Luk 21

Ii tɨ ndirimu na wa̰y tɨ Ndɨla nimni par

Mrk 12.41

1Jesu ɗig ji tɨ bi ton hina na wa̰y tɨ bɛ tɨ bra̰ hul tɨ Ndɨla li hul. 2Ər ləg ii tɨ ndirimu ne ndemni kaw hina bɛ sele tɨ ndidi tɨ bra̰ hul la. 3Gɨna ər ja ɓə: «Ən ja gɨ i tɨ bayri, ii tɨ ndrimu ne bɛ gursu ura bi gun tɨ sanduk hul. 4Kəysul bi gun jul a wa̰y tɨ tina taal jo a bɛ tɨ bra̰ hul lɛ ii tɨ ndemni ne gɨna, ər naa gursu gun ne tɨ ər mu tɨ tudi.»

Jesu ja kum tɨ Ndɨla li tɨ Jerusalɛm yṵga

Mat 24.1-2; Mrk 13.1-2

5Gorne bi peer paa wo ja jaa tuna Ndɨla na li sul la ər kori ne a ka na kura gɨna, Jesu ja gɨ a: 6«Mum ne i ləg le, lula sul ɓə hina gɨna, kura ɓudu in ɓə gə̰y tɨ paa sul lo.»

Wa̰y ne ɓla ɓə ɗa̰y tɨ jaa tṵgni tɨ ndog

Mat 24.3; Mrk 13.3

7Jesu na bi tɨ wa̰y edɨ ɓiri ər: «Wo tɨ wa̰y ɓla, kəykwi mum ne əm ja kum ɓə an a, la kəy wa̰y jo ɓə gɨ ī ɓla ɓə mum ton ɓə an ndog a?» 8La Jesu ja gɨ a: «I kay i jicina tɨ i ndɔ sul, wo ɓudu in ka i tan lo, kəysul bi dɨbla ɓə hina na ən ndil, a ɓə gɨ i ja ɓə: “Yin tɨ Krist wo ne Ndɨla ɛr ər!” la: “Lula sul an teni.” Yḭ ka a jaa laa lo. 9Gorne yḭ ɓə sal jaa laa la, sal nig laa la gɨna, yḭ ka ayri kar lo, kəysul mum ne ɓə an, lɛ ne tɨ dunya̰ na mu tɨ tong ɗang lo.» 10Gɨna ər ja gɨ a: «Bi tɨ lɔr ɓudu ɓə ndɔ kay tɨ paa tɨ lɔr jak muna la, woom ɓə o̰ peer muna la. 11Nəgri sul ɓə dig na dwari la, ngalbagi la ndula la ɓə tɨba na un un la, mum ne ka ayri ɓə wag la, mum ne ɓɔrji ɓə wag tɨ ndɨla sul la. 12Lɛ toni bari, a ɓə a daa kay tɨ i sul tɨ i par la a ɓə i pɛw kar la, a ɓə jaa tṵgni tɨ i sul tɨ juyb-a na li tɨ paa tina hul la, a ɓə i bɛ tɨ dangay la a ɓə na i saal tɨ woom kwi la, tɨ guberno̰ kwi la, yin ndil jaa. 13Mum ne jo ɓə gɨ i ul mu naa tɨ gɨ a jaa ja tuna ən sul. 14Kay tɨ i sul ɓari, yḭ ka jaa tɨ i sul tṵgni ilgɨ toni lo. 15Kəysul yin man ən ɓə gɨ i jaa la jicina la naa nɨ i peer tɨ pɛni gun ɓə lɛm jaa tungni tɨ i sul lo la, a ɓə lɛm gɨ i jaa duga lo la. 16I bəgɨ la, i ɓungɨ la, i peer nimni la, i peer korgɨ la ɓə i sul sula, la a ɓə kar nɨ bi dɨbla tɨ i daan ɓə ulu la. 17Bi gun ɓə i koor yin jaa. 18Lɛ i sul ɓwḭ ɓudu in ɓə haam lo. 19I hul par sɨgra ɓə i nina.»

