सेगुम्पाक 19
19
पावाल एफिसास साहारबे
1आपोल्लोस कोरिन्थ साहारबे वायानिङ् पावाल एसिया लिङ्खामगा उलुम-उलुम लेङ्साङ् एफिसास साहारबे ताया॥ न्नाबे पावालङा एकोहिप्पाङ् बिस्वासिचि तुप्सुचि॥ 2उङा ङ्खाचि छिम्दुचि, “न्निङ्दा बिस्वास चोगुम्घोङ् पाबित्तारा आत्मा तोक्तुम्गाना?”
ङ्खाचिङा पोलोवा म्बि, “कानिङ् गो पाबित्तारा आत्मा वान्नेॽना बाङ्ना चेॽया चा ङ्खेप्सुक्सुम्ङान्हा॥”
3न्हाङा पावालङा छिम्दुचि, “ङ्खाॽलाभोङ् इमिन्ना बाप्तिस्मा लियाचोगुम्गाना?”
ङ्खाचिङा पोलोवा म्बि, “युहान्नागा बाप्तिस्मा॥”
4पावालङा लुचि, “युहान्नाङा पिचिहा बाप्तिस्मा गो पास्चातापका बाप्तिस्मा साया॥ उङा याॽमिचि ‘का हाक्निङ् हेक्साङ् ताखुबा बिस्वास चोगानुम’ भोङ् लुचि॥ न्ना उका हेक्साङ् ताखुबा च्हेन येसुमाङ् ओम॥”#मात्ति ३:११; मार्कुस १:४; १:७-८; लुका ३:४,१६; युहान्ना १:२६-२७
5खा चेॽया ङ्खेप्सुहोङ् ङ्खाचिङा हाङ्बा येसुगा उनिङ्बे बाप्तिस्मा लियान्जोगु॥ 6न्हाङा पावालङा उङ्चि टुखुरुक छोङ्बे उमुक ङ्युक्सुबिचिनिङ् पाबित्तारा आत्मा उङ्चि छोङ्बे उक्सा॥ न्हाङा उङ्चिङा आमामेयामाहा हेकोहा-हेकोहा चेॽया चेक्साङ् आगाम्बानि न्जोगु॥ 7न्नाबे एहिच जाना हिङ् याॽमिचि ङ्वाया॥
8पावालङा याहुदि छुम्पाङ्बे खेसाङ् सुम मोनाम सोम्मा मेङ्गिसिॽले याॽमिचि चिन्दुचि॥ ङ्खाचिङा निङ्वाफुमागा राज्यागा उतुम्बे उचुन ङ्ङासुनिभोङ् उङा लुॽमा न्लेप्तिन्चिन॥ ङ्खाचि बिस्वासपे ताॽमाना कोसिस चोगामासा॥ 9-10ङ्खाॽनिङ्गो इखिङ्ङा च्हेन बिस्वास चोक्मागा साटो उङ्चि निङ्वा काठोर न्जोगुहोङ् घाक याॽमिगा उयुम्बे हाङ्बागा लाम्बुगा बिरुद्दाबे इसिॽनुङ् चेक्मा न्दारोक्तु॥ न्हाङामाङ् पावालङा ङ्खा चेलाचि उङ्नुङ् खेतुचि न्हाङ् ङ्खाचिगा छुम्पाङ् खेॽमा लेप्ति॥ न्हाङा टुरान्नास बाङ्ना याॽमिगा चिन्मालाङ्बे हिच फिम्बिलिङ् सोम्मा याॽमिचिनुङ् साधाइ लुखुसा न्जाया॥ खाॽला एसिया लिङ्खामबेॽहा घाक याहुदिचि नुङ् हेकोहा जातिगा याॽमिचिङा चा हाङ्बागा नुसाला ङ्खेप्सु॥
एफिसासपे आच्चाम्माहा काम
11निङ्वाफुमाङा पावालभाङ् पात्ये चोक्मायि मेयामाहा आच्चाम्माहा काम चोगु॥ 12खिङ् आच्चाम्माहा काम चोगु, याॽमिचिङा पावाल रुमोलङा होङ्चा फोॽमाङा होङ्चा न्दोक्तिहोङ् तुखाबाङ्चि छोङ्बे ङ्युक्सुबिचिनिङ् ङ्खा तुखाबाङ्चि न्नुया, न्हाङ् इसिॽहा मुइचि चा न्लोन्दाख्या॥
13न्नाबे ठोङ्-ठोङ्बे कोङ्घोसाङ् इसिॽहा मुइचि लोन्नाहाङ्खुबा एकोहिप्पाङ् याहुदिचि चा ङ्वाया॥ ङ्खाचिङा खाॽला लुसाङ् इसिॽना मुइ लोन्हाङ्मागा न्जोगु, “पावालङा पार्चार चोगुना येसुगा उनिङ्बे का आग्गे पिमेॽनेन, न्दा नाभाङ् लोन्दाख्या॥” 14ङ्खाॽला चोक्खुबाचिबे स्केवास बाङ्ना याहुदि खाङ्खाङ् हाङ्खुबागा ला जाना उच्या बाबुचि न्साया॥ 15इलेन इसिॽना मुइङा ङ्खाचि खाॽला लुचि, “का येसु चिनाचोग्वाङ्, पावाल चा चिनाचोग्वाङ्, ङ्खाॽनिङ्गो न्निङ्दा च्हेन इसासिगान?” 16न्हाङा न्ना इसिॽना मुइङा याक्सुना याॽमि बुरुक-बुरुक पुक्साङ् तायाहोङ् ङ्खाचि घाक चेप्तुचिहोङ् काबु चोगुचि॥ न्हाङा ङ्खाचि उङ्चि सालुङ् भोरि चोटाइ चोट् न्लेक्साहोङ् नाङ्गेभुतुङ्गे न्नाभाङ् न्लुक्ताख्या॥
