लुका 11

येसुजिक सिखावल परथाना

(मति ६:९-१३; ७:७-११)

1एक दिन येसुजि कुनहुँ एगुडा ठउरिमा परथाना करइ रहलसि। परथाना करसकलेपर हुनेक एगुडा चेलवा वहवाँ याके हुनेके कहलिय, “प्रभुजि, बप्‍तिस्‍मा देलाहर युहन्‍ना यापन चेलवानिके सिखोलि नहिँया हमराके फेनि यपनहुँ परथाना करेके सिखोहुँ।” 2तब येसुजि यापन चेलवानिके कहलसि, “तोहरा परथाना करइखुनि यसके कहिह

हे हमार स्वर्गमा रहलाहर पिता, यपनहुँक पवितर नाउँक आदर हखइ।

यपनहुँक राज यवइ।

3 हमार दिन-दिनक जेउना हमराके सबदिन देहुँ।

4 हमरा दोसरि जनके छमा देलि नहिँया

हमार करलि पाप हमराके छमा देहुँ

हसे हमराके परिछा # ११:४ कुनहुँ चिजु जुन मन्‍सावाके पाप करेके लगोसिय हसे उल्‍लकोसिय, वकरहिँके परिछा कहसइ। मा परेके बचोहुँ।”

5वकरपाछा येसुजि यापन चेलवानिके यसके कहलसि, “मानलेउँ, तोहारमधे ककरो एक जन सङहतिया बडइ। तोहरा याधा रतियामा जाके वकरेके यसके कहबह, ‘मोर सङहाति, मोरके तिन गो रोटि पइँचा देहुँ त, 6केहकेकि मोर लघिना एक जन सङहतिया तनाउसे याइल बडिय हसे वकरेके खाए देवेके मोरसाङे किहो चिजु फेनि हइने बडइ।’ 7तब वकर सङहतियावा भितरासे जवाफ देते कहबिय, ‘मोरके दुःख झिन दे। मुइ केउरिया लगाके यापन बचवानिसाङे सुतसकल बडहिँ। मुइ यखनि उठके तोरके किहो चिजु फेनि देवे नाहिँ सकबहि’।” 8तब येसुजि हुनुकाके कहलसि, “मुइ तोहराके कहबहिँ, सङहतिया भेले फेनि नाहिँ देबिय, बाकि घर-घराहे मङलेसे उअ उठबिय हसे वकरेके चाहिँ लगना जतुरा देबिय।

9 “उहेसे मुइ कहबहिँ, मङिह, तोहराके दियतइ। खोजिह, तोहरा पउबह, केउरिया ढकढकउह हसे तोहार तहिँया केउरिया खोलेतइ। 10केहकेकि जुने मङसिय, उअ पउसिय, जुने खोजबिय, उअ पउबिय हसे जुने केउरिया ढकढकोसिय वकर तहिँया केउरिया खोलेतइ। 11तोहारमधे कुने यसनुक बाप हखबह, जाकर बेटवा माछरि मङइकि, माछरिक सटहा साँप देबह, 12कि याडा मङइकि वकरेके बिछि देबिय? 13तोहरा पापि मन्‍से भके फेनि यापन बेटवा-बेटियाके डउल चिजु देवे जनले बडह जउँ, स्‍वरगमा रहलाहर तोहार परमेस्‍वर पितासे मङबह जउँ, हुने झन कथि बढि पवितर-आत्‍मा नाहिँ देबसि त?”

