SAN JUAN 12

Tej tjax tkꞌoꞌn jun xuuj cꞌocꞌsbil tuj twiꞌ Jesús

(Mt. 26:6-13; Mr. 14:3-9)

1Cuma chꞌitk tpon ninkꞌij te Pascua, juꞌ tzunj e tzyet tbe Jesús tuꞌn tponxin tuj Jerusalén. At-x wukak kꞌij tuꞌn ttzyet ninkꞌij tej tponxin tuj Betania, jtnom jaaꞌ najle Lázaro, jxjal otk jaw titzꞌjsaꞌnxin tuj cyamecy. 2Bix tuꞌn cykꞌonte aj tnom chjonte te Jesús, iyꞌ cyiyꞌsaꞌnxin jun tninkꞌijxin. Bix oc ten Marta cyxol kej xjal ajbel cye xjal nchi waaꞌn. Bix at Lázaro cyxol kej xjal kꞌuklcꞌa ttxaꞌn mes tuya Jesús. 3Yal te María, tuꞌn t-xiꞌ tyeecꞌan María tanem texin, e tzaj tiiꞌnxuj jun lmet nojne tuya cꞌocꞌsbil cyiꞌ xjal nardo tbi, wiꞌyelxsen, bix yaaꞌn smoꞌn tuya aꞌ. Bix e cub tkoꞌnxuj cꞌocꞌsbil tiꞌ tkenxin, bix e baj tsuꞌnxuj tuya ttzmal twiꞌxuj. Bix e noj jaaꞌ tuya tcꞌoꞌcjel.

4Bix tocxsen Judas Iscariote tunwen, jun t-xnakꞌatz Jesús, tcwal Simón. Bix jatzen Judas tuꞌn t-xiꞌ qꞌueyente Jesús tuj cykꞌab byol xjal. E tkbatzen Judas:

5—¿Tikentzen min xiꞌ qꞌueyet ja cꞌocꞌsbil lu? Nuket xiꞌ qꞌueyet, matle tzꞌoc twiꞌ te oxe syent pwak te denario, bixetle xiꞌ cyej xjal mebe―tz̈i Judas. 6Pero mintiiꞌ tanemxin cye mebe. E xiꞌ tkbaꞌnxin juꞌwa cuma alakꞌxin. Ajbenxin te cꞌojlal jcajon te pwak te Jesús cyuya ke t-xnakꞌatzxin, bix at maj el tiiꞌnxin cyoybil xjal e cuꞌx cykꞌoꞌn tuj tcublel pwak.

7Bix e xiꞌ tkbaꞌn Jesús te Judas:

—Miꞌn tzꞌoc tena yaaꞌl xuuj. Yaaꞌn nuk tajx ma cyaj tcloꞌnxuj jcꞌocꞌsbil tuꞌn tcub tkoꞌnxuj cyibaj nkena. Jma bint weya najben tuꞌn tbaj bint nxumlala tuꞌn nmaketa. 8Ka taja txiꞌ tyeecꞌana tanema cye mebe, attzen mebe cyxola cykil kꞌij. Pero weya, nuk chꞌintl chin temela cyxola―tz̈i Jesús.

Tej tbint tiꞌj cyuꞌn xjal tuꞌn tcub byet Lázaro

9Yal cyej txkentl xjal judío otk chi chmet te iyꞌsal ninkꞌij, tej cybinte e ten Jesús tuj Betania, e tzajkexin te cyeyꞌlte Jesús, bix yaaꞌn nuk tuꞌn toc cycyeꞌyen ja Jesús, sino jax juxꞌ tuꞌn toc cycyeꞌyen ja Lázaro, cuma otk jaw itzꞌj tuj cyamecy tuꞌn Jesús. 10Pero yal kej nejenel cye pala, e tzaj cychmon cyiibxin tuꞌn tbaj cynincꞌuꞌnxin ti tten tuꞌn tcub byet yaaꞌn nuk ja Jesús, sino tuyax Lázaro, 11cuma tuꞌn tlaj e jaw itzꞌj Lázaro tuj cyamecy, nim xjal judío el lkꞌe tjakꞌ cycawbil pala tuꞌn cyocslan tiꞌ Jesús.

