सेगुम्पाक 7
7
इस्तिफानासङा नुसाला खेम्मेतुचिहा
1न्हाङा मा-हाङ्खुबाङा इस्तिफानास छिम्दु, “खाचिङा ङ्गामेहा चेॽया जेप्पा ओम?”
2उङा पोलोवा पिचि, “ओ आप्पा-आफाङ्, आफुआनुन्छाचि, आचेॽया खेप्सानुम! एङ्गा पुर्खा आब्राहाम हारान साहारबे खेॽमाहाक्निङ् ओन्दाङ् उङ् मेसोपोटामिया लिङ्खामबे वायानिङ् माहिमागा निङ्वाफुमाङा एको सेन्चि पि॥ 3सेन्चिबे निङ्वाफुमाङा खाॽला लु, ‘ना खाम्युक नुङ् ङ्गा आफान्ताचि नाओचिघोङ् का सोॽमेॽनेन्ना खाम्युकपे ख्या॥’#उथुक १२:१
4“न्हाङा उङ् काल्दिचिगा खाम्युकपाहाङ् लोन्दाहोङ् हारानबे ख्या, न्हाङ् न्नाबेॽमाङ् वामा तारोक्तु॥ न्नाबे उका उप्पा स्या, न्हाङ् निङ्वाफुमाङा उङ् न्ना खाम्युकभाङ् हेन्सेन न्निङ्दा वामासिइवागाना ना खाम्युकपे ता॥#उथुक ११:३१; १२:४ 5ङ्खिङ्बेला निङ्वाफुमाङा उङ् न्ना खाम्युकपे लाङ् तुॽमाना ठोङ् चा म्बिन॥ ङ्खाॽनिङ्गो ‘ना खाम्युक न्दा नुङ् ङ्गा सान्तानचि पिमेॽनेनिन्हा’ भोङ् बाचा पि॥#उथुक १२:७; १३:१५; १५:१८; १७:८ ङ्खिङ्बेला आब्राहामगा एको चा उच्याचि म्मायानिन॥ 6हेक्साङ् निङ्वाफुमाङा उङ् खाॽला लु, ‘ङ्गा सान्तानचि माङ्दुना खाम्युकपे ङ्खेमेहोङ् ङ्वामे, न्हाङ् न्नाबेॽहा याॽमिचिङा ना होम्बोक फिम्बिलिङ् सोम्मा उङ्चि नोकोर न्जोग्वाचिहोङ् ङ्युक्स्वाचि॥ ङ्खिङ्बेला न्नाबेॽहा याॽमिचिङा तुक्नुङ् तुखि म्बिवाचिहा॥’ 7निङ्वाफुमाङा खाॽला चा लु, ‘ङ्खाॽनिङ्गो ङ्खा तुखि पिखुबा घाक याॽमिचि का दान्डा पिवाङ्चिङ्, न्हाङा ङ्गा सान्तानचि न्ना खाम्युकपाहाङ् न्लोन्दारामेहोङ् ना ठोङ्बेॽमाङ् उङ्चिङा का आराधाना चोङ्मेहा॥’#उथुक १५:१३-१४
8“न्हाङा निङ्वाफुमाङा आब्राहामनुङ् बाचा थुन्दु, न्ना बाचा मेमुॽनिमागा लागि सालुङ्बे खाताना चोक्माना आग्गे पिचि॥ न्हाङा आब्राहामगा उच्या इसाहाकका वाम लेक्सा, आब्राहामङा उच्या वायाना ताम्ना#७:८ आठाउ लेनबे खाताना चोक्तुबि॥ इसाहाकङा चा उच्या याकुब न्हाङा याकुबङा चा उका घाक एहिच उच्याचिगा खाताना चोक्तुबिचि॥ न्ना याकुबका एहिच उच्या बाबुचि माङ् एङ्गा पुर्खाचि न्लेक्सा॥#उथुक १७:१०-१४; २१:२-४; २५:२६; २९:३१–३५:१८
