Popular Bible Verses from SAN JUAN 14

Share

Cxeꞌl nkꞌoꞌna cyey tuꞌn tten cyanema tuj ttz̈yal. Cyxol xjal te twitz txꞌotxꞌ, n-oc cyipen tiꞌj tuꞌn cyten tuj txubtx, pero mintiiꞌ jaaꞌ tuꞌn toc ke cycꞌuꞌj. Pero weya, tuya wipemala nxiꞌ nkꞌoꞌna cyey tuꞌn cycyaja tuj txubtx. Juꞌ tzunj, miꞌn baj cycꞌuꞌja. Miꞌn tzaj ttz̈i ti pjel cyiꞌja.

Aj ttzakꞌbeꞌnxin: —Inayen weja jbe. Inayen weja jjaxxix. Inayenja kꞌol cychunkꞌlala te junx maj. Nuk wuꞌna at cyoclena tuꞌn cypona tuya Nmana.

Tuꞌn tcywix cycꞌuꞌj t-xnakꞌatz Jesús, e xiꞌ tkbaꞌnxin cyexin: —Nim nchi bisena tiꞌj ti pjel, pero miꞌn tzaj ttz̈i cyiꞌja. Cꞌoquel ke cycꞌuꞌja tiꞌ Dios bix jax juꞌx wiꞌja.

Bix oj tul J-onlte cyey, cxeꞌl ttxꞌolbaꞌn cykilca te cyey, tuꞌntzen tcyaj tuj tzinen jma txiꞌ nxnakꞌtzaꞌna cyey. Ctzaal tsmaꞌn Nmana Espíritu Santo te nxela, bix tuꞌn tzul cykilca nyola tuj cycꞌuꞌja.

Ka ma tzꞌoc cybiꞌna nyola, n-octzen wakꞌa cyey. Bix ka ma tzꞌoc wakꞌa cyey, cꞌoqueltzen cyakꞌa te Nmana. Bix jax juꞌx weya, cꞌoquel cyakꞌa weya, bix chin temela cyuyey tuꞌnj Espíritu Santo―tz̈i Jesús.

Bixsen cxeꞌl nkanena te Nmana tuꞌn ttzaj tsmaꞌnxin juntl Onlte cyey. Ctzaal tsmaꞌnxin, bix ctemel cyuyey te junx maj. Ja Espíritu Santo ja tzunja Onlte cyey, bix cxeꞌl t-xnakꞌtzaꞌn alcyej jaxxix cyey. Pero kej xjal te twitz txꞌotxꞌ, mlay kꞌoj Espíritu Santo cye, cuma cycyꞌi jaxin, bix n-el cyiiqꞌuen jaxin. Pero cyey, cytzkiꞌna jaxin, cuma at-xin cyuyey. Bix mas yaj ctemelxin tuj cyanema.

Bix oj waja, alcyej cxeꞌl cykanena te Nmana, ka junx cykanbila tuya wajbila, cbinel wuꞌna, cuma waja tuꞌn tjaw nimset tbi Nmana tuꞌnj nbint wuꞌna, inayena Tcwal. Jax wuꞌna. Alcyej cxeꞌl cykanena, ka junx cykanbila tuya wajbila, cbinel wuꞌna.

Ka ma tzꞌoc wakꞌa cyey, chi nimala nyola.

Tuj tnajbil Nmana at nim lugar te cyey. Nuket mintiiꞌ, matle txiꞌ nkbaꞌna cyey. Pero tneelxix, il tiꞌj tuꞌn nneja jkolte najbil cywitza.

Bix ka ma chin aja jkolte cynajbila, jax chin ul meltzꞌaja juntl maj, bix cxeꞌl nchmoꞌna ejeeꞌy, cuma waja tuꞌn cytena junx wuyena.

E xiꞌ tkbaꞌn Tomás texin: —Taat, min ktzkiꞌna jaaꞌ cxeꞌley. ¿Titzen tten qꞌuelel kniꞌya tiꞌj alcyej be ctzyetel tuꞌna?―tz̈i Tomás.