येसुजिक करलि कमवामा संका

(मति १२:२२-३०,४३-४५; मरकुस ३:२०-२७)

14एक दिन येसुजि एक जन मन्‍सेसे भुत निकडोइ रहलसि। उअ भुतवा वकरेके गेडाह बनोले रहलिय। जब येसुजि उअ मन्‍सावासे भुत निकडोलसि, उअ मन्‍सावा फदके लगलिय। इअ देखके जम्‍मे मन्‍सावाह छक परलइ। 15बाकि हुनुकरमधे कतेक जन यसके कहे लगलइ, “इअ त भुतवाक सिरदरवा बालजिबुलसे#११:१५ बालजिबुल: इअ नउँवा मन्‍सावाह सइतनवाके कहइ। २ राजा १:२ भुतवानिके निकडोसिय।”#मति ९:३४; १०:२५ 16तब याको जन येसुजिके गारहमा पारेके तहिँया हुनेके कहलइ, “यपनहुँ हमराके स्‍वरगसे एगुडा चिन्‍हा देखोहुँ।”#मति १२:३८; १६:१; मरकुस ८:११ 17बाकि येसुजि हुनुकर मनवाक विचार बुझके यसके कहलसि, “जुन राजमा फुट हसइ उअ राज नास हतइ। जुन घरवामा फुट हसइ उअ घरवा फेनि नास हतइ। 18वसनेकरते, यगर सइतनवा यापन विरोध यपनहिँ करतइ जउँ, वकर राज फेनि कस्‍के टिकतइ त? केहकेकि तोहरा मोरके ‘इअ बालजिबुलसे भुतवानिके निकडोसहुँ’ कहके कहसह। 19वसके भेले, यगर मुइ भुतवाक सिरदरवा बालजिबुलसे भुतवानिके निकडोसहि जउँ, तोहार चेलवाह काकर सक्‍तिसे भुतवानिके निकडोसइ त? तोहार यपने चेलवाहिँ, तोहरा गलत बडह कहके परमान देइ बडइ। 20यगर मुइ परमेस्‍वरक सक्‍तिसे भुतवानिके निकडोसहि जउँ, परमेस्‍वरक राज तोहार बिचा यासकल बडइ। 21जब कुनहुँ बरियार मन्‍से हाथ-हथियार लेके यापन घरवाक रछा करतइ जउँ, वकर जम्‍मे चिजुवा बचावे सकबिय। 22बाकि वकरसे याको बरियार मन्‍से यबिय जउँ, उअ वकरेके जितबिय हसे वकर भर परलि जम्‍मे हाथ-हथियार निछोरके जम्‍मे चिजुवा लिगाके बाँट देबिय। 23जुन मन्‍सावा मोरवरि हइने बडिय, उअ मोर विरोधि हखिय। जुन मन्‍सावा मोरसाङे नाहिँ बटियोबिय उअ छाहरछिता पारबिय।#मरकुस ९:४०

भुत-आत्‍मावा फेरि फिरसइ

(मति १२:४३-४५)

24 “जब एगुडा दुस्‍ट-आत्‍मा कुनहुँ मन्‍सेसे निकडसइ, उअ उराठ-ठउरियामा जाके बिसाएके तहिँया ठउरि खोजते बुलसिय। बाकि उअ बिसाएके ठउरि कहवाँहुँ हइने पउलेसे उअ यसके कहसिय, ‘पहिने जुन घरवासे याइल बडहिँ मुइ उहे घरवामा जेबहिँ।’ 25जब उअ फिर याके पहिनेक घरवा बहारके साफा हसे डउलसे सजावल पउसिय, 26उअ जाके यापनसे याको झन खराब सात गो दुस्‍ट-आत्‍मासभके लेले याके वकर भितरा पेससइ। उहेसे उअ मन्‍सावाक पाछक दासा पहिलाक दासासे झन खराब हसइ।”

सदि आनन्‍द

27जब येसुजि फदकते रहलसि, तब मन्‍सावानिक भिडवासे एक जन जनियानि चिल्‍लाके यसके कहलिय, “यपनहुँके जनम देलाहर हसे दुध पियोलहरि दाओ आसिसित हखिय।” 28बाकि येसुजि जवाफ देते कहलसि, “बरु जुने परमेस्‍वरक वचन सुनके पालन करसइ उअ मन्‍सावा आसिसित हखिय।”

योनाक चिन्‍हा

(मति १२:३८-४२)

