Matyo 15

Jesu la Juyb-a na kəgɨ gṵ hul

1Na lula sul ne, Parisyḛ-a la bi tɨ gṵ hul ɓla a o̰ tɨ Jerusalɛm a hina tɨ Jesu ndɔ, a ɓiri ər ɓə: 2«Kəyjaa əm bi oy i kəgɨ gṵ hul tɨ ca lo a?» Kəysul toni barita a ɓə wa̰y tudi a ugu a daa kuna i ka hu gṵ jaa lo a? 3Jesu duga gɨ a: «Kəyjaa yḭ ɓini Ndɨla na gṵ hul lɛ i ka i kəgɨ gṵ hul a? 4Kəysul Ndɨla ja ɓə: “Ka əm ba la əm na̰ la hormo̰” la “wo ne ɓurum ər ba ɓee ər na̰, ndini ər humna.#15.4 Exo 20.12; Deu 5.16” 5Lɛ yḭ, i ɓla gɨ bi ɓə: jo wo ja gɨ ər ba ɓee ər na̰ ɓə: “Wa̰y ne toni hiina ən ɓə gɨ əm naa lɛ ən kay jak gɨ Ndɨla teni gɨna, i kway ul mu gɨ ər ba la ər na̰ la, ər wa̰y ndɔ dula” 6Gorne, ɓa̰ ɓə ər ba ɓee ər na̰ hormo̰ kar teni. Nejo yḭ nɨm Ndɨla jaa teni lɛ i ka i kəgɨ na gṵ hul. 7Yḭ bi gṵ tɨ ndidi, jaa ne nebi Esay ja toni tuna i sul tɨ kuri! Yḭ bi gṵ tɨ ndidi. Ndɨla ja ɓə:

8“Bi ne, a ka ən hormo̰ na a mu bla

lɛ a nirimu tɨ ɓag na ən.

9Bi ne yabu ən, lɛ ən yabu tɨ wa̰y bla in

kəysul gṵ hul ne a ɓla gɨ bi o̰ tɨ biɓari na ilgɨ lɛ o̰ tɨ Ndɨla ndɔ lo.”»

Wa̰y ne ka woɓari loni tɨ Ndɨla kwi

Mrk 7.14-23

10Jesu soon bi gun ər ja gɨ a ɓə: «Yḭ laa ən jaa la i una ən jaa ne ji ɓari la. 11Tɨ wa̰y ne wur tɨ woɓari mu jo ka ər ɓijim lo, lɛ tɨ wa̰y ne wag tɨ ər mu jo ka ər ɓijim tɨ Ndɨla kwi.» 12Gɨna ər bi tɨ wa̰y edɨ kori tɨ ər ndɔ, a ɓiri ər la a ja ɓə: «Jaa ne əm ja yṵga Parisyḛ-a hul pay əm una a?» 13Ər duga gɨ a ɓə: «Teri gun ne ən ba jaw lo, a ɓə a jul na ndeem. 14I nɨm a: Ya̰ tɨ bi ji nina ne a jul a peer ji nina kwi. Jo wo ji nina par ər paa duu mu gɨna, a ɓə tɨba tɨ ndidi gun tɨ tulɔ hul.» 15Gɨna Piyɛr ja gɨ ər: «Jul gɨ i jaa laar ne ji.» 16Jesu duga gɨ ər: «Yḭ kaw i lɛm jaa ne ji una lo a? 17Yḭ una ɓə wa̰y ne wur tɨ wo mu si tɨ ər hul la wag tɨ ər lɔ la lo a? 18Lɛ wa̰y ne wag tɨ wo mu o̰ tɨ ər nirimu la ər ka ər ɓijim tɨ Ndɨla kwi. 19Kəysul tɨ woɓari nirimu jo ilgɨ ɓijim tɨ wo humna la, paa taam la, kir-kir kar la, suga la, jaa ɓori kay tɨ paa sul la, Ndɨla ɓurum la wag tɨ nin. 20Nejo tɨ wa̰y ne ka wo ɓari ɓijim, lɛ wa̰y tudi bla daa ugu lɛm wo ɓari kar ɓijim tɨ Ndɨla kwi lo.»

