सेगुम्पाक 8
8
साउलङा येसुबे बिस्वास चोक्खुबाचि तुखि पिचिहा
1-2धार्मोति याॽमिचिङा स्तिफानास ङ्हुम्दु न्हाङ् उङ् मिसाङ् इब्बे-इब्बे ङ्हाबा॥ स्तिफानास सिमाना कामबे साउलगा चा उमुक वाया॥ न्ना नाहाङ्तोमाङ् याॽमिचिङा यारुसालेमबेॽहा बिस्वासिचि प्याक तुखि पिॽमा न्दारोक्तुचि॥ न्हाङा येसुबे बिस्वास चोक्खुबा हेकोहा घाक चेलाचि याहुदिया नुङ् सामारिया लिङ्खामबे ङ्ख्याहोङ् यो-खे, तो-मो घाकपोटि ङ्हिसाख्या, ङ्खाॽनिङ्गो सेगुम्पाकचि च्हेन यारुसालेमबे ङ्वाया॥ 3साउलङा च्हेन येसुबे बिस्वास चोक्खुबाचि नास चोक्मास्या॥ उङा पाङ्-पाङ्बे खेसाङ् येसुबे बिस्वास चोक्खुबा बाबु-मामुचि लाबुचिहोङ् साङ्खेसाङ् छेक्पाङ्बे छेक्मेतुचि॥#सेगुम्पाक २२:४-५; २६:९-११
सामारियाबे नुसाला हिसाहा
4यारुसालेमभाङ् ङ्हिसाख्याहा बिस्वासिचिङा उङ्चि हेॽने ङ्ख्या, न्नाबे नुसाला खेम्मेॽमा न्लेप्तिन्चिनिन॥ 5फिलिप च्हेन सामारियागा एको साहारबे ख्या, न्हाङा न्नाबेॽहा याॽमिचि “येसुमाङ् निङ्वाफुमाङा पाक्सुना खिरिस्ट ओम” भोङ् खेम्मेतुचि॥ 6फिलिपङा लुचिहा चेॽया ङ्खेप्सुहोङ्, उङा चोगुहा आच्चाम्माहा चिङ्गो न्निसुहोङ् घाक याॽमिचिङा उका चेॽया उचुन निङ्वा म्बिहोङ् ङ्खेप्सु॥ 7न्नाबे प्याक याॽमिचिभाङ् इसिॽहा मुइचि ओक्साङ् न्लोन्दाख्या, न्हाङा कुजे नुङ् लाम्मा मेयाखुबा तुखाबाङ्चि चा न्नुया॥ 8ङ्खाॽला न्ना साहारबे प्याक आनान्दा लेक्सा॥
9न्ना साहारबे एको सिमोन बाङ्ना जादुवाल याॽमि वाया॥ उङा ओन्दाङ् नाहाङ्तोमाङ् उका जादुङा न्ना साहारबेॽहा याॽमिचि आच्चाम्मा चोगुक्साचि॥ उङ् का लोॽवाना इसा चा मान्ना मितामासा॥ 10न्ना साहारबे वाखुबा माम्माहा मिमिॽहा घाकङा “ना याॽमिबे निङ्वाफुमागा माडा साक्ति वान्नेॽना” ङ्गाया॥ 11न्हाङा घाक याॽमिचि चा उका चेॽयागा हेक्साङ् लान्जोगामासा, इजाङ्बाङ्निङ् प्याक ओन्दाङ् नाहाङ्तो उङा जादु सोॽमेतुचिहोङ् आच्चाम्मा चोगुक्साचि॥
12ङ्खाॽनिङ्गो जोबो फिलिपङा निङ्वाफुमागा राज्यागा उतुम्बे नुङ् येसु खिरिस्टका उतुम्बे नुसाला खेम्मेतुचि, न्हाङ् प्याक बाबु-मामुचिङा उका चेॽया बिस्वास न्जोगुहोङ् बाप्तिस्मा लियान्जोगु॥ 13सिमोनङा चा बिस्वास चोगुहोङ् बाप्तिस्मा लियाचोगु, न्हाङ् फिलिपनुङ् लाम्मा तारोक्तु॥ सिमोन फिलिपनुङ् वायानिङ् फिलिपङा चोगुहा आच्चाम्माहा काम नुङ् चिङ्गो निसुहोङ् आच्चाम्मा एता॥
