SAN JUAN 16

1Bix e xiꞌ tkbaꞌntl Jesús cye t-xnakꞌatzxin:

—Ma txiꞌ nkbaꞌna cyey qꞌuelel cyiiqꞌuen xjal ejeeꞌy bix ma txiꞌ nkbaꞌna cyey tzul Espíritu Santo te onlte cyey, tuꞌntzen miꞌn cyaj cykꞌoꞌna cyocslabla wiꞌja. 2Qꞌueletz cylojoꞌn xjal ejeeꞌy cyuj camon jaaꞌ te xnakꞌtzbil tiꞌ tyol Dios. Jax wuꞌna, tzul jun kꞌij cwel cybyoꞌn xjal ejeeꞌy cuma tuj cywitz nchi onen tiꞌ Dios. 3Cbinel cyuꞌn juꞌwa cuma cycyꞌi tzꞌel cyniyꞌ tiꞌj Nmana bix wiꞌja. 4Ma txiꞌ nkbaꞌna cykilcaj lu cyey, tuꞌntzen tul nyola tuj cycꞌuꞌja oj tpon kꞌij tuꞌn cykꞌojl xjal cyiꞌja.

Taakꞌen Espíritu Santo

Min e xiꞌ nkbaꞌna jtumel lu cyey nejl, cuma mitknaꞌx tpon kꞌij tuꞌn waja. 5Pero jaꞌle chin xeꞌla tuya Dios e tzaj tsmaꞌn inayena. Pero jeyꞌ, min-al jun cyey ma tzaj tkanena weya: “¿Jaaꞌ ma txaꞌy?” 6Min nchi bisena wiꞌja, sino nuk nchi bisena ma noj tuj cyanema tuya bisbajil tuꞌnj nyola cyey. 7Pero jaxxix cxeꞌl nkbaꞌna cyey, mas baꞌn te cyey tuꞌn nxiꞌya. Ka min ma chin aja, mlaytzen tzul Onel cyuyey. Pero ka ma chixa, ctzaaltzen nsmaꞌna cyuyey. 8Bix oj tul, cxeꞌl tyeecꞌan cye xjal te twitz txꞌotxꞌ at cyil, bix ti tten tuꞌn t-xiꞌ cyiiꞌn cychunkꞌlal jiquen twitz Dios, bix cwel cycastiwa ka min ma chi oc jiquen twitz Dios. 9At cyil, cuma min ma chi ocslan wiꞌja. 10Bix cuma chin pomela tuya Nmana, ya miꞌn cyitla inayena. Pero cꞌakꞌanaltzen Onlte cyey te nxela tuꞌn t-xiꞌ tyeecꞌan cye xjal ti tten tuꞌn t-xiꞌ cyiiꞌn cychunkꞌlal jiquen twitz Dios. 11Bix cuma o tkba Dios at tuꞌn tcub tcastiwa taaw twitz txꞌotxꞌ, juꞌ tzunj cxeꞌl tyeecꞌan Espíritu Santo cye xjal jax cwel cycastiwa cykilca aj il.

12At nimtl waja tuꞌn t-xiꞌ nkbaꞌna cyey, pero mlay chi camana tuꞌn tel cyniꞌya tiꞌj jaꞌlewe. 13Pero n-el tniyꞌ Espíritu Santo tiꞌj cykilca jaxxix, bix oj tul, cxeꞌltzen tonen ejeeꞌy, tuꞌntzen tel cyniꞌya tiꞌj jaxxix yol. Yaaꞌn tex tyol cxeꞌl tkbaꞌn, sino cxeꞌl tkꞌoꞌn jyol ma tzaj tkbaꞌn Nmana te. Bix cxeꞌl tyeecꞌan cyey ti pjel mas yaj. 14Cjawel tnimsaꞌn nbiꞌya, cuma weya nyol cxeꞌl ttxꞌolbaꞌn cyey, tuꞌn tcyaj tuj tzinen cykilcaj ma txiꞌ nkbaꞌna cyey. 15Junx nnaabla tuya tnaabl Nmana. Juꞌ tzunj, tumel tuꞌn t-xiꞌ nkbaꞌna cyey cxeꞌl ttxꞌolbaꞌn Espíritu Santo ti elpenina jma txiꞌ nkbaꞌna cyey, cuma junx taꞌ nyola tuya tyol Nmana.

Jaj cybisa cꞌoquel te tzalajebl

16Nuk chꞌintl chin temela cyuyey, bix mlay cyitla inayena. Pero tuj juntl rato cꞌoquel cycyeꞌyena inayena juntl maj―tz̈i Jesús cye t-xnakꞌatzxin.

17Yal kej t-xnakꞌatzxin, cuma min el cyniyꞌxin tiꞌj tyolxin, juꞌ tzunj at juun e xiꞌ cykanenxin cyxolxxin:

—Yaaꞌn telniyꞌ kej yol lu ma tzaj tkbaꞌn taat ke. ¿Tikentzen tzin tkbaꞌnaxin juꞌwa: “Nuk chꞌintl chin temela cyuyey, bix mlay cyitla inayena. Pero tuj juntl rato cꞌoquel cycyeꞌyena inayena juntl maj,” tz̈ixin? ¿Bix tiken tzin tkbaꞌnaxin juꞌwa: “Chin pomela tuya Nmana,” tz̈ixin? 18¿Ti japenina ja yol “nuk chꞌintl chin temela cyuyey”? ¿Ti tten tuꞌn tel kniyꞌ tiꞌj tyolxin?―tz̈ikexin.

