SAN JUAN 11

Tej tcyim Lázaro

1E yebttzen junxin xjal Lázaro tbi tuj tnom te Betania, nka tiꞌ Jerusalén. Jun tuya Jesús Lázaro, bix cyitzꞌen Marta bix María jaxin. 2Ja tzunj xuj María, jaxj María otk cub tsuꞌn cꞌocꞌsbil tibaj tken Cawel kxol, bix otk tzꞌel tsuꞌnxuj tiꞌ tken Jesús tuya ttzmal twiꞌxuj.

3Tejtzen tyebt Lázaro, e xiꞌ cysmaꞌn ke ttzicyxin jun sanjel kbalte te Jesús:

—Taat, jxjal n-oc takꞌ tey nim ma yebt, bix ma tz̈ꞌitz̈ꞌexin―tz̈i sanjel.

4Tej tbinte Jesús tyol sanjel, e xiꞌ tkbaꞌnxin:

—Jt-xiꞌlen ja yabel lu yaaꞌn tuꞌn t-xiꞌ tiiꞌn Lázaro tuj cyamecy, sino tuꞌn tchicꞌajax tipemal Dios, tuꞌntzen tjaw nimset nbiꞌya, inayena Tcwal Dios―tz̈ixin.

5Nim oc cyakꞌ Marta bix María bix Lázaro te Jesús. 6Juꞌ tzunj, tej tbintexin ka yaab Lázaro, e tcuyaxin tuꞌn t-xiꞌxin cyeyꞌlte. Pero nejl, e cyajxin caꞌbatl kꞌij tuj lugar jaaꞌ e tenaxin. 7Bix tej tpon tumel tuꞌn t-xiꞌxin, e xiꞌ tkbaꞌnxin cye t-xnakꞌatzxin:

—Koꞌtzen juntl maj tuj Judea―tz̈ixin.

8Bix aj cytzakꞌbeꞌn t-xnakꞌatzxin:

—Taat Xnakꞌtzal, ma bint caꞌba oxe kꞌij oc cyipen judío jatzewe tiꞌj tuꞌn tcub cybyoꞌn jay tuya xak. ¿Tikentzen taja t-xiꞌy juntl maj tuj ja tnoma?―tz̈ikexin.

9Bix aj ttzakꞌbeꞌnxin cyexin:

—Il tiꞌj tuꞌn nxiꞌya, cuma minaꞌx tpon baj waakꞌena. Cyxol xjal at jun yol tzin tkbaꞌn: “Tuj jun kꞌij at cablaaj hora te spiꞌyen. Ka ma bet jun xjal te kꞌij, mlay cub tzꞌak, cuma at spiꞌyen. 10Pero ka ma bet jun xjal te koniyan, cjawel tzꞌak tuj klolj,” tz̈i yol. Jax juꞌx weya. Minaꞌx tpon baj tyem tuꞌn tbint waakꞌena, bix miꞌn ko akꞌanan tuya ttz̈i kiꞌj, tisen oj nchi bet xjal tuj klolj―tz̈i Jesús.

11Bix e xiꞌ tkbaꞌntlxin:

—Jkuya Lázaro nwutan. Pero ma chixa tuꞌn tjaw ncꞌasena―tz̈ixin.

12—Taat, ka ma wutanxin, jatzen jun yecꞌbil baꞌn, cuma tzultzen tnaablxin―tz̈ikexin, 13cuma min el cyniyꞌ t-xnakꞌatzxin tiꞌj ka otk yolenxin tiꞌj tcyamecy Lázaro. Tuj cywitzxin, nyolenxin tiꞌj najlan Lázaro.

14Cuma min el cyniyꞌxin tiꞌj, juꞌ tzunj e xiꞌ tkbaꞌnxin cyexin tuj tzinen:

—Ma cyim Lázaro. 15Bix baꞌn tuj nwitza min in pona nejl tuꞌn ncoꞌpana jaxin tuj yabel, cuma mas baꞌn te cyey tuꞌn tcywix cyocslabla wiꞌja oj toc cycyeꞌyena jun mas jawnex twitzj tuꞌn ncoꞌpana jun yaab tuj yabel. Koꞌtzen jaaꞌ taꞌxin―tz̈i Jesús.