9“याकुबका उच्या योसेफ उफुचिङा उङ्चि नाङ्हेन्दु, न्हाङा मिस्रा खाम्युकपेॽहा याॽमिचिबे ङ्ङिनुचो॥ न्हाङ् उङ् ङ्खाचिगा नोकोर लेक्सा, ङ्खाॽनिङ्गो निङ्वाफुमा उङ्नुङ् वायाहोङ्#उथुक ३७:११,२८; ३९:२,२१ 10निङ्वाफुमाङा उङ् घाक तुखिभाङ् फोक्सु, न्हाङ् उचुन्ना बुद्दि पि॥ न्हाङा फारो हाङ्ङा योसेफ मिस्रा खाम्युक नुङ् उका घाक हाङ्पाङ्गा माडा-खाङ्खाङ्बा चोगु॥#उथुक ४१:३९-४१
11“न्हाङा मिस्रा खाम्युक नुङ् कानान खाम्युकपे माडा आनिकाल पोक्तुहोङ् प्याक तुखि लेक्सा, न्हाङा एङ्गा पुर्खाचिङा चाचिॽया न्दोक्तुनिन॥#उथुक ४२:१-२ 12ङ्खाॽनिङ्गो याकुबङा मिस्राबे प्याक चाचिॽया वान्नेहाभोङ् खेप्सुहोङ् उच्याचि न्ना खाम्युकपे इम्ना खेप पाक्सुचि॥ 13उङ्चि हेकोना खेप चाचिॽया लासे ङ्ख्यानिङ् योसेफङा उफुनुन्छाचि ‘का योसेफङान’ भोङ् चिनातोक्मेतुचि॥ ङ्खिङ्बेलामाङ् फारो हाङ्ङा चा योसेफका पाङ्बेॽहा याॽमिचिगा उतुम्बे था तोक्तु॥#उथुक ४५:१,१६ 14न्हाङ् योसेफङा उप्पा याकुब नुङ् उका घाक आफान्ताचि मिस्राबे काचि॥#उथुक ४५:९-१०,१७-१८; ४६:२७ उङ्चि घाक लाफा#७:१४ पाचाहात्तार जाना न्साया॥ 15याकुब ङ्खा घाक खेतुचिहोङ् मिस्राबे ख्या॥ हेक्साङ् याकुब नुङ् एङ्गा एहिच छोङ्गा पुर्खाचि न्नाबेॽमाङ् न्स्या॥#उथुक ४६:१-७; ४९:३३ 16उङ्चिगा लास साकेम बाङ्ना ठोङ्बे ङ्खेतुचिहोङ् ङ्हुम्दुचि॥ न्ना लाम्धाङ् आब्राहामङा हामोरगा उच्या बाबुचिभाङ् इनुक्सा॥#उथुक २३:३-१६; ३३:१९; ५०:७-१३; याहोसु २४:३२
17“ङ्खाॽनिङ्गो निङ्वाफुमाङा आब्राहामनुङ् चोगुना बाचा पुरा लेङ्माना बेला ताहेक्सासानिङ् मिस्राबे एङ्गा इजिरेलि याॽमिचि प्याक पुसाङ् ङ्ख्या॥#पारास्थान १:७-८ 18न्हाङा प्याक फिम्बिलिङ् हेक्साङ् न्नाबे योसेफ चिनामेन्दोक्खुबा एको याॽमि हाङ् लेक्सा॥ उङा योसेफका उतुम्बे इहाचा था म्मायान॥ 19उङा एङ्गा पुर्खाचि लेम्चासाङ् तुक्नुङ् तुखि पिचि, न्हाङा बाबु पिछाचि न्सिनिभोङ् ङ्वायाना सोलोक लेम्नाहाङ्मेतुचि॥#पारास्थान १:१०-११,२२
