SAN JUAN 13

Tej tel ttxꞌjoꞌn Jesús cyken ke t-xnakꞌatzxin

1Tetzen tneel kꞌij te Pascua, e cub ke Jesús cyuya t-xnakꞌatzxin te koniyan te waaꞌl. El tniyꞌxin tiꞌj otk pon tumel tuꞌn tcyimxin bix tuꞌn tiyꞌxin twitz txꞌotxꞌ tuꞌn tponxin tuya Tmanxin. Tuya cykil tcꞌuꞌjxin otk tzꞌoc cyakꞌ kej xjal lepchec tiꞌjxin texin. Kej xjal lepchec tiꞌjxin tuꞌn cycyaj cyxol xjal twitz txꞌotxꞌ, bix ya otk pon tumel tuꞌn tyeecꞌanxin te junx maj tkꞌakꞌbil tcꞌuꞌjxin cyiꞌj. 2Bix otk cuꞌx tkꞌoꞌn taaw il tuj tanem Judas Iscariote, tcwal Simón, jun tajbil tuꞌn tqꞌueyen Judas ja Jesús tuj cykꞌab kej xjal e cyajbe tuꞌn tcubxin. 3Bix el tniyꞌxin tiꞌj otk tzaj tkꞌoꞌn Tmanxin tipemalxin tibaj cykilca at, bix otk tzajxin tuya Dios bix at tuꞌn tpon meltzꞌajxin tuya Dios juntl maj. 4Pero amale elet tniyꞌxin tiꞌj at cykilca tuj tkꞌabxin, pero e jaw weꞌxin tej nchi waaꞌnxin, bix el tiiꞌnxin t-xbalenxin, bix oc tẍpoꞌnxin jun toalla tcyꞌitzxin. 5Bix e cuꞌx tkoꞌnxin aꞌ tuj jun joꞌs̈, bix akꞌxin txjol cyken t-xnakꞌatzxin. Bix el tsuꞌnxin cykenxin tuyaj toalla otk tzꞌoc tẍpoꞌnxin tcyꞌitzxin. 6Tej tponxin twitz Simón Pedro, e xiꞌ tkbaꞌn Pedro texin:

—Taat, ¿wepaya nkena qꞌuelel ttxjoꞌna? Yaaꞌn tumel―tz̈i Pedro.

7Bix aj ttzakꞌbeꞌnxin:

—Jaꞌlewe min tzꞌel tniꞌya tiꞌj tiken nchin txjona cykena. Pero tuj juntl rato qꞌuelel tniꞌya tiꞌj ja techel lu―tz̈ixin.

8Bix e xiꞌ tkbaꞌn Pedro texin:

—Te junx maj cxeꞌl nkbaꞌna tey, mlayx tzꞌel ttxjoꞌna nkena―tz̈i Pedro.

—Ka min ma tzꞌel ntxjoꞌna tkena, mintzentiiꞌ tmunela weya―tz̈i Jesús.

9Juꞌ tzunj, e xiꞌ tkbaꞌn Pedro:

—Taat, ka juꞌ tten, waja tuꞌn tel ttxjoꞌna yaaꞌn nuk nkena, sino jax ke nkꞌaba tuyax nwiꞌya―tz̈i Simón Pedro.

10E xiꞌ tkbaꞌn Jesús te Pedro:

—Jun xjal, ka ma txjon tiib, mintiiꞌtzen il tiꞌj tuꞌn ttxjon tiib juntl maj. Nuk oꞌcx tuꞌn ttxjet tken. Qꞌuelel ntxjoꞌna nuk cykena, cuma sak cyxumlala. Pero at jun cyxola yaaꞌn sak―tz̈ixin. 11Ttzkiꞌnxin alcyej t-xnakꞌatzxin tuꞌn t-xiꞌ kꞌonte texin tuj cykꞌab byol xjal. Juꞌ tzunj otk txiꞌ tkbaꞌnxin: “At jun cyxola yaaꞌn sak.”

