SAN JUAN 14

Ja Jesús jbe tuya Dios

1Tuꞌn tcywix cycꞌuꞌj t-xnakꞌatz Jesús, e xiꞌ tkbaꞌnxin cyexin:

—Nim nchi bisena tiꞌj ti pjel, pero miꞌn tzaj ttz̈i cyiꞌja. Cꞌoquel ke cycꞌuꞌja tiꞌ Dios bix jax juꞌx wiꞌja. 2Tuj tnajbil Nmana at nim lugar te cyey. Nuket mintiiꞌ, matle txiꞌ nkbaꞌna cyey. Pero tneelxix, il tiꞌj tuꞌn nneja jkolte najbil cywitza. 3Bix ka ma chin aja jkolte cynajbila, jax chin ul meltzꞌaja juntl maj, bix cxeꞌl nchmoꞌna ejeeꞌy, cuma waja tuꞌn cytena junx wuyena. 4Yal tzunj be ctzyetel wuꞌna, n-el cyniꞌya tiꞌj alcyej be―tz̈i Jesús cye t-xnakꞌatzxin.

5E xiꞌ tkbaꞌn Tomás texin:

—Taat, min ktzkiꞌna jaaꞌ cxeꞌley. ¿Titzen tten qꞌuelel kniꞌya tiꞌj alcyej be ctzyetel tuꞌna?―tz̈i Tomás.

6Aj ttzakꞌbeꞌnxin:

—Inayen weja jbe. Inayen weja jjaxxix. Inayenja kꞌol cychunkꞌlala te junx maj. Nuk wuꞌna at cyoclena tuꞌn cypona tuya Nmana. 7Nuket el cyniꞌya tiꞌj alcye kena bix alcyej il tiꞌj tuꞌn tbint wuꞌna, jaxettzenle ma tzꞌel cyniꞌya tiꞌj Nmana bix ti tajxin. Pero te jaꞌlewe qꞌuelel cyniꞌya tiꞌjxin, bix qꞌuelel cyniꞌya tiꞌj ya ma cyila jaxin―tz̈ixin.

8E xiꞌ tkbaꞌn Felipe texin:

—Taat, yeecꞌantz Tmana keya, tuꞌn toc kcyeꞌyena. Oj toc kcyeꞌyena jaxin, mintiiꞌtl kaja―tz̈i Felipe.

9E xiꞌ tkbaꞌn Jesús te Felipe:

—Nim kꞌij ma chin tena cyuyey, Felipe. ¿Mimpanaꞌx tel tniꞌya tiꞌj alcye kena? Ka ma tzꞌoc cycyeꞌyena inayena, jax ma tzꞌoc cycyeꞌyena Nmana, cuma inayen weja jyecꞌbil ti tten Nmana. ¿Tikentzen ntzaj tkanena weya: “Yeecꞌantz Tmana keya”? tz̈iy. 10¿Mimpa tocslay ka junx kena tuya Nmana bix junx taꞌ Nmana wuyena? Kej yol nxiꞌ nkbaꞌna te cyey nxnakꞌatza, yaaꞌn wexwe nyol, sino tyol Nmana at wuyena. Bix jnbint wuꞌna, yaaꞌn tuꞌn wexwe wipemal, sino tuꞌn tipemal Nmana―tz̈i Jesús te Felipe.

11Bix e xiꞌ tkbaꞌntlxin cye t-xnakꞌatzxin:

—Cyocslama nyola ka junx kena tuya Nmana bix junx taꞌ Nmana wuyena. Pero ka cycyꞌiy tuꞌn cyocslana wiꞌja tuꞌnj nyola, chi ocslana wiꞌja tuꞌn wipemala ma txiꞌ nyeecꞌana cyey. 12Jaxxix cxeꞌl nkbaꞌna cyey, ka ma tzꞌoc ke cycꞌuꞌja wiꞌja, j-akꞌuntl ma bint wuꞌna tuya tipemal Nmana, jax cbinel cyuꞌna. Bix jun akꞌuntl mas jawnex minaꞌx tbint wuꞌna cbinel cyuꞌna, cuma weya, chin aala tuya Nmana. 13Bix oj waja, alcyej cxeꞌl cykanena te Nmana, ka junx cykanbila tuya wajbila, cbinel wuꞌna, cuma waja tuꞌn tjaw nimset tbi Nmana tuꞌnj nbint wuꞌna, inayena Tcwal. 14Jax wuꞌna. Alcyej cxeꞌl cykanena, ka junx cykanbila tuya wajbila, cbinel wuꞌna.

Ctzaal tsmaꞌn Dios Espíritu Santo

15Ka ma tzꞌoc wakꞌa cyey, chi nimala nyola. 16Bixsen cxeꞌl nkanena te Nmana tuꞌn ttzaj tsmaꞌnxin juntl Onlte cyey. Ctzaal tsmaꞌnxin, bix ctemel cyuyey te junx maj. 17Ja Espíritu Santo ja tzunja Onlte cyey, bix cxeꞌl t-xnakꞌtzaꞌn alcyej jaxxix cyey. Pero kej xjal te twitz txꞌotxꞌ, mlay kꞌoj Espíritu Santo cye, cuma cycyꞌi jaxin, bix n-el cyiiqꞌuen jaxin. Pero cyey, cytzkiꞌna jaxin, cuma at-xin cyuyey. Bix mas yaj ctemelxin tuj cyanema. 18Miꞌn chi cyaja cyjunala.