Tej tocx Jesús tuj tnom Jerusalén

(Mt. 21:1-11; Mr. 11:1-11; Lc. 19:28-40)

12Yal te ninkꞌij te Pascua, nimxsen xjal otk chi pon tuj Jerusalén te iyꞌsal ninkꞌij. Tetzen juntl kꞌij toclen tkꞌon María cꞌocꞌsbil tiꞌ Jesús, e pon tpocbal tuꞌn t-xiꞌ Jesús tuj Jerusalén. Tejtzen cybinte tnimal xjal tuꞌn t-xiꞌ Jesús, 13el cytxꞌomen tkꞌab xaꞌj, bix etzkexin tuj Jerusalén te clulte texin. Bix akꞌkexin s̈-il:

—¡Jawnexsen Cawel kxol! ¡Cyꞌiwlaꞌnxit jxjal tzul te t-xel Dios! ¡Ma tzul jmero Cawel kxol ejooꞌ aj Israel!―tz̈i ke xjal.

14Yal te Jesús tuj Betania, e tzaj ttzyuꞌnxin jun tal bur, bix e jaxxin tibajjil. Juꞌ tzunj jax eꞌla jyol tuj tyol Dios tzin tkbaꞌn: 15“Miꞌn tzaj ttz̈i cyiꞌja, key xjal te Jerusalén, cuma tzul Cycawela tjax tibaj jun tal bur,” tz̈i tyol Dios.

16Yal ke t-xnakꞌatz Jesús, min el cyniyꞌxin tiꞌj nyolen kej yol lu tiꞌj Jesús. Pero mas yaj, tej taj kꞌiꞌnxin tuj cyaꞌj, ul tuj cycꞌuꞌjxin ti otk baj, bix el cyniyꞌxin tiꞌj otk tzꞌel tyol Dios jax.

17Kej xjal otk ten tuyaxin tej tetz ttxcoꞌnxin Lázaro tuj mukbil bix e jaw titzꞌjsaꞌnxin tuj cyamecy juntl maj, otk txiꞌ cykꞌumen cye xjal tuj Jerusalén ti otk bint tuꞌnxin. 18Tiꞌj tzunj tpocbal tipemalxin otk tzꞌetz tnimal xjal tuj Jerusalén te clulte texin. 19Bix cuma e jaw cynimsaꞌn xjal tbi Jesús, juꞌ tzunj e xiꞌ cykbaꞌn fariseo cyxolx:

—Mintiiꞌ tzꞌajben jma baj knincꞌuꞌn tiꞌj Jesús, tuꞌn tul cyiiꞌn xjal jaxin kwitz. Cycyeꞌyenc. Cykil xjal ma cheꞌx lpe tiꞌjxin―tz̈ikexin.

Tej cypon kej xjal griego tuya Jesús

20Cyxoltzen xjal e pon tuj Jerusalén te nimal Dios tuj ninkꞌij, attzen cab xjal griego. 21E pon lkꞌe kej griego lu tiꞌ Felipe, jxjal aj Betsaida tuj departamento te Galilea. Bix e xiꞌ cykbaꞌnxin te Felipe:

—Taat, kaja tuꞌn kyolena tuya Jesús―tz̈ikexin.

22Juꞌ tzunj, e xiꞌ Felipe tuꞌn t-xiꞌ tkbaꞌn te Andrés, bix e xiꞌkexin kbalte te Jesús ti cyaj kej xjal griego.

23Bix e xiꞌ tkbaꞌn Jesús cyexin:

—Ma pon tumel tuꞌn tbint wuꞌna jkꞌoꞌn weya tuꞌn tbint wuꞌna, inayena, jxjal Smaꞌn tuꞌn Dios tuꞌn ntena cyuya xjal. 24Cxeꞌl nkbaꞌna jun techel cyey. Jaxxix cxeꞌl nkbaꞌna cyey, jun iyaj te triwa, ka min ma cuꞌx makuꞌn tuj txꞌotxꞌ tuꞌn tcyim, juꞌx cwel ten iyaj tjunal. Mlay jatz pokꞌch. Pero ka ma cyim, nim twitz cꞌoquel. Jaxse juꞌx weya, il tiꞌj tuꞌn ncyima, tuꞌntzen t-xiꞌ nkꞌoꞌna cychunkꞌlal xjal. 25Jax juꞌx cye xjal. Al tzunj xjal min ma cyaj tcyeꞌyen tchunkꞌlal, sino nuk oꞌcx ma tzꞌoc tcꞌuꞌj tuꞌn tten tchunkꞌlal te twitz txꞌotxꞌ, mlay caman tchunkꞌlal te junx maj tzin nkꞌoꞌna. Pero ja tzunj xjal cyjel tcyeꞌyen tchunkꞌlal te jun rato, ccamaltzen tchunkꞌlal te junx maj. 26Ka taj jun xjal tzꞌajben weya bix yaaꞌn nuk tzꞌoc tcꞌuꞌj tiꞌj tchunkꞌlal, iltzen tiꞌj tuꞌn tiyꞌx qꞌuixcꞌaj tuꞌn wiꞌja, ojxe tcyim ka at il tiꞌj, tisenxj ma wakꞌ wiiba tuꞌn ncyima. Kej xjal chi ajbel weya juꞌwa, chi temeltzen jaaꞌ chin xeꞌla, bix cxeꞌl tkꞌoꞌn Nmana tuꞌn cyoc te jawnex.