16Pero tuꞌn ttz̈i cyiꞌj, cycyꞌi t-xnakꞌatzxin tuꞌn cyxiꞌ. Pero bix e xiꞌ tkbaꞌn Tomás cye niyꞌtl t-xnakꞌatz Jesús:

—Ka taj Jesús tuꞌn tcub byet, jax juꞌx ke. Koꞌtzen, tuꞌntzen kcyim tuyaxin―tz̈i Tomás, jxjal Yoẍ tbi cyuꞌn xjal. Bix e xiꞌkexin cykilcakexin.

Cjawel itzꞌj cykil xjal tuꞌn Jesús tuj mancꞌbil kꞌij

17Tejtzen cyponxin tuj Betania, e tbitzen Jesús cyaja kꞌij tcyajlen Lázaro tuj tjayel anem twitz xak. 18Cuma taꞌ Betania nuk jun ajlabl tiꞌ Jerusalén, 19juꞌ tzunj e xiꞌ nim xjal judío cyuya Marta bix María, te yecꞌbil tkꞌakꞌbil cycꞌuꞌjxin cyiꞌjxuj, cuma otk cyim cyitzꞌenxuj.

20Tejtzen tbinte Marta otk tzul Jesús tuj ttanemxuj, etzxuj tuj tjaxuj te clulte Jesús tuj be. Yal te María, e cyaj tuj cyjaxuj. 21Tej tpon Marta tuya Jesús, e xiꞌ tkbaꞌnxuj texin:

—Taat, nuket e tena tzalu, minttzele e cyim nxibena. 22Pero amale mint ula, pero baꞌnx wuꞌna alcyej cxeꞌl tkanena te Dios, ctzaal tkꞌoꞌn Dios tey―tz̈i Marta.

23E xiꞌ tkbaꞌn Jesús texuj:

—Cjawel itzꞌj t-xibena juntl maj tuj cyamecy―tz̈ixin.

24Bix e xiꞌ tkbaꞌn Marta texin:

—Ntzkiꞌna oj tpon tumel tuꞌn tjaw itzꞌj cykil xjal tuj mancꞌbil kꞌij, jax cjawel itzꞌj nxibena tuj cyamecy―tz̈ixuj.

25Bix e xiꞌ tkbaꞌnxin texuj:

—Inayena kꞌolte cye xjal tuꞌn cyjaw itzꞌj tuj cyamecy, bix inayena kꞌolte cychunkꞌlal xjal te junx maj. Ka cꞌocslal jun xjal wiꞌja, amale ncyimet, pero wuꞌna cjawel itzꞌj tuj cyamecy juntl maj. 26Cykilca kej xjal iꞌtz, ka ma chi ocslan wiꞌja, mlay chi cyaj tuj jcyamecy te junx maj. ¿Tocslaꞌpa te ja lu?―tz̈ixin.

27Aj ttzakꞌbeꞌn Marta texin:

—Tzin, taat. Ya ma txiꞌ wocslaꞌna jay jxjal Scyꞌoꞌn tuꞌn Dios te Cawel. Jay Tcwal Dios at tulel twitz txꞌotxꞌ, bix tuꞌna chi jawel itzꞌj xjal tuj cyamecy juntl maj―tz̈ixuj.

Tej tjatz itzꞌj Lázaro

28Tej tbaj tkbaꞌn Marta ja yol lu, e xiꞌxuj tjaxuj te txcolte titzꞌenxuj. E xiꞌ tkbaꞌnxuj te María, pero yaaꞌn cywitz judío:

—Ma tzul jjawnex Xnakꞌtzal tuj tnom, bix taj yolen tuyey―tz̈ixuj.

29Tej tbinte María ka otk txcon Jesús tiꞌjxuj, tujxse naj e jaw weꞌxuj, bix e tzyet tbexuj tuꞌn tponxuj tuyaxin. 30Mitknaꞌx tul Jesús tuj tmij tnom, sino at-xxin ttxaꞌn tnom jaaꞌ otk pona Marta tuyaxin. 31Pero mitkx n-exa María tjunal, cuma kej nejenel cye judío eteꞌ tuj tjaxuj tuꞌn tcywix tcꞌuꞌjxuj, tej t-xiꞌ cycyeꞌyenxin otk jaw weꞌ María bix e xiꞌxuj tuj ajkelbil, bix oc lpekexin tiꞌjxuj, cuma tuj cywitzxin xiꞌninxuj tuj camposant te ookꞌel. 32Pero e xiꞌxuj tuya Jesús. Tej tpon María tuya Jesús, bix e tilxuj jaxin, bix e cub mutzkꞌajxuj t-xeeꞌ tkenxin, bix e xiꞌ tkbaꞌnxuj texin:

—Taat, nuket e tena tzalu, minttzele e cyim nxibena―tz̈ixuj.