14सामारिया लिङ्खामबेॽहा याॽमिचिङा निङ्वाफुमागा चेॽया ङ्खेप्सुहोङ् बिस्वास न्जोगुहा चेॽया यारुसालेमबे ङ्वायाहा सेगुम्पाकचिङा ङ्खेप्सुहोङ् पात्तुरुस नुङ् युहान्ना न्नाबे म्बाक्सुचि॥ 15न्हाङा उङ्चि सामारिया साहारबे तासाचुहोङ् येसुबे बिस्वास चोक्खुबाचिङा पाबित्तारा आत्मा न्दोक्तुनिभोङ् पार्थाना चोगाचि॥ 16इजाङ्बाङ्निङ् ङ्खिङ्बेला सोम्मा ङ्खाचि इसाङा चा पाबित्तारा आत्मा न्दोक्तुक्सानिन॥ ङ्खाचिङा हाङ्बा येसुगा उनिङ्बे से बाप्तिस्मा लियान्जोगुक्सा, न्हाङा पाबित्तारा आत्मागा उतुम्बे ङ्खाचिङा था म्मायान॥ 17पात्तुरुस नुङ् युहान्नाङा ङ्खा बिस्वासिचि छोङ्बे उङ्चि मुक युक्साचुचि, न्हाङ् ङ्खाचिङा पाबित्तारा आत्मा न्दोक्तु॥
18सेगुम्पाकचिङा उङ्चि मुक ङ्युक्स्वाचिनिङ् पाबित्तारा आत्मा तोङ्मेॽना बाङ्ना चेॽया सिमोनङा था तोक्तु॥ न्हाङ् सेगुम्पाकचि याङ् पिसाङ् खाॽला लुचि, 19“का चा खाॽलाना साक्ति पिया, का इसा छोङ्बे आमुक युक्स्वाङ्, न्ना याॽमिङा पाबित्तारा आत्मा तोक्तुनि!”
20ङ्खाॽनिङ्गो पात्तुरुसङा लु, “ङ्गा याङ् न्दानुङ्माङ् नास लेङ्नि, इजाङ्बाङ्निङ् निङ्वाफुमागा पिनिक्ला न्दा याङ्ङा इम्मा यामेॽनाभोङ् मितुगा॥ 21न्दा खा काम इहाचा चोक्मा न्दोक्त्वागान्हा, नाबे ङ्गा भाक चा मान, न्हाङा ङ्गा चोक्तोक चा मान्हा॥ इजाङ्बाङ्निङ् ङ्गा निङ्वा निङ्वाफुमागा ओन्दाङ् उचुन्ना मेन्ना॥ 22हाकु ना इसिॽना न्निङ्वागा लागि न्निङ्वाभाङ् पास्चाताप चोगाघोङ् हाङ्बानुङ् पार्थाना चोगा॥ ङ्खाॽला चोगागाभोङ् छेमा तोक्त्वागाना येम॥ 23इजाङ्बाङ्निङ् ङ्गा न्निङ्वा प्याक इसिॽहा चेॽयाङा इप्तुक्सु, न्हाङ् लोप चा न्दा पापका तायेनबे वान्नेकाना निमासिमेॽनेन्ना॥”
24खा खेप्सुहोङ् सिमोनङा पात्तुरुस नुङ् युहान्ना लुचि, “न्दा लुयाङ्घा खा चेॽया एको चा का छोङ्बे ङ्ङानिन्निभोङ् हाङ्बानुङ् आका लागि न्जिङ्दा पार्थाना चोक्ताब्या॥”
25न्हाङा पात्तुरुस नुङ् युहान्नाङा गाबाहि पिसाङ् निङ्वाफुमागा चेॽया खेम्मेतिॽयाचुचिहोङ् सामारिया लिङ्खामगा तेन-तेनचिबे नुसाला खेम्मेसाङ् यारुसालेम पोटि लासाचि॥
फिलिप नुङ् नापुङ्साक
26इलेन हाङ्बाङा पाक्सुना वालोक्दुतङा फिलिप खाॽला लु, “नाभाङ् छुप्तालाङ् पोटि यारुसालेमभाङ् गाजा खेॽमाना इसा चा मेॽनिङ्ना सुन्नेना ठोङ्बेॽना लाम्बुबे ख्या॥” 27न्हाङा फिलिप पोगाहोङ् ख्या॥ ङ्खिङ्बेला न्ना लाम्बुबे इथोयोपिया खाम्युकपेॽना एको नापुङ्साक याॽमि यारुसालेमबे आराधाना चोक्से ख्याहोङ् लाङ्खेॽमास्याना तुप्सु॥ न्ना याॽमि इथोयोपिया खाम्युक्का हाङ्मा कान्दाकिगा घाक याङ्सा सोखुबा माडा याॽमि साया॥ 28उङ् राथपे युङाहोङ् निङ्वाफुमाभाङ् चेक्खुबा यासाइयाङा छेप्तुना छेप्ताप पोढाचोक्मास्या॥ 29पाबित्तारा आत्माङा फिलिप लु, “राथका उयुम्बे ख्या॥”
30फिलिप राथका उयुम्बे लुक्ताख्या, न्हाङा न्ना याॽमिङा निङ्वाफुमाभाङ् चेक्खुबा यासाइयाङा छेप्तुना छेप्ताप पोढा चोक्मास्याना खेप्सुहोङ् फिलिपङा छिम्दु, “न्दा पोढाचोक्मासिम्मेकाहा ङ्खा चेॽया आसुघा?”
