सेगुम्पाक 20
20
पावाल माकेडोनिया नुङ् गिरिस खाम्युकपे ख्याना
1घाक याॽमि स्वाक ङ्वायाब्याहोङ् पावालङा एफिसासबेॽहा बिस्वासिचि काॽमेतुचि न्हाङ् बिस्वासपे चात्तु लेङ्निभोङ् आर्ति पिचि॥ न्हाङा ङ्खाचिनुङ् बिदा लेक्साहोङ् उङ् न्नाभाङ् माकेडोनिया पोटि ख्या॥ 2माकेडोनियाबे तासुहोङ् न्नाबे चा उङा ठोङ्-ठोङ्बे खेसाङ् बिस्वासिचि उत्साहा पिचि॥ न्हाङा उङ् गिरिस बाङ्ना खाम्युकपे ख्या॥ 3न्नाबे उङ् सुम मोनाम सोम्मा वाया॥ न्हाङा उङ् होङ्गाॽवाभाङ् सिरियापोटि खेक्सासानिङ् याहुदिचिङा उङ् सिमागा चेॽया ङ्हुप्तुक्सुहा बाङ्ना था तोक्तुहोङ् उङ् न्नाभाङ् माकेडोनिया लिङ्खाम लेङ्साङ् लाम्साङ् खेॽमा मिता॥ 4पावाल न्नाबे ख्यानिङ् बेरिया साहारबे वाखुबा पुरासका उच्या सोपातोरोआस, थेस्लोनिके साहारबे वाखुबा आरिस्तार्खास नुङ् सिकान्दास, डार्बि साहारबे वाखुबा गायास, तिमोथि नुङ् एसियाभाङ् तायाचिहा तुखिकास नुङ् तोरोफिमास चा उङ्नुङ् ङ्ख्या॥ 5ङ्खाचि कान्चिङ् हाक्निङ् ओन्दाङ् ङ्ख्याहोङ् तोरोआस साहारबे न्दासुहोङ् कान्चिङ् कुसामासा॥ 6कान्चिङ् च्हेन फोङ्होक्नाम मेन्दाहोङ् फिलिप्पि साहारभाङ् सामुन्दारागा लाम्बु होङ्गाॽवाबे लामाङ्चिङ्॥ फा लेन हेक्साङ् उङ्चि तोरोआस साहारबे तुप्साङ्चुङ्चिङ्॥ न्नाबे कानिङ् ला लेन सोम्मा वाइङ्॥
युटिकास हिङ्गिलिक लेक्साना
7नाम्लेनगा नासेक कानिङ् न्नाबे वाइङ्हा घाक बिस्वासिचि हाङ्बा होक्ता चासे छुप्सिङ्॥ पावाल वान्दिक्ना लेन खेन्दिखुबा सायाहोङ् सेॽनि हाखोक सोम्मा ङ्खाचिनुङ् साला लेन्दामासा॥ 8कानिङ् छुप्सिङ्नागा तोप्पारिक कोठाबे प्याक बात्तिचि ङ्हान्दुक्साचि॥ 9झ्यालबे युटिकास बाङ्ना एको बाबु युङामासा॥ न्ना बाबु पावाल चेक्मास्यानुङ् तुखुॽवा लाॽमा तारोक्तु॥ खाॽला उङ् तुखुॽवा लातानुङ् इप्साख्या, न्हाङा सुम्ना तालाभाङ् मो खामबे आयाख्या॥ याॽमिचि पोक्से ङ्ख्यानिङ् उङ् सेब्यामासा॥ 10ङ्खाॽनिङ्गो पावाल मो ख्याहोङ् उङ् छोङ्बे सोल्लिक सोसा, न्हाङ् हेप्तुहोङ् न्नाबे ङ्वायाहा याॽमिचि लुचि, “ङ्गिसितानिन, ना बाबु न्स्यामान्ना!” 11न्हाङ् पावाल तोप्पारिक थाङा न्हाङा घाक न्दोङाहोङ् हाङ्बा होक्ता न्जो॥ न्जोइहोङ् ओम मेलेङ्ले सोम्मा पावाल ङ्खाचिनुङ् साला लेन्दामासा न्हाङ् बिदा लेक्साहोङ् ख्या॥ 12न्नाबेॽहा बिस्वासिचिङा च्हेन न्ना बाबु उपाङ्बे न्दिसोओ॥ न्ना बाबु हिङानाङा घाक न्जोन्दास्या॥
पावालङा एफिसासबेॽहा एल्डारचि तुप्सुचिहा