33Tej tlonte Jesús nchi s̈-in María cyuya nejenel cye judío, e tzajtzen tbisxin, bix e tzaj tkꞌojxin tiꞌj nchi cyim xjal tuꞌn tlaj il. 34Bix e xiꞌ tkanenxin cye xjal:

—¿Jaaꞌ tumel e cuꞌxa cymakuꞌna jaxin?―tz̈i Jesús.

—Taat, koꞌtzen, tuꞌn t-xiꞌ kyeecꞌana tey―tz̈ikexin.

35Bix e jaw okꞌ Jesús. 36Juꞌ tzunj, e xiꞌ cykbaꞌn judío cyxolx:

—Nimxsen oc takꞌ Lázaro texin―tz̈ikexin.

37Pero at juun cyxol e xiꞌ cykbaꞌn:

—Jxin lu e xiꞌ tkꞌanen jun xjal mos̈. ¿Titzen tten min oc tipenxin tiꞌj tuꞌn mint e cyim ja tuyaxin lu?―tz̈ikexin.

38Juꞌ tzunj, juntl maj e tzaj tkꞌoj Jesús, cuma min oc ke cycꞌuꞌjxin tiꞌjxin.

Tejtzen cyponxin tuj camposant, tocx anem tuj jun jul twitz xak, bix tocx jun xak paatzꞌ ttziiꞌ tjayel anem. 39Juꞌ tzunj, e xiꞌ tkbaꞌn Jesús cye xjal:

—Cyimel xak―tz̈ixin.

Bix e xiꞌ tkbaꞌn Marta, taneb jxjal otk cyim:

—Taat, yaaꞌn tumel, cuma qꞌueletz nim t-xewel anem. Ma bint cyaja kꞌij tcyimlenxin―tz̈i Marta.

40Bix e xiꞌ tkbaꞌn Jesús texuj:

—¿Tikentzen mintiiꞌ n-oc ke tcꞌuꞌja wiꞌja? ¿Mimpa txiꞌ nkbaꞌna tey, ka ma tzꞌocslana wiꞌja, tlaꞌy tipemal Dios?―tz̈ixin.

41Tejtzen tel cyiiꞌn xjal xak twitz tjayel anem, e jaw tcyeꞌyen Jesús twitz cyaꞌj, bix e xiꞌ tkbaꞌnxin te Dios:

—Taat Nmana, nxiꞌ nkꞌoꞌna chjonte tey, cuma e tzaj tbiꞌna nkanbila tej t-xiꞌ nkanena tey wipemala tuꞌn tjaw witzꞌjsaꞌna ja xjal lu. 42Weya, ntzkiꞌna ntzaj tbiꞌna nyola jaca maj oj nxiꞌ nnaꞌna tey. Pero tzin nkꞌoꞌna chjonte tey jaꞌlewe, tuꞌntzen tel cyniyꞌ kej xjal lu tiꞌj ka jay e tzaj tsmaꞌna inayena twitz txꞌotxꞌ―tz̈i Jesús te Tmanxin cywitz xjal.

43Tej tbaj nnaꞌn Jesús Dios, cyiwxix e jaw ts̈iꞌnxin:

—¡Lázaro, ctetza!―tz̈ixin.

44Bix n-etztl jcyimne. Balkꞌiꞌn tkꞌabxin bix tkenxin tuya jun tz̈omj, bix potzen twitzxin. Bix e xiꞌ tkbaꞌn Jesús cye xjal:

—Cycoꞌpamel t-xbalenxin, tuꞌntzen tbet-xin―tz̈ixin.

