लुका 12

फरिसियाह नहिँया झिन हखिह

(मति १०:२६-२७)

1तखनहिँ बहुत मन्‍सेक भिड जामा भेल रहलइ। उहेसे जम्‍मे मन्‍सावाह एक-दोसरि जनके धकिला-मकिलि करइ रहलइ। तब येसुजि यापन चेलवानिके कहलसि, “तोहरा फरिसियानिक खमिर नहिँया कपटि व्‍यबहारसे बचके रहिह!#मति १६:६; मरकुस ८:१५ 2केहकेकि जम्‍मे झपाइल बात परकट हतइ हसे जथि बात लोकावल बडइ, उअ थाह हतइ।#मरकुस ४:२२; लुका ८:१७ 3उहेसे जथि बात तोहरा यन्‍हारिमा कहले बडह, उअ इजोरवामा सुनार हतइ हसे जथि बात तोहरा खोकवा भितरा खुस-खुस करके फदकले रहलह, उअ बतवा घरवाक छनियासे जबड माहे परचार हतइ।”

काकरसे डेराए परतइ

(मति १०:२८-३१)

4 “अरे मोर सङहतियवाह, मुइ तोहराके कहबहिँ, उअ मन्‍सावानिसे झिन डेरइह, जुने तोहार देहियाके मतरे नास करे सकतइ हसे याको किहो फेनि करे नाहिँ सकतइ। 5बाकि मुइ तोहराके काकरसाङे डेराए परतइ कहके कहबहिँ। तोहरा परमेस्‍वरसाङे डेरइह, केहकेकि देहिया मारलिपाछा तोहराके नरकमा फाकेके हुनेक अधिकार बडइ। उहेसे तोहरा परमेस्‍वरसाङे मतरे डेरइह। 6हेरह, पाँच गो गेहुरि त दु पइसामा बिकेसइ, हइने त? ताफेनि परमेस्‍वर एगुडाके फेनि हइने विसरोससि। 7परमेस्‍वर एकहक करके तोहार मुडवाक केसवा फेनि गनले बडसि। उहेसे तोहरा झिन डेरइह, केहकेकि तोहरा गेहुरियानिसे फेनि झन बहुत मोलक बडह।

येसुजिके स्‍विकार करिह

(मति १०:३२-३३; १२:३२; १०:१९-२०)

8 “तब येसुजि कहलसि, सुनह, ‘मुइ तोहराके कहबहिँ, जुने मोरके मन्‍सावानिक यागा, मोर चेला कहके स्‍विकार करतइ, मुइ मन्‍सेक पुतर फेनि परमेस्‍वरक दुतवानिक यागा वकरेके इअ मोर हखिय कहके स्‍विकार करबहिँ। 9बाकि जुने मोरके मन्‍सावानिक यागा मोर चेला कहके स्‍विकार नाहिँ करतइ, मुइ फेनि परमेस्‍वरक दुतवानिक यागा वकरेके इअ मोर हइने हखिय कहके कहबहिँ। 10यगर कुनहुँ मन्‍सेक पुतरक विरोधमा एगुडा सबद फदकके पाप करतइ, वकर पाप छमा हतइ, बाकि जुने पवितर-आत्‍माक विरोधमा निना करतइ, वकर पाप कबहुँ फेनि छमा नाहिँ हतइ।’#मति १२:३२; मरकुस ३:२९

11 “जब मन्‍सावाह तोहराके पकडके सभाघरवाक सासक हसे अधिकारियानिक लघिना लिगतइ, तखनहिँ तोहरा कथि हसे कस्‍नुक जवाफ देवे परतइ कहके चिन्‍ता झिन करिह। 12तखनहिँ पवितर-आत्‍मा तोहराके कथि जवाफ देवे परतइ कहके सिखोबसि।”#मति १०:१९-२०; मरकुस १३:११; लुका २१:१४-१५