20“ङ्खिङ्बेलामाङ् मोसागा वाम लेक्सा॥ उङ् निङ्वाफुमाङा उसाप थाक्तुना याॽमि साया॥ मोसा सुम मोनाम सोम्मा उप्पा-उमाङा पाङ्बे चुमामासाचु॥#पारास्थान २:२ 21ङ्खाॽनिङ्गो नाहाङ्तो चुम्नुङ्मा ङ्यासान्चुन्होङ् पाखा युक्सामासाचु॥ ङ्खिङ्बेला फारो हाङ्गा उच्या मामुङा तुप्सु न्हाङ् खेतुहोङ् उका उच्या लोॽवा चोगुहोङ् हिङु॥#पारास्थान २:३-१० 22मोसाङा मिसिरिचिगा उतुम्बे प्याक चेॽया चिन्मा तोक्तु॥ न्हाङा उङ् चेक्माबे नुङ् कामबे साक्तिसालि लेङ्साङ् ख्या॥
23“मोसाङा नाखेङ् फिम्बिलिङ् तासुनिङ् उका इजिरेलि उफु-उनुन्छाचिनुङ् तुप्मा मिता॥#पारास्थान २:११-१५ 24इलेन उङा एको मिसिरि याॽमिङा एको इजिरेलि याॽमि मोक्मास्याना निसु॥ उङा न्ना इजिरेलि मोक्खुबा मिसिरि सिसुहोङ् बाद्ला लियाचोगु॥ 25निङ्वाफुमाङा इजिरेलि याॽमिचि फोङ्मागा का पाक्साङ्ना ओम बाङ्ना चेॽया ङ्ङास्वाहा लोप्पिभोङ् मोसा मितामासा, ङ्खाॽनिङ्गो ङ्खाचिङा ङ्खा चेॽया ङ्ङासुनिन॥
26“हेक्साङ्ना लेन मोसाङा हिप्पाङ् इजिरेलिचि उङ्चि-उङ्चि चुङ्मास्याचिहा निसुचि॥ न्हाङा ङ्खाचि तोङ्चिनि भोङ् मोसाङा खाॽला लुचि, ‘हाओ काम्निभाकचि, न्जिङ्दा गो उफु-उनुन्छाचिगान, इजाङ् खिमेचिघा?’
27“ङ्खाॽनिङ्गो न्ना इसिॽनुङ् चोक्मा योक्खुबाङा मोसा यो चोन्नाहाङ्साङ् लु, ‘न्दा इसाङा आन्चिङ्गा हाङ् नुङ् निरिक्राङ्बा लेङ्से पाक्सागाना? 28आसेन मिसिरि सिसुगाना लोॽवा का चा सिमा मितामाङ्गाना?’ 29खा चेॽया खेप्सुहोङ् मोसा मिस्राभाङ् खुसाख्या॥ न्हाङ् मिधान बाङ्ना खाम्युकपे ख्याहोङ् न्नाबे वामा तारोक्तु॥ न्नाबे वासाङ् ख्यानिङ् न्नाबेॽमाङ् थाङ् छेङा, न्हाङ् हिप्पाङ् उच्या बाबुचि चा ङ्वाया॥#पारास्थान १८:३-४
30“न्हाङा नाखेङ् फिम्बिलिङ् हेक्साङ् सिनायि चोम्कोङ्गा इसा चा मेॽनिङ्ना सुन्नेना ठोङ्बे हान्दुक्साना बुट्टागा मिलेपपे एको वालोक्दुत मोसागाबे ओता॥#पारास्थान ३:१-१० 31खा निसुहोङ् मोसा आच्चाम्मा एता न्हाङ् उचुन सोॽमा तायानाभोङ् न्नागा उयुम्बे ख्यानिङ् हाङ्बा निङ्वाफुमागा ओसेम्ला खेप्सु, 32‘का ङ्गा पुर्खाचि आब्राहाम, इसाहाक, नुङ् याकुबका निङ्वाफुमाङान॥’#पारास्थान ३:६ खा खेप्सुहोङ् मोसा किसिॽमाङा योङ्मा तारोक्तु न्हाङा न्ना सोॽमाना उका साहास न्दायान॥
