ໂຢຮັນ 21
21
ພຣະເຢຊູເຈົ້າ ແລະ ການຫາປາຢ່າງອັດສະຈັນ
1ຕໍ່ມາ ພຣະເຢຊູເຈົ້າປາກົດແກ່ພວກສາວົກຂອງພຣະອົງອີກທີ່ທະເລຄາລີເລ.#21:1 ພາສາກຣີກວ່າ ທະເລຕີເບເຣຍ ເຫດການເກີດຂຶ້ນດັ່ງນີ້ຄື 2ຊີໂມນເປໂຕ, ໂທມາ (ທີ່ເອີ້ນວ່າດີໄດມັດ#21:2 ໂທມາ (ພາສາອາຣາມິກ) ແລະ ດີໄດມັດ (ພາສາກຣີກ) ທັງສອງ ແປວ່າ ຝາແຝດ), ນະທານາເອັນ ມາຈາກບ້ານການາໃນແຂວງຄາລີເລ, ລູກຊາຍທັງສອງຂອງເຊເບດາຍ ແລະ ສາວົກອີກສອງຄົນກໍຢູ່ນຳກັນ. 3ຊີໂມນເປໂຕບອກພວກເພິ່ນວ່າ, “ຂ້ອຍຈະອອກໄປຫາປາ”. ພວກເພິ່ນເວົ້າວ່າ, “ພວກເຮົາຈະໄປນຳເຈົ້າດ້ວຍ”. ພວກເພິ່ນຈຶ່ງລົງເຮືອອອກໄປ ແຕ່ໃນຄືນນັ້ນພວກເພິ່ນຫາປາບໍ່ໄດ້ຈັກໂຕ.
4ເມື່ອຮຸ່ງເຊົ້າມາ ພຣະເຢຊູເຈົ້າຢືນຢູ່ເທິງແຄມຝັ່ງ ແຕ່ພວກສາວົກບໍ່ຮູ້ຈັກວ່າແມ່ນພຣະເຢຊູເຈົ້າ.
5ພຣະເຢຊູເຈົ້າຮ້ອງຖາມວ່າ, “ເພື່ອນເອີຍ, ບໍ່ມີປາເລີຍບໍ?”
ພວກເພິ່ນຕອບວ່າ, “ບໍ່ມີ”.
6ພຣະອົງຈຶ່ງກ່າວວ່າ, “ຈົ່ງຖິ້ມມອງລົງເບື້ອງຂວາຂອງເຮືອແມ ແລ້ວພວກເຈົ້າຈຶ່ງຈະໄດ້ປາ”. ດັ່ງນັ້ນ ເມື່ອພວກເພິ່ນຖິ້ມມອງລົງກໍໄດ້ປາຈໍານວນຫລວງຫລາຍຈົນດຶງມອງຂຶ້ນບໍ່ໄດ້.
7ແລ້ວສາວົກຄົນທີ່ພຣະເຢຊູເຈົ້າຮັກຈຶ່ງເວົ້າກັບເປໂຕວ່າ, “ແມ່ນອົງພຣະຜູ້ເປັນເຈົ້າ!” ເມື່ອຊີໂມນເປໂຕໄດ້ຍິນລາວເວົ້າວ່າ, “ແມ່ນອົງພຣະຜູ້ເປັນເຈົ້າ” ເປໂຕກໍຈັບເສື້ອຊັ້ນນອກມານຸ່ງ (ເພາະເພິ່ນໄດ້ຖອດໄວ້) ແລ້ວໂດດລົງນ້ຳ. 8ສາວົກຄົນອື່ນໆກໍໄດ້ນັ່ງເຮືອຕາມໄປພ້ອມທັງດຶງມອງທີ່ມີປາເຕັມຢູ່ນັ້ນມານຳ, ເພາະພວກເພິ່ນຢູ່ບໍ່ໄກຈາກຝັ່ງ, ຄືປະມານ 200 ສອກ#21:8 ຄືປະມານ 90 ແມັດເທົ່ານັ້ນ. 9ເມື່ອພວກເພິ່ນຂຶ້ນເຖິງຝັ່ງແລ້ວພວກເພິ່ນກໍເຫັນຖ່ານໄຟລຸກຢູ່ ພ້ອມທັງມີປາປິ້ງຢູ່ທາງເທິງຖ່ານໄຟນັ້ນ ແລະ ມີເຂົ້າຈີ່ຈຳນວນໜຶ່ງ.
