सेगुम्पाक 18
18
पावाल कोरिन्थ साहारबे
1न्हाङा पावाल एथेन्सभाङ् कोरिन्थ साहारबे ख्या॥ 2न्नाबे उङा आकिलास उनिङ् वायाना एको याहुदि याॽमि तुप्सु॥ न्ना च्हेन पोन्टास लिङ्खामबेॽना साया॥ न्ना एहिलेन ओन्दाङ् से उहिङ्खुमानुङ् इटालिया खाम्युकपाहाङ् तायामासा, इजाङ्बाङ्निङ् रोमबेॽना हाङ् क्लाउडियासङा घाक याहुदिचि रोम साहार नाॽनामाना आग्गे पिक्साचि॥ पावाल ङ्खाचि तुप्से ख्या॥ 3ङ्खाचि पाङ् खाप्माहा पाल आक्खुबा याॽमि सायाचि॥ न्हाङ् पावाल चा ङ्खाचि लोॽवा पाल आक्खुबा सायाहोङ् ङ्खाचिनुङ् वाया॥ 4पावाल आराम चोक्माना लेन साधाइ याहुदि छुम्पाङ्बे ख्याहोङ् याहुदिचि नुङ् हेकोहा जातिगा याॽमिचिङा येसुगा उतुम्बे आमा ङ्यासुनिभोङ् चिन्दुचि॥
5सिलास नुङ् तिमोथि माकेडोनिया लिङ्खामभाङ् न्नाबे तायाब्याचिहोङ्, पावाल घाक सामाया नुसाला खेम्मेॽमाहा कामबे लाचोगा॥ उङा याहुदिचि “येसुमाङ् निङ्वाफुमाङा पाक्सुना खिरिस्ट ओम” भोङ् चिन्दुचि॥ 6ङ्खाॽनिङ्गो याहुदिचिङा उका चेॽयागा बिरोध चोक्साङ् न्थिन्दु॥ न्हाङ् पावालङा ङ्खाचिगा बिरुद्दाबे ओतेकपेॽहा धुलो आम्साङ् खाॽला लुचि, “न्निङ्दा नास लेक्सिगाभोङ् न्निङ्दा चोगुम्गाहा कामङामाङ् नास लेक्सिॽवाघा, काबे ङ्खा आप्दिक ङ्ङामेन्हा॥ हाकु नाहाङ्तो का हेकोहा जातिचिगाबे खेमेङ्ना॥”
7नाहाङ्तो पावाल याहुदिचिगा छुम्पाङ्बे खेॽमा लेप्ति॥ न्हाङा निङ्वाफुमागा सेवा चोक्खुबा तितास युस्तास बाङ्ना गिरिक याॽमिगा पाङ्बे ख्या॥ न्नागा उपाङ् छुम्पाङ्गा उयुम्बे वाया॥ 8याहुदि छुम्पाङ्गा तायेन्राङ्बा किरिस्पास नुङ् उपाङ्बेॽहा घाकङा हाङ्बाबे बिस्वास न्जोगु, न्हाङ् कोरिन्थबेॽहा हेकोहा याॽमिचिङा चा पावालगा ओचेॽया ङ्खेप्सुहोङ् बिस्वासि न्लेक्सा, न्हाङा बाप्तिस्मा लियान्जोगु॥
9इमा सेॽनिङ् हाङ्बाङा पावाल सेन्चिबे खाॽला लु, “न्दा इसानुङ्चा मेङ्गिसिॽले नुसाला खेम्मेसाङ् ख्या, स्वाक ङ्वायान, 10इजाङ्बाङ्निङ् का न्दानुङ् वेॽङाना॥ न्दा इसाङा चा इच्चा चोक्मा ङ्यामेकानिन्ना, इजाङ्बाङ्निङ् ना साहारबे आका प्याक याॽमिचि ङ्वान्नेहा॥” 11ङ्खाॽला पावाल ए फिम्बिलिङ् या मोनाम सोम्मा न्ना कोरिन्थ साहारबे वायाहोङ् निङ्वाफुमागा चेॽया चिन्दुचि॥
12आखाइया खाम्युकपे गालियोन बाङ्ना याॽमि माडा-खाङ्खाङ्बा सायानिङ् याहुदिचि न्दोङाहोङ् पावाल न्लाबु, न्हाङ् माडा-खाङ्खाङ्बागाबे ङ्खेतुहोङ् खाॽला न्लु, 13“ना याॽमिङा एङ्गा ब्यावास्थानुङ् मेन्दोङ्माना तारिकाङा निङ्वाफुमागा आराधाना चोक्मा चिन्द्वाचिहोङ् याॽमिचि खोक्निमा सिमेॽना॥” 14पावाल चेक्तेहेक्सासानिङ् गालियोनङा ङ्खा याहुदिचि खाॽला लुचि, “ओ याहुदिचि, ना याॽमिङा चोगुहा खा काम जेप्पा इसिॽहा नुङ् माम्माहा आपाराध सायानिङ्बि न्निङ्गा चेॽया खेप्माहोङ् निरिक चोक्मा थेन्दिसिबि॥ 15ङ्खाॽनिङ्गो खा चेॽया गो न्निङ्दा चिन्द्वाम्चिम्घा चेॽया, निङ्चि नुङ् ब्यावास्थागा उतुम्बेॽहा ओम, न्हाङामाङ् न्निङ्दा आफाइ ङ्खा चेॽयागा निरिक चोगानुम॥ का खाॽलाहा चेॽयागा निरिक न्जोग्वाङान्हा॥” 16खाॽला लुचिहोङ् गालियोनङा ङ्खाचि निरिक्पाङ्भाङ् पाक्साहाक्सुचि॥ 17न्हाङ् ङ्खा याहुदिचिङा याहुदि छुम्पाङ्बेॽना तायेन्राङ्बा सोस्थेनेस न्लाबुहोङ् निरिक्पाङ्गा उयुम्बे म्मोक्तु॥ ङ्खाॽनिङ्गो ङ्खा चेॽया गालियोनङा था न्दोक्तुन्हा लोॽवा चोगा॥