17खा चेॽया एफिसासपे ङ्वायाहा घाक याहुदि, गिरिक जातिचिगा याॽमिचिङा ङ्खेप्सुहोङ् ङ्गिसिता॥ न्हाङा ङ्खाचिङा हाङ्बा येसुगा आदार चोक्साङ् उका उनिङ् न्थेन्दु॥ 18प्याक बिस्वास चोक्खुबाचि न्नाबे न्दायाहोङ् ओन्दाङ् उङ्चिङा न्जोगुहा इसिॽहा काम हाकु नाहाङ्तो हेॽनिङ्चा न्जोग्वाम्ङान्हाभोङ् ङ्गाया॥ 19ङ्खाचिबे प्याक लोॽवा टुनामुना चोक्खुबाचि न्साया, ङ्खाचि घाकङा उङ्चिनुङ् ङ्वायाहा जादु चोक्माहा छेप्तापचि नुङ् धामि काम चोक्माहागा उतुम्बे न्छेप्ताहा छेप्तापचि न्दाचिहोङ् याॽमिचिगा उयुम्बे न्दुन्धाक्सुचि॥ ङ्खा न्दुन्धाक्सुचिहा छेप्तापचि फाखेङ् माहोम्बोक युप्पा याङ् हिङ्#१९:१९ ङ्खिङ्बेला इलेन काम चोगाहागा उमेन एको युप्पा साया॥ आखुबा न्साया॥ 20खाॽला हाङ्बागा चेॽया साक्तिसालि रुप्पे घाक ठोङ्बे हिसाङ् ख्या॥
एफिसासपे खाइलाबाइला
21खा चेॽया लेक्साब्याहोङ् पावाल माकेडोनिया नुङ् आखाइया लिङ्खाम लेङ्साङ् यारुसालेम खेॽमा मिता॥ उङा काया, “का यारुसालेम तास्वाङ्होङ् इमिन्होङ्चा रोम साहारबे चा खेमेङ्ना॥” 22न्हाङ् उङ् फाखुबाचि हिप्पाङ् तिमोथि नुङ् इरास्तास माकेडोनियाबे पाक्सुचि, ङ्खाॽनिङ्गो उङ् च्हेन एसिया लिङ्खामबेॽमाङ् एहिलेन वाया॥
23ङ्खिङ्बेला एफिसासपे हाङ्बागा लाम्बुगा बिरुद्दाबे माडा खाइलाबाइला लेक्सा॥ 24न्नाबे डेमेतिरियास बाङ्ना एको सुनार वाया॥ उङा युप्पाभाङ् आर्तेमिस माङ्गा मिमिॽहा माङ्पाङ् चोगुचि॥ ङ्खा कामभाङ् उङ् नुङ् उङा काम चोक्से युक्सुचिहा याॽमिचिङा प्याक याङ् ङ्ङुप्मास्या॥ 25न्हाङा डेमेतेरियासङा उका काम चोक्खुबाचि नुङ् हेकोहा ङ्खाॽला काम चोक्खुबाचि घाक छुप्सुचिहोङ् खाॽला लुचि, “काम्निभाकचि, खा कामभाङ् कानिङ् इखिङ् प्याक याङ् उबुक्सुम्हा बाङ्ना चेॽया गो न्निङ्दा था वान्ने॥ 26ङ्खाॽनिङ्गो न्ना पावालङा इ कामासिम्मेॽना, न्निङ्दा आफाइ खेम्मा सिइवागा निमासिइवागा॥ उङा याॽमिगा मुकङा न्जोगाहा मुर्तिचि निङ्वाफुमा मेन्हाचि भोङ् कामासिम्मेॽना॥ उङा एफिसासपे से मेन्ना, एसिया लिङ्खामबेॽहा प्याक लोॽवा याॽमिचि उका चेॽया चिन्साङ् भाड्का चोगिहेक्सुचिहा॥ 27न्हाङामाङ् खाॽलाहा चेॽयाङा गो एङ्गा कामसे ङ्खेमेन, ङ्खाॽनिङ्गो कानिङ् घाक्का माङ् आर्तेमिसका माङ्पाङ्गा आपामान लेङ्मे, न्हाङ् एसिया नुङ् कायुङ्लेनबेॽहा घाक याॽमिचिङा पुजा आराधाना न्जोगुना माङ् आर्तेमिसका आदार चोक्मा न्लेप्तिॽवाना॥”