13कानिङ् तोरोआसपाहाङ् होङ्गाॽवाबे थाङिङ्होङ् आस्सोस साहारबे खेइङ्॥ पावाल च्हेन आस्सोस सोम्मा लाम्साङ् खेॽमाहोङ् आस्सोस भाङ् से होङ्गाॽवाबे थाङ्मा मितामासा, न्हाङा ङ्खाॽलामाङ् तार्तुम्बि चा तोक्सुक्सा॥ 14कानिङ् आस्सोसपे तासुम्ङाहोङ् उङ् होङ्गाॽवाबे थाङा न्हाङ् कानिङ् घाक मितिलेने साहारबे खेइङ्॥ 15वान्दिक्ना लेन न्नाभाङ् कानिङ् खियास टापुगा उलाप्पे तासुम्ङा, न्हाङ् न्नागा हेक्साङ्ना लेन सामोस टापुबे तासुम्ङा॥ न्नागा चा हेक्साङ्ना लेन च्हेन मिलेटास साहारबे ताइबिङ्॥ 16पावाल एसिया लिङ्खामबे प्याक वामा म्मितान्होङ् एफिसास साहारबे मेलोन्ले खेॽमा मिता, इजाङ्बाङ्निङ् उङा पेन्तिकोसका लेन यारुसालेमबे तामा मितुक्सा॥
एफिसासबेॽना छुम्वाङ्बेॽहा एल्डारचिनुङ् पावाल बिदा लेक्साना
17पावालङा मिलेटास साहारभाङ् एफिसास साहारबे याॽमि पाक्सुचिहोङ् छुम्वाङ्बेॽहा एल्डारचि काॽमेतुचि॥ 18ङ्खाचि न्दायाब्याहोङ् उङा लुचि, “एसियाबे तायाङ्ना लेन नाहाङ्तो न्निङ्दानुङ् वायाङ्निङ् का ङ्खा लेनचिबे इमिन वायाङ्ना बाङ्ना चेॽया न्निङ्दा था वान्ने॥ 19याहुदिचिङा का तुक्नुङ् तुखि पिया, छाक्नुङ्बे आमेता, ङ्खोङ्चा का आलोक मेङ्खोॽले हाप्साङ् हाङ्बागा सेवा चोगुङ्॥ 20न्निङ्दा घाक्का युम्बे नुङ् पाङ्-पाङ्बे खेसाङ् चिन्नेनिन, ङ्खिङ्बेला न्निङ्दा उचुन लेङ्माहा चेॽया का इहाचा आनिङ्वाबे न्जुमिङान॥ 21का याहुदि नुङ् गिरिक जातिगा याॽमिचि पास्चाताप चोगिघोङ् निङ्वाफुमा पोटि हिक्सानि न्हाङ् एङ्गा हाङ्बा येसुबे बिस्वास चोगानुमभोङ् पार्चार चोगुङ्चिङ्॥
22“हाकु पाबित्तारा आत्माङा लुयाङ्ना लोॽवा का यारुसालेम खेॽमासिमेङ्॥ न्नाबे इलेङ्मे का इहाचा था मान॥ 23ङ्खाॽनिङ्गो का खिङ्से था वान्ने, का खेमेङ्हा घाक साहारचिबे छेक्पाङ्बे छेङ्मे न्हाङा प्याक तुखि आङ्मा पोराचोङ्मेहाभोङ् पाबित्तारा आत्माङा योक्मेतामाङ्ना॥ 24ङ्खाॽनिङ्गो आका हिङ्लुङ्बे हाङ्बा येसुङा जिम्मा पियाङ्हा काम चोक्निमा नुङ् निङ्वाफुमागा आनुगाराहागा नुसाला पार्चार चोक्मा हाक्निङ् हेकोहा चेॽया इहाचा म्मित्वाङान्हा॥#२ तिमोथि ४:७
25“हाकु खेप्सानुम, न्निङ्दा घाक का निङ्वाफुमागा राज्यागा उतुम्बे पार्चार चोक्नेनिन, हाकु फेरि न्निङ्दा का हेॽनिङ्चा निमा न्दोङ्मेकान्हा॥ 26न्हाङामाङ् हेन का न्निङ्दा गाबाहि पिसाङ् लुमेॽनेनिन, न्निङ्दाबे इसा चा पाप चोगुम्गाहोङ् नास लेक्सिगाभोङ् ङ्खागा आप्दिक काबे ङ्ङामेन्हा॥ 27इजाङ्बाङ्निङ् निङ्वाफुमाङा एङ्गा लागि चोगुहा नुङ् वान्दिक चोग्वाहा कामगा उतुम्बे इहाचा मेन्जुप्निले न्निङ्दा योक्मेनुङ्नेनिन॥
