मात्ति 22
22
माडा होक्तागा ताप्चेॽया
(लुका १४:१५-२४)
1येसुङा ङ्खाचि फेरि ताप्चेॽयाभाङ् खाॽला लुचि, 2“वालोक्का राज्या एको हाङ्नुङ् तोङ्मा यामेॽना, उङा उका उच्या बाबुगा थाङ्छेङ्गा होक्ता त्यार चोगु॥ 3न्हाङा होक्ताबे निम्तो न्जोगाहा याॽमिचि कासे उका नोकोरचि पाक्सुचि, ङ्खाॽनिङ्गो ङ्खाचि तामा ङ्गाक्सानिन॥ 4न्हाङा फेरि उङा हेकोहा नोकोरचि खाॽला लुचिहोङ् पाक्सुचि ‘ख्यानिघोङ् ङ्खा निम्तो न्जोगाहा याॽमिचि खाॽला लुयानुम्चिम, का थाङ्छेङ्गा होक्ता त्यार चोगुक्सुङ्॥ आका चात्तुहा-चात्तुहा जिवातचि सिमेतुक्सुङ्चिङ् न्हाङ् घाक थोक त्यार लेक्सामाहा, थाङ्छेङ्गा होक्ताबे तायानि॥’ 5ङ्खाॽनिङ्गो ङ्खाचिङा ङ्खेप्सुनिन्हा लोॽवा चोक्साङ् इखिङ् रोपा लाम्धाङ्बे काम चोक्से ङ्ख्या, न्हाङ् इखिङ् च्हेन बेपार चोक्से ङ्ख्या॥ 6हेकोहाचिङा च्हेन हाङ्गा नोकोरचि न्लाबुचिहोङ् इसिॽनुङ् न्जोगुचि न्हाङ् ङ्खाचि न्सिसुचि॥ 7न्ना हाङ् ओलोक खोॽमाङा मि लेक्सा न्हाङ् उका काङ्बाचि पाक्सुचिहोङ् ङ्खा याॽमि सिखुबाचि सिमेतुचि, न्हाङा ङ्खाचिगा साहार तुन्नाहाङ्मेतुचि॥
8 “न्हाङा न्नाङा उका नोकोरचि लुचि, ‘थाङ्छेङ्गा होक्ता त्यारिहा, ङ्खाॽनिङ्गो निम्तो न्जोगाहाचि होक्ता चामालाइक न्लेक्सानिन॥ 9न्हाङामाङ् न्निङ्दा लाम्बु-लाम्बुबे ख्यानिघोङ् इसा तुप्स्वाम्चिम्गा ङ्खाचि होक्ताबे कारायानुम्चिम॥’ 10न्हाङा नोकोरचि लाम्बुबे ङ्ख्याहोङ् उङ्चिङा न्दुप्सुचिहा उचुन्हा, इसिॽहा घाक याॽमिचि ङ्गाराचि॥ खाॽला थाङ्छेङ् पाङ् खोलोङ्बाचिङा इप्तु॥
11 “ङ्खाॽनिङ्गो जोबो खोलोङ्बाचि सोसे हाङ् ताया, ङ्खिङ्बेला उङा थाङ्छेङ्बे वाॽमाहा तेक मेवाॽले तायाना एको याॽमि निसु॥ 12न्हाङा न्ना छिम्दु, ‘हाओ, काम्निभाक! न्दा थाङ्छेङ्बे वाॽमाहा तेक मेवाॽले इमिन उयागाना?’ न्ना याॽमिङा इच्चा पोलोवा पिॽमा ङ्यासुन॥ 13न्हाङा हाङ्ङा उका नोकोरचि लुचि, ‘ना याॽमि लाबुम्घोङ् उलाङ्-उमुक थुन्दाबियानुम न्हाङ् पाखा कुइम्नाबे लेप्ताहाक्सानुम॥ न्नाबे याॽमिचि उङ्चि केङ् छिम्साङ् ङ्हाम्नुङ्मे॥’#मात्ति ८:१२; २५:३०; लुका १३:२८
14 “इजाङ्बाङ्निङ् ङ्गायाहाचि गो प्याक ङ्वान्ने, ङ्खाॽनिङ्गो न्सेगाहाचि च्हेन मिॽयाङ्सेॽहाचि॥”
तिरो हुङ्माना उतुम्बे छिम्योक
(मार्कुस १२:१३-१७; लुका २०:२०-२६)
15न्हाङा फारिसिचि ङ्ख्याहोङ् येसु उका चेॽयाबे इमिन आमेॽमाना भोङ् चेॽया ङ्हुप्तु॥ 16ङ्खाचिङा उङ्चि एकोहिप्पाङ् चेलाचि हाङ् हेरोद पोटि लान्जोगाहा याॽमिचिनुङ् येसुगाबे म्बाक्सुचि॥ ङ्खाचि ङ्ख्याहोङ् येसु खाॽला न्लु, “ओ, चिन्खुबा न्दा नुराङ्बा याॽमिगान बाङ्ना कानिङ् था वान्ने॥ न्हाङ् याॽमिचि चिन्द्वाचिगानिङ् जेप्पाना निङ्वाफुमागा लाम्बु सोॽमेत्वाचिगा, न्हाङ् न्दा इसानुङ्चा ङ्गिसिमेकान, इजाङ्बाङ्निङ् न्दा याॽमिचिगा या सोसाङ् काम न्जोग्वागान॥ 17न्हाङामाङ् कानिङ् लुया, रोमि तायेन्राङ्बा काइसार तिरो हुङ्मा ठिक्नायेम मेन्नायेम?”
