सेगुम्पाक 5
5
हानानिया नुङ् साफिरा
1ङ्खाॽनिङ्गो न्नाबे एको हानानिया बाङ्ना याॽमि वाया, न्नागा उहिङ्खुमागा उनिङ् साफिरा साया॥ उङ्चिङा मिॽयाङ् लाम्धाङ् इनाचायाचुहोङ् 2मिॽयाङ् याङ् चुमिॽयाचु न्हाङा मिॽयाङ् च्हेन हानानियाङा सेगुम्पाकचिगाबे ता॥
3ङ्खाॽनिङ्गो ङ्खिङ्बेला पात्तुरुसङा छिम्दु, “ओ हानानिया, न्दा न्निङ्वाबे साइतान राज्या चोक्मा पिगाहोङ् इजाङ् पाबित्तारा आत्मा लेमुच्वागाना? न्जिङ्दा लाम्धाङ् इनाचायाचुगाहोङ् इजाङ् मिॽयाङ् याङ् चुमिॽयाचुघा? 4न्ना मेइन्चाले सोम्मा चा न्जिङ्गामाङ् साया, न्हाङ् इनाचायाचुगाहोङ् चा ङ्खा घाक याङ् न्जिङ्गामाङ् न्सायान्हायि? खाॽला इसिॽहा काम चोक्माना निङ्वा इमिन न्जिङ्गा न्निङ्वाबे तायाहा? न्जिङ्दा गो याॽमिचि मेन्ना, ङ्खाॽनिङ्गो निङ्वाफुमा लेमाचायामाचुगाना!”
5हानानियाङा खा चेॽया खेप्सुहोङ् सोलोक खामबे काक्कुलिक काक्साख्या, न्हाङ् उका ओसोक्मा ख्या॥ न्हाङा खा चेॽया खेम्खुबाचि घाक तुक्नुङ् ङ्गिसिता॥ 6न्हाङ् एकोहिप्पाङ् वेन्चाबाङ्चि न्दायाहोङ् हानानियागा लास तेकङा ङ्गितु न्हाङ् पाखा ङ्खेतुहोङ् ङ्हुम्दु॥
7न्नागा सुम घान्टा हेक्साङ् हानानियागा उहिङ्खुमा साफिरा चा न्नाबे ताया॥ उङा उहिङ्खुबा स्यानाभोङ् था म्मायान॥
8पात्तुरुसङा उङ् चा छिम्दु, “न्जिङ्दा लाम्धाङ् ङ्खिङ्बेॽमाङ् इनाचायाचुगाना ओम?”
साफिराङा पोलोवा पि, “ओम, ङ्खिङ्बेॽमाङ् ओम॥”
9न्हाङा पात्तुरुसङा उङ् खाॽला लु, “खाॽला इजाङ् न्जिङ्दा हाङ्बागा आत्मा लेम्चामा योगाचुगाना? खेप्सु, ङ्गा ङ्हिङ्खुबा हुम्खुबाचि न्ना वालाम्बुङ्बे न्दायाब्यामाहा॥ ङ्खाचिङा न्दा चा ङ्खाॽलामाङ् ङ्हुम्मेकाना॥”
10ङ्खिङ्बेलामाङ् साफिरा पात्तुरुसका उलाङ् युम्बे काक्कुलिक काक्साख्या, न्हाङ् उका चा ओसोक्मा ख्या॥ वेन्चाबाङ्चि पाङ्होङ्बे ङ्ङुयानिङ् उङ् स्याना न्निसुहोङ् उका लास पाखा ङ्खुहेतु न्हाङ् उहिङ्खुबागा उयुम्बे ङ्हुम्दु॥ 11न्हाङा खा घाक चेॽया निखुबाचि नुङ् छुम्वाङ्बेॽहा घाक याॽमिचि तुक्नुङ् ङ्गिसिता॥
सेगुम्पाकचिङा आच्चाम्माहा काम न्जोगुहा
12सेगुम्पाकचिङा प्याक आच्चाम्माहा काम नुङ् चिङ्गो याॽमिचिगा उलुम्बे न्सोॽमेतुचि॥ न्हाङा घाक बिस्वास चोक्खुबाचि एको निङ्वागा न्लेक्साहोङ् सोलोमानगा दालान बाङ्ना ठोङ्बे साधाइ न्छुप्सा॥ 13बिस्वास मेन्जोक्खुबा याॽमिचिङा उङ्चि उचुन आदार न्जोगुचि, ङ्खाॽनिङ्गो उङ्चिनुङ् तोङ्माना साहास चोक्मा ङ्यासानिन॥ 14ङ्खोङ्चा बिस्वास चोक्खुबा बाबु-मामुचि प्याक-प्याक पुसाङ् ङ्ख्या॥ 15पात्तुरुस लाम्मेॽनिङ् उका लालामे से होङ्चा तुखाबाङ्चि छोङ्बे आहोङ् उङ्चि न्नुनिभोङ् याॽमिचिङा तुखाबाङ्चि लाम्बु-लाम्बुबे ङ्युक्सुचि॥ 16यारुसालेमगा यो-खेहा साहारचिभाङ् चा न्नाबे प्याक याॽमिचि न्दाया॥ ङ्खाचिङा न्नाबे तुखाबाङ्चि नुङ् इसिॽहा मुइङा तुखि पिचिहा याॽमिचि न्दाचि, न्हाङा ङ्खाचि घाक न्नुया॥
