SAN JUAN 17

Tej tnaꞌn Jesús Dios cyiꞌj t-xnakꞌatzxin

1Tejtzen tbaj tkbaꞌn Jesús cye t-xnakꞌatzxin, e jaw tcyeꞌyen twitz cyaꞌj, bix e xiꞌ tkbaꞌnxin te Tmanxin:

—Taat, ma pon hora tuꞌn ncyima, inayena, Tcwala. Kꞌontz weya tuꞌn tbint ncyamecya wuꞌna, tuꞌntzen tjaw nimset tbiy tuꞌnj ncyamecya. 2Chin tonentza tuꞌn ncyima, cuma tuj ncwenta ma tzaj tkꞌoꞌna cykil xjal. Te weya ma tzaj tkꞌoꞌna j-akꞌuntl tuꞌn t-xiꞌ nkꞌoꞌna cye xjal cychunkꞌlal te junx maj, bix nuk wuꞌna chi cletel kej xjal ma tzaj tkꞌoꞌna weya tuꞌn t-xiꞌ nkꞌoꞌna cychunkꞌlal. 3At cychunkꞌlal xjal te junx maj nuk tuꞌnj cyocslabl tiꞌj oꞌcx jay jaxxix Dios bix wiꞌja, inayena Jesucristo, jxjal ma tzaj tsmaꞌna cyxol xjal. 4Ma bint wuꞌna j-akꞌuntl e tzaj tkꞌoꞌna weya tuꞌn tbint twitz txꞌotxꞌ, bix tuꞌnj jlu, ma jaw nnimsaꞌna tbiy. 5Bix cuma ma bint waakꞌena twitz txꞌotxꞌ, juꞌ tzunj kꞌontz weya tuꞌn woca te jawnex juntl maj, tisenx tej ntena tuj tneel tuyey tej mitknaꞌx tbint twitz txꞌotxꞌ.

6Yal kej xin nxnakꞌatza etz tscyꞌoꞌna cyxol xjal tuj twitz txꞌotxꞌ, ma txiꞌ nyeecꞌana cyexin ti tten tnaabla. T-xjalke xina, bix e tzaj tkꞌoꞌna ejeeꞌ weya, bix ma chi ocslan tiꞌ tyola. 7Ma tzꞌel cyniyꞌxin tiꞌj kej yol ma txiꞌ nkbaꞌna bix jwipemala ma txiꞌ nyeecꞌana tuyey e tzaaꞌ. 8Ma txiꞌ nkbaꞌna cyexin nuk jyol e tzaj tkꞌoꞌna weya, bix ma txiꞌ cyocslaꞌnxin, bix ma tzꞌel cyniyꞌxin tiꞌj tuyey in tzaaꞌya, bix jax tey e tzaj tsmaꞌna inayena.

9Chin cubsal nwitza tey nuk cyiꞌj nxnakꞌatza ma chi jaw tscyꞌoꞌna, cuma tey t-xjalke xina. Yaaꞌn cyiꞌj xjal te twitz txꞌotxꞌ chin cubsal nwitza tey jaꞌlewe. 10Tey t-xjalke xina, cuma cykilcaj xjal at te weya, jax at te tey. Jax cykilcaj xjal at te tey, attzen te weya. Bix cyuꞌnj nchi ocslan wiꞌja, ma jaw nimset nbiꞌya.

11Taat, ma pon tumel tuꞌn tcyaj nkꞌoꞌna twitz txꞌotxꞌ, tuꞌn npona tuyey. Pero kej nxnakꞌatza, chi cyjel tzalu twitz txꞌotxꞌ. O chi tzaj tkꞌoꞌn xina weya. Kꞌontz tcꞌojlabla cyexin, tuꞌntzen junx ctemel cynaablxin, tisenx junx koꞌ. 12Tej nbeta tzalu twitz txꞌotxꞌ cyuyaj nxnakꞌatza e tzaj tkꞌoꞌna weya, e xiꞌ nxnakꞌtzaꞌna cyexin tuꞌn cyoc lpexin tiꞌ tyola. Min-al cyexin ma txiꞌ tuj il. Nuk jaj xjal at tuꞌn t-xiꞌ tuj castiwa ma tzꞌoc tuj tkꞌab il, tuꞌntzen tel jax tyol Dios te ootxa.