18ङ्खाॽनिङ्गो येसुङा ङ्खाचिगा इसिॽना निङ्वा था तोक्तुहोङ् खाॽला लुचि, “ओ किहि काप्खुबाचि, का इजाङ् चेॽयाबे आमेॽमा योङ्मेकाहा? 19सोङ् तिरो हुङ्माना याङ् सोॽमेता॥” न्हाङा ङ्खाचिङा एको युप्पा याङ् न्दाहोङ् न्सोॽमेतु॥ 20न्हाङा येसुङा ङ्खाचि छिम्दुचि, “नाबे इसागा छाप नुङ् इसागा उनिङ् वान्नेॽना?”
21ङ्खाचिङा पोलोवा म्बि, “काइसारगा॥”
न्हाङा येसुङा लुचि, “ङ्खाॽलाभोङ् इहा काइसारगा ओम ङ्खा काइसार पियानुम, न्हाङ् इहा निङ्वाफुमागा ओम ङ्खा निङ्वाफुमा पियानुम॥” 22खा ङ्खेप्सुहोङ् ङ्खाचि आच्चाम्मा ङ्ङेता, न्हाङ् उङ् न्नाओहोङ् ङ्खेब्या॥
सिमाहोङ् हिङ्गिलिक लेङ्माना चेॽयागा उतुम्बे छिम्योक
(मार्कुस १२:१८-२७; लुका २०:२७-४०)
23याॽमि न्सिमेहोङ् हिङ्गिलिक न्लेङ्मेहाभोङ् बिस्वास मेन्जोक्खुबा एकोहिप्पाङ् सादुकिचि न्ना लेन येसु वायानाबे न्दायाहोङ् न्छिम्दु,#सेगुम्पाक २३:८ 24“चिन्खुबा, मोसाङा खाॽला कायामा, ‘इसागा उफु उच्याचि मेवाले सिमे, न्नागा उनुन्छाङा लाङ्निमा उभाउजु थाङ् छेङुहोङ् उफुगा लागि च्याचि तोक्चुचिनि॥’#ब्यावास्था २५:५ 25इमा आनिङ्गा लुम्बे ला जाना उफुनुन्छाचि ङ्वाया॥ तुम्ना थाङ् छेङा, न्हाङ् उच्याचि मेवाले स्या॥ न्हाङा छालुम्बाङा उभाउजु थाङ् छेङु॥ 26न्ना चा उच्या मेलेङ्ले स्या॥ ङ्खाॽलामाङ् पाक्छालुम्बा भाङ् घाक हाक्निङ् पाक्ना सोम्मा चा थाङ् छेङ्साङ् च्या मेलेङ्ले न्स्याख्या॥ 27हेक्साङ् न्ना मामु चा स्या॥ 28हाकु न्स्याहाचि हिङ्गिलिक लेङ्माना बेला ङ्खा ला जाना उफुनुन्छाचिबे न्ना मामु इसागा उहिङ्खुमा लेङ्मेॽना? इजाङ्बाङ्निङ् न्ना मामु घाकङा थाङ् न्छेङुक्सा॥”
29येसुङा ङ्खाचि पोलोवा पिचि, “न्निङ्दा लाम्बु फाप्सिसिइमिघा, न्निङ्दा धार्मासाप्ला नुङ् निङ्वाफुमागा साक्तिगा उतुम्बे ङ्ङासुक्सुम्गान्हा॥ 30इजाङ्बाङ्निङ् न्स्याहाचि हिङ्गिलिक न्लेङ्मेॽनिङ् याॽमिचि थाङ् न्छेङ्मेनिन न्हाङ् न्छेङ्दुबिवान्चिनिन चा, ङ्खाॽनिङ्गो ङ्खाचि वालोकपे वाखुबा वालोक्दुत लोॽवा न्लेङ्मेहा॥ 31न्हाङ् सिमाहोङ् हिङ्गिलिक लेङ्माना चेॽयागा उतुम्बे निङ्वाफुमाङा धार्मासाप्लाबे इ कायामाना, पोढा न्जोगुक्सुम्गानाहा? 32निङ्वाफुमाङा काया ‘का आब्राहाम, इसाहाक नुङ् याकुबका निङ्वाफुमाङान॥’#पारास्थान ३:६ उङ् न्स्याहाचिगा निङ्वाफुमा मेन्ना, ङ्खाॽनिङ्गो हिङ्गिलिक्हाचिगा निङ्वाफुमा ओम॥” 33खाॽला येसुङा चिन्दुचिहा चेॽया ङ्खेप्सुहोङ् घाक याॽमि आच्चाम्मा ङ्ङेता॥