सेगुम्पाकचिङा तुखि ङ्ङाङ्दुहा
17मा-हाङ्खुबा नुङ् उका सादुकि उकाम्चिङा सेगुम्पाकचि तुक्नुङ् नाहेम्मा न्दारोक्तुचि॥ 18न्हाङ् ङ्खाचिङा सेगुम्पाकचि न्लाबुचिहोङ् छेक्पाङ्बे न्छेक्तुचि॥ 19ङ्खाॽनिङ्गो न्ना सेॽनि हाङ्बागा वालोक्दुत तायाहोङ् छेक्पाङ्गा वालाम्बुङ् होसुबिचि, न्हाङा सेगुम्पाकचि पाखा लोन्दुचिहोङ् खाॽला लुचि, 20“हाकु न्निङ्दा निङ्वाफुमापाङ्बे खेइघोङ् मेन्सिमाना हिङ्लुङ्गा उतुम्बे घाक याॽमिचि खेम्मेतानुम्चिम॥” 21न्हाङा ङ्खा चेॽया ङ्खेप्सुहोङ् वान्दिक्ना लेन भेनिक नाम मेलोन्ले उङ्चि निङ्वाफुमापाङ्बे ङ्ङुयाहोङ् याॽमिचि चिन्मा न्दारोक्तुचि॥
ङ्खाॽनिङ्गो मा-हाङ्खुबा नुङ् उका उकाम्निभाकचि माछुम्माबे न्दायाहोङ् इजिरेलिचिगा घाक हाङ्गुम्बाचि माछुम्माबे ङ्गाचि न्हाङा सेगुम्पाकचि लाल्लासे छेक्पाङ्बे याॽमिचि म्बाक्सुचि॥
22ङ्खाॽनिङ्गो काङ्बाचि छेक्पाङ्बे न्दासुनिङ् सेगुम्पाकचि न्नाबे न्दुप्सुन्चिनिन, न्हाङ् न्लासाख्याहोङ् खाॽला न्लुचि, 23“कानिङ् छेक्पाङ्बे तासुम्ङानिङ् उचुन्माङ् वालाम्बुङ् छेक्तामासा, न्हाङा छेक्पाङ् कुखुबा किथिरिक्पाचि चा वालाम्बुङ्बे कुसाङ् ङ्येबामासा, ङ्खाॽनिङ्गो कानिङ् वालाम्बुङ् होसुम्ङानिङ् न्नाबे इसा चा म्मायानिन्हा॥”
24निङ्वाफुमापाङ्गा केप्टेन नुङ् खाङ्खाङ् हाङ्खुबाचिङा खा चेॽया ङ्खेप्सुहोङ्, “हाकु इलेङ्मेहा लोप्पि?” भोङ् उङ्चि आच्चाम्मा ङ्ङेता॥ 25ङ्खिङ्बेलामाङ् न्नाबे एको याॽमि तायाहोङ् खाॽला लुचि, “खेप्सानुम, न्निङ्दा छेक्पाङ्बे छेक्तुम्चिम्घा याॽमिचि गो यो निङ्वाफुमापाङ्बे याॽमिचि न्जिन्मासिमेहा॥” 26खा चेॽया खेप्सुहोङ् निङ्वाफुमापाङ्गा केप्टेनङा किथिरिक्पाचि खेतुचिहोङ् सेगुम्पाकचि लाल्लासे ख्या॥ उङ्चिङा सेगुम्पाकचि इच्चा मेन्जोक्ले ङ्ङाप्तुचि इजाङ्बाङ्निङ् याॽमिचिङा लुङ्खाकङा लेम्सिमेहा लोप्पिभोङ् उङ्चि ङ्गिसिता॥ 27ङ्खाचिङा सेगुम्पाकचि माछुम्मागा ओन्दाङ् ङ्येप्मेतुचि, न्हाङा मा-हाङ्खुबाङा छिम्दुचि, 28“हाकु नाहाङ्तो येसुगा उनिङ्बे इसा चा न्जिन्दानुम्चिम्निन भोङ् लुन्नुङ्नेन्सानिन्हा मेन्नायि? ङ्खाॽनिङ्गो खेप्सानुम, न्निङ्दा गो यारुसालेमबेॽहा घाक याॽमिचि चिन्दिक्सुम्चिम्घा॥ न्हाङा न्ना याॽमि न्सिसुनागा आप्दिक चा कानिङ् ले एम्मा मितामाघा?”#मात्ति २७:२५