मुरुख धनि मन्‍सेक दृस्‍टान्‍त

13तखनहिँ मन्‍सावानिक भिडवासे कुनहुँ एक जन येसुजिके कहलिय, “गुरुजि, हमार बाबाक छाडके गेलि धन-सम्‍पतिया मोर दादाके अंसबन्‍डा करदेहि कहके मोर दादाके कहदेहुँ।” 14बाकि येसुजि वकरेके कहलसि, “अरे भयवा, तोहार दु जनक बिचा धन-सम्‍पतिक अंसबन्‍डा करेके मोरके कुने खटोलिय त?” 15तब येसुजि फेरि कहलसि, “तोहरा चेतले रहिह! हसे जम्‍मे खलिक लोभ-लालचसे बचके रहिह, केहकेकि मन्‍सेक सदि जिवन वकरसाङे भेलि बहुत धन-सम्‍पतिमा नाहिँ हतइ।”

16वकरपाछा येसुजि हुनुकाके एगुडा दृस्‍टान्‍त देते कहलसि, “कुनहुँ एक जन धनि मन्‍सेक खेतवामा बहुत उब्‍जनि भेलइ। 17तब उअ मने-मने यसके विचार करे लगलिय, ‘याबे मुइ कथि करेके त? केहकेकि इअ यनवा धरेके तहिँया मोरसाङे ठउरि हइने बडइ।’ 18उहेसे उअ यपनहिँके कहलिय, ‘याबे मुइ यसके करबहिँ, झिन-झिनि बखरिया भसकाके जबड-जबड बखारि बनोबहिँ हसे वहवाँहिँ मोर जम्‍मे यनवा हसे चिजु-बिज धरबहिँ। 19वकरपाछा मुइ यापन प्रानके कहबहिँ, “अरे मोर प्रान, मुइ तोर तहिँया बहुत बरस पुग्‍ना धन-सम्‍पति धरले बडहिँ। याबे तुइ सुखसे खइसि, पियसि हसे मोजमाजा करसि”।’ 20बाकि परमेस्‍वर वकरेके कहलसि, ‘अरे मुरुख मन्‍सावा! याजु रतहिँ तोर प्रान जेतइ जउँ, तोर जतन करके धरलि धन-सम्‍पतिया कुने पउतइ त?’#अयुब २७:८; भजन ३९:६; यरमिया १७:११

21 “तब येसुजि वकरेके कहलसि, ‘यापन तहिँया धरतियामा धन-सम्‍पति जामा करलाहर, बाकि परमेस्‍वरक लजरियामा धनि हइने हखलहरानिके यसने दुःख हतइ’।”

तोहरा फिकरि झिन करिह

(मति ६:२५-३४)

22वकरपाछा येसुजि यापन चेलवानिके कहलसि, “यापन प्रानक तहिँया कथि चिजु खाएके हसे देहियाक तहिँया कथि लुगा पेहरेके कहके फिकरि झिन करिह, 23केहकेकि जेउनासे मन्‍सेक प्रान हसे लुगाफाटासे मन्‍सेक देहिया बहुत मोलक हखइ। 24तोहरा कउघावानिके हेरिह! हुनुका खेति-पाति हइने करसइ, न बालि काटके भितरोसइ। हुनुकर धरना बखारि फेनि हइने रहसइ, ताफेनि परमेस्‍वर हुनुकाके खियोससि। तोहरा त उअ चेरइयानिसे फेनि बहुत मोलक बडह।

25 “तोहारमधे कुने बडह जुने फिकरि करके यापन आयुमा इचिका समय फेनि बढावे सकबह? 26यगर तोहरा यतुरा झिनिक काम करे हइने सकसह जउँ, तोहरा केहके याको चिजुक बारेमा फिकरि करसह? 27हेरह, वनवाक लिलि फुलवाह कस्‍के बढसइ। हुनुका त काम फेनि हइने करसइ, कि लुगा फेनि हइने बिनसइ, बाकि मुइ तोहराके कहबहिँ, सोलोमन रजवा बहुत मोलक लुगा पेहरके फेनि हिनिकर नहिँया कछाइल हइने रहलिय।#१ राजा १०:१-१० 28अरे इचिके विस्‍वास भेलि मन्‍सावाह, यगर परमेस्‍वर याजु बडइ हसे यनदिने यगियामा फकइना जमरवाक घसवाके फेनि यसके कछोससि जउँ, कथि तोहराके फेनि यकरसे बहुत डउलसे लुगा नाहिँ पेहरोबसि त? 29उहेसे तोहरा कथि खेबहु हसे कथि पियबहुँ कहके फिकरि झिन करिह। 30केहकेकि अयहुदि मन्‍सावाह मतरे इअ चिजुवाक खोजि करसइ, बाकि तोहराके इअ जम्‍मे चिजुवा चाहिँ लगसइ कहके तोहार परमेस्‍वर पिताक थाह बडइ। 31बरु तोहरा पहिला परमेस्‍वरक राजक खोजि करिह हसे इअ जम्‍मे चिजुवा तोहराके दियतइ।

