सेगुम्पाक 17
17
थेस्लोनिके साहारबे पावाल नुङ् सिलास
1पावाल नुङ् सिलास आम्फिपोलिस नुङ् आपोल्लोनिया साहार लेङ्साङ् थेस्लोनिके साहारबे तासाचु॥ न्नाबे याहुदिचिगा छुम्पाङ् वाया॥ 2साधाइ लोॽवामाङ् पावाल न्ना याहुदि छुम्पाङ्बे चा ख्या॥ न्हाङ् सुम हाप्ता सोम्मा आराम चोक्माहा लेनचिबे धार्मासाप्लाबे छेप्ताहा चेॽयागा उतुम्बे ङ्खाचिनुङ् लुखुसा न्जाया॥ 3उङा धार्मासाप्लाभाङ् पार्मान पिसाङ् ङ्खाचि खाॽला लुचि, “खिरिस्टङा तुखि आङ्मा नुङ् स्यानाभाङ् हिङ्गिलिक लेङ्मा पोर्ने माङ् साया, न्हाङा का पार्चार चोगुङ्ना येसुमाङ् निङ्वाफुमाङा पाक्सुना न्ना खिरिस्ट ओम॥” 4न्नाबे ङ्वायाहा इखिङ् याहुदिचिङा ङ्खा चेॽया ङ्खेप्सुहोङ् उङ्चि निङ्वा ताया, न्हाङ् हाङ्बाबे बिस्वास न्जोगु॥ ङ्खाॽलामाङ् निङ्वाफुमागा सेवा चोक्खुबा गिरिक जातिगा याॽमिचि नुङ् उङ्चि निङ् ङ्हिसाहा माङ्फा मामुचिङा चा हाङ्बाबे बिस्वास न्जोगुहोङ् पावाल नुङ् सिलास पोटि लान्जोगा॥
5ङ्खाॽनिङ्गो हेकोहा याहुदिचिगा उङ्चि नाहेन्दा न्हाङ् न्ना साहारबेॽहा बोद्मास याॽमिचि न्छुप्सुचिहोङ् साहारबे इसिॽहा काम न्जोक्मेतुचि॥ ङ्खाचिङा पावाल नुङ् सिलास प्याक याॽमिचिगा ओन्दाङ् ताॽमाचिहोङ् येप्मेमागा यासोनगा पाङ्पोटि न्लुक्ताख्या॥ 6ङ्खाॽनिङ्गो ङ्खाचिङा न्नाबे पावाल नुङ् सिलास न्दुप्सुन्चिनिन॥ न्हाङा यासोन नुङ् हाङ्बाबे बिस्वास चोक्खुबा हेकोहा फुनुन्छाचि खाॽला कासाङ् साहारबेॽहा खाङ्खाङ्बाचिघे घोरोरो न्साहेतुचि, “कायुङ्लेन उलाट पुलाट चोक्खुबा याॽमिचि नाबे चा न्दायाब्यामाहा॥ 7ङ्खाचि ना यासोनङा उपाङ्बे हिङुनेसुचिहा, न्हाङ् खाचिङा ‘येसु बाङ्ना एको हेकोना हाङ् वान्नेॽना’ कासाङ् एङ्गा रोमि हाङ् काइसारगा आग्गेगा बिरुद्दाबे काम न्जोग्वाहा॥” 8खा चेॽया ङ्खेप्सुहोङ् याॽमिचि नुङ् साहारबेॽहा खाङ्खाङ्बाचि आत्ते न्जोगा न्हाङ् इचोक्मा-इचोक्मा न्लेक्सा॥ 9न्हाङा हेक्साङ् ङ्खाचिङा यासोन नुङ् हेकोहा फुनुन्छाचि याङ् ङ्हुङ्मेतुचिहोङ् न्लेहाक्सुचि॥
पावाल नुङ् सिलास बेरिया साहारबे
10नाम आयाहोङ् सोलोक हाङ्बाबे बिस्वास चोक्खुबा फुनुन्छाचिङा पावाल नुङ् सिलास सेॽनिमाङ् बेरिया बाङ्ना साहारबे म्बाक्साहाक्सुचि॥ उङ्चि न्नाबे तासाचुहोङ् याहुदिचिगा छुम्पाङ्बे ख्याचि॥ 11न्नाबेॽहा याॽमिचि थेस्लोनिकेबेॽहा याॽमिचि हाक्निङ् प्याक उचुन्हा#१७:११ नुराङ्बा न्साया॥ ङ्खाचिङा पावालङा पार्चार चोगुहा निङ्वाफुमागा चेॽया निङ्वा म्बिहोङ् उचुन्माचेक ङ्खेप्सुहोङ् ङ्खा चेॽया तोङ्मेहा येम न्दोङ्मेन्हा येम भोङ् लेन्लेन धार्मासाप्ला पोढाचोक्साङ् जाच न्जोगु॥ 12प्याक याहुदिचिङा हाङ्बाबे बिस्वास न्जोगु॥ ङ्खाॽलामाङ् उङ्चि निङ् हिसाहा गिरिक बाबु-मामुचिङा चा हाङ्बाबे बिस्वास न्जोगु॥
