सेगुम्पाक 9
9
दामास्कासका लाम्बुबे साउलङा येसु बिस्वास चोगुना
1-2ङ्खिङ्बेला साउलङा बिस्वासिचि सिमेॽनेनिन्हाभोङ् तुक्नुङ् किसिॽमा लाप्तुघोन्दुचि॥ इलेन उङ् मा-हाङ्खुबागाबे ख्याहोङ् खाॽला लु, “आका लागि दामास्कास पेॽहा तायेन्राङ्बाचि एको खाॽलाना छेप्फा छेप्ताब्या, का न्नाबेॽहा बिस्वासि बाबु-मामुचि घाक लाप्साङ् यारुसालेमबे ताॽमा तोक्तुङ्चिङ्नि॥”
3साउल दामास्कास साहारबे खेॽमास्यानिङ् उङ् न्ना साहारगा उयुम्बे तासु, ङ्खिङ्बेला थाप्थुम्बे ताङ्खेङ्भाङ् एको जोति उका ओरिपोरि चाम्काचोगा॥ 4न्हाङा उङ् खामबे काक्कुलिक काक्साख्या, ङ्खिङ्बेला उङा खाॽलाना सेम्ला खेप्सु, “साउल, ओ साउल, का इजाङ् तुखि पिमेङ्गाना?”
5साउलङा छिम्दु, “ओ हाङ्बा, न्दा इसागान?”
न्हाङा फेरि उङा खाॽला कायाना खेप्सु, “का न्दा तुखि पिॽमासिम्मेकाना येसुङान॥ 6हाकु पोगाघोङ् साहारबे ख्या, न्नाबेॽमाङ् न्दा चोक्माहा कामगा उतुम्बे न्लुमेकाना॥”
7साउलनुङ् वाखुबा याॽमिचिङा सेम्ला गो ङ्खेप्सु, ङ्खाॽनिङ्गो इसा चा याॽमि न्निसुन्चिनिन्होङ् माङ्माङ् माङ्दिसाङ् लेम्सुरुम्बाचि लोॽवा ङ्येबामासा॥ 8साउल खामभाङ् मुथिङ्गिरिक पोगाहोङ् उमिक थागुचि, ङ्खाॽनिङ्गो उङा इहाचा निमा ङ्यासुन॥ न्हाङा उकाम्निभाकचिङा उमुकपे न्लाबुहोङ् दामास्कासपे न्दा॥ 9न्नाबे उङ् सुम लेन सोम्मा उमिक मेनिखुबा लेक्सा॥ ङ्खिङ्बेला उङा चाम्योङ्बा इहाचा न्जोन न्हाङ् माङ्च्वा चा ङ्ङुङुन॥
10न्नाबे हानानिया बाङ्ना एको हाङ्बा येसुगा चेला वाया॥ इलेन हाङ्बाङा उङ् सेन्चिबे खाॽला लुना खेप्सु, “ओ हानानिया!”
न्हाङा हानानियाङा लु, “लुयाङ् हाङ्बा॥”
11हाङ्बाङा लु, “पोगाघोङ् सिधा बाङ्ना लाम्बुबे ख्या, न्हाङा न्नाबेॽना याहुदागा पाङ्बे ख्याघोङ् टार्सासबेॽना साउल बाङ्ना याॽमि योगु॥ उङ् न्नाबे पार्थाना चोक्मासिम्मे, 12उङा सेन्चिबे हानानिया बाङ्ना याॽमि तायाहोङ् फेरि उमिकङा निमा यासुनिभोङ् उङ् छोङ्बे उमुक युक्सुचिहा निसुक्सुना॥”
13ङ्खाॽनिङ्गो हानानियाङा पोलोवा पि, “ओ आहाङ्बा, न्ना याॽमिङा गो यारुसालेमबेॽहा ङ्गा चेलाचि तुक्नुङ् तुखि पिचिहा चेॽया प्याक याॽमिचिभाङ् खेप्सुक्सुङ्हा॥ 14न्हाङ् बिस्वासिचि लाप्माना चोक्तोक खाङ्खाङ् हाङ्खुबाचिभाङ् तोक्तुहोङ् उङ् नाबे तायामाना॥”
15ङ्खाॽनिङ्गो हाङ्बाङा हानानिया लु, “न्दा इमिन्होङ्चा न्नाबे ख्या! इजाङ्बाङ्निङ् हेकोहा जातिगा याॽमिचि नुङ् उङ्चि हाङ्चि न्हाङ् इजिरेलिचि आका उतुम्बे नुसाला खेम्मेॽमागा का न्ना याॽमि सेगुक्सुङ्ना॥
16 “आका लागि उङा इखिङ् तुखि आङ्मा पोराचोङ्मेहा, ङ्खा चेॽया का सोॽमेत्वाङ्हा॥”
