Matyo 16

Parisyḛ-a la Sadusḛ-a la a ɓiri wa̰y ne ɓɔrji

Mrk 8.11-13; Luk 12.54-56; Mat 12.38-39

1Parisyḛ-a la Sadusḛ-a la a hina tɨ Jesu ndɔ tɨ ər sangni. A ɓiri ər nɨ ka ər ka gɨ a wa̰y tɨ jiɓɔr ne ɓla ɓə ər o̰ tɨ Ndɨla ndɔ. 2Lɛ Jesu duga gɨ a: «Gorne lula wo tɨba gɨna, yḭ ja ɓə “un wo ndini kəysul ndɨlasul yɛgɨ hiina cadada.” 3La na gaan cɔg, yḭ ja ɓə: “Ndɨla wo yo̰y kakamle, kəysul ndɨlasul duga hiina la ɗoy cilib la.” Gorne yḭ ləg ndɨlasul gɨna, yḭ una mum ne wo paa kar, lɛ tuna mum ne wo paa kar tɨ daamu le gɨna, yḭ lɛm una lo kəyja a? 4Bi kalɔ ɓijim la bi tɨ juna kar ne ndogle, a ɓiri ən ka ən ka gɨ a wa̰y ne ɓɔrji lɛ, ən ɓə gɨ a wa̰y ne ɓɔrji ɓudu in kar lo. Dɨbla nari gɨna, tɨ Jonas na wa̰y ɓla ne toni ngoy jo ɓə tɨm a wa̰y tɨ ɓla maan.#16.4 Jonas gag jaa tɨ Ndɨla mu ər ɓini saal tɨ Ninib nejo kaa min ər si woon ər tɨ Ninib.» La ər nɨm a la ər si la.

Parisyḛ-a na ham ho̰ni

Mrk 8.14-21; Luk 12.1-6

5Gorne Jesu na bi tɨ wa̰y edɨ ɗən tɨ tapaa gɨna, a tori mapa sula tɨ a daa. 6La Jesu ja gɨ a: «Yḭ kay jicina ɓari tɨ i ndɔ sul la, i ɓaw i ndɔ na Parisyḛ-a la Sadusḛ-a na ham ho̰ni.» 7La ər bi tɨ wa̰y edɨ gag peer tɨ a daan ɓə: «Ər ja in kəysul yini so mapa lo.»

8Lɛ Jesu una wa̰y ne ka paa la ər ja gɨ a ɓə: «Kəyjaa yḭ gag peer mapa na teni jaa a? I hul kula gaw! 9Pay yḭ una wa̰y ne ən ka lɔ lo cam a? Yḭ ho̰ni jani tɨ mapa tɨ luni ne yḭ ɓaan gɨ bi dubu mi sul lo a? Ɗa̰y ɗay yḭ to wa̰y tudi lɔ ne gə̰y krang tɨ waa a? 10Yḭ ho̰ni jani tɨ mapa kili ne yḭ ɓaan gɨ bi ɓərgɨ dubu so! Ɗa̰y ɗay yḭ to wa̰y tudi ne lɔ gə̰y krang tɨ waa a? 11Ka waa ta yḭ una jaa ne lɔ lo a? Gorne ən ja gɨ i ɓə i kay i jicina tɨ i ndɔ sul na Parisyḛ-a la Sadusḛ-a ham ho̰ni jaa, kəyja jo yḭ gagɨ paa na mapa jo jaa a?»

12Gɨna Jesu na bi tɨ wa̰y edɨ una ɓə ər ja gɨ a jaa tuna haam ho̰ni lo lɛ ka a kay jicina tɨ a ndɔ sul tuna Parisyḛ-a na Sadusḛ-a mum tɨ edɨ.

Jesu tɨ kəy wo a?