28खा चेॽया ङ्खेप्सुहोङ् न्नाबे न्छुप्साहा घाक उङ्चि लोक खोॽमाङा मि न्लेक्सा, न्हाङा खाॽला कासाङ् ओक्मा न्दारोक्तु, “एफिसासका आर्तेमिस माङ् घाक हाक्निङ् माडा ओम॥” 29ङ्खाॽला न्ना घाक साहारबे खाइलाबाइला लेङ्मा तारोक्तु॥ न्हाङा घाक याॽमिचि न्दोङारायाहोङ् माकेडोनियाभाङ् पावालनुङ् न्दायाहा पावालगा उकाम्निभाकचि गायास नुङ् आरिस्तार्खास न्लाबुचिहोङ् राङ्गासालाबे ङ्खेतुचि॥ 30पावाल चा ङ्खा याॽमि लुम्बे खेॽमाहोङ् चेक्मा मिता, ङ्खाॽनिङ्गो बिस्वासिचिङा उङ् न्नाबे खेॽमा म्बिनिन॥ 31एसियाबेॽहा एकोहिप्पाङ् खाङ्खाङ्बाचि पावालगा उकाम्निभाक न्साया, ङ्खाचिङा चा पावालगा उचुन्गा लागि न्नाबे खेॽमा म्बिनिन॥
32याॽमिचिबे माडा खाइलाबाइला लेङ्मास्या॥ एकोङा एको चेॽया, हेकोनाङा हेकोहा चेॽया कासाङ् ङ्ओक्मास्या॥ न्नाबेॽहा प्याक लोॽवा याॽमिचिङा गो कानिङ् इजाङ् नाबे छुप्सिमिङ्हा बाङ्ना चेॽया चा था म्मायान॥ 33ङ्खिङ्बेला याहुदिचिङा आलेक्जेन्डार बाङ्ना याहुदि याॽमि न्जेक्मेतु॥ उङ् ङ्खा याॽमिचि माध्येबे इखिङ्ङा न्नाबे इलेङ्मास्याहा ङ्खा चेॽयागा उतुम्बे ङ्खेम्मेतु॥ न्हाङा आलेक्जेन्डारङा ङ्खा याॽमिचि एकोहिच्चि चेॽया लुॽमागा उमुक्का चालङा स्वाक वामेॽमागा चोगुचि॥ 34ङ्खाॽनिङ्गो ङ्खाचिङा उङ् चा याहुदि ओमभोङ् था न्दोक्तुहोङ् घाक एको निङ्वागा न्लेक्सा न्हाङा हिच घान्टा सोम्मा “एफिसासका आर्तेमिस माङ् घाक हाक्निङ् माडा ओम” कासाङ् ङ्ओक्तामासा॥
35न्हाङ् साहारबेॽना खाङ्खाङ्बाङा याॽमिचि स्वाक वामेतुचिहोङ् खाॽला लुचि, “एफिसासबेॽहा याॽमिचि, ना एफिसास साहार घाक हाक्निङ् माडा आर्तेमिसका माङ्पाङ् नुङ् ताङ्खेङ्भाङ् आयुक्साना उका मुर्तिगा राछे चोक्खुबा साहार ओम बाङ्ना चेॽया इसाङा था मान्ना? 36इसाङा चा खा चेॽया मेन्हाभोङ् कामा ङ्यामेनिन्हा॥ न्हाङामाङ् न्निङ्दा स्वाक वायानि॥ खाॽला जोसपे तामाहोङ् उचुन मेमिॽले इहाचा काम चोक्मा उचुन न्लेङ्मेन्हा॥ 37न्निङ्दा लाबुराम्चिम्घा खा याॽमिचिङा एङ्गा माङ्पाङ्बेॽहा इहाचा ङ्खुसुक्सुनिन न्हाङा एङ्गा माङ्गा बिरुद्दाबे चा न्जेक्तामानिन॥ 38डेमेतिरियास नुङ् उका काम चोक्खुबा याॽमिचिगा उजुर चोक्माहा चेॽया वेॽहाभोङ् निरिक पाङ्बे निरिक चोक्खुबा ङ्वान्दिॽने, उङ्चि-उङ्चि मुद्दा एन्खुसा न्जानि॥ 39ङ्खाॽनिङ्गो खा हाक्निङ् हेकोहा चेॽया न्निङ्दानुङ् वेॽयाहा भोङ् ङ्खागा निरिक एङ्गा साधाइ लेङ्मेॽना छुम्माबे चोक्मा यामेहा॥ 40इजाङ्बाङ्निङ् हेन लेङ्मासिम्मेहा खा खाइलाबाइलागा आप्दिक रोमि तायेन्राङ्बाङा कानिङ् एम्मा यामेहा॥ न्हाङा कानिङ् आप्दिक एन्दाभोङ् खागा उतुम्बे कानिङ् इच्चा लुॽमा ङ्यास्वाम्चिम्निन्हा॥” 41खिङ् लुइचिहोङ् उङा न्छुप्साहा याॽमिचि बिदा पिहाक्सुचि॥
Currently Selected:
सेगुम्पाक 19: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