17न्हाङ् हानानिया न्ना पाङ्बे ख्याहोङ् साउल छोङ्बे उमुक युङ्साङ् खाॽला लु, “ओ आनुन्छा साउल, न्दा आप्मास्यागानिङ् लाम्बुबे ओखुबा हाङ्बा येसुङा माङ् का पाक्साङ्ना ओम॥ उङा न्दा फेरि निमा यासुगानि न्हाङ् पाबित्तारा आत्मागा साक्तिङा इप्कानिभोङ् का पाक्सामाङ्ना॥” 18ङ्खिङ्बेलामाङ् उका उमिकपाहाङ् पाप्रा लोॽवाहा आयाख्या, न्हाङ् उङ् फेरि उमिक निखुबा लेक्सा न्हाङा उङ् पोगाहोङ् बाप्तिस्मा लियाचोगु॥ 19न्हाङ् उङा चाम्योङ्बा चोहोङ् चात्तु लेक्सा॥
साउलङा दामास्कासपे नुसाला खेम्मेतुचिहा
साउल माङ्फा लेन सोम्मा येसुगा चेलाचिनुङ् दामास्कासपे वाया॥ 20ङ्खिङ्बेलामाङ् उङा न्नाबेॽहा याहुदि छुम्पाङ्चिबे ख्याहोङ्, “येसुमाङ् निङ्वाफुमागा उच्या ओम” भोङ् याॽमिचि खेम्मेॽमा तारोक्तुचि॥ 21न्नाबे उका चेॽया खेम्खुबाचि च्हेन आच्चाम्मा एसाङ् खाॽला ङ्गाया, “ना याॽमि गो यारुसालेमबे येसुगा उनिङ्बे चेक्खुबा घाक याॽमिचि नास चोक्मा योक्खुबा मेन्नायि? न्हाङ् नाबे चा येसुगा उनिङ्बे चेक्खुबाचि खाङ्खाङ् हाङ्खुबाचिगाबे लाम्खेॽमागा तायाना गो मेन्ना?” 22ङ्खाॽनिङ्गो साउलङा हाकुचा साक्तिसालि लेक्साहोङ् दामास्कासपे ङ्वायाहा याहुदिचि “येसुमाङ् निङ्वाफुमाङा पाक्सुना खिरिस्ट ओम” भोङ् जेप्पागा पार्मान पिचि॥ न्हाङामाङ् दामास्कास पेॽहा याहुदिचिङा इच्चा पोलोवा पिॽमा ङ्यासुनिन॥
23माङ्फा लेन हेक्साङ् याहुदिचि न्दोङाहोङ् साउल सिसुमभोङ् चेॽया ङ्हुप्तु॥ 24ङ्खाॽनिङ्गो ङ्खा घाक चेॽया साउलङा था तोक्तु॥ ङ्खा याॽमिचिङा साउल सिमागा लेॽनिसेॽनि साहारगा वालाम्बुङ्चिबे कुमा न्दारोक्तु॥ 25ङ्खाॽनिङ्गो चेलाचिङा उङ् सेॽनिमाङ् डोकुबे ङ्ङेन्दुहोङ् पार्खालभाङ् मो ङ्ङाएन्दु न्हाङ् ङ्खुसाहाक्सु॥#२ कोरिन्थि ११:३२-३३
26साउल यारुसालेमबे तायाहोङ् न्नाबेॽहा चेलाचिनुङ् तोङ्मा योगा, ङ्खाॽनिङ्गो ङ्खा चेलाचि उङ्नुङ् तुक्नुङ् ङ्गिसिता, इजाङ्बाङ्निङ् उङ्चिङा येसुगा चेला ओमभोङ् पात्ये चोक्मायि ङ्यासुनिन॥ 27ङ्खाॽनिङ्गो बार्नाबास तायाहोङ् साउल सेगुम्पाकचिगाबे खेतु॥ न्हाङ् साउलङा दामास्कास खेॽमाना लाम्बुबे हाङ्बा निसुना नुङ् हाङ्बा उङ्नुङ् चेक्ताना, न्हाङा दामास्कासपे मेङ्गिसिॽले येसुगा उतुम्बे याॽमिचि खेम्मेतुचिहा घाक चेॽया सेगुम्पाकचि योक्मेतुचि॥ 28न्हाङा साउल ङ्खाचिनुङ् वाया, उङा यारुसालेम घाकपे मेङ्गिसिॽले हाङ्बागा उनिङ्बे नुसाला खेम्मेतुचि॥ 29न्हाङ् गिरिक चेॽया चेक्खुबा याहुदिचिनुङ् चा लुखुसा न्जाया, ङ्खाॽनिङ्गो ङ्खाचिङा उङ् सिमा म्मितुक्सा॥ 30खा चेॽया बिस्वासि फुनुन्छाचिङा था न्दोक्तुहोङ् उङ् काइसारिया साहारबे ङ्खेतु॥ न्हाङ् न्नाभाङ् टार्सास पोटि म्बाक्साहाक्सु॥