स्‍वरगमा जामा हखना धन

(मति ६:१९-२१)

32 “येसुजि यापन चेलवानिके कहलसि, ‘मोर झिनकि दफवाक चेलवाह, झिन डेरइह! केहकेकि तोहार पिता तोहराके यापन राज देवेके तहिँया खुसि बडसि। 33तोहरा यापन धन-सम्‍पतिया बेचके गरिबवानिके दान दिह। यापन तहिँया हइने फटना झोला बनाके कबहुँ हइने वरइना धन स्‍वरगमा जामा करिह। वहवाँ चोरवा फेनि हइने चोरोसइ हसे किरवा फेनि हइने खेसइ। 34केहकेकि जहवाँ तोहार धन हसइ, वहवाँहिँ तोहार मन फेनि हतइ।’

चेतले रहके इसियाइ रहिह!

(मति २४:४५-५१)

35 “वकरपाछा येसुजि कहलसि, तोहरा यापन फडवा बान्‍हके काम करेके तहिँया तयार रहिह हसे तोहार यापन दिवइयाह बारके रखिह। # मति २५:१-१३ 36तोहरा बियाहक भोजसे फिरके यवइखुनि मलिकवाक पइडा हेरलाहर बहरिया नहिँया हखिह, जुने मलिकवा फिर याके केउरिया ढोकढोकउतेकि वकर तहिँया केउरिया खोलदेतइ। 37जुन बहरियावानिके मलिकवा फिरके यवइखुनि जगले पउबिय, उअ बहरियावानिके च्‍याबास देबिय। मुइ तोहराके सदियो कहइ बडहिँ, उअ मलिकवा फाड बान्‍हके हुनुकाके पहुना नहिँया जेउना खियावेके बेठोबिय हसे हुनुकर सेवा करबसि। 38यगर मलिकवा याधा रतियामा कि बिहान भेलिसे यागा यवइखुनि यापन बहरियावानिके जगले पउबिय जउँ, उअ बहरियावानिके बहुत च्‍याबास देबसि। 39बाकि तोहरा इअ बुझह कि, चोरवा कखना यबिय कहके घरवाक मलिकवा जनले रहतिय जउँ, उअ यापन घरवामा चोरवाके पेसे नाहिँ देबिय। 40उहेसे तोहरा फेनि चेतले रहिह, केहकेकि मन्‍सेक पुतर तोहार हइने सोचलि जुनवामा यबहिँ।” 41तब पतरुस येसुजिके कहलिय, “प्रभुजि, यपनहुँ इअ दृस्‍टान्‍त हमराके मतरे कि जम्‍मे जनके कहइ बडहुँ?” 42तब प्रभुजि हुनुकाके कहलसि, “विस्‍वासिलो हसे बुद्धियार यगुवा कुने हखिय, जकरेके मलिकवा यापन बहरियावानिके ठिक जुनवामा जेउना देवेके तहिँया जिम्‍मा देबिय। 43जब मलिकवा फिरके यवइखुनि उअ यगुवावाके यपने कहलि नहिँया काम करइ पउबिय, तब उअ वकरेके इनाम देबिय। 44मुइ तोहराके सदियो कहइ बडहिँ, मलिकवा उअ यगुवावाके यापन जम्‍मे धन-सम्‍पतियाक जिम्‍मा लगोबिय। 45बाकि उअ यगुवा ‘मोर मलिकवा हल-हालि नाहिँ यबिय’ कहके सोचके बहुत खाँ-पिके दोसरि बहरियावानिके फेनि पिटे लगबिय जउँ, 46वकर मलिकवा उअ यसरा हइने करलि दिन हसे जुनवामा यबिय तके वकरेके खुभे सजाय देबिय। तब वकर दासा आग्‍या हइने मनलाहरक नहिँया हतइ। 47यगर जुन बहरियावा मलिकवाक इछा जानके फेनि तयार नाहिँ रहबिय जउँ, उअ बहरियावा खुभे पिटाइ खेबिय। 48बाकि जुन बहरियावा मलिकवाक इछा थाहे नाहिँ भके काम करबिय जउँ, उअ कमाहे पिटाइ खेबिय। जकरेके बहुत दियाइल बडइ, वकरेसे बहुत मङेतइ हसे जकरेके बहुत सपाइल बडइ, वकरेसे याको बहुत लियतइ।”#गन्‍ति १५:२९-३०; व्‍यवस्‍था २५:२-३