Ii tɨ Kana na hul kula

Mrk 7.24-30

21Jesu jul ndɔ tɨ un ne, ər si tɨ lɔr nəgri sul tɨ Tir la Sido̰ la. 22Tɨ lɔr nəgri ne sul, ii tɨ Kana hina tɨ Jesu ndɔ la ər ɗolɔ tɨ ngɔr kar ɓə: «Ən Baali, Dabid na ɓa̰ ka, ləg ən jindemni. Lal ɓijim yeri ən ɓa̰ ii sul la wur ər jindemni nari.» 23Lɛ Jesu duga gɨ ər jaa ɓudu lo. Ər bi tɨ wa̰y edɨ kori tɨ ər ndɔ ja gɨ ər: «əm kun ər teni, kəysul ər ka ngɔr tɨ i lɔ.» 24Lɛ Jesu duga gɨ a: «Ndɨla toon ən tuna Israhel ne ti kuna həm ne haam ndɔ.» 25Ne kaw, ii ne hina ha̰w ɗa̰y tɨ ər kwi la ər ja: «Ən Baali, əm yar ən.» 26Jesu duga gɨ ər: «Ndini ne wo ɓə wa̰y tudi tɨ ɓimi maan sula gɨ səw ɗula lo.» 27Ii duga gɨ ər: «Tɨ kuri, ən Baali, lɛ səw ɓə wa̰y tudi burumi ne tɨbɨn tɨ lway mu tudi bla.» 28Jesu duga gɨ ər: «Ii, əm hul kula tɨ ɗəng! Ka Ndɨla ka gɨ əm wa̰y ne əm hul taam.» Tɨ daamu, ər ɓa̰ ii ten nina.

Jesu nen bi tɨ mo̰y dɨbla

29Jesu o̰ tɨ un ne ər duga ər si tɨ larɨm ɗəng mu tɨ Galile. Ər ɗɔl ər ti tɨ nan sul. 30Bi dɨbla hina tɨ ər ndɔ hari na bi kɔgri la, bi ji nina la, bi ne ndula taal ɓudu uy la, bi ɗugri la, bi tɨ mo̰y lɔ jak jak dɨbla. A hina na a tɨ Jesu ndɔ la ər nen a. 31Ɓɔr bi ji nari, kəysul a ləg bi ɗugri ja jaa ɓari la, bi kɔgri si tugla la, bi ne ndula taal ɓudu uy o̰ si la, ta bi ji nina kaw ləg un la. Bi gun teen Ndɨla tɨ Israhel.

Jesu naa gɨ bi dubu so wa̰y tudi

Mrk 8.1-10

32Jesu soon ər bi tɨ wa̰y edɨ la ər ja gɨ a ɓə: «Ən ləg bi ne jindemni kəysul a ka ɗa̰y tɨ tedi na ən la, a wa̰y tudi teni. Ən lɛm a kun na ndula lo kəysul a dwari ɓə tong tɨ ul sul tɨ duga.» 33Ər bi tɨ wa̰y edɨ duga gɨ ər: «Kəyjo yini ɓə tina tɨ tap hul tɨ gɨ bi dɨbla ne naa a?» 34Jesu ɓiri a: «Yḭ na mapa tɨ waa a?» A duga gɨ ər: «yini na mapa kili la cəw ɓḭ tɨ ndidi la.» 35Gɨna Jesu ja gɨ bi ka a ti tɨ lɔr, 36ər so mapa kili la, kaa ɓḭ tɨ ndidi la ər ka gɨ Ndɨla barka, la ər ha̰w, ər naa gɨ ər bi tɨ wa̰y edɨ nɨ ka a ɓaan gɨ bi gun. 37Bi gun twi, a kər la a to wa̰y tudi burmi ne lɔ gə̰y sir krang kili. 38Bi ne a twi wa̰y a ji lɛm bi ɓərgɨ dubu so bla aa a na ɓimi ɓra. 39Jesu kun bi, gorne ər kun bi teni gɨna, ər ɗɔl tɨ kwa̰r ɗəng hul, ər si tɨ lɔr nəgri sul tɨ Magadan.

Currently Selected:

Matyo 15: nie

Highlight

Copy