Jesu ja kum tɨ Jerusalɛm na yṵga

Mat 24.15; Mrk 13.14

20«Gorne yḭ ləg ɓə eli-a wo Jerusalɛm sul yeri a, yḭ ɓə una ɓə Jerusalɛm na yṵga tɨ ndog. 21Gɨna, ka wo ne wo tɨ Jude yey waal ndɔ tɨ nan gɔl la, ya̰ ton wo tɨ Jerusalɛm wag tɨ bayri la, bi ne wo tɨ taa hul a ka hina tɨ lɔr ɗəng hul lo la. 22Kəysul na lula sul ɗay Ndɨla ɓə jaa ɗəng tungni tɨ bi sul nɨ mum ne a kya̰ tɨ Ndɨla maktub hul ka ti kuri.#21.22 Osé 9.7 23Ndemni gɨ aa ne yen ɓimi la ton wo tɨ ɓimi huma naa la, kəysul bi tɨ lɔr nəgri ne sul ɓə pɛw ɗəng nari tina la, Ndɨla na hul laa ɓə jir tɨ a sul la. 24A ɓə a humna na kaskar la, a ɓə a pərɨm hə̰r tɨ bi kalɔ jag daan la. Bi tɨ Ndɨla una ɓari lo ɓə Jerusalɛm nəngni marway lula sul ne Ndɨla naa gɨ a ɓə an.»

Wo Ɓa̰ na hina

Mat 24.29; Mrk 13.24

25«Yḭ ɓə mum ləg tɨ lula sul la tɨ pya̰ sul la, tɨ meri daan la. Ayri ɗəng ɓə bi tɨ nəgri sul kar. A ɓə wa̰y ne a ɓə kar una lo gorne ɗaglə ɗəng na diri ɓə tɨba ɓə̰gɨm la ɓə o̰ la. 26Ayri ɓə bi dɨbla humna tuna mum ne ɓə an tɨ nəgri sul, kəysul mum tɨ dwari ne wo tɨ ndɨla sul ɓə dig. 27Gɨna a ɓə Yin, Wo Ɓa̰ ləg tɨ goblə hul na hina na ən dwari gun la tɨ taan ɗəng hul la. 28Gorne mum ne ɗolɔ tɨ an a, nay i ndɔ la uma i sul tɨ ndal la, kəysul ɗa̰y ne Ndɨla ɓə i nɨm tɨ ndal tɨ ndog.»

Wa̰y tɨ ɓla tuna ndɔg sul

Mat 24.32; Mrk 13.28

29Jesu ja gɨ a jaa lar ne: «Yḭ ləg ndɔg la teri tapeer la. 30Gorne yḭ ləg a ɔri do, yḭ una ɓə hiin tɨ ndog. 31Kuna ne, gorne yḭ ɓə mum ne ləg an a, yḭ ɓə una ɓə Ndɨla na waan tɨ ndog la. 32Kuri, ən ja gɨ i, bi tɨ ndogle ɓə ɗira gun lo barita mum gun ne ɓə an. 33Ndɨla sul la nəgri sul la ɓə ɗira, lɛ yin jaa ɓə ɗira lo bad.»

Kay i jicina tɨ i ndɔ sul

34«Kay jicina tɨ i ndɔ sul! Ka mum tɨ tudi dɨbla la mum tɨ yiḭ tɨ ji kar la, mum tɨ tɨm tɨ dunya̰ la ka gɨ i un kway tɨ ilgɨ ɓari lo. In lo a, ɗa̰y tɨ jaa tṵgni ɓə i dula tɨ nəgri. 35Kəysul ər ɓə hina tɨ bi gun ne wo tɨ nəgri sul kuna ka̰n no̰. 36Lɛ yḭ ka ley lom lo. Yḭ soon Ndɨla na lula sul gun, nejo yḭ ɓə dwari tina tɨ wag tɨ mum ne ɓə an hul la, yḭ ɓə lura tɨ ndal bla kaar tɨ Yin, Wo Ɓa̰ kwi la.»

37Na gaan, Jesu ɓla gɨ bi wa̰y tɨ Ndɨla li jaal hul, lɛ na syɛl, ər ley tɨ nan ne a soon ndil ɓə olibe sul. 38Na gaan cɔg, bi gun si tɨ ər ndɔ, tɨ Ndɨla li jaal hul tɨ ər jaa laa.

Currently Selected:

Luk 21: nie

Highlight

Copy