33“न्हाङा हाङ्बा निङ्वाफुमाङा लु, ‘ङ्गा लाङ्खोप फुक्सुचि, इजाङ्बाङ्निङ् न्दा येबागाना ठोङ् पाबित्तारा ठोङ् ओम॥ 34मिस्रा खाम्युकपे आका याॽमिचिङा ङ्ङाङ्मासिमेहा तुखि का निसुक्सुङ्, न्हाङा उङ्चिङा हाप्साङ् न्जोगाहा पार्थाना का खेप्सुक्सुङ्॥ न्हाङामाङ् ङ्खाचि मिसिरिचिगा मुकपाहाङ् फोङ्मागा का उक्सामाङ्ना॥ हाकु खा कामगा लागि न्दा मिस्राबे पाङ्मेॽनेन्ना॥’
35“न्ना मोसा माङ् उका इजिरेलि याॽमिचिङा ‘न्दा इसाङा आनिङ्गा हाङ् नुङ् निरिक्राङ्बा लेङ्से पाक्सागाना?’ लुसाङ् इन्कार न्जोगुक्सा॥ ङ्खाॽनिङ्गो निङ्वाफुमाङा बुट्टाबे ओताना वालोक्दुतभाङ् उङ्माङ् ङ्खाचि फोङ्खुबा नुङ् तिक्खुबा चोगुहोङ् पाक्सु॥ 36उङामाङ् इजिरेलिचि मिस्रा खाम्युकपाहाङ् लोन्दुचि॥ न्हाङा ङ्खिङ्बेला मिस्राबे, लाल सामुन्दाराबे नुङ् नाखेङ्#७:३६ चालिस फिम्बिलिङ् सोम्मा इसा चा मेॽनिङ्ना सुन्नेना ठोङ्बे आच्चाम्मा-आच्चाम्माहा काम नुङ् चिङ्गो सोॽमेतुचि॥#पारास्थान ७:५; १४:२१; निप १४:३३
37“न्ना मोसाङा माङ् इजिरेलिचि खाॽला लुक्साचि, ‘निङ्वाफुमाङा का सेगाङ्ना लोॽवामाङ् न्निङ्गा याॽमिचिभाङ् न्निङ्गा लागि एको निङ्वाफुमाभाङ् चेक्खुबा पाक्सिबिइवाघा॥’#ब्यावास्था १८:१५,१८ 38सिनायि चोम्कोङ्गा उसामबे इसा चा मेॽनिङ्ना सुन्नेना ठोङ्बे प्याक इजिरेलि याॽमिचि न्छुप्सानिङ् न्ना मोसा माङ् ङ्खाचिनुङ् वाया॥ मोसा वालोक्दुतनुङ् सिनायि चोम्कोङ्बे चेक्ता, न्हाङा उङामाङ् वालोक्दुत पाहाङ् तोक्तुहा हिङ्लुङ्गा चेॽया इजिरेलिचि खेम्मेतुचि॥#पारास्थान १९:१–२०:१७; ब्यावास्था ५:१-३३
39“ङ्खाॽनिङ्गो एङ्गा पुर्खाचिङा उका चेॽया खेम्मायि ङ्खेप्सुनिन, येम्मा चा ङ्येनुनिन॥ न्हाङा मोसा नाॽनामाहोङ् मिस्रा खाम्युकपेॽमाङ् लाङ्खेॽमाना निङ्वा न्जोगा॥ 40ङ्खाचिङा मोसागा उफु हारुन खाॽला न्लु, ‘आनिङ्गा लागि कानिङ् लाम्बु सोॽमेखुबा माङ्चि चोक्ताब्या॥ इजाङ्बाङ्निङ् कानिङ् मिस्रा खाम्युकपाहाङ् लोॽनाम्खुबा मोसा हेॽने ख्याना, इङा हाना कानिङ् इहाचा था मान्ना॥’