सेगुम्पाक 6
6
ला जाना याॽमि न्सेगुचिहा
1ङ्खा लेनचिबे चेलाचि पुसाङ्-पुसाङ् ङ्खेॽमास्या, ङ्खिङ्बेला गिरिक चेॽया चेक्खुबा याहुदिचिङा हिब्रु चेॽया चेक्खुबा याहुदिचिगा बिरुद्दाबे गान्गान न्जोगा॥ ङ्खा गिरिक चेॽया चेक्खुबा याहुदिचिङा “लाङ्निमाचि लेन्लेन हाम्बिॽमाहा चाम्योङ्बाबे आनिङ्गा लाङ्निमाचि उचुन न्सोन्चिनिन्हा” भोङ् ङ्गाया॥
2ङ्खाॽलाहोङ्माङ् एहिच सेगुम्पाकचिङा घाक चेलाचि ङ्गाचिहोङ् खाॽला न्लुचि, “आफुआनुन्छाचि, कानिङ् निङ्वाफुमागा चेॽया चेक्माहा काम नाॽनामाहोङ् चामा-उङ्मागा तार्तुम्बि तोङ्माहा कामबे लाचोक्मा उचुन न्लेङ्मेन्हा॥ 3न्हाङामाङ् न्निङ्गा लुम्भाङ् ला जाना घाकङा आदार न्जोगुचिहा, बुद्दिमानि नुङ् पाबित्तारा आत्मागा साक्तिङा इप्तुचिहा याॽमिचि सेगानुम्चिम॥ ङ्खाचि कानिङ् खा कामगा जिम्मा पिवाम्चिम्ङाहा॥ 4न्हाङा कानिङ् च्हेन साधाइ पार्थाना नुङ् निङ्वाफुमागा चेॽया चिन्माहा कामबे लाचोगिॽवाङ्हा॥”
5सेगुम्पाकचिगा खा चेॽयाङा घाक चेलाचिगा उङ्चि निङ्वा ताया॥ न्हाङा ङ्खाचिङा बिस्वास नुङ् पाबित्तारा आत्माङा इप्तुना स्तिफानास, न्हाङा फिलिप, पार्खारास, निक्नोर, तिमोन, पार्मिनास, न्हाङ् याहुदि धार्माबे तायाना एन्टिओखिया साहारबेॽना निकोलाउस न्सेगुचि॥ 6ङ्खाचिङा ङ्खा न्सेगुचिहा याॽमिचि सेगुम्पाकचिगाबे न्दाचि॥ न्हाङा सेगुम्पाकचिङा ङ्खाचि छोङ्बे उङ्चि मुक युङ्साङ् पार्थाना न्जोक्तुबिचि॥
7निङ्वाफुमागा चेॽया ङ्खाॽलामाङ् हिसाङ् ख्या॥ हाङ्बा येसुगा चेलाचि यारुसालेमबे प्याक पुसाङ्-पुसाङ् ङ्ख्या, न्हाङा प्याक हाङ्खुबाचिङा चा येसुबे बिस्वास न्जोगु॥
स्तिफानास न्लाबुना
8स्तिफानासङा च्हेन हाङ्बाभाङ् प्याक आसिक नुङ् साक्ति तोक्तुक्सा॥ उङा याॽमिचिगा उलुम्बे प्याक आच्चाम्माहा काम नुङ् चिङ्गो सोॽमेतुचि॥ 9ङ्खाॽनिङ्गो इखिङ् याॽमिचिङा च्हेन उका बिरोध चोक्मा न्दारोक्तु॥ ङ्खाचि याहुदि छुम्पाङ्गा “स्वातान्तारा” बाङ्ना छुमगा याॽमिचि न्साया॥ ङ्खाचि आलेक्जेन्डिरिया साहार न्हाङा किलिकिया, कुरेनि नुङ् एसियाभाङ् न्दायाहा याहुदिचि न्साया॥ ङ्खाचि घाक न्दोङाहोङ् स्तिफानासनुङ् लुखुसा चामा न्दारोक्तु॥ 10ङ्खाॽनिङ्गो पाबित्तारा आत्माङा स्तिफानास खाॽलाना बुद्दि नुङ् साक्ति पि, उङ् चेक्तानिङ् इसाङा चा उका बिरोध चोक्मा ङ्यासुनिन॥
11न्हाङा स्वाक ङ्खाचिङा एकोहिप्पाङ् याॽमिचि खाॽला कायानिभोङ् न्लुचि, “कानिङ् ना याॽमि मोसा नुङ् निङ्वाफुमागा बिरुद्दाबे चेक्ताना खेप्सुम्ङाना॥”
12खाॽला ङ्खाचिङा याॽमिचि नुङ् माछुम्माबे वाखुबा हाङ्गुम्बाचि न्हाङा धार्मासाप्ला चिन्खुबाचि चा न्थेन्दुचि॥ न्हाङ् ङ्खाचिङा स्तिफानास याहुदिचिगा माछुम्माबे न्लाबुरा॥ 13न्हाङा ङ्खाचिङा स्तिफानास मेन्हा आप्दिक एन्मागा न्सेगुचिहा याॽमिचि चा न्दाचि॥ ङ्खाचि खाॽला ङ्गाया, “ना याॽमि गो साधाइ एङ्गा पाबित्तारा निङ्वाफुमापाङ् नुङ् मोसाङा पियाहा ब्यावास्थागा बिरुद्दाबे चेङ्मेॽना॥ 14न्हाङा नाङा गो, ‘नासारातपेॽना येसुङा ना निङ्वाफुमापाङ् होराहाक्स्वा, न्हाङा मोसाङा कानिङ् पियाहा ब्यावास्थाबेॽहा चेॽया चा हेकोहा चोङ्बिमेहा’ भोङ् कायाना कानिङ् खेप्सुक्सुम्ङाना॥”
15ङ्खिङ्बेला माछुम्माबे वाखुबाचि घाकङा उङ् उचुन न्सोनिङ् उका उनाचिक च्हेन वालोक्दुतका लोॽवा ओम न्निसु॥
Currently Selected:
सेगुम्पाक 6: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