Tej tyole Jesús tiꞌ tcyamecy

27Pero weya, ma pon tumel tuꞌn ncyima. Bix yaaꞌn tuj ttz̈yal taꞌ wanema. ¿Ti cxeꞌl nkbaꞌna? ¿Cxeꞌlpa nkbaꞌna: “Taat Nmana, najsama. Chin tclaꞌy, tuꞌntzen miꞌn pon hora tuꞌn ncyima,” ntz̈ipaya? Pero mlay txiꞌ nkanena jlu, cuma in ula tuꞌn ncyima. 28Taat, bint-xit jtajbila wuꞌna, tuꞌntzen tjaw nimset tbiy―tz̈i Jesús.

Bixsen e tzaj tyol Dios tuj cyaꞌj, bix tz̈i cyjulu:

—Tuꞌnj ma bint tuꞌna, ya ma jaw nimset nbiꞌya. Bix juntl maj ctzaal nkꞌoꞌna tuꞌn tajbena tuꞌn tjaw nimset nbiꞌya―tz̈i twiꞌ Dios.

29Kej tnimal xjal e ten tiꞌj Jesús, tej cybinte tkꞌajkꞌajel, e xiꞌ cykbaꞌn otk kꞌajt jun kꞌancyok. Pero at juuntl e xiꞌ cykbaꞌn otk yolen jun ángel tuyaxin. 30Tuꞌn tel cyniyꞌ xjal tiꞌj, e xiꞌ tkbaꞌn Jesús:

—Ja yol e tzaj tuj cyaꞌj najben te jun techel, yaaꞌn te weya, sino te cyey, tuꞌntzen cyocslana wiꞌja. 31Ma pon tumel tuꞌn ncyima, bix tuꞌnj ncyamecya, cyjel tuj tzinen alcye cꞌoquel te cawel tibaj twitz txꞌotxꞌ. Ma pon tumel tuꞌn tetz lojoꞌn taaw il ncawen jaꞌlewe. 32Bix weya, ojtzen njaw kꞌoꞌna tibaj twitz txꞌotxꞌ, jatzen tumelja te cykil xjal tuꞌn cyclet tjakꞌ tcawbil taaw il―tz̈i Jesús. 33E yolenxin tiꞌj tuꞌn tjawxin tibaj twitz txꞌotxꞌ tuꞌntzen tel cyniyꞌ xjal tiꞌj at tuꞌn tjawxin twitz jun cruz tuꞌn tcyimxin.

34Bix e xiꞌ cykbaꞌn xjal texin:

—O kbiꞌya tzin tkbaꞌn tley Dios, oj tul jxjal Scyꞌoꞌn tuꞌn Dios, cyjeltzen te junx maj. Miꞌn cyim. Pero tzin tkbaꞌna: “Il tiꞌj tuꞌn tcyim jxjal Smaꞌn tuꞌn Dios twitz cruz,” tz̈iy. Jeyꞌ, ¿alcye tzuna? ¿Titzen tten cymeela twitz cruz oj tzin tkbaꞌn tyol Dios mlay cyim Jscyꞌoꞌn tuꞌn Dios?―tz̈i ke xjal.

35Bix aj ttzakꞌbeꞌnxin cyexin:

—Cycyꞌiy tzꞌel cyniꞌya tiꞌj. Cycyꞌiy nxnakꞌtzbila. Pero nuk chꞌintl ctemel nxnakꞌtzbila cyxola. Miꞌn chin cyaja tzalu. Juꞌ tzunj, cꞌoquel cyipena tiꞌj tuꞌn tajben nxnakꞌtzbila cyey joocꞌtzen at-x, tuꞌntzen miꞌn chi beta tuj klolj. Kej xjal nchi bet tuj klolj, chi tzpeteltzen. 36Ma pon tumel tuꞌn waja. Chi ocslana wiꞌja loj lux kena ntiina, tuꞌntzen cyoca junx wuyena―tz̈ixin cye xjal.