#पारास्थान ३२:१ 41न्हाङा ङ्खाचिङा एको बाछागा मुर्ति न्जोगुहोङ् मुर्तिगा ओन्दाङ् बोलि न्दिसु॥ न्हाङ् उङ्चिङा न्जोगुहा कामबे चोन्सिसाङ् होक्ता ङ्ङेन्दु॥#पारास्थान ३२:२-६ 42न्हाङामाङ् ङ्खाचि निङ्वाफुमाङा ताङ्खेङ् नुङ् चोक्चोकिचिगा पुजा न्जोगुचिनिभोङ् लेहाक्सुचि॥ खा चेॽयागा उतुम्बे धार्मासाप्लाबे निङ्वाफुमाभाङ् चेक्खुबाचिङा खाॽला न्छेप्तुक्सु–#आमोस ५:२५-२७
‘ओ इजिरेलि याॽमिचि, न्निङ्दा नाखेङ् फिम्बिलिङ् सोम्मा
इसा चा मेॽनिङ्ना सुन्नेना ठोङ्बे वाइगानिङ् का बोलि पियाघायि?
43ङ्खाॽनिङ्गो न्निङ्दा गो मोलेख बाङ्ना माङ्गा#७:४३ देउतागा थान थान
न्हाङा रेफान बाङ्ना चोक्चोकि माङ्गा मुर्ति चोगुम्गाहोङ्
न्निङ्दा ङ्खाचि पुजा चोगुम्चिम्गा॥
न्हाङामाङ् हाकु का न्निङ्दा दान्डा पिॽमागा बेबिलोन हाक्निङ्चा यो पाङ्मेॽनेनिन्हा॥’#आमोस ५:२५-२७
44“इसा चा मेॽनिङ्ना सुन्नेना ठोङ्बे एङ्गा पुर्खाचि ङ्वायानिङ् उङ्चिनुङ् निङ्वाफुमा ओॽमाना पाबित्तारा पाल वाया॥ मोसाङा न्ना पाबित्तारा पाल च्हेन निङ्वाफुमाङा लुना लोॽवामाङ् चोगुक्सा॥#पारास्थान २५:९,४० 45हेक्साङ् निङ्वाफुमाङा ना खाम्युकपे ङ्वायाहा हेकोहा जातिगा याॽमिचि इक्ताहाक्सुचि न्हाङ् याहोसु नुङ् एङ्गा पुर्खाचिङा ना खाम्युक ङ्हेचोनिङ् न्ना पाबित्तारा पाल चा उङ्चिनुङ् ङ्खुरा॥ न्हाङा हाङ् दाउदका पालो सोम्मा न्ना पाल उङ्चिनुङ् वाया॥#याहोसु ३:१४-१७
46“हाङ् दाउदङा निङ्वाफुमा चोन्सिमेतु, न्हाङा याकुबङा सेवा चोगुना निङ्वाफुमागा लागि एको पाङ् चोक्मा तोक्तुङ्निभोङ् उमुक फाक्तुचि॥#२ सामुएल ७:१-१६; १ उथुक्साला १७:१-१४ 47ङ्खाॽनिङ्गो न्ना पाङ् च्हेन उच्या सोलोमानङा चोगु॥#१ हाङ् ६:१-३८ 48ङ्खाॽनिङ्गो याॽमिचिगा मुकङा चोगाना पाङ्बे निङ्वाफुमा ङ्वामेन्ना॥ निङ्वाफुमाभाङ् चेक्खुबाचिङा खाॽला ङ्गायामा,
49‘निङ्वाफुमा खाॽला कामे,
वालोक आका हाङ्युक्थाम ओम, न्हाङ् ताम्दाङ्फुमा आका आलाङ् तुॽमाना ठोङ् ओम॥