पावाल एन्टिओखियाबे लासाना
18पावाल माङ्फा लेन सोम्मा बिस्वासि फुनुन्छा नानुन्छाचिनुङ् कोरिन्थ साहारबे वाया॥ न्हाङ् ङ्खाचिनुङ् फोक्साहोङ् पिरिस्किला, आकिलासनुङ् किङ्किरिया साहारबे ख्या॥ न्नाबे तासुहोङ् उका उताम्फोक खोगु,#निप ६:१८ इजाङ्बाङ्निङ् उङा ओन्दाङ् भाकाल चोगुक्सा॥ न्हाङा उङ्चि सामुन्दारागा लाम्बु लेङ्साङ् सिरियापोटि ङ्ख्या॥ 19उङ्चि एफिसासपे न्दायाब्याहोङ् पिरिस्किला नुङ् आकिलास पावालङा न्नाबे नाओचि, न्हाङ् उङ् च्हेन एको याहुदि छुम्पाङ्बे उयाहोङ् याहुदिचिनुङ् लुखुसा न्जाया॥ 20ङ्खा याहुदिचिङा पावाल एहिलेन कानिङ्नुङ् वाया न्लुहोङ् उङ्चि मुक म्फाक्तुचि, ङ्खाॽनिङ्गो उङ् ङ्गाक्सान॥ 21ङ्खाचिनुङ् फोङ्माना बेला पावालङा खाॽला लुचि, “निङ्वाफुमाङा न्नाबे तामा पियाङ्भोङ् का फेरि न्निङ्दाबे तामेङ्ना॥” न्हाङा उङ् एफिसास पाहाङ् सामुन्दारागा लाम्बु लाचोगा॥ 22पावाल काइसारिया साहारबे तायाहोङ् तो यारुसालेमबे ख्या, न्हाङा न्नाबेॽना छुम्वाङ्बेॽहा बिस्वासिचिनुङ् तुबा न्हाङ् उङ् एन्टिओखिया साहारबे उक्सा॥
23पावाल न्नाबे एहिलेन वाया॥ न्हाङ् गालातिया नुङ् फिर्गिया लिङ्खामगा ठोङ्-ठोङ्बे कोसाङ् ङ्खाबेॽहा बिस्वासिचि बिस्वासपे चात्तु चोगुचि॥
आपोल्लोसङा एफिसास नुङ् कोरिन्थबे पार्चार चोगुहा
24ङ्खिङ्बेला आलेक्जेन्डिरिया साहारबे वाम लेक्साना आपोल्लोस बाङ्ना एको याहुदि याॽमि एफिसासपे ताया॥ उङ् उचुन चेक्मा याखुबा न्हाङा धार्मासाप्ला चा उचुन पोढाचोक्खुबा याॽमि साया॥ 25उङा हाङ्बागा लाम्बुगा उतुम्बे उचुन चिन्मा तोक्तुक्सा, न्हाङा आत्माबे जोसिलो लेङ्साङ् येसुगा उतुम्बे ठिक-ठिक चेॽया चिन्दुचि॥ ङ्खाॽनिङ्गो उङा युहान्नाङा पिचिहा बाप्तिस्मागा उतुम्बे से था वाया॥ 26उङ् याहुदिचिगा छुम्पाङ्बे मेङ्गिसिॽले चेक्मा तारोक्तु॥ उका चेॽया खेप्साचुहोङ् पिरिस्किला नुङ् आकिलासङा उङ्चि पाङ्बे तिक्तेहेताचु न्हाङा उङ्चिङा निङ्वाफुमागा लाम्बुगा उतुम्बे उचुन योक्मेताचु॥
27आपोल्लोस आखाइया लिङ्खामबे खेॽमा मितानिङ् एफिसासबेॽहा बिस्वासि फुनुन्छा नानुन्छाचिङा उङ् न्नाबे खेॽमाना साहास म्बि॥ न्हाङा आखाइया बेॽहा बिस्वासिचि “आप्पोल्लोस न्निङ्गाबे ताये, उङ् उचुन स्वागात चोगानुम्यो” भोङ् छेप्ताना छेप्फा ङ्ङाहाक्तुचि॥ उङ् न्नाबे तासुहोङ् निङ्वाफुमागा आनुगाराहाङा बिस्वासपे न्दायाहा बिस्वासिचि प्याक फातुचि॥ 28इजाङ्बाङ्निङ् घाक याॽमिचिगा उयुम्बे न्नाबेॽहा याहुदिचिनुङ् लुखुसा न्जायानिङ् उङा धार्मासाप्लाबेॽहा निङ्वाफुमागा चेॽयाभाङ् येसुमाङ् निङ्वाफुमाङा पाक्सुना खिरिस्ट ओमभोङ् पार्मान पिचि॥
Currently Selected:
सेगुम्पाक 18: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
