबा’ न्लुइगान्नि इजाङ्बाङ्निङ् न्निङ्गा ‘चिन्खुबा’ एको सेॽना, उङ् खिरिस्ट ओम॥ 11न्निङ्दाबे इसा घाक हाक्निङ् मा, न्नाङा न्निङ्गा सेवा चोगुनि॥#मात्ति २०:२६-२७; मार्कुस ९:३५; लुका २२:२६ 12इसा मा लेङ्मा योङ्मे न्ना मि लेङ्मे, न्हाङ् इसा मि लेङ्मा योङ्मे न्ना मा लेङ्मेॽना॥#लुका १४:११; १८:१४
किहि काप्खुबाचिगा बिरुद्दाबे चेतावानि
(मार्कुस १२:४०; लुका ११:३९-४२,४४,५२; २०:४७)
13 “धिक्कार न्निङ्दा, धार्मासाप्ला चिन्खुबाचि नुङ् फारिसिचि, किहि काप्खुबाचि! इजाङ्बाङ्निङ् न्निङ्दा याॽमिचिगा उयुम्बे वालोक्का राज्यागा वालाम्बुङ् छेक्तिॽवाम्गा॥ न्निङ्दा आफाइ चा न्नाबे ङ्ङुइवागान न्हाङ् उमा योक्खुबाचि चा उमा म्बिवाम्चिम्गान॥
14 [“धिक्कार न्निङ्दा, धार्मासाप्ला चिन्खुबाचि नुङ् फारिसिचि, किहि काप्खुबाचि! इजाङ्बाङ्निङ् न्निङ्दा लाङ्निमाचिगा पाङ् लाम्धाङ् नाप्त्वाम्चिम्गा, न्हाङ् सोॽमेमागा केङ्गेॽहा पार्थाना चोगिॽवागा॥ न्हाङामाङ् न्निङ्दा घाक हाक्निङ् प्याक दान्डा तोक्त्वाम्घा॥] # २३:१४ मुक्खे सोरोतपे ना पाद् मान्ना॥
15 “धिक्कार न्निङ्दा, धार्मासाप्ला चिन्खुबाचि नुङ् फारिसिचि, किहि काप्खुबाचि! इजाङ्बाङ्निङ् एको याॽमि न्निङ्गा याहुदि धार्माबे ताॽमागा सामुन्दारा नुङ् खाम्युक भोरि कोतिॽवागा, न्हाङ् न्ना याॽमि न्निङ्गा धार्माबे तावाम्गाहोङ् न्निङ्दा हाक्निङ् प्याक नाराक्का दान्डा तोक्खुबा चोग्वाम्गा॥
16 “धिक्कार न्निङ्दा, मिक्सुरुम्बा हाङ्गुम्बाचि! न्निङ्दा ‘निङ्वाफुमापाङ्गा उनिङ्बे कासाम चामानिङ् इच्चा न्लेङ्मेन, ङ्खाॽनिङ्गो निङ्वाफुमापाङ्बेॽहा साम्मेङ्गा कासाम चामानिङ् च्हेन उङा चोहा कासाम लाचोङ्मेहा’ भोङ् चिन्द्वाम्चिम्गा॥ 17न्निङ्दा इमिन्हा मिक्सुरुम्बा नुङ् मुर्खा सिगान! हेॽना च्हेन माडा चेॽया ओम? साम्मेङ् येम साम्मेङ् पाबित्तारा चोक्खुबा निङ्वाफुमापाङ्येम? 18न्निङ्दा खाॽला चा चिन्द्वाम्चिम्गा ‘बेदिगा उनिङ्बे कासाम चामानिङ् इच्चा न्लेङ्मेन्हा, ङ्खाॽनिङ्गो बेदिबे तिसाहा भेटिगा कासाम चामानिङ् च्हेन उङा चोहा कासाम लाचोङ्मेहा॥’ 19ओ मिक्सुरुम्बाचि! हेॽना च्हेन माडा? भेटि येम भेटि पाबित्तारा चोक्खुबा बेदि येम? 20न्हाङामाङ् बेदिगा उनिङ्बे कासाम चाखुबाङा बेदि नुङ् न्नाबे तिसाहा घाक चेॽयागा उनिङ्बे कासाम चामेॽना॥ 21न्हाङा निङ्वाफुमापाङ्गा उनिङ्बे कासाम चाखुबाङा निङ्वाफुमापाङ्बे वाखुबागा उनिङ्बे चा कासाम चामेॽना॥ 22वालोक्का उनिङ्बे कासाम चाखुबाङा निङ्वाफुमागा हाङ्युक्थाम नुङ् न्नाबे युङ्खुबागा उनिङ्बे कासाम चामेॽना॥#यासाइया ६६:१; मात्ति ५:३४