ङ्खाॽलाभोङ् न्निङ्दा आका लागि इमिन्ना पाङ् चोक्मा यास्वाम्गाना? का आराम चोक्माना ठोङ् हेॽने चोग्वाम्गाना? 50वालोक नुङ् ताम्दाङ्फुमाबे वान्नेहा खा घाकथोक का आमुकङा चोगुङ्हा मेन्नायि?’#यासाइया ६६:१-२
51“ओ किहि काप्खुबाचि! न्निङ्दा निङ्वाफुमागा चेॽया खेम्मा म्मित्वाम्गान, न्हाङा पाबित्तारा आत्मा साधाइ इन्कार चोग्वाम्गा॥ न्निङ्गा पुर्खाचि इमिन न्जोगा, न्निङ्दा चा ङ्खाॽलामाङ् चोगिॽवागा॥#यासाइया ६३:१० 52न्निङ्गा पुर्खाचिङा निङ्वाफुमाभाङ् चेक्खुबाचि घाक तुखि म्बिचि॥ ङ्खाचिङा निङ्वाफुमाङा बाचा चोगाना धार्मोति याॽमि तामेॽनाभोङ् ओन्दाङ् योक्मेखुबाचि चा न्सिसुचि॥ हाकु न्निङ्दा च्हेन न्ना तायाना धार्मोति याॽमिगा बिरुद्दाबे पोगिघोङ् सिसुम्गा॥#मात्ति ५:१२ 53न्निङ्दा वालोक्दुतचिगा मुकपाहाङ् ब्यावास्था गो तोक्तुक्साम्गा, ङ्खाॽनिङ्गो ङ्खा पालाना न्जोगुम्गान॥”
स्तिफानास लुङ्खाकङा न्लेप्तुना
54स्तिफानासका खा चेॽया ङ्खेप्सुहोङ् माछुम्माबेॽहा याॽमिचि लोक खोॽमाङा मि न्लेक्साहोङ् उङ्चि केङ् छिम्मा न्दारोक्तुचि॥ 55ङ्खाॽनिङ्गो स्तिफानास च्हेन पाबित्तारा आत्मागा साक्तिङा इप्तुहोङ् वालोकपोटि सो॥ ङ्खिङ्बेला उङा निङ्वाफुमागा माहिमा नुङ् येसु निङ्वाफुमागा छुप्ताङ् पोटि येबामासाना निसु॥ 56न्हाङा खाॽला काया, “सोयानुम, का वालोक होसाना नुङ् याॽमिगा उच्या निङ्वाफुमागा छुप्ताङ् पोटि येबाना निमासिम्मेङ्ना!”
57ङ्खिङ्बेला ङ्खा याॽमिचि तुक्नुङ् ङ्ओक्ताभोक्सा, न्हाङा उङ्चि नाभाकचि हुॽनिसाङ् छोपान्जोगु॥ 58ङ्खाचिङा स्तिफानास लुङ्खाकङा लेम्सिॽमागा साहारभाङ् पाखा न्साहेतु न्हाङा ङ्खा चेॽयागा साचिचिङा उङ्चिगा तेक म्फुक्सुचिहोङ् साउल बाङ्ना वेन्चा ङ्गुमेतुहोङ् स्तिफानास लुङ्खाकङा लेप्मा न्दारोक्तु॥
59ङ्खाचिङा लुङ्खाकङा न्लेप्मास्यानिङ् स्तिफानासङा खाॽला पार्थाना चोगा, “ओ हाङ्बा येसु, आका आत्मा लियाचोगु॥” 60न्हाङ् उङ् लाङ्छुकपे युङाहोङ् माडा सेम्लाबे खाॽला काया, “ओ हाङ्बा, खा उङ्चिङा न्जोगुहा पापका दान्डा उङ्चिबे ङ्ङानिन्नि॥” खिङ् कायाहोङ् उका ओसोक्मा ख्या॥
Currently Selected:
सेगुम्पाक 7: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