13Pero ya ma pon tumel tuꞌn npona tuyey. Pero joocꞌtzen nchin tena twitz txꞌotxꞌ, nchin cubsana nwitza tey cyiꞌjxin. Kꞌontz cyexin tuꞌn tnoj cyanemxin tuya jun jawnex cytzalajeblxin, tisen at ntzalajebla. 14Ma txiꞌ nkꞌoꞌna tyola cyexin. Juꞌ tzunj qꞌuelel cyiiqꞌuen kej xjal te twitz txꞌotxꞌ ejeeꞌxin, cuma yaaꞌn junx cynaablxin tuyaj cynaabl xjal te twitz txꞌotxꞌ, tisen weya yaaꞌn junx nnaabla tuyaj cynaabl xjal te twitz txꞌotxꞌ. 15Min chin cubsana nwitza tey tuꞌn tetz tiiꞌna ejeeꞌxin cyxol kej xjal qꞌuelel cyiiqꞌuen ejeeꞌxin, sino tuꞌn tcꞌojlana ejeeꞌxin tuꞌn miꞌn chi cub tzꞌakxin tuj tkꞌab taaw il. 16Yaaꞌn junx cynaablxin tuyaj cynaabl xjal te twitz txꞌotxꞌ, tisenx weya yaaꞌn junx nnaabla tuyaj cynaabl xjal te twitz txꞌotxꞌ. 17Paꞌmelkexin te tey, tuꞌn cyajbenxin tuꞌn cykꞌumenxin jaxxix tyola, cuma nuk tey tyola jaxxix. 18Tisenj tej ttzaj tsmaꞌna inayena twitz txꞌotxꞌ tuꞌn nkꞌumena tyola, juꞌx xsunj cxeꞌl nsmaꞌna ejeeꞌxin cyxol cykilca xjal tuꞌn cykꞌumen jyol jaxxix. 19Ma txiꞌ nkꞌon wiiba tuꞌn tbint tajbila wuꞌna, te jun techel cyexin ti tten tuꞌn cyajbenxin tuya cykil cycꞌuꞌjxin tuj taakꞌena.

20Taat, yaaꞌn nuk cyiꞌj nxnakꞌatza cxeꞌl ncubsaꞌna nwitza tey, sino cyuyaj cykilca kej xjal chi ocslal wiꞌja oj t-xiꞌ cykꞌumenxin npocbala. 21Nxiꞌ ncubsaꞌna nwitza tey tuꞌn cyoc te junx cykilca kej xjal chi ocslal wiꞌja. Taat Nmana, tisenx junx taꞌy wuyena bix junx kena tuyey, chi ocxit junx cykilca ocslal tuꞌnj chi oc junx kuya, cuma oj toc cycyeꞌyen kej xjal yaaꞌn ocslal ka junxke, qꞌueleltzen jax tuj cywitz ma tzaj tsmaꞌna inayena. 22Tisenx ma tzaj tkꞌoꞌna tnaabla weya, jax ma txiꞌ nkꞌoꞌna tnaabla cye, tuꞌntzen junx ten cynaabl, tisenx junx koꞌ. 23Ma txiꞌ nkꞌoꞌna cye tuꞌn junx ctemel nnaabla cyuya, tisenx junx koꞌ, tuꞌntzen junx ten cynaabl tuya jun cymojbabl cyiib tzꞌaklxix, tuꞌntzen tel cyniyꞌ xjal yaaꞌn ocslal tiꞌj e tzaj tsmaꞌna inayena, bix tiꞌj ma tzꞌoc cyakꞌ tey tisenx n-oc wakꞌa tey.

24Taat, kej ocslal wiꞌja ctzaal tkꞌoꞌna weya, waja tuꞌn cyten wuyena jaaꞌ chin pomela, tuꞌntzen t-xiꞌ cycyeꞌyen jjawnex wipemala ma tzaj tkꞌoꞌna. Cxeꞌl ncubsaꞌna nwitza tey juꞌwa, cuma ma tzꞌoc wakꞌa tey jatxe tej mitknaꞌx tbint twitz txꞌotxꞌ.

25Taat, jiquentey te junx maj. Min cytzkiꞌn kej xjal te twitz txꞌotxꞌ ti tten tnaabla. Pero weya, n-el nniꞌya tiꞌja. Bix kej xjal lepchecke wiꞌja ma tzꞌel cyniyꞌ tiꞌj e tzaj tsmaꞌna inayena. 26Ma txiꞌ nyeecꞌana cyexin ti tten tnaabla, bix cxeꞌl nyeecꞌantla, cuma waja tuꞌn toc cyakꞌ cyuya cye tisenj n-oc wakꞌa tey. Bix waja tuꞌn woca junx cyuya―tz̈i Jesús te Tmanxin.

Currently Selected:

SAN JUAN 17: mamTS

Highlight

Copy