12Tejtzen tbaj txjet cyken t-xnakꞌatzxin tuꞌnxin, oc tkꞌoꞌnxin t-xbalenxin, bix e cub kexin tiꞌ mes. Bix e xiꞌ tkbaꞌnxin cye t-xnakꞌatzxin:

—¿Mapa tzꞌel cyniꞌya tiꞌj ti elpenina jma bint wuꞌna cyiꞌja? 13Tzin cykbaꞌna inayena Xnakꞌtzal cyey bix Cawel cyxola, bix jax cyuꞌna, cuma juꞌ ttena. 14Katzen ma tzꞌel ntxjoꞌna cykena, amale Cawelet kena cyxola bix Cyxnakꞌtzala kena, juꞌ tzunj il tiꞌj tuꞌn cyajbena cyxolxa juꞌwa. 15Ma txiꞌ nyeecꞌana cyey jun yecꞌbil ti tten tuꞌn cyajbena cye juntl, tuꞌntzen tbint cyuꞌna tisenx ma bint wuꞌna. 16Jaxxix cxeꞌl nkbaꞌna cyey, yaaꞌn ejeeꞌy mas jawnex nwitza, cuma jun akꞌanal yaaꞌn mas jawnex twitz tpatrón, bix jxjal ma tzaj smaꞌn yaaꞌn mas jawnex twitzj xjal e tzaj smante jaxin. 17Pero ma tzꞌel ntxjoꞌna cykena te jun techel ti tten tuꞌn cyajbena cye juntl. Ka juꞌ chi ajbela cye juntl, attzen cytzalajebla.

18Pero yaaꞌn cykilcakey chi temela tuj cytzalajebla. Tej tjaw nscyꞌoꞌna ejeeꞌy tuꞌn cyoca te nxela, el nniꞌya tiꞌj at jun yaaꞌn tuꞌn tel baꞌn. Pero tocx ja xjal lu cyxola tuꞌntzen tel jax tyol Dios. Tzin tkbaꞌn tyol Dios cyjulu: “Cyxol kej xjal chi waaꞌl wuyena, at jun cjawel tken tuꞌn toc t-xjoꞌn inayena,” tz̈i tyol Dios. 19At jun cyxola cbinchal jun kaꞌ wiꞌja. Bix tzin nkbaꞌna jlu cyey te mitknaꞌx tbint, tuꞌntzen miꞌn baj cycꞌuꞌja wiꞌja oj tbint tuꞌnxin juꞌwa, sino cꞌoquel ke cycꞌuꞌja wiꞌja Jscyꞌoꞌn tuꞌn Dios inayena. 20Jaxxix cxeꞌl nkbaꞌna cyey, chi oquela te nxela, bix alcye cꞌoquel tbiꞌn cyyola oj t-xiꞌ nsmaꞌna ejeeꞌy, jax n-oc tbiꞌn weya. Bix alcye cꞌocslal wiꞌja, jax n-ocslan tiꞌj Nmana e tzaj tsmaꞌn inayena―tz̈i Jesús cye t-xnakꞌatzxin.

E tkba Jesús ka ja Judas tuꞌn t-xiꞌ qꞌueyente

21Tej tbaj tkbaꞌnxin kej yol lu, e tzaj jun nintzaj bisbajil tiꞌjxin, bix e xiꞌ tkbaꞌnxin tuj tzinen:

—Jaxxix cxeꞌl nkbaꞌna cyey, at jun cyxola cxeꞌl tqꞌueyen inayena tuj cykꞌab kej xjal cyaj tuꞌn ncuba―tz̈ixin.

22Tej t-xiꞌ tkbaꞌn Jesús at jun t-xnakꞌatzxin tuꞌn tqꞌueyen jaxin, nimxsen e jaw seyꞌpajkexin, bix akꞌkexin cyeyꞌlte tuj cywitzxin. Minteyꞌ tumel cyuyaxin alcyej tocx cyxolxin e yolen Jesús tiꞌj. 23Toctzen ttxlaj Jesús jun t-xnakꞌatzxin nim oc takꞌ texin. 24Bix oc tchꞌiquen Simón Pedro tiꞌj jxin toc ttxlaj Jesús, te yecꞌbil e tajbe tuꞌn tyolen tuya, bix e xiꞌ tkanen Pedro te:

—¿Mapa tbiy alcyej nyolen Jesús tiꞌj? Kbantz keya―tz̈i Pedro.

25Juꞌ tzunj, jt-xnakꞌatz Jesús toc ttxlajxin e xiꞌ tkanen texin:

—Taat, ¿alcyetzen?

26—Alcye tzunj cxeꞌl nkꞌoꞌna pan te, oj tcuꞌx nmuꞌna. Ja tzunja―tz̈i Jesús.