19Eltzen tniyꞌ Jesús tiꞌj e cyajbe t-xnakꞌatzxin tuꞌn t-xiꞌ cykanenxin texin tuꞌn tcyaj tyolxin mas tuj tzinen. Juꞌ tzunj, e xiꞌ tkbaꞌnxin cyexin:

—¿Tikentzen nchi kanena cyxola ti japenina nyola tej xiꞌ nkbaꞌna cyey: “Nuk chꞌintl chin temela cyuyey, bix mlay cyitla inayena. Pero tuj juntl rato cꞌoquel cycyeꞌyena inayena juntl maj”? 20Jaxxix cxeꞌl nkbaꞌna cyey, tuj jun rato chi jawel ookꞌa tuꞌn ncyamecya, bix chi tzalajel kej xjal te twitz txꞌotxꞌ. Cnool cyanema tuya nim bisbajil, pero cꞌoquel cybisa te tzalajebl. 21Jbisbajil tzul cyiꞌja tisen tchyonel tal jun xuuj. Oj tpon tumel tuꞌn talenxuj, nbisenxuj, cuma nim qꞌuixcꞌaj qꞌuiyel tuꞌnxuj. Pero oj titzꞌj talxuj, miꞌntl tzul tuj tcꞌuꞌjxuj iyꞌx qꞌuixcꞌaj tuꞌnxuj, cuma ctzalajelxuj tiꞌj ma tzꞌitzꞌj talxuj twitz txꞌotxꞌ. 22Jax juꞌx cyey, il tiꞌj tuꞌn tiyꞌx qꞌuixcꞌaj cyuꞌna jaꞌlewe. Pero chi wilaꞌya juntl maj, bix cnool cyanema tuya tzalajebl, bix min-al qꞌuelel tiiꞌn cytzalajebla tuj cyanema. 23Tuj tzunj kꞌij te cytzalajebla, qꞌuelel cyniꞌya tiꞌj, bix mlay cykanetla weya ti japenina nyola.

Jaxxix cxeꞌl nkbaꞌna cyey, alcyej cxeꞌl cykanena te Nmana, ctzaal tkꞌoꞌnxin cyey, ka junx taꞌ cykanbila tuyaj wajbila. 24Nejl, min ma txiꞌ cykanena texin tuya jun cynaabla junx taꞌ tuya wajbila. Cykanenx, tuꞌntzen tkꞌontexin cykanbila, tuꞌn tnoj cyanema tuya tzalajebl.

Jun yaaꞌn baꞌn at twitz txꞌotxꞌ ma cub tiꞌj tuꞌn Jesús

25Kej yol ma txiꞌ nkbaꞌna cyey, eꞌwen chꞌin taꞌ. Pero tzul jun kꞌij oj t-xiꞌ nkbaꞌna cyey tujxix tzinen ti tten Nmana, bix qꞌuelel cyniꞌya tiꞌjxin. 26Tuj tzunj kꞌij oj tel cyniꞌya tiꞌj Nmana, cxeꞌl cykanena wajbila te Nmana. Bix ctkꞌaꞌxin cykanbila, yaaꞌn nuk cuma cxeꞌl nkanena texin te cyxela, 27sino cuma jax texin at tkꞌakꞌbil tcꞌuꞌj cyiꞌja. N-oc cyakꞌa texin cuma ma tzꞌoc wakꞌa cyey, bix ma chi ocslana tiꞌj nyola ka tuya Dios in tzaja. 28In tzaja tuya Nmana, bix in ula twitz txꞌotxꞌ. Pero ya cyjel nkꞌoꞌna twitz txꞌotxꞌ, bix chin aala tuꞌn npona tuya Nmana juntl maj―tz̈i Jesús cyexin.

29E xiꞌ cykbaꞌn t-xnakꞌatzxin texin:

—Jeyꞌ, jaꞌlewe nyolena tuj tzinen bix yaaꞌn tuj ewjel. 30Bix ktzkiꞌna at cykil tumel tuyey. N-el tniꞌya tiꞌj ti niyꞌ tuj cycꞌuꞌj xjal, tuꞌntzen mintiiꞌ il tiꞌj tuꞌn t-xiꞌ tkanena ti cyaj tuꞌn tel cyniyꞌ tiꞌj. Juꞌ tzunj, nxiꞌ kocslaꞌna ma tzaja tuya Dios―tz̈ikexin.

31E xiꞌ tkbaꞌn Jesús cyexin:

—¿Jaxpa cyuꞌna nchi ocslana wiꞌja? 32Jeyꞌ, chꞌixcꞌa tpon hora tuꞌn tcyaj cycyeꞌyena inayena. Chi elel tz̈itja. Teeylex juun cyey cxeꞌl tiiꞌn tbe. Pero yaaꞌn njunala chin cyjela, cuma at Nmana wuyena.

33Kej yol lu ma txiꞌ nkbaꞌna cyey tuꞌn cyocslana wiꞌja, tuꞌntzen cytena tuj ttz̈yal. Twitz txꞌotxꞌ cꞌoquel nim pena cyiꞌja, pero miꞌn baj cycꞌuꞌja, cuma inayena chin camal tibaj twitz txꞌotxꞌ―tz̈i Jesús cye t-xnakꞌatzxin.

Currently Selected:

SAN JUAN 16: mamTS

Highlight

Copy