29जब मन्‍सावानिक भिड बढते गेलइ, येसुजि यसके कहे लगलसि, “इअ पुस्‍ताक मन्‍सावाह दुस्‍ट बडइ! हिनिका चिन्‍हा खोजसइ, बाकि परमेस्‍वर अगमवक्‍ता योनाक जिन्‍गियामा देखावल नहिँया चिन्‍हा याको कुनहुँ चिन्‍हा फेनि नाहिँ दियतइ।#मति १६:४; मरकुस ८:१२ 30जसने योना अगमवक्‍ता निनवे सहरवाक मन्‍सावानिक तहिँया चिन्‍हा भेलिय, वसने मुइ मन्‍सेक पुतर इअ पुस्‍ताक मन्‍सावानिक तहिँया चिन्‍हा हखबहिँ।”#योना ३:४ 31न्यायक दिनवामा दखिनेक देस सेबाक रनिया इअ पुस्‍ताक मन्‍सावानिसाङे उठके हुनुकाके दोस लगोबिय, केहकेकि उअ सोलोमन रजवाक ग्‍यानक बात सुनेके तहिँया धरतियाक वाहि तिरवासे याइल रहलिय। बाकि हेरह, सोलोमनसे फेनि एक जन महान मन्‍से यहवाँ बडिय। 32न्यायक दिनवामा निनवे सहरवाक मन्‍सावाह इअ पुस्‍ताक मन्‍सावानिसाङे उठके हिनिकाके दोस लगोतइ, केहकेकि योना परमेस्‍वरक वचन परचार करइकि हुनुका यापन-यापन पपवा मानके छडलइ। बाकि हेरह, योनासे फेनि एक जन महान मन्‍से यहवाँ बडिय।#योना ३:५

देहियाक दिवा

(मति ५:१५; ६:२२-२३)

33 “कुनहुँ फेनि दिवा बारके लोकाके हइने धरसइ, नत भडियासे झपसइ, बरु दिवा धरनावामा धरसइ, ताकि घरवा भितरा यलहरवा इजोर देखइ। # मति ५:१५; मरकुस ४:२१; लुका ८:१६ 34तोर यखिया तोर देहियाक तहिँया इजोर देलाहर दिवा हखइ। तोर यखिया यसल हतइ जउँ, तोर जम्‍मे देहियामा इजोर हतइ। यगर तोर यखिया खराब हतइ जउँ, तोर जम्‍मे देहिया यन्‍हार हतइ। 35उहेसे हुसियार रहिय, ताकि तोरमा भेलि इजोरवा यन्‍हार झिन हखइ। 36यगर तोर देहियाक कुनहुँ फेनि यङग यन्‍हार नाहिँ भके जम्‍मे देहियामा इजोर हतइ जउँ, तोर जम्‍मे देहियामा इजोर चम्‍कतइ, जसने दिवइयाक इजोरवा तोरमा चम्‍कसइ।”

फरिसि हसे व्‍यवस्‍थाक-गुरुसभके येसुजिक चेतवनि

(मति २३:१-३६; मरकुस १२:३८-४०)

37येसुजि फदक सकलेपर, एक जन फरिसि हुनेके यापन घरवामा जेउना करेके नेउता देलिय। उहेसे येसुजि वकर घरवा भितरा पेसके खाए बेठलसि। 38बाकि येसुजि जेउना करलिसे यागा यापन हथवा हइने धोवलेसे#११:३८ फरिसियाह जेउना करलिसे यागा निस्‍ठा हखेके तहिँया हथवा हसे पखुरवा धोवेके चलन रहलइ। नेउता देलहरा फरिसिया छक परलिय। 39उहेसे प्रभुजि वकरेके कहलसि, “तोहरा फरिसियाह कचोरवा हसे छिपवाक बहरिकरवा मिससह, बाकि तोहार भितरिकरवा जम्‍मे लोभ हसे दुस्‍टसे भराइल बडह। 40अरे मुरुखसभ, जुने तोहार भितराक बनोले बडिय, कथि उहे तोहार बाहराक फेनि बनोले हइने त? 41जब तोहरा भितरा भेलि चिजुवा गरिबवानिके दान देबह, तब तोहार जम्‍मे चिजुवा सुद्ध हतइ।