10ພຣະເຢຊູເຈົ້າກ່າວກັບພວກເພິ່ນວ່າ, “ຈົ່ງເອົາປາບາງໂຕທີ່ພວກເຈົ້າຫາກໍຈັບໄດ້ມານໍາ”. 11ຊີໂມນເປໂຕປີນຂຶ້ນເຮືອແລ້ວດຶງມອງຂຶ້ນຝັ່ງ, ມີປາໃຫຍ່ເຕັມມອງນັບໄດ້ 153 ໂຕ, ເຖິງວ່າຈະມີປາຈໍານວນຫລວງຫລາຍມອງກໍຍັງບໍ່ຂາດ. 12ພຣະເຢຊູເຈົ້າກ່າວກັບພວກເພິ່ນວ່າ, “ຈົ່ງພາກັນມາກິນເຂົ້າເຊົ້າສາ”. ບໍ່ມີສາວົກຄົນໃດກ້າຖາມວ່າ, “ທ່ານແມ່ນຜູ້ໃດ?” ພວກເພິ່ນຮູ້ຈັກຢູ່ແລ້ວວ່າແມ່ນອົງພຣະຜູ້ເປັນເຈົ້າ. 13ພຣະເຢຊູເຈົ້າມາຈັບເອົາເຂົ້າຈີ່ ແລະ ຍື່ນໃຫ້ພວກເພິ່ນ, ພຣະອົງຈັບເອົາປາ ແລະ ເຮັດຢ່າງດຽວກັນ. 14ນີ້ເປັນເທື່ອທີສາມທີ່ພຣະເຢຊູເຈົ້າປາກົດແກ່ພວກສາວົກຂອງພຣະອົງ ຫລັງຈາກທີ່ພຣະອົງເປັນຄືນມາຈາກຕາຍ.
ພຣະເຢຊູເຈົ້າໃຫ້ເປໂຕກັບມາຮັບໃຊ້ຄືເກົ່າ
15ເມື່ອພວກເພິ່ນຮັບປະທານອາຫານແລ້ວ, ພຣະເຢຊູເຈົ້າກ່າວກັບຊີໂມນເປໂຕວ່າ, “ຊີໂມນລູກໂຢຮັນເອີຍ, ເຈົ້າຮັກເຮົາຫລາຍກວ່າສິ່ງເຫລົ່ານີ້ບໍ?”
ເປໂຕຕອບວ່າ, “ໂດຍ ອົງພຣະຜູ້ເປັນເຈົ້າ, ພຣະອົງຮູ້ຈັກວ່າຂ້ານ້ອຍຮັກພຣະອົງ”.
ພຣະເຢຊູເຈົ້າຈຶ່ງສັ່ງວ່າ, “ຈົ່ງລ້ຽງແກະໜຸ່ມຂອງເຮົາເດີ”.
16ພຣະເຢຊູເຈົ້າກ່າວອີກຄັ້ງທີສອງວ່າ, “ຊີໂມນລູກໂຢຮັນເອີຍ, ເຈົ້າຮັກເຮົາບໍ?”
ເປໂຕຕອບວ່າ, “ໂດຍ ອົງພຣະຜູ້ເປັນເຈົ້າ, ພຣະອົງຮູ້ຈັກວ່າຂ້ານ້ອຍຮັກພຣະອົງ”.
ພຣະເຢຊູເຈົ້າຈຶ່ງສັ່ງວ່າ, “ຈົ່ງລ້ຽງຮັກສາແກະຂອງເຮົາເດີ”.
17ພຣະອົງກ່າວກັບລາວເປັນຄັ້ງທີສາມວ່າ, “ຊີໂມນລູກໂຢຮັນເອີຍ, ເຈົ້າຮັກເຮົາບໍ?”
ເປໂຕຮູ້ສຶກເຈັບປວດໃຈ ເພາະພຣະເຢຊູເຈົ້າໄດ້ຖາມຕົນເປັນເທື່ອທີສາມວ່າ, “ເຈົ້າຮັກເຮົາບໍ?” ເປໂຕຈຶ່ງຕອບພຣະອົງວ່າ, “ຂ້າແດ່ອົງພຣະຜູ້ເປັນເຈົ້າ ພຣະອົງຮູ້ຈັກທຸກສິ່ງ ພຣະອົງຮູ້ຈັກວ່າຂ້ານ້ອຍຮັກພຣະອົງ”.