Mrk 8.27-30; Luk 9.18-21

13Jesu an tɨ lɔr nəgri tɨ Sesare tɨ Pilip. Ər ɓiri ər bi tɨ wa̰y edɨ ɓə: «Kəyjaa jo bi ja tuna yin, Wo Ɓa̰ sul a?» 14A duga gɨ ər: «Bi tapeer ja ɓə əm tɨ Ja̰ Batis, peer paa ja ɓə əm tɨ nebi Eli, peer paa ja cam ɓə əm tɨ nebi Jeremi la, tapeer ja cam ɓə əm tɨ nebi paa.» 15Jesu ja gɨ a: «A yḭ, i ja ɓə yin tɨ ja a?» 16Simo̰ Piyɛr duga gɨ ər: «Yim tɨ Krist, wo ne Ndɨla ɛr, yim tɨ Ndɨla ne ti jili na ɓa̰.» 17Gɨna Jesu duga gɨ ər: «Simo̰, Jonas na ɓa̰, yim na ndula laar. Kəysul tɨ wo ɓari jo ɓla gɨ əm wa̰y ne lo, lɛ tɨ ən Ba tɨ Ndɨla ne ti tɨ ndal pi jo ɓla gɨ əm wa̰y ne. 18Lɛ yin, ən ja gɨ əm: Yim tɨ Piyɛr, tɨ kura ne sul, ən ɓə ən li lɔ kay tɨ nin, la ulu na dwari lɛm ər wa̰y ɓudu kar lo. 19Ən ɓə gɨ əm lakelele tɨ Ndɨla na waan naa. Mum gun ne əm ɓəw tɨ lɔr nəgri sul le, ɓə tɨm tɨ ɓəwlu tɨ ndɨlasul pi la. Mum gun ne əm cigri tɨ nəgri sul le, ɓə tɨm tɨ cigri tɨ ndɨlasul pi la.» 20La Jesu peer ər bi tɨ wa̰y edɨ na gṵ sɨgra ɓə a ka gɨ wo ja ɓə yḭr tɨ Krist, wo ne Ndɨla ɛr lo.

Jesu ja jaa tuna ər ulu la ər wag tɨ ngalɨm la

Mrk 8.31–9.1; Luk 22.27

21Ɗo lɔ na lula sul ɗay, Jesu ɗolɔ tɨ gɨ ər bi tɨ wa̰y edɨ jaa ja tɨ bayri. Ər ja ɓə: «Ka ən si tɨ Jerusalɛm nɨ ka bi nii la, woom tɨ bi tɨ hima ɓina maan la, ta bi tɨ gṵ hul ɓla ɓə ən jindemni kar. A ɓə ən humna la ɗa̰y tɨ tedi mani gɨna, ən ɓə duga tɨm jili.» 22Gɨna Piyɛr wag na ər teni la ər meer ər: «Ka Ndɨla ɓaw əm tɨ wa̰y ne daa, ən Baali, wa̰y ne ka an tɨ əm sul lo!» 23Lɛ Jesu yiga ndula la ər ja gɨ Piyɛr: «Si ɓag na ən, Sidan! Yim tɨ tɨla ngɔgri tɨ ən ul sul tɨ gɨ ən ul mu kway wa̰y ne ən hina kar, kəysul əm ilgɨ tɨ Ndɨla na ilgɨ lo lɛ tɨ bi ɓari na ilgɨ.» 24Gɨna Jesu ja gɨ ər bi tɨ wa̰y edɨ ɓə: «Jo wo taam ul sula tɨ ən lɔ gɨna, ka ər ɓini ər ndula ya̰m la, ər so ər tɨla tɨ tərgɨ la, ər so ul tɨ ən lɔ. 25Kəysul wo ne taam ər ndula ya̰m ɓaw gɨna, ɓə ər ndula ya̰m haam lɛ wo ne haam ər ndula ya̰m yin jaa ɓə ər tina. 26Jo wo ten mum gun tɨ dunya̰ lɛ ər ndoygɨ kud gɨna, ər barka maan tɨ kəy a? Kəy wa̰y jo woɓari ɓə lɛm sula na ər ndo̰yngɨ yɛr a? 27Kəysul yin, Wo Ɓa̰ ən ɓə hina na ən malayka-a tɨ ən ba na taan hul. Ən ɓə gɨ jakaw wa̰y tɨ ər daa sul naa tuna ər cida tɨ kar. 28Kuri, ən ja gɨ i tɨ bayri, tɨ bi ne ti le daan, bi tapeer ɓə ulu lo toni barita a ɓə yin, Wo Ɓa̰ ləg gorne ən ɓə hina kuna wa̰ay.»

Currently Selected:

Matyo 16: nie

Highlight

Copy