Jax juꞌx weya, chin ultla cyuyey. 19Nuk chꞌintl chin temela twitz txꞌotxꞌ, bix mlay chin oc cycyeꞌyentl xjal te twitz txꞌotxꞌ. Pero cyey, chin oquel cycyeꞌyena juntl maj oj njaw itzꞌja tuj cyamecy. Bix cuma chin jawel itzꞌja juntl maj, jax juꞌx cyey, chi jawel itzꞌja juntl maj. 20Bix oj njaw itzꞌja tuj cyamecy, qꞌuelel cyniꞌya tiꞌj ka junx kena tuya Nmana, bix junx kena cyuyey, bix junx eteꞌy wuyena.

21Ka ma tzꞌoc cybiꞌna nyola, n-octzen wakꞌa cyey. Bix ka ma tzꞌoc wakꞌa cyey, cꞌoqueltzen cyakꞌa te Nmana. Bix jax juꞌx weya, cꞌoquel cyakꞌa weya, bix chin temela cyuyey tuꞌnj Espíritu Santo―tz̈i Jesús.

22Bix e xiꞌ tkanen Judas texin, yaaꞌn Judas Iscariote:

—Taat, ¿ti ma baj? Ka at tuꞌn tcoꞌpana ktanem, ¿tikentzen ctzaal tyeecꞌan tiiba nuk kwitza, bix yaaꞌn cywitz cykil xjal?―tz̈i Judas.

23Aj ttzakꞌbeꞌn Jesús:

—Mintiiꞌ nmojbabla cyuyaj xjal cycyꞌi tuꞌn toc cybiꞌn nyola. Alcye kej xjal ma tzꞌoc wakꞌa cye, n-octzen cybiꞌn nyola. Bix cꞌoquel cyakꞌ te Nmana, bix junx tuya Nmana ko temela cyuyaxin. 24Pero alcye kej xjal min tzꞌoc wakꞌa cye, jax miꞌn tzꞌoc cybiꞌn nyola, bix miꞌn chin tena cyuya. Kej yol lu ma txiꞌ nkbaꞌna cyey, yaaꞌn wexwe nyola, sino tyol Nmana e tzaj tsmaꞌn inayena.

25Tej ntena tzalu cyxola, nim nxnakꞌtzbila ma cyaj nkꞌoꞌna cyuyey. 26Bix oj tul J-onlte cyey, cxeꞌl ttxꞌolbaꞌn cykilca te cyey, tuꞌntzen tcyaj tuj tzinen jma txiꞌ nxnakꞌtzaꞌna cyey. Ctzaal tsmaꞌn Nmana Espíritu Santo te nxela, bix tuꞌn tzul cykilca nyola tuj cycꞌuꞌja.

27Cxeꞌl nkꞌoꞌna cyey tuꞌn tten cyanema tuj ttz̈yal. Cyxol xjal te twitz txꞌotxꞌ, n-oc cyipen tiꞌj tuꞌn cyten tuj txubtx, pero mintiiꞌ jaaꞌ tuꞌn toc ke cycꞌuꞌj. Pero weya, tuya wipemala nxiꞌ nkꞌoꞌna cyey tuꞌn cycyaja tuj txubtx. Juꞌ tzunj, miꞌn baj cycꞌuꞌja. Miꞌn tzaj ttz̈i ti pjel cyiꞌja.

28Jatxe mayꞌ xiꞌ nkbaꞌna cyey: “Chin xeꞌla, bix chin ul meltzꞌaja,” ntz̈iya. Nuket oc wakꞌa cyey tuya cykil cycꞌuꞌja, matle chi jaw tzalaja tej xiꞌ nkbaꞌna chin xeꞌla tuya Nmana, cuma te weya, jun nin xtalbil tuꞌn ntena tuya Nmana, cuma mas jawnex Nmana nwitza. 29Ma txiꞌ nkbaꞌna cyey te mitknaꞌx tbaj ti pjel wiꞌja, tuꞌntzen tcywix cyocslabla wiꞌja oj tbaj.

30Yaaꞌn nimtlxix chin yolela cyuyey, cuma chꞌix tpon tumel tuꞌn tul taaw il, jxjal ncawen tibaj twitz txꞌotxꞌ jaꞌlewe. Taj tuꞌn tpon baj nkꞌija, pero mintiiꞌ tipemal wibaja. 31Pero amale minttiiꞌ tipemal taaw twitz txꞌotxꞌ wibaja, pero chin oquela tjakꞌ jctbincha wiꞌja, tuꞌn nnimana tyol Nmana, tuꞌntzen tel cyniyꞌ cykil xjal tiꞌj n-oc takꞌ Nmana weya. Chi weꞌwetzen cyey. Koꞌtzen tzalu―tz̈i Jesús cye t-xnakꞌatzxin.

Currently Selected:

SAN JUAN 14: mamTS

Highlight

Copy