ພຣະເຢຊູເຈົ້າສັ່ງເປໂຕວ່າ, “ຈົ່ງລ້ຽງແກະທັງຫລາຍຂອງເຮົາເດີ. 18ເຮົາບອກເຈົ້າຕາມຄວາມຈິງວ່າ, ເມື່ອເຈົ້າຍັງໜຸ່ມ ເຈົ້າແຕ່ງໂຕຂອງເຈົ້າເອງ ແລະ ທຽວໄປມາຕາມທີ່ເຈົ້າຕ້ອງການ ແຕ່ເມື່ອເຈົ້າເຖົ້າແກ່ແລ້ວ ເຈົ້າຈະຢຽດມືຂອງເຈົ້າອອກ ແລະ ມີຄົນອື່ນມາແຕ່ງໂຕໃຫ້ເຈົ້າ ແລະ ຈະພາເຈົ້າໄປຍັງບ່ອນທີ່ເຈົ້າບໍ່ຢາກໄປ”. 19ພຣະເຢຊູເຈົ້າກ່າວຢ່າງນີ້ເພື່ອສະແດງໃຫ້ເຫັນວ່າເປໂຕຈະຖວາຍກຽດແກ່ພຣະເຈົ້າດ້ວຍການຕາຍຢ່າງໃດ. ແລ້ວພຣະອົງຈຶ່ງສັ່ງເປໂຕວ່າ, “ຈົ່ງຕາມເຮົາມາ!”
20ເປໂຕຫັນຫລັງມາເຫັນສາວົກທີ່ພຣະເຢຊູເຈົ້າຮັກກຳລັງຕິດຕາມມາ (ເຊິ່ງເປັນສາວົກຄົນດຽວກັນກັບຜູ້ທີ່ເນີ້ງໂຕອີງພຣະເຢຊູເຈົ້າໃນລະຫວ່າງຮັບປະທານອາຫານຄ່ຳໃນວັນນັ້ນ ແລະ ເຄີຍຖາມວ່າ, “ອົງພຣະຜູ້ເປັນເຈົ້າເອີຍ, ແມ່ນຜູ້ໃດທີ່ຈະທໍລະຍົດຕໍ່ພຣະອົງ?”) 21ເມື່ອເປໂຕເຫັນລາວກໍຖາມວ່າ, “ອົງພຣະຜູ້ເປັນເຈົ້າເອີຍ, ແລ້ວຄົນນີ້ເດຈະເປັນຢ່າງໃດ?”
22ພຣະເຢຊູເຈົ້າຕອບວ່າ, “ຖ້າເຮົາຢາກໃຫ້ລາວມີຊີວິດຢູ່ຈົນເຮົາກັບມາ ຈະກ່ຽວຂ້ອງຫຍັງກັບເຈົ້າ? ເຈົ້າຈົ່ງຕາມເຮົາມາ”. 23ເພາະເຫດນີ້ ຈຶ່ງມີຂ່າວລືໄປໃນທ່າມກາງພວກພີ່ນ້ອງວ່າສາວົກຄົນນັ້ນຈະບໍ່ຕາຍ. ແຕ່ພຣະເຢຊູເຈົ້າບໍ່ໄດ້ກ່າວວ່າລາວຈະບໍ່ຕາຍ ແຕ່ພຣະອົງກ່າວວ່າ, “ຖ້າເຮົາຕ້ອງການໃຫ້ລາວມີຊີວິດຢູ່ຈົນເຮົາກັບມາ ຈະກ່ຽວຂ້ອງຫຍັງກັບເຈົ້າ?”
24ສາວົກຄົນນີ້ແຫລະ ທີ່ເປັນພະຍານເຖິງເຫດການເຫລົ່ານີ້ ແລະ ເປັນຜູ້ຈົດບັນທຶກໄວ້. ພວກເຮົາກໍຮູ້ຈັກວ່າຄຳພະຍານຂອງເພິ່ນນັ້ນເປັນຈິງ.
25ພຣະເຢຊູເຈົ້າໄດ້ເຮັດສິ່ງອື່ນໆອີກຫລາຍຢ່າງ. ຖ້າຈະຂຽນໄວ້ທັງໝົດ ຂ້າພະເຈົ້າຄິດວ່າທົ່ວທັງໂລກນີ້ຈະບໍ່ມີບ່ອນພໍສຳລັບໜັງສືຕ່າງໆທີ່ຈະຂຽນຂຶ້ນນັ້ນ.
Currently Selected:
ໂຢຮັນ 21: LCV
Highlight
Share
Copy
Want to have your highlights saved across all your devices? Sign up or sign in
ພຣະຄຳພີລາວສະບັບສະໄໝໃໝ່™ ພັນທະສັນຍາໃໝ່
ສະຫງວນລິຂະສິດ © 2023 ໂດຍ Biblica, Inc.
ໃຊ້ໂດຍໄດ້ຮັບອະນຸຍາດ ສະຫງວນລິຂະສິດທັງໝົດ.
New Testament, Lao Contemporary Version™
Copyright © 2023 by Biblica, Inc.
Used with permission. All rights reserved worldwide.