28“हाकु न्निङ्दा, न्निङ्गा लागि नुङ् पाबित्तारा आत्माङा जिम्मा पिइघा घाक बिस्वासिचिगा लागि थाङ्थाङ् वायानि॥ निङ्वाफुमागा छुम्वाङ्गा उचुन्ना गोठाला लेक्सानि, न्हाङ् हाङ्बा येसुङा उका हेलिङा इनुचिहा खा याॽमिचि उचुन सोयानुम्चिम॥ 29इजाङ्बाङ्निङ् का खेन्दिमेङ्होङ् पुङ्दाबेॽहा ब्वासो लोॽवाहा याॽमिचि न्निङ्लुम्बे न्दामे, न्हाङा ङ्खाचिङा न्निङ्दा ब्वासोङा सामुङ्चि तुखि म्बिवाचिहा लोॽवा न्निङ्दा चा तुखि पिॽमा न्लेप्तिॽवागान्हा॥ 30न्हाङा न्निङ्लुम्भाङ् मेन्हा चेॽया चिन्खुबा याॽमिचि न्लोम्मे॥ ङ्खाचिङा हाङ्बागा चेलाचि उङ्चि न्लाम्मा सिमेॽना इसिॽना लाम्बुबे तिक्मा ङ्योग्वाचि॥ 31न्हाङामाङ् थाङ्थाङ् वाइगानिभोङ् का सुम फिम्बिलिङ् सोम्मा लेॽनिसेॽनि हाप्साङ् हाङ्बागा घाक चेलाचि चेतावानि पिॽनेनिन॥
32“हाकु का न्निङ्दा निङ्वाफुमागा उमुकपे जिम्मा लाचोङ्न्हेङ्नेनिन न्हाङा उका आनुगाराहागा चेॽया खेम्मेॽमाहा कामगा जिम्मा चा न्निङ्दाबे नाॽनामासिमेङ्॥ ङ्खा कामङा न्निङ्दा बिस्वासपे चात्तु चोगिनेसिॽवागा, न्हाङा पाबित्तारा न्जोगाहा उका घाक याॽमिगा उलुम्बे आसिक तोक्खुबा याॽमि चोगिॽवाघा॥ 33का इसागा चा साम्मेङ् युप्पा नुङ् तेक आलुङ्मा ङ्गिप्तुङान॥ 34न्निङ्दा आफाइ था वान्ने, आका खा आमुकचिङा काम चोगाङ्होङ् का नुङ् आकाम्निभाकचिगा लागि चाहाचोगाहा घाक थोक आफाइ छुप्सुङ्॥ 35का घाक चेॽयाबे न्निङ्दा साङ्खालाम#२०:३५ उदाहारान पिन्नुङ्नेनिन, न्निङ्दा चा यासुम्गानुङ् सोम्मा खाॽलामाङ् तुखि चोगिघोङ् काम चोगानि न्हाङा इहाचा चोक्मा मेयाखुबाचि फातानुम्चिम॥ हाङ्बा येसुङा कायाहा चेॽया निङ्वाबे मितानुम उङा आफाइ खाॽला कायामा, ‘ताप्खुबा हाक्निङ् पिखुबा च्हेन आसिक तोक्खुबा ओम॥’”
36पावालङा खिङ् लुइचिहोङ् उङ्चि घाक लाङ्छुकपे ङ्युङाहोङ् पार्थाना न्जोगा॥ 37उङ्चि घाक इब्बे-इब्बे ङ्हाबा, न्हाङ् पावाल उफाक्ताङ्बे हेप्साङ् उम्मा न्जोगुहोङ् बिदा म्बिहाक्सु॥ 38पावालङा “हाकु कानिङ् हेॽनिङ्चा न्दुबिॽवान्हा” लुचिहाङा ङ्खाचि तुक्नुङ् सोकपे ङ्ङाया॥ न्हाङा ङ्खाचिङा पावाल होङ्गाॽवा सोम्मा न्दिसोओ॥
Currently Selected:
सेगुम्पाक 20: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