31न्हाङा याहुदिया, गालिल नुङ् सामारिया लिङ्खामबेॽहा छुम्वाङ्चिबे हाङ्हाङ् लेक्सा॥ बिस्वासिचिङा पाबित्तारा आत्माभाङ् उत्साहा न्दोक्तुहोङ् छुम्वाङ्चि उचुन लेङ्साङ् ङ्ख्या॥ चेलाचि निङ्वाफुमागा आदार चोक्साङ् ङ्वाया न्हाङ् बिस्वासिचि चा पुसाङ्-पुसाङ् ङ्ख्या॥
एनियास नुयाना
32पात्तुरुस च्हेन यो-खे घाक ठोङ् कोसाङ्-कोसाङ् लुड्डाबे ङ्वायाहा बिस्वासिचिगाबे चा तायाब्या॥ 33न्नाबे उङा एनियास बाङ्ना एको याॽमि तुप्सु, न्ना याॽमि ता फिम्बिलिङ् ओन्दाङ् नाहाङ्तो कुजे लेक्साहोङ् नेथाम लाबाब्यामासा॥ 34पात्तुरुसङा न्ना याॽमि लु, “ओ एनियास, खिरिस्ट येसुङा न्दा नुमेमेकाना, पोगाघोङ् न्नेथाम इगु!” ङ्खिङ्बेलामाङ् न्ना मुथिङ्गिरिक पोगा, न्हाङा लाम्मा याखुबा लेक्सा॥ 35न्ना याॽमि ङ्खाॽला नुयाना न्निसुहोङ् लुड्डा साहार नुङ् सारोन बाङ्ना ठोङ्बे वाखुबा घाक याॽमिचिङा हाङ्बा येसुबे बिस्वास न्जोगु॥
ताबिता नुयाना
36योप्पा साहारबे ताबिता उनिङ् वायाना एको मामु चेला वाया॥ (न्नागा उनिङ् गिरिकपे डोराकास साया, न्नागा तुम्बिला “किसा” ओम) उङ् याॽमिचिगा लागि उचुन्हा काम चोक्खुमा नुङ् तुखिसुम्बाचि फाखुमा साया॥ 37ङ्खिङ्बेला उङ् तुगाब्याहोङ् स्या, न्हाङा याॽमिचिङा उका लास ङ्वासिहोङ् तोप्पारिक्ना तालाबे ङ्खेतुहोङ् ङ्युक्सु॥ 38योप्पा लुड्डा साहारभाङ् नाजिक साया॥ चेलाचिङा पात्तुरुस लुड्डाबे वान्नेॽना बाङ्ना ङ्खेप्सुहोङ् उङ् लाल्लासे हिप्पाङ् याॽमिचि म्बाक्सुचि॥ न्हाङा ङ्खाचि पात्तुरुसकाबे ख्याचिहोङ् “आनिङ्गा पाङ्बे हानि आबा” लुसाङ् उङ्चि मुक फाक्ताचुचि॥
39ङ्खाचिगा चेॽया खेप्सुहोङ् पात्तुरुस चा त्यार लेक्सा, न्हाङ् ङ्खाचिनुङ् योप्पाबे ख्या॥ उङ्चि न्नाबे न्दासुहोङ् याॽमिचिङा पात्तुरुस तोप्पारिक तालाबे ङ्खेतु॥ न्हाङा न्नाबेॽहा घाक लाङ्निमाचि च्हेन पात्तुरुसका इघुरुम ङ्येबाहोङ्, ताबिता उङ्चिनुङ् वायानिङ् उङा थुरुहा तेक सोॽमेसाङ्, इब्बे-इब्बे ङ्हाबा॥
40पात्तुरुसङा घाक याॽमिचि कोठाभाङ् पाखा पाक्साहाक्सुचिहोङ् लाङ्छुकपे युङा, न्हाङ् निङ्वाफुमानुङ् पार्थाना चोगा॥ न्हाङा न्ना लास पोटि हिक्साहोङ् खाॽला लु, “ओ ताबिता, पोगा!” न्हाङा न्नाङा उमिक थागुचि, न्हाङ् उङा पात्तुरुस निसुहोङ् पोगाहोङ् युङा॥ 41पात्तुरुसङा उका उमुकपे लाबुहोङ् पोगु, न्हाङा बिस्वासिचि नुङ् लाङ्निमाचि काचिहोङ् स्यानाभाङ् फेरि हिङ्गिलिक लेक्साना ताबिता उङ्चि जिम्मा पिचि॥
42खा चेॽया योप्पा घाकपे हिसा, न्हाङ् प्याक याॽमिङा हाङ्बा येसुबे बिस्वास न्जोगु॥ 43न्हाङ् पात्तुरुस योप्पाबे एहिलेन ह्वारिक्का काम चोक्खुबा सिमोनगा पाङ्बे वाया॥
Currently Selected:
सेगुम्पाक 9: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
