सेगुम्पाक 21
21
पावाल यारुसालेम ख्याना
1एफिसास छुम्वाङ्बेॽहा हाङ्गुम्बाचिनुङ् कानिङ् फोक्सिङ्होङ् होङ्गाॽवाबे थाङिङ् न्हाङ् सिधाइ कोस बाङ्ना टापुबे ताइङ्॥ हेक्साङ्ना लेन भेनिक रोडोस बाङ्ना टापुबे तासुम्ङाहोङ् न्नाभाङ् पाटारा साहारबे ताइङ्॥ 2न्नाबे कानिङ् फोनिके लिङ्खाम पोटि खेखुबा होङ्गाॽवा तुप्सुम्ङाहोङ् न्नाबे थाङिखेइङ्॥ 3कानिङ् साइपारास खाम्युक्का उयुम्बे तासुम्ङा, न्हाङा न्ना टापुगा छुप्तालाङ् पोटिक्ना सिरिया लिङ्खाम पोटि खेइङ्॥ टुरोस साहारबे तासुम्ङाहोङ् न्नाबे होङ्गाॽवा सामान आॽनेम्मागा ङ्येप्सु न्हाङा कानिङ् चा न्नाबे झाराचोगिङ्॥ 4न्नाबे कानिङ् बिस्वासिचि तुप्सुम्चिम्ङाहोङ् ए हाप्ता सोम्मा उङ्चिनुङ् वाइङ्॥ उङ्चिङा पाबित्तारा आत्माभाङ् आगुवाइ न्दोक्तुहोङ् “न्दा यारुसालेमबे ङ्ख्यान” भोङ् पावाल न्लु॥ 5ङ्खाॽनिङ्गो कानिङ् न्नाभाङ् खेॽमाना बेला लेक्साहोङ् न्नाबेॽहा घाक बिस्वासि बाबु मामु, पिछानाछाचि साहारगा योरोक सोम्मा कानिङ् तिॽनासे ङ्ङाबा॥ न्हाङा कानिङ् घाक सामुन्दारागा उलाप्पे लाङ्छुकपे युङिङ्होङ् पार्थाना चोगिङ्॥ 6न्हाङा कानिङ् फोक्सिङ्होङ् होङ्गाॽवाबे थाङिङ्, न्हाङ् उङ्चि चा पाङ्बे न्लासा॥
7टुरोस साहारभाङ् कानिङ् टोलेमाइस साहारबे ताइबिङ्होङ्, न्नाबेॽहा बिस्वासि फुनुन्छा नानुन्छाचि तुप्से खेइङ्, न्हाङ् ए लेन ङ्खाचिनुङ् वाइङ्॥ 8हेक्साङ्ना लेन भेनिक कानिङ् फोक्सिङ्होङ् काइसारियाबे ताइङ् न्हाङ् नुसाला खेम्मेखुबा फिलिपका उपाङ्बे खेइङ्होङ् वाइङ्॥ उङ् सेगुम्पाकचि फाॽमागा न्सेगुचिहा ला जाना#सेगुम्पाक ६:५; ८:५ याॽमिचिबे एको साया॥ 9उका थाङ् न्छेङानिन्हा सुम्भाङ् उच्या मामुचि ङ्वाया॥ ङ्खाचिङा निङ्वाफुमाभाङ् आगाम्बानि चेक्माना पिनिक्ला न्दोक्तुक्सा॥ 10कानिङ् फिलिपका पाङ्बे एहिलेन वाइङ्॥ ङ्खिङ्बेला निङ्वाफुमाभाङ् चेक्खुबा आगाबास याहुदिया लिङ्खामभाङ् कानिङ् वाइङ्नाबे ताया॥#सेगुम्पाक ११:२८ 11उङा पावालगा फोखिमा फुक्सु न्हाङ् उका उलाङ्-उमुक थुन्दुचिहोङ् खाॽला काया, “पाबित्तारा आत्माङा खाॽला कामे, ‘ना फोखिमागा ह्वाङ्बा यारुसालेमबे याहुदि हाङ्गुम्बाचिङा न्लाब्वाहोङ् खाॽलामाङ् न्थुन्द्वा, न्हाङा हेकोहा जातिचिगा मुकपे जिम्मा म्बिवाना॥’”