Min e xiꞌ cyocslaꞌn xjal judío ja Jesús

Tej tbaj tkbaꞌnxin kej yol lu, el lkꞌexin cyiꞌjxin, tuꞌn tewente tiibxin cywitzxin. 37Amale otket tyeecꞌaxin nimxsen tipemalxin cye xjal judío, pero min ocslanke tiꞌjxin ka jaxin Cristo. 38Juꞌ tzunj, jax eꞌla tyol Isaías, jtyolel Dios te ootxa. Tz̈i Isaías cyjulu: “Kman Kaaw, min e cyajbe ke xjal tey tyol tej t-xiꞌ kkꞌumena, bix min ocslanke tej t-xiꞌ cycyeꞌyen tipemala,” tz̈i Isaías. 39Bix cuma el cyiiqꞌuen xjal tyol Cawel kxol, juꞌ tzunj e xiꞌ tkbaꞌntl Isaías: 40“O cyaj tkꞌoꞌn Kaaw ejeeꞌ tuꞌn tcub mutzꞌbaꞌn cynaabl, bix tuꞌn miꞌntl tzꞌajben cyanem tuꞌn cyiikꞌente tyola. Juꞌ tzunj, mlay tzꞌel cyniyꞌ xjal tiꞌj, tuꞌntzen miꞌn cyaj cykꞌoꞌn cyil, tuꞌntzen cyclet,” tz̈i Isaías.

41Tej tyolen Isaías juꞌwa, e yolenxin tiꞌj Scyꞌoꞌn tuꞌn Dios, cuma otk tilxin tej tjaw tiiꞌn Dios ja Isaías tuj cyaꞌj jun maj. Bix jax e yolen Isaías jun maj tiꞌj Jscyꞌoꞌn tuꞌn Dios tuꞌn tiyꞌx nim qꞌuixcꞌaj tuꞌn twitz txꞌotxꞌ.

42Amale el chꞌixcꞌat yaaꞌn cykilca nejenel cye xjal el cyxooꞌn Jscyꞌoꞌn tuꞌn Dios, pero at nim cyxol ocslan tiꞌjxin ka jaxin Cristo. Pero at cytz̈i fariseo cyiꞌjxin, bix cycyꞌixin tuꞌn cyetz lojoꞌnxin cyxol xjal judío. Juꞌ tzunj min e cykbaxin cywitz xjal ka lepcheckexin tiꞌjxin. 43Mas e cyajbexin tuꞌn cyelxin baꞌn cywitz xjal twitzj tuꞌn cyelxin baꞌn twitz Dios.

Tuꞌn tyol Jesús cwel cycastiwa xjal

44Jyol e tkꞌume Jesús cye xjal tej tten twitz txꞌotxꞌ, juꞌtzen cyjulu: “Alcyej xjal cxeꞌl tocslaꞌn tiꞌj nyola, yaaꞌn oꞌcx wiꞌja n-ocslan, sino jax n-ocslan tiꞌj tyol Nmana e tzaj tsmaꞌn inayena. 45Bix oj n-el tniyꞌ jun xjal wiꞌja, jax n-el tniyꞌ ti Nmana e tzaj tsmaꞌn inayena, cuma junx koꞌya. 46Ma chin ula twitz txꞌotxꞌ tisen spiꞌyen. Kej xjal ma chi ocslan wiꞌja, miꞌn chi cyaj tuj klolj. 47Kej xjal ma chi ebinte nyola pero min cyocsla, cwel cycastiwa, pero yaaꞌn wuꞌna cwel castiwa cyibaj, cuma min in ula twitz txꞌotx tuꞌn t-xiꞌ nkꞌoꞌna cycastiwa xjal, sino tuꞌn t-xiꞌ nkꞌoꞌna cycolbil xjal. 48At juntl ctkbaꞌ at cyil xjal. Kej xjal qꞌuelel cyiiqꞌuen inayena bix cycyꞌi nyola, tuj mancꞌbil kꞌij j-e xiꞌ nkbaꞌna cꞌajbel tuꞌn tcyaj tuj tzinen at cyil. 49Cꞌajbel nyola juꞌwa, cuma yaaꞌn wexwe nyol tzin nkbaꞌna, sino tyol Nmana e tzaj tsmaꞌn inayena. Ma tzaj tkbaꞌn Nmana weya alcye tuꞌn t-xiꞌ nkbaꞌna. 50Bix ja yol ma tzaj tkbaꞌn Nmana weya, jaj tuꞌn t-xiꞌ nkꞌoꞌna cychunkꞌlal xjal. Juꞌ tzunj, nxiꞌ nkꞌumena cye xjal nuk oꞌcx tisenj ma tzaj tkbaꞌn Nmana weya,” tz̈i Jesús.

Currently Selected:

SAN JUAN 12: mamTS

Highlight

Copy