SAN JUAN 15

Ja Jesús tisen jun jaxxix tken loꞌpj

1Tej cyetz Jesús, e xiꞌ tkbaꞌntlxin cye t-xnakꞌatzxin:

—Cxeꞌl nkbaꞌna jun techel cyey. Inayena tisen jun jaxxix tken loꞌpj te uva. Bix Nmana taaw tken uva. 2Bix ejeeꞌy tisen kej tkꞌab toc wiꞌja. Kej tkꞌab uva toc wiꞌja, ka min ma cyakꞌ twitz, qꞌueleltzen ttxꞌoman Nmana wiꞌja. Pero kej tkꞌab at twitz, qꞌuelel tiiꞌn Nmana ttzkijil cyiꞌj, tuꞌntzen toc mas twitz. 3Ejeeꞌy tisen kej tkꞌab baꞌn, cuma ma chi cyaja sak tuꞌnj yol ma txiꞌ nkbaꞌna cyey. 4Cykꞌoꞌnc cyipena tiꞌj tuꞌn cytena junx wuyena, tuꞌntzen ntena junx cyuyey. Jun tkꞌab loꞌpj, ka yaaꞌn toc tiꞌ tken, mlay takꞌ twitz. Bix jax juꞌx cyey, mintiiꞌ baꞌn cbinel cyuꞌna ka min ma chi cyaja junx wuyena. 5Inayen weja tken uva. Cyey, tkꞌab uvakey. Ka junx chi temela wuyena, tuꞌntzen junx ntena cyuyey, nim cbinel cyuꞌna. Pero ka ma chi eꞌlkey wiꞌja, mintiiꞌ cbinel cyuꞌna. 6Alcyej xjal yaaꞌn toc wiꞌja, juꞌtzen ctemela tisen jun tkꞌab loꞌpj ka min takꞌ twitz. Nuk qꞌuelex xeꞌt tkꞌab, bix ctzkiꞌl. Bix cꞌajbel nuk tuꞌn tocx cykꞌoꞌn xjal tuj kꞌakꞌ, tuꞌntzen tbaj tzꞌeyꞌ.

7Ka junxkey wuyena, bix ka ma cyaj nyola tuj cyanema, alcyej ma txiꞌ cykanena te Nmana, ctzaal tkꞌoꞌnxin cyey. 8Oj t-xiꞌ cyyeecꞌana ka ncheꞌx lpey wiꞌja tuꞌnj nim cbinel cyuꞌna, cjaweltzen nimset tbi Nmana. 9Tisen ma tzꞌoc wakꞌa te Nmana, juꞌxse weya, ma tzꞌoc cyakꞌa weya. Juꞌ tzunj, miꞌn chi eꞌlkey tiꞌj tkꞌakꞌbil ncꞌuꞌja cyiꞌja. 10Ka ma cybiy nyola, juꞌtzen chi yeecꞌala n-oc wakꞌa cyey, tisenx ma txiꞌ nyeecꞌana n-oc takꞌ Nmana weya tuꞌnj e nbiya tyol.

11Ka ma tzꞌoc cybiꞌna kej yol lu ma txiꞌ nkbaꞌna cyey, chi tzalajela tisen weya nchin tzalaj. Waja tuꞌn tten jun cytzalajebla jawnex.

12Cxeꞌl nkꞌoꞌna juntl yol cyey. Cꞌoquel cyakꞌ cyuyey cyey, tisen ma tzꞌoc cyakꞌa weya. 13Mlay txiꞌ tyeecꞌan jun xjal jun tkꞌakꞌbil tcꞌuꞌj mas jawnex twitzj tuꞌn t-xiꞌ tkꞌon tiib tuꞌn tcyim, tuꞌn tclet jun tuya tuꞌn. 14Cyey, wuyakey ka ma cybiy nyola. 15Miꞌn tzꞌoc nkꞌoꞌntla cybiy nuk akꞌanal, cuma min tzꞌel tniyꞌ jun akꞌanal tiꞌj ti niyꞌ tuj tcꞌuꞌj tpatrón. Cꞌoquel nkꞌoꞌntla cybiy wuyena, cuma cykilca ma tzaj tkbaꞌn Nmana weya, ma txiꞌ nkbaꞌna cyey, tuꞌntzen tel cyniꞌya tiꞌj ti niyꞌ tuj tcꞌuꞌjxin. 16Yaaꞌn ejeeꞌy e kbante tuꞌn cyakꞌanana junx wuyena, sino inayena e jaw scyꞌonte cyey, bix ma txiꞌ nkꞌoꞌna cyaakꞌena, jaj tuꞌn cyxiꞌy kbalte cye xjal tuꞌn cyocslan wiꞌja. Jaj akꞌuntl lu tisen jun awal mlay cub baj. Bix cuma ma txiꞌ nkꞌoꞌna ja cyaakꞌena lu, juꞌ tzunj alcyej cxeꞌl cykanena te Nmana, ctzaal tkꞌoꞌnxin cyey.