23 “धिक्कार न्निङ्दा, धार्मासाप्ला चिन्खुबाचि नुङ् फारिसिचि, किहि काप्खुबाचि! इजाङ्बाङ्निङ् न्निङ्दा पाधेना, सोफा नुङ् जिरागा दासाम्सा निङ्वाफुमा पिवाम्गा, ङ्खाॽनिङ्गो ब्यावास्थाबेॽहा मुक्खे चेॽया निरिक, दाया नुङ् बिस्वास योग्या लेङ्माहा चेॽयाबे च्हेन निङ्वा म्बिवाम्गान॥ न्निङ्दा दासाम्सा पिॽमायि पोर्ने साया, न्हाङा ङ्खा ब्यावास्थाबेॽहा मुक्खे चेॽया चा येम्मा पोर्ने साया॥ #
लेबि २७:३०
24मिक्सुरुम्बा हाङ्गुम्बाचि! न्निङ्दा भुसुना सेघाक्स्वाम्गा, ङ्खाॽनिङ्गो ओओक च्हेन लुन्दिॽवाम्गा॥
25 “धिक्कार न्निङ्दा, धार्मासाप्ला चिन्खुबाचि नुङ् फारिसिचि, किहि काप्खुबाचि! इजाङ्बाङ्निङ् न्निङ्दा थाल खोरेक्का ओछोङ्बे को नान्द्वाम्चिम्गा, ङ्खाॽनिङ्गो होङ्बे च्हेन ङ्खाचि पोहोङ् नुङ् न्निङ्गा लागि से मितुम्गाहोङ् ताम्घा इसिॽहा थोकङा इप्तुनेस्वाम्चिम्गा॥ 26ओ मिक्सुरुम्बा फारिसि याॽमिचि! ओन्दाङ् थाल खोरेक्का होङ्बे उचुन वासिॽयानुम्चिम, न्हाङ् ओछोङ्बे चा उचुन न्लेङ्मेहा॥
27 “धिक्कार न्निङ्दा, धार्मासाप्ला चिन्खुबाचि नुङ् फारिसिचि, किहि काप्खुबाचि! इजाङ्बाङ्निङ् न्निङ्दा चुनाङा न्लेङाहा सियापाङ्चि लोॽवाहासिगान, ङ्खाचि पाखा सोॽमाचिनिङ् उचुन ङ्ङोमे, # २३:२७ ङ्खिङ्बेला इजिरेलि याॽमिचि न्स्याभोङ् सियापाङ्बे हुम्माहोङ् न्ना छोङ्बे इसा चा याॽमि न्लाम्निन्निभोङ् चुनाङा लेङ्माना चालान साया॥ इजाङ्बाङ्निङ् इसा सियापाङ् छोङ्बे लाम्मे न्ना याॽमि आसुद्दा लेङ्मेॽना उङ्चि ङ्गाया॥ ङ्खाॽनिङ्गो होङ्बे च्हेन न्स्याहा याॽमिचिगा सेङ्ख्वाक नुङ् आसुद्दा चेॽया से वामे॥#सेगुम्पाक २३:३ 28खाॽलामाङ् न्निङ्दा चा याॽमिचिगा उयुम्बे सोॽमानिङ् धार्मोति लोॽवा ओतिॽवागा, ङ्खाॽनिङ्गो न्निङ्गा निङ्वा च्हेन घाक किहि नुङ् पापङा इप्तिमिगा॥
आप्दिक्का दान्डा
(लुका ११:४७-५१)
29 “धिक्कार न्निङ्दा, धार्मासाप्ला चिन्खुबाचि नुङ् फारिसिचि, किहि काप्खुबाचि! इजाङ्बाङ्निङ् न्निङ्दा निङ्वाफुमाभाङ् चेक्खुबाचिगा सियापाङ् चोग्वाम्चिम्गा न्हाङ् धार्मोतिचिगा सियापाङ् उचुन सेक्स्वाम्चिम्गा॥ 30न्हाङा न्निङ्दा काइवागा, ‘उइले आनिङ्गा पा-पुम्चिङा निङ्वाफुमाभाङ् चेक्खुबाचि न्सिसुचिनिङ् कानिङ् वाइङ्निङ्बि उङ्चि ङ्खाॽलाहा काम चोक्मा म्फातुम्चिम्ङान्बि॥’ 31खाॽला काइवागाहोङ् न्निङ्दा आफाइ ङ्खा निङ्वाफुमाभाङ् चेक्खुबाचि सिखुबाचिगा सान्तानसिङान भोङ् पार्मानित चोग्वाम्गा! 32हाकु न्निङ्गा पा-पुम्चिङा न्दारोक्तुहा काम न्निङ्दा पुरा चोगानुम!