परिवारमा फुट

(मति १०:३४-३६)

49 “येसुजि कहलसि, ‘मुइ इअ धरतियामा यागि # १२:४९ यहवाँ यागि कहले मन्‍सावानिक बिचा फुट हखइ कहके बुझोसइ। लगावे याइल बडहिँ। इअ यगिया पहिनासे सुनगसकल रहतिय त डउले हतिय! 50मुइ एगुडा खाँ दुःखक बप्‍तिस्‍मा लेवे परतइ हसे उअ बप्‍तिस्‍मा नाहिँ लेइकलइ मुइ व्‍याकुल हखबहिँ।#मरकुस १०:३८ 51कथि तोहरा मोरके इअ धरतियामा मन्‍सावानिके सान्‍ति देवे याइल बडहिँ कहके सोचसह? सान्‍ति हइने, बरु फुट यानेके याइल बडहिँ। 52याबेसे एगुडा परिवारमा भेलि पाँच जनक बिचा फेनि फुट हतइ। तिन जनक विरोधमा दु जन उठतइ हसे दु जनक विरोधमा तिन जन उठतइ।

53 बाबा बेटवाक विरोधमा

हसे बेटवा बाबाक विरोधमा उठतइ,

दाओ बेटियाक विरोधमा

हसे बेटिया दाओक विरोधमा उठतइ।

वसनेकरते, ससुइया पुतहियाक विरोधमा

हसे पुतहिया ससुइयाक विरोधमा फेनि उठतइ’।” # मिका ७:६

समयक चिन्‍हा

(मति १६:२-३)

54येसुजि मन्‍सावानिक भिडवाके फेनि कहलसि, “जब पछियसे बदरिया लगोले देखसह, तखनहिँ तोहरा ‘याबे पानि परतइ’ कहके कहसह हसे पानि परसइ। 55जब दखिनेसे बयार चलसइ, तखनहिँ तोहरा ‘याबे गरम हतइ’ कहके कहसह हसे गरम हसइ। 56अरे कपटियाह! यगर तोहरा धरतिया हसे बदरियाके हेरके यखनि कथि हतइ कहके जनसह जउँ, तोहरा यखनिक जुनवाक यरथ केहके हइने बुझसह?”

विरोध करलहरासाङे मिलाप करिह

(मति ५:२५-२६)

57 “कथि काम करेके ठिक बडइ कहके तोहरा यपनहिँ केहके हइने बुझसह? 58जब कुनहुँ तोहराके दोस लगाके न्‍यायधिसवाक लघिना लिगे खोजतइ जउँ, तोहरा उअ दोस लगोलहरासाङे पइडवाहिमा मिलाप करिह। यगर मिलाप नाहिँ करबह जउँ, उअ तोरके न्यायधिसवाक यागा लिगबिय। तब न्‍यायधिसवा तोरके झ्‍यालखनवामा थुनेके तहिँया पुलसवानिक जिम्‍मा लगोबिय। 59मुइ तोरके कहबहिँ, कदरहिक एकहक पइसा नाहिँ तिरइलइ, तुइ वहवाँसे छुटे नाहिँ सकबहि।”

Currently Selected:

लुका 12: CTHR

Highlight

Copy