12खा चेॽया खेप्सुम्ङाहोङ् कानिङ् नुङ् न्नाबेॽहा घाक याॽमिचिङा पावाल “यारुसालेमबे ङ्ख्यान” लुसाङ् मुक फाक्तुम्चिम्ङा॥ 13ङ्खाॽनिङ्गो पावालङा कानिङ् खाॽला लुया, “न्निङ्दा हाबिॽवागाहोङ् इजाङ् आनिङ्वा खोक्निम्बिमेकाहा? का हाङ्बा येसुगा लागि यारुसालेमबे तुखि आङ्मा से मेन्ना, ङ्खाॽनिङ्गो सिमा चा त्यारिङाना॥” 14न्हाङा हाकु उका उनिङ्वा लामा ङ्यामेन्ना बाङ्ना था तोक्तुम्ङाहोङ् कानिङ् “निङ्वाफुमागा उनिङ्वा लोॽवा लेङ्नि” काइङ्होङ् स्वाक वाइङ्॥
15न्हाङा कानिङ् त्यार लोक्सिङ्होङ् यारुसालेम पोटि खेइङ्॥ 16कानिङ्नुङ् काइसारियाबेॽहा एकोहिप्पाङ् बिस्वासिचि न्लोक्सा॥ उङ्चिङा कानिङ् साइपारास टापुभाङ् तायाहोङ् वायाना मानासोन बाङ्ना याॽमिगा पाङ्बे बास याक्से तामेता॥ उङ् उलिप्पाना बिस्वासि साया॥
17कानिङ् यारुसालेम तासुम्ङाहोङ् न्नाबेॽहा बिस्वासिचिङा कानिङ् चोन्सिसाङ् स्वागात चोगा॥ 18हेक्साङ्ना लेन पावालनुङ् कानिङ् याकुबका पाङ्बे खेइङ्॥ न्नाबे छुम्वाङ्बेॽहा घाक एल्डारचि न्छुप्सामासा॥ 19पावालङा उङ्चि सेमेतुचिहोङ्, उङा हेकोहा जातिचिगाबे ख्याहोङ् नुसाला खेम्मेतुचिनिङ् निङ्वाफुमाङा उङ्भाङ् इमिन्हा-इमिन्हा काम चोगुहा, ङ्खा घाक चेॽया योक्मेतुचि॥ 20पावालगा खा चेॽया ङ्खेप्सुहोङ् उङ्चिङा निङ्वाफुमागा माहिमा न्जोगु॥ न्हाङा पावाल खाॽला न्लु, “हाओ आनुन्छा सो, नाबे चा प्याक माहोम्बोक याहुदिचिङा हाङ्बा येसु बिस्वास न्जोगुक्सु, न्हाङ् ङ्खाचि मोसागा ब्यावास्थाबे एकोहोरो लाचोङ्नुङ्मा म्मिम्मेहा॥ 21ङ्खाॽनिङ्गो हेकोहा जातिचिगा उलुम्बे वाखुबा याहुदिचिङा ‘मोसागा ब्यावास्थाबे छेप्ताहा लोॽवा चोक्मा पोरान्जोङ्मेन, बाबुचि खाताना चोक्मा पोरान्जोङ्मेनिन न्हाङा याहुदिचिगा रितिथितिगा चेॽया चा येम्मा पोरान्जोङ्मेन्हा’ भोङ् याहुदिचि चिन्द्वाचिघा बु बाङ्हा चेॽया उङ्चिङा ङ्खेप्सुक्सु॥ 22न्हाङामाङ् हाकु कानिङ् इ चोगि? न्दा नाबे तायागाना चेॽया ङ्खाचिङा इमिन्होङ्चा ङ्खेप्सिॽवा॥ 23हाकु कानिङ् लुॽनेनिन्हा लोॽवा चोगा॥ नाबे भाकाल चोक्खुबा ना जाना फुनुन्छाचि कानिङ्नुङ् ङ्वान्ने॥#निप ६:१३-२१ 24हाकु न्दा चा ङ्खाचिनुङ् निङ्वाफुमापाङ्बे ख्याघोङ् सुद्दा लेक्सा॥ ङ्खाचिगा लाचोक्माहा खार्चा न्दा एन्दुबिचि, न्हाङा ङ्खाचिङा ताम्फोक ङ्खोगुनि॥ खाॽला चोगागाभोङ् याहुदिचिङा ब्यावास्थाबेॽहा चेॽया येनुघा लोॽवा न्निमेका न्हाङ् ङ्गा उतुम्बे ङ्खेप्सुहा चेॽया जेप्पाहा मेन्हाभोङ् घाकङा था न्दोक्त्वाहा॥ 25ङ्खाॽनिङ्गो बिस्वास चोक्खुबा हेकोहा जातिगा याॽमिचि च्हेन ‘मुर्तिबे तिसाहा चाम्योङ्बा, हेलि नुङ् ओखोम फिन्दास्याना जिवातका उसा न्जायानुम्निन न्हाङा ब्याभिचार न्जोगानिन’ भोङ् छेप्फा छेप्तुम्ङाहोङ् हाक्सिक्सुम्चिम्ङाहा॥”#सेगुम्पाक १५:२९
पावाल निङ्वाफुमापाङ्बे न्लाबुना
26हेक्साङ्ना लेन पावालङा ङ्खा ना जाना याॽमिचि खेतुचिहोङ् ङ्खाचिनुङ् उङ् आफाइ चा सुद्दा लेक्सा॥ न्हाङ् सुद्दा लेङ्माहा लेनचि हेॽनिङ् म्मेम्मेहा, न्हाङा घाक्का लागि बोलिदान चोक्माना लेन हेॽनिङ् ओमभोङ् हाङ्खुबा योक्मेमागा निङ्वाफुमापाङ्बे उया॥
27सुद्दा लेङ्माहा ला लेन पुरा न्लेक्सेहेक्सासा॥ ङ्खिङ्बेला एसिया लिङ्खामभाङ् न्दायाहा याहुदिचिङा पावाल निङ्वाफुमापाङ्बे न्निसु॥ न्हाङा ङ्खाचिङा घाक याॽमिचि न्थेन्दुचिहोङ् पावाल न्लाबुहोङ् 28खाॽला कासाङ् ङ्ओक्ता, “हाओ इजिरेलि आफुआनुन्छाचि आबानि, कानिङ् फाता! ना याॽमिमाङ् ओम, घाक ठोङ्बे खेसाङ् एङ्गा जाति, एङ्गा ब्यावास्था नुङ् ना ठोङ्गा बिरुद्दाबे याॽमिचि चिन्घोखुबा! खिङ्से मेन्ना, नाङा गो हेकोहा जातिगा याॽमिचि चा निङ्वाफुमापाङ् होङ्बे उमेतुचिहोङ् ना पाबित्तारा ठोङ्माङ् आसुद्दा चोगुक्सुना॥” 29इजाङ्बाङ्निङ् ओन्दाङ् ङ्खाचिङा एफिसास पाहाङ् तायाना तोरोफिमास बाङ्ना याॽमि पावालनुङ् साहारबे न्निसुक्सा, न्हाङा पावालङा न्ना याॽमि निङ्वाफुमापाङ् होङ्बे खेतुना म्मितुक्सा॥#सेगुम्पाक २०:४
30खा चेॽयाङा साहारभोरि माडा हाल्लाखाल्ला लेक्सा, न्हाङ् घाकपाहाङ् याॽमिचि हुरुरु न्लुक्ताराया॥ ङ्खाचिङा पावाल न्लाबुहोङ् निङ्वाफुमापाङ्भाङ् पाखा न्साहेतु न्हाङ् निङ्वाफुमापाङ्गा वालाम्बुङ्चि न्छेक्तुचि॥ 31ङ्खाचिङा पावाल न्सिसेहेक्सुसानिङ् “यारुसालेमबे याॽमि सिखुसा न्जाहेक्साहा” बाङ्ना सालेन रोमि काङ्बाचिगा माडा याॽमिगाबे तासु॥ 32न्हाङा उङ् सोलोक काङ्बाचि नुङ् केप्टेनचि खेतुचिहोङ् लुक्साङ् न्ना ठोङ्बे तासु॥ ङ्खा याॽमिचिङा उङ्चि न्निसुचिहोङ् पावाल मोक्मा न्लेप्ति॥