29ङ्खाॽनिङ्गो पात्तुरुस नुङ् सेगुम्पाकचिङा ङ्खाचि खाॽलाना पोलोवा म्बिचि, “कानिङ् याॽमिचिगा चेॽया हाक्निङ् निङ्वाफुमागा चेॽयाङामाङ् खेम्माहा॥ 30न्निङ्दा कुरुसपे छुसिम्गाना येसु एङ्गा पुर्खाचिगा निङ्वाफुमाङा हिङ्गिलिक लेङ्मेतुक्सुना॥ 31उङ् निङ्वाफुमाङा हाङ् नुङ् मुक्ति पिखुबा चोगुहोङ् उका छुप्ताङ् उमुक पोटि युक्सुक्सु॥ खाॽला इजिरेलबेॽहा याॽमिचिङा पास्चाताप चोक्माना, न्हाङा पाप छेमा तोक्माना लाम्बु न्दोक्तुक्सु॥ 32खा चेॽयागा साचि कानिङ् वेतिङ्हा न्हाङा निङ्वाफुमाङा उका चेॽया येन्खुबाचि पियामाहा पाबित्तारा आत्माङा चा साचि पिॽमासिम्मेहा॥”
33न्हाङा खा चेॽया ङ्खेप्सुहोङ् माछुम्माबे न्छुप्साहा याॽमिचिगा तुक्नुङ् उङ्चि लोक खोता, न्हाङ् सेगुम्पाकचि सिमा म्मितुचि॥ 34ङ्खिङ्बेला गामालिएल बाङ्ना फारिसि माछुम्माबे चेङ् येबा॥ उङ् ङ्खाचि घाकङा आदार न्जोगुना धार्मासाप्ला चिन्खुबा साया॥ उङा सेगुम्पाकचि एक्छिन पाखा पाक्साहाक्सुचि॥ 35न्हाङा ङ्खा याॽमिचि खाॽला लुचि, “ओ इजिरेलबेॽहा याॽमिचि, खाचि न्निङ्दा इ चोघेक्सुम्चिम्गा, ङ्खा चेॽयाबे न्निङ्दा होस चोगानि! 36एहिच फिम्बिलिङ् ओन्दाङ् थुदास बाङ्ना एको याॽमि ताया॥ न्नाङा ‘काङान’ काया, न्हाङा ना होम्बोकहिङ् याॽमिचि चा उका हेक्साङ् लान्जोगा, ङ्खाॽनिङ्गो काङ्बाचिङा उङ् न्सिसुहोङ् उका हेक्साङ् लाचोक्खुबा याॽमिचि घाक ङ्हिसाख्याहोङ् नास न्लेक्साख्या॥ 37मिहेक्साङ् याॽमि निप्माना बेलाबे गालिलबेॽना याहुदा बाङ्ना याॽमि ताया॥ उका हेक्साङ् चा प्याक याॽमिचि लान्जोगा, ङ्खाॽनिङ्गो उङ् चा काङ्बाचिङा न्सिसु, न्हाङा उका हेक्साङ् लाचोक्खुबाचि चा ङ्हिसाख्याहोङ् नास न्लेक्साख्या॥
38“न्हाङामाङ् खा याॽमिचि न्दोक्तियानुम्चिम्निन लेहाक्सानुम्चिम भोङ् का न्निङ्दा साल्लाहा पिमेॽनेनिन्हा॥ इजाङ्बाङ्निङ् खाचिङा न्जिन्दुचिहा, न्जोगुहा चेॽया याॽमिभाङ् ओमभोङ् खा याॽमिचि नास न्लेङ्खेमेहा॥ 39ङ्खाॽनिङ्गो निङ्वाफुमाभाङ् ओमभोङ् न्निङ्दा खा याॽमिचि इच्चा चोक्मा ङ्यास्वाम्चिम्गान्हा॥ मानुङ्गो न्निङ्दा ले निङ्वाफुमागा बिरुद्दाबे पोगिघा लोॽवा लेक्सिॽवाघा!”
40माछुम्माबेॽहा याॽमिचिङा गामालिएलगा चेॽया ङ्येनु, न्हाङा ङ्खाचिङा सेगुम्पाकचि ङ्गाचिहोङ् कोर्राङा मोक्साङ् “हाकु नाहाङ्तो येसुगा उनिङ्बे चेक्माहा, चिन्माहा काम चोक्मा लेप्तिॽयानुम” भोङ् आग्गे म्बिचिहोङ् न्लेहाक्सुचि॥
41न्हाङा सेगुम्पाकचि माछुम्माभाङ् न्लोन्दाख्याहोङ् “कानिङ् गो निङ्वाफुमाङा येसुगा उनिङ्बे तुखि आङ्मा नुङ् आपामान साहाचोक्मा योग्या ठारेचोगाहा” भोङ् तुक्नुङ् न्जोन्दास्या॥ 42न्हाङा घाक लेन ङ्खाचि निङ्वाफुमापाङ्बे नुङ् पाङ्-पाङ्बे ङ्ख्याहोङ् येसुमाङ् मुक्ति पिखुबा हाङ् ओम बाङ्ना नुसाला खेम्मेॽमा न्लेप्तिन्चिनिन॥
Currently Selected:
सेगुम्पाक 5: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