33 “ओ पुछाकचि, बिखालु पुछाक्का सान्तानचि! न्निङ्दा इमिन नाराक्का दान्डाभाङ् हिङिॽवाघा? #
मात्ति ३:७; १२:३४; लुका ३:७ 34न्हाङामाङ् हाकु उचुन खेप्सानुम, का न्निङ्दाबे निङ्वाफुमाभाङ् चेक्खुबा, बुद्दिमानि याॽमिचि नुङ् धार्मासाप्ला चिन्खुबाचि पाक्स्वाङ्चिङ्॥ ङ्खाचि माध्येबे इखिङ् न्निङ्दा सिस्वाम्चिम्गा, इखिङ् कुरुसपे छुसिॽवाम्चिम्गा, न्हाङ् इखिङ् न्निङ्गा छुम्पाङ्चिबे कोर्रा एन्द्म्चिम्गा न्हाङा इखिङ् च्हेन साहार-साहारबे तुखि पिवाम्चिम्गा॥ 35ङ्खोङ्माङ् ताम्दाङ्फुमाबे न्सिसुचिहा घाक धार्मोति याॽमिचि– धार्मोति हाबिल भाङ् निङ्वाफुमापाङ् नुङ् बेदिगा उलुम्बे न्सिसुना बेरेक्याहागा उच्या जाकारिया सोम्मागा हेलिगा आप्दिक न्निङ्दाबे आमेहा॥#उथुक ४:८; २ उथुक्साला २४:२०-२१ 36जेप्पा का न्निङ्दा लुमेॽनेनिन, खा घाक चेॽयागा आप्दिक ना पुस्तागा याॽमिचि छोङ्बे आमेहा॥
येसुङा यारुसालेम उलुङ्मा तुक्तुना
(लुका १३:३४-३५)
37 “यारुसालेमबेॽहा याॽमिचि, ओ यारुसालेमबेॽहा याॽमिचि! न्निङ्दा निङ्वाफुमाभाङ् चेक्खुबाचि सिस्वाम्चिम्गा, न्हाङा न्निङ्दाबे म्बाक्साहाचि लुङ्खाकङा लेप्त्वाम्चिम्गा॥ का इखिङ् खेप वागुमाङा उच्याचि छुप्स्वाचिहोङ् कुप्त्वाचिहा लोॽवा का चा न्निङ्दा छुम्मा योक्नेनिन, ङ्खाॽनिङ्गो न्निङ्दा ङ्गाक्सिगान॥ 38सोयानुम, न्निङ्गा पाङ् निङ्वाफुमाङा नासिॽवा न्हाङ् लुङ्माहिम्हिम लेङ्मेॽना॥#यार्मिया २२:५ 39हाकु का लुमेॽनेनिन, न्निङ्दा ‘हाङ्बा निङ्वाफुमागा उनिङ्बे ताखुबा इखिङ् प्याक आसिक तोक्खुबा ओम’#छेम ११८:२६ मेङ्गाले सोम्मा का हेॽनिङ्चा फेरि न्निमेकान्हा॥”
Currently Selected:
मात्ति 23: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