Qꞌuelel cyiiqꞌuen xjal kej ocslal

17Juntl maj cxeꞌl nkbaꞌna cyey, tuꞌn cybintey nyola, cꞌoquel cyakꞌ cyiiba cyey. 18Kej xjal eteꞌ tjakꞌ tcawbil taaw twitz txꞌotxꞌ, qꞌuelel cyiiqꞌuen ejeeꞌy. Bix oj cyel cyiiqꞌuen ejeeꞌy, qꞌuelel cyniꞌya tiꞌj o tzꞌel cyiiqꞌuen inayena nejl cywitza. 19Nuket junx cynaabla tuyaj cynaabl xjal te twitz txꞌotxꞌ, n-oqueltzele cyakꞌa cye, cuma junxseke cyuyey. Pero yaaꞌn junx cynaabla tuya cynaabl xjal te twitz txꞌotxꞌ. Ma jaw nscyꞌoꞌnkey tuꞌn tel cypaꞌn cyiiba cyiꞌj. Juꞌ tzunj, qꞌuelel cyiiqꞌuen ejeeꞌy. 20Cꞌoquel cycꞌuꞌja tiꞌj jun yol xiꞌ nkbaꞌna cyey nejl. Yaaꞌn jun akꞌanal mas jawnex twitzj tpatrón. Juꞌ tzunj, ka ma chi kꞌojl xjal wiꞌja, jax chi kꞌojlel cyiꞌja. Pero jax at juun o cybi nyola. Jax juꞌx cyey, at juun cꞌoquel cybiꞌn cyyola. 21Kej xjal cycyꞌi jweya nyol, chi yajlal cyiꞌja nuk tuꞌn tlaj lepcheckey wiꞌja. Bix cycyꞌi inayena cuma cycyꞌi Dios e tzaj tsmaꞌn inayena. 22Kej xjal te twitz txꞌotxꞌ, nuket min in tzaja tuꞌn t-xiꞌ nxnakꞌtzaꞌna alcye kena, minttzenle el cyxooꞌn inayena. Pero in tzaja, bix juꞌ tzunj mlaytl txiꞌ cykbaꞌn min tzꞌel cyniyꞌ tiꞌj, cuma o tzꞌoc cybiꞌn nyola, bix cycyꞌi. 23Alcyej ma tzꞌel tiiqꞌuen inayena, jax n-el tiiqꞌuen Nmana. 24Nuket min in tzaja cyxol xjal te twitz txꞌotxꞌ bix e xiꞌ nyeecꞌana wipemala, minttzenle e xiꞌ cyxooꞌn nyecꞌbila. Min-al juntl o binchan jma bint wuꞌna cyxol. Pero amale e xiꞌt cycyeꞌyen nbinchbena, pero cycyꞌi inayena. Tejtzen t-xiꞌ cycyeꞌyen inayena, jax juꞌx e xiꞌ cycyeꞌyen Nmana. Juꞌ tzunj, tej tel cyiiqꞌuen inayena, jax el cyiiqꞌuen Nmana. 25Amale e cyilet wipemala, pero el cyxooꞌn inayena. Juꞌtzen ma tzꞌel jax jun yol tzꞌiꞌben tuj ley te Dios e kꞌoj cye. Tz̈i cyjulu: “Amale cꞌoquelet cycyeꞌyen wipemala, pero qꞌuelel cyiiqꞌuen inayena,” tz̈i tyol Dios.

26Cxeꞌl nsmaꞌna Onlte cyey. At tuya Nmana. Ja Espíritu Santo, bix juꞌ ctzaal tuya Nmana. Jtaakꞌen tuꞌn tchicꞌajax alcyej jaxxix. Oj tul, cꞌakꞌanaltzen tuj cyanem xjal tuꞌn tcyaj tuj tzinen alcye kena. 27Jax juꞌx cyey, chi kꞌumela cye xjal wiꞌja, cuma o chi tena wuyena jatxe tej wakꞌa akꞌanal―tz̈i Jesús cye t-xnakꞌatzxin.

Currently Selected:

SAN JUAN 15: mamTS

Highlight

Copy