42 “तोहरा फरिसियानिके धिकार! केहकेकि तोहरा पुदिना, मसालाक हसे जम्‍मे जरिबुटिक दसांस परमेस्‍वरके देसह, बाकि तोहरा मन्‍सावानिके ठगसह तके परमेस्‍वरके फेनि माया हइने करसह। तोहरा दसांस देलिक सङहि मन्‍सावानिके डउलसे न्‍याय हसे परमेस्‍वरके फेनि माया करे परतइ। # लेवि २७:३०

43 “तोहरा फरिसियानिके धिकार! केहकेकि तोहरा यहुदियानिक सभाघरवामा यादरक ठउरियामा बइठेके हसे बजरवामा दोसरि जनसे यादर पावे खोजसह। 44तोहराके धिकार! केहकेकि तोहरा त चिने हइने सकना चिन्‍डि नहिँया बडह, जाकर वपरा मन्‍सावाह थाहे हइने पाके बुलसइ।”

45तब एक जन व्‍यवस्‍थाक-गुरु येसुजिके कहलिय, “गुरुजि, यपनहुँ यसके कहके हमार बिजेत करइ बडहुँ।” 46बाकि येसुजि जवाफ देते कहलसि, “तोहरा व्‍यवस्‍थाक-गुरुसभके धिकार! केहकेकि तोहरा मन्‍सावानिके बोके हइने सकना बोदहर भार बोकोसह, बाकि तोहरा यापन एगुडा यङगुरिसे फेनि मदत हइने करसह।

47 “तोहरा फरिसियानिके धिकार! केहकेकि तोहरा यापन पुरखावानि मारलि अगमवक्‍तावानिक चिन्‍डिया बनोसह, हसे 48यसने तोहरा यापन पुरखावानिक करलि कमवामा साछि हसे सहमत बडह। केहकेकि हुनुका अगमवक्‍तावानिके मारलइ हसे तोहरा हुनुकर तहिँया चिन्‍डिया बनोसह। 49उहेसे परमेस्‍वर यापन बुद्धियासे यसके कहले बडसि, ‘मुइ तोहार लघिना अगमवक्‍ता हसे प्रेरितसभके पठोबहि, बाकि हुनुकरमधेसे कतेक जनके तोहरा मारबह तके कतेक जनके तोहरा सतोबह।’ 50उहेसे संसारक सुरुसे यखनिलइ मारलि जम्‍मे अगमवक्‍तावानिक रकतक लेखा इहे पुस्‍ताक मन्‍सावाह देवे परतइ। 51मुइ तोहराके सदियो कहबहिँ, हाबिलक रकतसे लेके मन्‍दिरवा हसे वेदियाक बिचा मारलि जकरियालइ जम्‍मे अगमवाक्‍तावानिक रकतवाक लेखा इहे पुस्‍तावाक मन्‍सावानिसे लेवे परतइ।#उत्‍पति ४:८; २ इतिहास २४:२०-२४

52 “तोहरा व्‍यवस्‍थाक-गुरुसभके धिकार! केहकेकि तोहरा परमेस्‍वरके चिनेके ग्‍यानक दुवरिया खोलनावा चभिया त लेलह, बाकि तोहरा यपनहिँ त भितरा हइने पेसलह हसे दोसरि जनके फेनि भितरा हइने पेसे देसह।”

53येसुजि वहवाँसे निकडके गेलेपर, उअ दिनवासे व्‍यवस्‍थाक-गुरुसभ हसे फरिसियाह हुनेके गहनि विरोध करते बहुत बिसयमा प्रस्‍न पुछे लगलइ। 54हुनुका येसुजिक फदकलि बतवामा किहो गल्‍ति पाके हुनेके पकडबहुँ कहके दाउ खोजे लगलइ।

Currently Selected:

लुका 11: CTHR

Highlight

Copy