13ङ्खाॽनिङ्गो थेस्लोनिकेबेॽहा याहुदिचिङा बेरियाबे चा पावालङा निङ्वाफुमागा चेॽया खेम्मेॽमासिमेॽना बाङ्ना ङ्खेप्सु॥ न्हाङा न्नाबे चा न्दायाहोङ् याॽमिचि पावालगा बिरोध चोक्मागा न्थेन्दुचि॥ 14खा न्निसुहोङ् बिस्वासि फुनुन्छाचिङा पावाल लोप्कालोप सामुन्दारागा उयुम्बे म्बाक्साहाक्सु॥ ङ्खाॽनिङ्गो सिलास नुङ् तिमोथि च्हेन बेरियाबेॽमाङ् वायाचि॥ 15पावाल तिॽनासे खेखुबा फुनुन्छाचिङा उङ् एथेन्स बाङ्ना साहारबे न्दिसोओ॥ न्नाबे न्दासुहोङ् पावालङा उङ् तिॽनासे खेखुबाचिभाङ् सिलास नुङ् तिमोथि हानि आप्चिनि भोङ् सालेन हाक्सु॥
पावाल एथेन्स साहारबे
16पावालङा एथेन्सपे सिलास नुङ् तिमोथि कुसुक्साचिनिङ्, न्ना साहारबे प्याक मुर्तिचि निसुचिहोङ् उनिङ्वाबे इसिॽनुङ् एता॥ 17न्हाङामाङ् उङ् याहुदिचि नुङ् निङ्वाफुमागा सेवा चोक्खुबा गिरिक जातिगा याॽमिचिनुङ् याहुदि छुम्पाङ्बे येसुगा उतुम्बे लुखुसा न्जाया॥ ङ्खाॽलामाङ् साहारगा चोकपे लेन्लेन आप्साङ्-खेसाङ् चोक्खुबा याॽमिचिनुङ् चा प्याक लुखुसा न्जाया॥ 18इपिकिउरि नुङ् इस्तोइकि छुमगा एकोहिप्पाङ् चिन्खुबाचि चा पावाल नुङ् लुखुसा न्जाया॥ ङ्खाचिबे इखिङ्ङा पावाल खाॽला न्लु, “ना भाक्भाकेङा इ कामेॽना?” इखिङ्ङा च्हेन खाॽला चा न्लु, “नाङा गो ओछोङा माङ्चिगा उतुम्बे पार्चार चोग्वाहा!” पावालङा येसुगा उतुम्बे नुङ् स्यानाभाङ् हिङ्गिलिक लेङ्मानागा उतुम्बे पार्चार चोगुहाङा ङ्खाचिङा खाॽला न्लु॥ 19न्हाङा ङ्खाचिङा पावाल आरियोपागास बाङ्ना छुम्माबे ङ्खेतुहोङ् खाॽला न्लु, “न्दा पार्चार चोगुघा खा ओछोङा चेॽयागा उतुम्बे कानिङ् चा आमा मितुक्सुम्ङाहा॥ 20कानिङ् खाॽलाहा चेॽया हेॽनिङ्चा ङ्खेप्सुक्सुम्ङान्हा॥ न्दा कामा योगाना चेॽयागा तुम्बिला इना ओम? कानिङ् योक्मेता॥” 21(इजाङ्बाङ्निङ् एथेन्स बेॽहा घाक याॽमिचि नुङ् न्नाबे वाखुबा हेकोहा खाम्युकपाहाङ् न्दायाहा याॽमिचि साधाइ ओछोङा-ओछोङा चेॽया खेम्मा मिखुबा, चेक्मा मिखुबाचि न्साया॥ न्हाङा उङ्चिङा ङ्खाॽलाहाबे से सामाया म्बिक्सा)॥
22पावालङा आरियोपागास छुम्मागा ओन्दाङ् येबाहोङ् खाॽला लुचि, “ओ एथेन्सपे वाखुबा याॽमिचि, न्निङ्दा तुक्नुङ् धार्मोति सिगान बाङ्ना चेॽया का था तोक्तुङ्॥ 23इजाङ्बाङ्निङ् न्निङ्गा साहारबे कोताङ्निङ् न्निङ्दा पुजा चोक्माहा ठोङ् सोङ्चिङ्, न्नाबे एको खाॽलाना बेदि चा तुप्सुङ् न्नाबे ‘चिनान्जोगान्ना माङ्गा लागि’ भोङ् छेप्तामासा॥ न्निङ्दा चिना मेन्दोक्ले पुजा चोगुम्गाना न्ना निङ्वाफुमागा उतुम्बे लोप का पार्चार चोक्मासिमेङ्ना॥