31न्ना नापुङ्साकङा पोलोवा पि, “इसाङा चा मेयोक्मेले का इमिन आसुङ्?” न्हाङ् न्ना नापुङ्साकङा फिलिप काहोङ् उका राथपे युङ्मेतु॥
32न्ना नापुङ्साकङा पोढा चोक्मास्याना धार्मासाप्लागा खान्डा ना साया–
“उङ् गो चेनेहेक्साना सामुङ् लोॽवा साया,
उमुङ् हेक्खुबागा उयुम्बे मेङ्गाले स्वाक येम्नुङ्खुबा सामुङ् लोॽवा उङ् पोक चा न्जेक्तान॥
33उङ् खिङ्तुक्नुङ् उसाया ङ्ङामेतु, इसिॽनुङ् न्जोगु, उङा निरिक चा न्दोक्तुन॥
इसाङा उका सान्तानगा उतुम्बे कामा यामेॽना? इजाङ्बाङ्निङ् ताम्दाङ्फुमाबे उका सान्तानचि लेङ्मा हाक्निङ् ओन्दाङ् उङ् याॽमिचिङा न्सिसु॥”#यासाइया ५३:७-८
34न्हाङा न्ना नापुङ्साकङा फिलिप छिम्दु, “का खा चेॽया उचुन योक्मेताङ्, निङ्वाफुमाभाङ् चेक्खुबा ना याॽमिङा खा चेॽया इसागा उतुम्बे कायाना? उका उतुम्बे येम, हेकोना याॽमिगा उतुम्बे येम?” 35न्हाङा फिलिपङा धार्मासाप्लागा न्ना खान्डाभाङ् माङ् येसुगा उतुम्बे उचुन नुसाला खेम्मेतु॥
36उङ्चि लाम्बुबे खेॽमास्याचिनिङ् माङ्च्वा वायाना ठोङ्बे तासाचु॥ न्हाङा न्ना नापुङ्साकङा छिम्दु, “नाबे माङ्च्वा वान्नेहा, का बाप्तिस्मा लियाचोक्मा यामेङ्ना?” 37फिलिपङा लु, “ङ्गा घाक न्निङ्वाङा बिस्वास चोगुगाभोङ् यामेकाना॥”
न्ना नापुङ्साकङा पोलोवा पि, “खिरिस्ट येसु निङ्वाफुमागा उच्या ओमभोङ् का आनिङ्वाभाङ् बिस्वास चोग्वाङ्ना॥”#८:३७ प्याक लोॽवा सोरोत बाइबोलबे खा चेॽया न्दोङ्मेन्हा॥ 38न्हाङा उङा राथ येप्मेतुहोङ् उङ्चि माङ्च्वा वायानाबे ख्याचि, न्हाङ् फिलिपङा बाप्तिस्मा पि॥ 39उङ्चि माङ्च्वाभाङ् लोन्दाक्याचिहोङ् निङ्वाफुमागा आत्माङा फिलिप हेकोना ठोङ्बे खेतु॥ न्हाङ् न्ना नापुङ्साकङा फिलिप फेरि न्निसुन, ङ्खोङ्चा उङ् इब्बे-इब्बे चोन्सिसाङ् उका लाम्बु लाचोगा॥
40ङ्खाॽनिङ्गो फिलिप आस्दोद् बाङ्ना ठोङ्बे ओता॥ उङ् काइसारिया बाङ्ना साहारबे मेन्दाले सोम्मा घाक साहारचिबे नुसाला खेम्मेसाङ् ख्या॥
Currently Selected:
सेगुम्पाक 8: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