33न्ना काङ्बाचिगा माडा याॽमि पावालगा उयुम्बे ख्याहोङ् पावाल लाबु, न्हाङ् हिच्चि चेक्चिगा साङ्लिचिङा थुम्मेतुचि॥ न्हाङा न्नाबेॽहा याॽमिचि छिम्दुचि, “नाङा इहा चोगुहा? ना याॽमि इसा ओम?” 34ङ्खाॽनिङ्गो न्नाबेॽहा याॽमिचि एकोङा एको चेॽया, हेकोनाङा हेकोना चेॽया कासाङ् ङ्ओक्ता॥ न्हाङ् न्नाबे इ लेक्साहा न्ना माडा याॽमिङा इहाचा आमा ङ्यासुन॥ न्हाङ् पावाल काङ्बाचि वामाना ठोङ्बे खेॽमाना हुकुम पिचि॥ 35काङ्बाचिङा पावाल ङ्खेॽमास्यानिङ् ङ्खा घाक याॽमिचि उङ्चि हेक्साङ् लान्जोगा॥ न्हाङ् पावाल थावाबे थाङ्मास्यानिङ् याॽमिचिङा सिमागा छोपान्जोगु, ङ्खिङ्बेला उङ् हिङ्मेॽमागा काङ्बाचिङा ङ्खुघेतु॥ 36इजाङ्बाङ्निङ् याॽमिचि ओक्साङ्, “न्ना याॽमि सिसानुम! सिसानुम!” कासाङ् उङ्चि हेक्साङ् लान्जोगामासा॥
पावालङा उका उतुम्बे लुचिहा
37काङ्बाचि वामाना ठोङ्बे ङ्ङुहेक्सासानिङ् पावालङा काङ्बाचिगा माडा याॽमि खाॽला लु, “ओ हाङ्बा, का न्दा एकोहिच्चि चेॽया लुॽमा यामेॽनेन्ना?”
माडा याॽमिङा पावाल लु, “ए, न्दा गिरिक चेॽया चा चेक्मा निस्वाघायि? 38ङ्खाॽलाभोङ्गो न्दा एहिच फिम्बिलिङ् ओन्दाङ्, बिद्दोरोहा चोगाहोङ् ना माहोम्बोक बिद्दोरोहिचि पुङ्दाबे खेखुबा मिसिरि नेता गो मेकान्ना?”
39पावालङा लु, “का मेॽङान्ना, का गो किलिकियागा टार्सास साहारबे वायाङ्ना याहुदिङान॥ का न्ना उनिङ् हिसाना माडा साहारगा नागारिकङान॥ हाङ्बा का आमुक फाक्त्वाङ्चिङ्, खा याॽमिचिनुङ् का एकोहिच्चि चेॽया चेक्मा पियाङ्॥” 40काङ्बाचिगा माडा याॽमिङा चा लेङ्मेॽना लु॥ न्हाङा पावाल थावाबे येबाहोङ् याॽमिचि उमुक्का चालङा स्वाक वायानि लुचि॥ याॽमिचि स्वाक ङ्वायाहोङ् पावालङा हिब्रु#२१:४० याहुदिचिगा चेॽया॥ चेॽयाभाङ् खाॽला लुॽमा तारोक्तुचि–
Currently Selected:
सेगुम्पाक 21: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