घाक हाक्निङ् माडा आग्गे
(मार्कुस १२:२८-३४; लुका १०:२५-२८)
34येसुङा सादुकिचि स्वाक वामेतुचिहा बाङ्ना चेॽया ङ्खेप्सुहोङ् फारिसिचि येसु वायानाबे न्छुप्साराया॥ 35ङ्खाचि माध्येबे धार्मासाप्ला चिन्खुबा एकोङा येसुगा जाच चोक्माना निङ्वाङा खाॽला छिम्दु, 36“चिन्खुबा, ब्यावास्थाबे घाक हाक्निङ् माडा आग्गे हेॽना ओम?”
37येसुङा न्ना पोलोवा पि, “न्दा ङ्गा हाङ्बा निङ्वाफुमा घाक न्लुङ्माङा, घाक हिङ्लुङ्ङा न्हाङा घाक न्निङ्वाङा लुङ्मा तुक्तु॥#ब्यावास्था ६:५ 38घाक हाक्निङ् माडा नुङ् इम्ना आग्गे नामाङ् ओम॥ 39हिम्ना चा ङ्खाॽलानाबा, ‘न्दा ङ्गा पाङ्निवाकचि न्दा लोॽवा न्लुङ्मा तुक्तुचि॥’#लेबि १९:१८ 40घाक ब्यावास्था नुङ् निङ्वाफुमाभाङ् चेक्खुबाचिगा छेप्तापपेॽहा घाक चेॽयागा उसाम खा हिच्चि आग्गेमाङ् ओम्चि॥”
खिरिस्टका उतुम्बे छिम्योक
(मार्कुस १२:३५-३७; लुका २०:४१-४४)
41न्हाङा ङ्खा न्छुप्सारायाहा फारिसिचि येसुङा एको छिम्योक छिम्दुचि, 42“खिरिस्टका उतुम्बे न्निङ्दा इ मितिॽवाघा? उङ् इसागा उच्या ओम?”
ङ्खाचिङा येसु न्लु, “उङ् दाउदका उच्या ओम॥”
43उङा ङ्खाचि लुचि, “ङ्खाॽलाभोङ् दाउद पाबित्तारा आत्मागा साक्तिङा आगुवाइ चोगुहोङ् इजाङ् उङ् ‘हाङ्बा’ भोङ् लुॽमेतुना? इजाङ्बाङ्निङ् दाउद आफाइङा खाॽला कायामा–
44 ‘हाङ्बा निङ्वाफुमाङा आका हाङ्बा लु,
ङ्गा सात्तुरचि न्लाङ्ङा मेम्बाॽमेले सोम्मा
न्दा आका छुप्ताङ् आमुक पोटि युङा॥’ #
छेम ११०:१
45 “खाॽला दाउद आफाइङा खिरिस्ट ‘हाङ्बा’ ल्वानाभोङ् खिरिस्ट इमिन दाउदका सान्तान लुॽमाना?” 46ङ्खाॽनिङ्गो इसाङा चा एको चा पोलोवा पिॽमा ङ्यासुनिन॥ न्ना लेन नाहाङ्तो इसाङा चा उङ् छिम्योक छिम्माना आट् चा न्जोगानिन॥
Currently Selected:
मात्ति 22: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