24“ताम्दाङ्फुमा नुङ् नाबे वेॽहा घाक थोक चोक्खुबा निङ्वाफुमामाङ् वालोक नुङ् ताम्दाङ्फुमागा मालिक ओम॥ उङ् याॽमिगा मुकङा चोगाना पाङ्बे ङ्वामेन्ना॥#१ हाङ् ८:२७; यासाइया ४२:५; सेगुम्पाक ७:४८ 25न्हाङ् उङ् याॽमिचिङा तिसाहा इहाचा थोक्का खाचो ङ्ङामेन्ना, ङ्खाॽनिङ्गो उङाले याॽमिचि हिङ्लुङ्, सोक्मा नुङ् चाहाचोगाहा घाक थोक पिवाचिहा॥ 26कायुङ्लेन भोरि याॽमिचि ङ्वानि भोङ् उङा एको याॽमिभाङ् घाक जातिचि चोगुचि, न्हाङ् कायुङ्लेनबे वामा पिचि॥ उङा ङ्खाचि हिङ्माहा लेनचि नुङ् वामाहा ठोङ् ओन्दाङ्माङ् तोक्सुबिचि॥ 27निङ्वाफुमाङा खा घाक काम याॽमिचिङा का योक्निहोङ् तुम्नि बाङ्ना आसङा चोगु॥ ङ्खोङ्चा निङ्वाफुमा कानिङ्भाङ् माङ्दु मान्ना॥ 28इजाङ्बाङ्निङ् कानिङ् उका कारानङामाङ् हिङिॽवा, लामिॽवा न्हाङ् उङ्बेॽमाङ् एङ्गा आस्तित्वा वान्ने॥ खा चेॽयागा उतुम्बे न्निङ्गा एको छेप्राङ्बाङा चा खाॽला कायामा, ‘जेप्पा कानिङ् उका सान्तानसिन॥’
29“ङ्खाॽला कानिङ् निङ्वाफुमागा सान्तान लेक्सिहाङा, निङ्वाफुमा याॽमिङा उङ्चि निङ्वाबे म्मितुहोङ् मुकङा न्जोगुचिहा साम्मेङ्, युप्पा नुङ् लुङ्खाक्का मुर्ति लोॽवाना भोङ् मिॽमा न्लेङ्मेन्ना॥ 30ङ्खाॽला था मेन्दोक्ले, मेनिले चोगाहा इसिॽहा कामगा दान्डा निङ्वाफुमाङा म्बिमेन्हा॥ ङ्खाॽनिङ्गो हाकु घाक ठोङ्बेॽहा घाक याॽमिचि पास्चाताप चोगानिभोङ् आग्गे पियामाहा॥ 31इजाङ्बाङ्निङ् कायुङ्लेनबेॽहा घाक याॽमिचिगा निरिक चोक्माना लेन उङा युक्साब्यामा, न्ना लेन उङा सेगुना याॽमिभाङ् धार्मिक्ताबे कायुङ्लेनगा निरिक चोग्वा॥ उङा सेगुना न्ना याॽमिबे निरिक चोक्माहा चोक्तोक वान्नेहा बाङ्ना चेॽयागा पार्मान उङ् स्यानाभाङ् हिङ्गिलिक लेङ्मेतुहोङ् सोॽमेतामा॥”
32न्स्याहा याॽमिचि हिङ्गिलिक न्लेङ्मेहा बाङ्ना चेॽया ङ्खेप्सुहोङ् इखिङ् याॽमिचिङा पावाल खिजे न्जातु॥ ङ्खाॽनिङ्गो इखिङ्ङा च्हेन खाॽला न्लु, “खा चेॽयागा उतुम्बे फेरि चा कानिङ् खेम्मा मितुक्सुम्ङाहा॥” 33न्हाङा पावाल ङ्खाचिगा लुम्भाङ् लोन्दाख्या॥ 34ङ्खाॽनिङ्गो एकोहिप्पाङ् याॽमिचि पावालनुङ् ङ्ख्या, न्हाङ् ङ्खाचिङा हाङ्बाबे बिस्वास न्जोगु॥ ङ्खाचिबे आरियोपागास छुम्मागा सादास्या डियानुसियास नुङ् दामारिस बाङ्ना मामु न्हाङा हेकोहा याॽमिचि चा ङ्वाया॥
Currently Selected:
सेगुम्पाक 17: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