Tej tjaw cychmon cyiib xjal tuꞌn ttzyet Jesús

(Mt. 26:1-5; Mr. 14:1-2; Lc. 22:1-2)

45Kej xjal judío otk chi ul tuj camposant tuya María, tej cylontexin ti otk bint tuꞌn Jesús, e cyocslaxin ka tuꞌn Dios jaxin. 46Pero at juuntl e xiꞌ cyuya fariseo tuꞌn t-xiꞌ cykbaꞌn cyexin ti otk tbincha Jesús.

47Tejtzen cybinte fariseo tpocbal e jaw titzꞌjsaꞌn Jesús jun xjal tuj cyamecy, oc cychmon cyiibxin cyuyaj nejenel cye pala, bix e xiꞌ cykbaꞌnxin:

—¿Ti pjel ke? Nimxsen nbint tuꞌn ja xjal lu tuya nim tipemal. 48Ka ma txiꞌ tzakpet-xin tuꞌn tcub cyiꞌj xjal tuꞌnxin, cykilcatzen xjal chi ocslal tiꞌjxin, bix cꞌoquelxin te cawel. Bix ctzaal tkꞌoj gobierno te Roma kiꞌj, bix qꞌuelel tiiꞌn kcawbil tuj tja Dios bix kxol ejooꞌ judío―tz̈ikexin.

49Attzen junxin pala cyxol, Caifás tbi, jxjal mas nintzaj cyxol pala tej tcub byet Jesús, bix e xiꞌ tkbaꞌnxin:

—¿Tikentzen min tzꞌel cyniꞌya tiꞌj alcye tuꞌn tbint kuꞌn tiꞌj ja xjal lu? 50¿Mimpa tzꞌel cyniꞌya tiꞌj ka mas baꞌn te cyey tuꞌn tcyim jun xjal te cyxel cykilca xjal, twitzj tuꞌn cyxiꞌ xjal tuj il?―tz̈i Caifás.

51Min el tniyꞌ tneel pala tiꞌj ka kꞌiꞌn tyol Dios tuꞌnxin, pero cuma tneel oylxte chojbil ilxin, ajbenxin te Dios tuꞌn tkbantexin alcyej wik chojbil cyil xjal at tuꞌn toyet tujx jnabkꞌi, jaj tuꞌn tcyim Jesús te cyxel judío, 52bix yaaꞌn nuk te cyxel judío, sino te cyxel cykilca xjal te twitz txꞌotxꞌ, tuꞌntzen cyoc te junx tnom cykilca kej xjal cyuj juntl tnom cyaj tuꞌn cyoc te tcwal Dios.

53Tej t-xiꞌ tkbaꞌn Caifás juꞌwa, tex kꞌij oc cykꞌon cyiib nejenel cye judío tuꞌn tcub cybyoꞌn ja Jesús. 54Juꞌ tzunj, mintl e bet Jesús cyxol nejenel cye judío, sino el lkꞌexin cyiꞌj. E ponxin tuj jun tnom Efraín tbi, nka tiꞌj txꞌotxꞌ mintiiꞌ cynajbil xjal tuj. Tuj Efraín e tenxin cyuya t-xnakꞌatzxin.

55Tejtzen chꞌitk tul ninkꞌij te Pascua, kej kꞌij xjan cye judío, etz nim xjal cyuj tnom tuꞌn cyponxin tuj Jerusalén, te kꞌolte chojbil cyilxin, tuꞌn cycyajxin sak nejl twitz ninkꞌij, tisenx cye judío cycostumbre. 56Bix tuj Jerusalén e jyonkexin tiꞌ Jesús. Bix tej cychmonte cyiibxin tuj nintzaj tja Dios, e xiꞌ cykanenxin cyxolxxin:

—¿Titzen toc cyuꞌna? ¿Tzulpale Jesús tuj ninkꞌij tuj ja jnabkꞌi lu?―tz̈ikexin. 57E yolenkexin juꞌwa cuma otk tzꞌetz jun yol cyuꞌn fariseo bix kej nejenel cye pala, ka ma tbi jun xjal jaaꞌ taꞌ Jesús, ya tuꞌn tpon naj cywitzxin te kbalte jaaꞌ tumel, tuꞌntzen tcub cytzyuꞌnxin jaxin.

Currently Selected:

SAN JUAN 11: mamTS

Highlight

Copy