लुका 13

परमेस्‍वरवरि मन फिरउह

1तखनहिँ वहवाँ भेलि कुनहुँ मन्‍सावाह, पिलातस कस्‍के कतेक जन गालिलिसभके मारे लगोलिय हसे हुनुकर रकतवा भोगवा चढोलि पसुवाक रकतवासाङे मिझरेलइ कहके येसुजिके कहलइ। 2तब येसुजि हुनुकाके जवाफ देते कहलसि, “कथि यसके दुःख पउलेसे हुनुका याको जम्‍मे गालिलिसभसे झन पापि रहलइ कहके सम्‍झसह? 3मुइ तोहराके कहबहिँ, वसके हइने, बरु तोहरा यापन-यापन पाप मानके परमेस्‍वरवरि यापन मनवा नाहिँ फिरोबह जउँ, तोहरा फेनि वसने नास हखबह। 4जुन अठारह जन सिलोआमक धरहरवा भहडके मरलइ, कथि उअ मन्‍सावाह याको यरुसलेमक मन्‍सावानिसे झन पापि रहलइ कहके सम्‍झसह? 5मुइ तोहराके कहबहिँ, वसके हइने, बरु तोहरा यापन-यापन पाप मानके परमेस्‍वरवरि यापन मनवा नाहिँ फिरोबह जउँ, तोहरा फेनि वसने नास हखबह।”

फर हइने फराह कोइलारक गाछक दृस्‍टान्‍त

6वकरपाछा येसुजि हुनुकाके एगुडा दृस्‍टान्‍त देते कहलसि, “एक जन मन्‍से यापन अंङगुरवाक बरियामा एगुडा कोइलारक गाछ रोपलिय। एक दिन उअ मन्‍सावा कोइलरवाक गछवामा फर खोजे यलिय, बाकि फर हइने पउलिय। 7उहेसे उअ अंङगुरवाक बरिया कमोलहरा मन्‍सावाके कहलिय, ‘हेरहि, मुइ तिन बरससे इअ गछवामा फर खोजइ बडहिँ, बाकि मुइ यकरमा फर हइने पउलहिँ। यकरेके काटके भहडा देहि, केहकेकि इअ बेकारमा भुयवा मतरे डडले बडिय।’ 8बाकि उअ मन्‍सावा कहलिय, ‘मलिकवा, इअ गछवाके एक बरस याको रहे देहुँ। मुइ यकर चारिवरि गडहा खेनके मल गहबहि। 9इअ गछवामा फर फरतइ जउँ त डउले बडइ, यगर फर नाहिँ फरतइ जउँ, मुइ यकरेके काटके ढाह देबहिँ’।”

येसुजि एगुडा मनियाइल जनियानिके डउल बनोलसि

10कुनहुँ एक विसराम दिनवामा येसुजि सभाघरवामा सिछा देइ रहलसि। 11वहवाँ एक जन जनियानि रहलिय, जुने अठारह बरसलइ एगुडा दुस्‍ट-आत्‍मासे कुबर भेल रहलिय। उहेसे उअ सोझ भके ठडियाय हइने सकइ रहलिय। 12येसुजि उअ जनिनियाके देखके वकरेके बलोलसि हसे कहलसि, “याबे तुइ यापन दुःखवासे डउल भेलहिँ।” 13जब येसुजि यापन हथवा वकर वपरा रखलसि, उअ जनिनिया वइघरहिँ सोझ भेलिय हसे ठडियाइके परमेस्‍वरक बखान करे लगलिय।

14येसुजि उअ जनिनियाके विसराम दिनवामा वकर दुःखवासे डउल बनोले देखके सभाघरवाक सासक खिसियाके मन्‍सावानिके यसके कहलिय, “एक हप्‍तामा काम करेके छउ दिन त बडते बडइ, उहेसे हप्‍ताक उअ छउ दिनवामा याके डउल हखिह, विसराम दिनवामा हइने।”#प्रस्‍थान २०:९-१०; व्‍यवस्‍था ५:१३-१४

15बाकि प्रभुजि वकरेके यसके कहते जवाफ देलसि, “अरे कपटियाह! कथि तोहरा विसराम दिनवामा यापन-यापन गोरुवा हसे गदहवाके फोके पानि पियावे हइने लिगसह त? 16इअ जनिनिया फेनि अब्राहमक बेटि हखिय हसे दुस्‍ट-आत्‍मा यकरेके अठारह बरसलइ दुःख देले रहलइ। कथि इअ जनिनिया फेनि विसराम दिनवामा दुस्‍ट-आत्‍मासे छुटकारा पावे नाहिँ परतइ त?” 17येसुजिक इअ जवाफ सुनके विरोध करलहरा जम्‍मे जन लजियामा परलइ, बाकि वहवाँ भेलि याको मन्‍सावाह येसुजिक करलि यचम्‍मक कमवा देखके खुसि भेलइ।

राइक बिया हसे खमिर

(मति १३:३१-३३; मरकुस ४:३०-३२)

18तब येसुजि हुनुकाके कहलसि, “परमेस्‍वरक राज कस्‍नुक बडइ? हसे परमेस्‍वरक राजके मुइ कथिसाङे दाजेके? 19इअ राइक बियाक एगुडा दाना नहिँया हखइ, जकरेके एक जन मन्‍से लिगाके बरियामा छिटलिय। उअ जामके एगुडा गाछ भेलिय हसे चेरइयाह याके वकर डरवा-डुरियामा कोथा लगोलइ।”

