Matyo 14

Ja̰ Batis na ulu

1Na lula sul ɗay, Erod ne li waan tɨ Galile sul laa jaa ne tuna Jesu sul. 2Ər ja gɨ ər bi tɨ wa̰y edɨ: «Tɨ Ja̰ Batis jo wag tɨ bi tɨ ulu daan! Nejo ər na dwari tɨ mum ne ɓɔrji kar.» 3Erod ja in kəysul ər so ər gṵ ər par Ja̰ Batis la a ɓəw ər na yingna swal a ɗo ər tɨ dangay Erodyad ne tɨ ər ɓun tɨ Pilip na ii jaa. 4Kəysul Ja̰ ja gɨ Erod lahul dɨbla ɓə: «Yim na ul mu tɨ Erodyad kula lo!» 5Erod taam Ja̰ humna lɛ ər oy gɨ Juyb-a. Kəysul bi gun una Ja̰ kuna nebi. 6Na ɗa̰y tɨ ndula laar tɨ Erod na twila, ər ka wa̰y tudi ɗəng tɨ ndula laar kar gɨna, Erodyad na ɓa̰ ii ɓowon tɨ Erod na bi tɨ hom kwi. Ər ɓowon laar gɨ Erod nari. 7La Erod maar ər mu tɨ gɨ ər wa̰y ne ər hul taam naa. 8Ɓa̰ ii na na̰ peer ər ka ər ja gɨ wa̰ay ɓə: «Əm naa gɨ ən Ja̰ Batis na sul tɨ mbla hul.» 9Wa̰ay hul yuga lɛ ər lɛm wa̰y jak kar lo kəysul ər maar ər mu tɨ bi tɨ hom kwi teni. Ər so ər gṵ ər naa gɨ ər əli ka a naa gɨ ɓa̰ ii Ja̰ Batis sul. 10Ər toon wo paa si tḭ Ja̰ Batis sul tɨ dangay hul. 11A ɗo Ja̰ Batis sul tɨ mbla hul a naa gɨ ɓa̰ ii nɨ ər ko ər naa gɨ ər na̰. 12Ja̰ Batis na bi hina so ər ulu a bili la, a si a ja gɨ Jesu wa̰y ne ka paa.

Jesu naa gɨ bi dubu mi wa̰y tudi

13Gorne Jesu laa jaa ne gɨna, ər o̰ tɨ un ne na kwa̰r ɗəng ər si tɨ tap hul ɓag teni. Lɛ bi laa ər taal. A wag tɨ lwərgɨ ɓḭ a so ul tɨ ər lɔ na a ɗa̰y. 14Gorne Jesu jir tɨ kwa̰r ɗəng hul gɨna, ər ləg bi dɨbla ne jindemni la ər ɗolɔ tɨ bi tɨ mo̰y nina. 15Na jeel, ər bi tɨ wa̰y edɨ hina tɨ ər ndɔ. A ja gɨ ər: «Lula teni la, un ne ti ɓag la, əm kun bi ka a si a huna mum tudi tɨ lwərgɨ hul.» 16Lɛ Jesu duga gɨ a: «A ɓə saal lo lɛ, yḭ may naa gɨ a wa̰y tudi.» 17La a duga gɨ ər: «Yini na mapa tɨ luni la ka tɨ ndidi la ngoy.» 18Jesu ja gɨ a ɓə: «I hina gɨ ən na.» 19Ər naa gɨ bi gṵ ka a ti tɨ ya̰n sul, la ər so mapa tɨ luni hari na kaa tɨ ndidi, ər uma ər ji tɨ ndal la ər ka gɨ ər barka. Gɨna ər ha̰w mapa, ər naa gɨ ər bi tɨ wa̰y edɨ ka a ɓaan gɨ bi. 20Bi gun twi la a kər la. La a to mapa ne gə̰y krang dɔkɔmɛ kar sap. 21Bi ne twi wa̰y ne lɛm bi ɓərgɨ dubu mi bla aa la ɓimi la ɓra.

Jesu si tɨ larɨm sul

22Lɔ tɨ plaa tɨ daamu, Jesu lor na ər bi tɨ wa̰y edɨ nɨ a ɗɔl tɨ kwa̰r hul, a ɗen tɨ larɨm tapaa tɨ ər kwi toni lɛ yḭrmar gə̰y ər bra bi. 23Gorne Jesu bra bi gun gɨna, ər si tɨ nan sul tɨ Ndɨla soon na ər sul. Gorne lula tɨba gɨna, ər ti tɨ ɗay na ər sul. 24Kwa̰r si ɓag tɨ larɨm daan teni, saaw təgɨm ndu tɨ kwa̰r hul kəysul saaw duga tɨ a sul. 25Na un lɔ, Jesu si ɗam-ɗam tɨ ndu sul tɨ ər bi tɨ wa̰y edɨ ndɔ. 26Gorne a ləg ər na hina tɨ ndu sul gɨna, a ndula kwɔbgɨ nari la a ja ɓə: «Tɨ wo tibri.» A ɗolɔ tɨ ngɔr kar kəysul ayri ka a. 27Lɛ tɨ daamu, Jesu ja gɨ a: «Yḭ par i hul ka sɨgra, tɨ yin, yḭ ka ayri kar lo!» 28Piyɛr ja gɨ ər: «Jo tɨ yim kuri a, ən Baali, naa əm gṵ ka ən si tɨ əm ndɔ tɨ ndu sul.» 29La Jesu duga gɨ ər: «Hina!» Tɨ daamu Piyɛr jir tɨ kwa̰r ɗəng hul la ər si tɨ ndu sul tɨ Jesu ndɔ la. 30Lɛ gorne ər ləg saaw təw gɨna, ayri ka ər la ər ɗolɔ tɨ diri gɨna, ər ka ngɔr: «Baali, nen ən!» 31Tɨ daamu, Jesu wur daa par la ər ja gɨ ər ɓə: «Əm hul kula gaw! Kəyjaa əm hul dugun paa a?» 32Gorne a ɗɔl tɨ kwa̰r hul gɨna, saaw ɗigli. 33Bi gun ne wo tɨ kwa̰r ɗəng hul tɨba tɨ ər kwi la a ja ɓə: «Kuri, yim tɨ Ndɨla na ɓa̰ may!»

Jesu nen bi tɨ mo̰y tɨ lɔr nəgri tɨ Jenesarɛt

34Jesu a na ər bi tɨ wa̰y edɨ a ɗen, a an tɨ lɔr nəgri sul tɨ Jenesarɛt. 35Gorne bi tɨ lɔr ne hul ləg Jesu una ər ɓari gɨna, a ɗo tɨ peer tulɔ tɨ lɔr nəgri ne gun la, a hina gɨ ər na bi tɨ mo̰y gun. 36A ka gɨ ər kɔgri ka ər naa gɨ a ul mu tɨ ər sər ɗəng mu dula. La bi gun ne do ər sər mu ten nina la.

Currently Selected:

Matyo 14: nie

Highlight

Copy