Bix e cuꞌx tmuꞌnxin jun piẍ pan, bix e xiꞌ tkꞌoꞌnxin te Judas, tcwal Simón Iscariote. 27Pero tej t-xiꞌ toyenxin te Judas, biꞌx oc Judas tuj tkꞌab taaw il. Bix e xiꞌ tkbaꞌn Jesús te:

—J-at tuꞌn tbint tuꞌna, bincham tuj ajkelbil―tz̈ixin.

28Pero cyxol kej niyꞌtl t-xnakꞌatzxin kꞌukl tiꞌ mes, min-al el cyniyꞌ tiꞌj tiken e xiꞌ tkbaꞌnxin kej yol lu te Judas Iscariote. 29Cuma ajben Judas te cꞌojlal cypwak Jesús, juꞌ tzunj tuj cywitz juun t-xnakꞌatzxin e tajbexin tuꞌn t-xiꞌ Judas te lokꞌol jwaabj te ninkꞌij, bix ka tuꞌn t-xiꞌ tkꞌoꞌn Judas jun onbil cyej xjal mebe.

Jun acꞌaj mandamyent

30Tejtzen t-xiꞌ ttzyuꞌn Judas jpan otk txiꞌ tkꞌoꞌn Jesús, n-etztl Judas. Bix otk cub klolj. 31Tej tetz, e xiꞌ tkbaꞌn Jesús cye t-xnakꞌatzxin:

—Ya ma pon tumel tuꞌn tbint wuꞌna jma tzaj kꞌoꞌn weya tuꞌn tbint, bix tuꞌn tjaw nimset tbi Nmana tuꞌnj cbinel wuꞌna, inayena, jxjal Smaꞌn tuꞌn Dios. 32Bix ka ma jaw nnimsaꞌna tbi Dios tuꞌnj at tuꞌn tbint wuꞌna, jax ctzaal tyeecꞌan Dios tnimbil weya. Bix chꞌixcꞌa tpon tumel tuꞌn tjaw nimset nbiꞌya tuꞌnxin. 33Key wuya nim n-oc cyakꞌa weya, cxeꞌl ntxꞌolbaꞌna cyey tuj tzinen ti japenina nyola. Nuk chꞌintl chin temela cyuyey. Bix cyaja tuꞌn cyxiꞌy wuyena, pero mlay cheꞌxa wuyena. Tisen e xiꞌ nkbaꞌna cye nejenel cye judío, jax cxeꞌl nkbaꞌna cyey jaꞌlewe, mlay cheꞌxa jaaꞌ chin xeꞌla.

34Cxeꞌl nkꞌoꞌna cyey jun acꞌaj ley. Cꞌoquel cyakꞌ cyiiba cyey. Tisen ma tzꞌoc cyakꞌa weya, juꞌx cyiiꞌnx tuꞌn toc cyakꞌ cyiiba cyey. 35Ka ma tzꞌoc cyakꞌ cyiiba cyey juꞌwa, tuꞌn tzunj jlu qꞌuelel cyniyꞌ cykil xjal tiꞌj ka nxnakꞌatzkey―tz̈i Jesús.

Tej t-xiꞌ tkbaꞌn Jesús te Pedro, jay cwel eꞌwente we oxe maj

(Mt. 26:30-35; Mr. 14:26-31; Lc. 22:31-34)

36E xiꞌ tkbaꞌntzen Simón Pedro texin:

—Taat, ¿jaaꞌtzen cxeꞌley?―tz̈i Pedro.

—Mlay tzꞌoc lpey wiꞌja jaꞌlewe jaaꞌ chin xeꞌla. Pero laꞌ alcye jun kꞌij cꞌoquel lpey wiꞌja―tz̈i Jesús.

37E xiꞌ tkbaꞌn Pedro texin:

—Taat, waja tuꞌn woc lpeya tiꞌja jaꞌlewe. Ka at il tiꞌj, chin cymeela tuꞌn woc lpeya tiꞌja―tz̈i Pedro.

38Aj ttzakꞌbeꞌn Jesús te Pedro:

—¿Jaxpa tuꞌna ccymela tuꞌn toc lpeya wiꞌja? Jaxxix cxeꞌl nkbaꞌna tey, te mitknaꞌx kskix, oj tookꞌ jun cooꞌ, tuꞌn ttz̈i tiꞌja otktzen tkbay oxe maj min ttzkiꞌna nwitza―tz̈ixin te Pedro.

Currently Selected:

SAN JUAN 13: mamTS

Highlight

Copy