20येसुजि हुनुकाके फेरि कहलसि, “मुइ परमेस्‍वरक राजके फेरि कथिसाङे दाजेके? 21इअ त पिठवामा घलना खमिर नहिँया बडइ। एगुडा जनियानि तिन ढकिया पिठामा मिझरोसिय हसे उअ जम्‍मे पिठवा फेनि खमिर हसइ।”

सेकटि दुवारि

(मति ७:१३-१४,२२-२३; ८:११-१२)

22तब येसुजि सहर-सहर हसे गाउँ-गाउँ हखते मन्‍सावानिके सिछा देते यरुसलेम सहरवरि गेलसि। 23तखनहिँ कुनहुँ एक जन मन्‍से येसुजिके यसके कहके पुछलिय, “प्रभुजि, कथि इचिकाहे मन्‍से मतरे मुक्‍ति पउतइ त?” 24येसुजि जवाफ देते कहलसि, “सेकटि दुवारि माहे भितरा पेसेके बोल्‍ह करिह, केहकेकि मुइ तोहराके कहइ बडहिँ, बहुत जन सेकटि दुवरियामाहे भितरा पेसेके खोजतइ, बाकि हुनुका पेसे नाहिँ सकतइ। 25जब घरवाक मलिकवा उठके केउरिया लगोबिय, तखनहिँ तोहरा बाहरा ठडियाके केउरिया ढकढकउते यसके कहबह, ‘मलिकवा, हमार तहिँया केउरिया खोल देहुँ।’ तब उअ कहबिय, ‘तोहरा कहवाँसे याइल बडह, मुइ तोहराके हइने चिनसहिँ।’ 26तब तोहरा कहबह, ‘हमरा यपनहुँसाङे खेलहुँ-पिलहुँ हसे यपनहुँ हमार सहरवाक गलियावामा सिछा देलहुँ।’ 27बाकि घरवाक मलिकवा फेरि जवाफ देते कहबिय, तोहरा कहवाँसे याइल बडह, मुइ तोहराके हइने चिनसहिँ। अरे दुस्‍ट मन्‍सावाह, यहवाँसे जइबे करह!#भजन ६:८ 28जब तोहरा अब्राहम, इसहाक, याकुब हसे जम्‍मे अगमवक्‍तावानिके परमेस्‍वरक राजमा देखबह हसे तोहरा यपनहिँके बाहरा फकाइल पउबह, तखनहिँ तोहरा कनते दतवा किटकिटोबह।#मति २२:१३; २५:३० 29तखनहिँ मन्‍सावाह पुरवे, पछिय, उतरे हसे दखिनेसे याके परमेस्‍वरक राजमा वकरेसाङे भोज खाए बेठतइ।#मति ८:११-१२ 30बाकि हेरह, जुने यखनि पाछा बडइ, हुनुका यागा हतइ हसे जुने यखनि यागा बडइ हुनुका पाछा हतइ।”#मति १९:३०; २०:१६; मरकुस १०:३१

येसुजि यरुसलेमके समझके दुःखित हखलसि

(मति २३:३७-३९)

31तखनहिँ कतेक जन फरिसिसभ येसुजिक लघिना याके कहलइ, “यपनहुँ यहवाँसे निकडके जइबे करहुँ, केहकेकि हेरोद अन्‍तिपास यपनहुँके मारे खोजइ बडिय।” 32बाकि येसुजि हुनुकाके कहलसि, “उअ धुरत गिदराके जाके कहदेह, ‘मुइ याजु हसे यनदिने भुतवानिके निकडाके मन्‍सावानिके डउल बनोइ बडहिँ हसे तिसरि दिनवामा मोर कमवा पुरा हतइ।’ 33बाकि याजु, यनदिने हसे परसुलइ मुइ यापन पइडावामा यागा बढते यरुसलेमवरि जाइ बडहिँ, केहकेकि कुनहुँ फेनि अगमवक्‍ताक हत्‍या यरुसलेम बाहरा हखहि नाहिँ सकतइ।

34 “यरुसलेमक मन्‍सावाह, अरे यरुसलेमक मन्‍सावाह, तोहरा अगमवक्‍तावानिके मारसह हसे परमेस्‍वरक पठोलि जनके फेनि पत्‍थरासे ढोकहारसह। चिङनिया यापन बचवाके डयनवातर कोक्‍सोले नहिँया, मुइ फेनि बहुत पारि तोहार बेटवा-बेटियानिके बटियावेके इछा करलहिँ, बाकि तुइ हइने मनलहि। 35हेरहि, परमेस्‍वर यरुसलेमके त्‍यागले बडसि। मुइ सदियो कहबहिँ, जखनिलइ तोहरा ‘प्रभुक नाउँमा यलहरवा आसिसित हखसि’ कहके नाहिँ कहबह, तखनहिँलइ तोहरा मोरके फेरि नाहिँ देखबह।”#भजन ११८:२६; यरमिया २२:५

Currently Selected:

लुका 13: CTHR

Highlight

Copy