Luk 20

Jesu na dwari o̰ tɨ ɓay a

Mat 21.23; Mrk 11.27

1Ɗa̰y paa Jesu wo wa̰y ɓla gɨ bi tɨ Ndɨla li jaal hul, ər ɗo beel tɨ Jaa Ndinimani la. Bi tɨ hima ɓina na woom la, bi tɨ gṵ hul ɓla la bi nii la a hina tɨ ər ndɔ. 2La a jaa gɨ ər: «Ja gɨ i, jaa jo naa gɨ əm dwari tɨ mum ton kar a? Ɓee jaa jo tɨ wo ne naa gɨ əm gṵ tɨ mum ne kar a?» 3Jesu duga gɨ a: «Yin kaw ən ɓə i jaa paa ɓiri la. Yḭ ja gɨ ən: 4Batɛm ne Ja̰ ka gɨ bi o̰ tɨ Ndɨla ndɔ ɓee tɨ bi ɓari ndɔ a? Yḭ duga gɨ ən!» 5Lɛ a gag peer tɨ a daan la a ja: «Jo yi ja gɨ ər ɓə: “O̰ tɨ Ndɨla ndɔ” gɨna, ər ɓə i jaa ɓiri: “Kəyjaa jo yḭ ko Ja̰ hul lo a?” 6Lɛ jo yi duga gɨ ər ɓə: “Lɔ o̰ tɨ biɓari ndɔ” gɨna, bi gun ɓə i munɨg na kurgɨ tɨ i humna, kəysul a ilgɨ gun ɓə Ja̰ tɨ Ndɨla na nebi.» 7Gɨna a duga gɨ ər ɓə: «Yini una wo ne toon Ja̰ ka ər ka gɨ bi batɛm lo.» 8La Jesu duga gɨ a: «Yin ɓə gɨ i wo ne naa ən gṵ tɨ mum ne kar ɓla lo la.»

Jaa lar tuna bi tɨ damnar waay ne ɓijim sul

Mat 21.33; Mrk 12.1

9La Jesu ja gɨ bi jaa lar ne: «Ɓər paa waay damnar, lɔ tɨ plaa ər nɨm gɨ bi tɨ damnar waal ɓaw, la ər si tɨ ɓoy ɓag ər mu tḭ. 10Na pya̰ sul tɨ damnar ɓina, ər ton ər wo tɨ cida ɓudu tɨ bi tɨ damnar waay ndɔ ka a naa gɨ ər nduri taal ne tɨ ər maan. Lɛ bi tɨ damnar waay ɗɨb ər la a kun ər daa bla. 11Damnar Baali toon wo tɨ cida jak cam, lɛ bi tɨ damnar waay ɗɨb ər la, a burum ər la a kun ər daa bla. 12Ər toon wo tɨ cida ne tedi mani, a naa gɨ ər hura la a kun ər la. 13Gɨna Baali tɨ damnar ja: “Kəy jo ən ɓə kar a, ən ɓə ən ɓa̰ ɓudu kam lag lag ne ən ka ər kum nari tomni, tɔteni a ɓə gɨ ɓa̰ ne oy ɓari.” 14Lɛ gorne bi tɨ damnar ɓwa ne ləg ər gɨna, a ja tɨ a daan: “Wo tɨ ndoogɨ tudi jo le, ka yḭ hun ər la damnar waal ɓə tɨm yi maan la.” 15A par ər a hun ər a ɗoli ər tɨ damnar jal ɓəgri. Kəyjo damnar Baali ɓə kar a? Ər ɓə hina, ər ɓə bi tɨ damnar waal waay humna. 16Ər ɓə hina, ər ɓə bi tɨ damnar waal waay humna la ər ɓə ər damnar waal gɨ bi jak naa.» Gorne bi laa jaa ne gɨna, a ja: «M-m, Wa̰y kuna paa ne in ɓə an le lo bad!» 17Lɛ Jesu ləg a in la ər ja gɨ a: «Jaa ne Ndɨla na maktub ja ɓə:

Kura ne bi tɨ li kay ɗoli

duga tɨ kura ndinimani ura peer tɨ li kay#20.17 Psa 118.22, ji ɓə kəy a?

18Wo tɨ lay ne tɨba tɨ kura ne sul gɨna ər ɓə ha̰w, lɛ jo kura ne tɨba wo sul a, ər ɓə mbɔri.»

19Bi tɨ hima ɓina na woom la bi tɨ gṵ hul ɓla la taam Jesu par tɨ daamu, lɛ a oy gɨ bi, kəysul a una ɓə Jesu ja jaa lar ne tuna a sul.

Lambo jaa

Mat 22.15-22; Mrk 12.13-17

20Nejo bi tɨ hima ɓini na woom la bi tɨ gṵ hul ɓla la a kay a ji tɨ Jesu lɔ la, a ton gɨ ər bi ne ka ndɔ bi tugla tɨ ər suri na jaa ne wo wag tɨ ər mu. Tɨ ər nɨm tɨ bi tɨ jaa tṵgni na guberno̰ a daa. 21Bi ton ɓiri ər jaa ɓə: «Wo tɨ wa̰y ɓla, yini una ɓə jaa ne əm ja la wa̰y ne əm ɓla la tɨ tugla. Əm jul wo daan lo, lɛ əm ɓla Ndɨla na ul na kuri. 22Tɨ ɓari, əm ja gɨ yi: Yi gṵ hul naa gɨ i ul mu tɨ lambo naa gɨ wa̰ay ɗəng Sesar ɓee naa gɨ i ul mu lo a?» 23Lɛ Jesu una a mayɛr la ər duga gɨ a: 24«Yḭ ɓla gɨ ən sisi ɓudu. Wo sul la, wa̰y ne a kya̰ le tɨ ja maan a?» A duga gɨ ər «tɨ Sesar maan.» 25Gɨna ər ja gɨ a: «Jo tɨ in a, yḭ naa gɨ Sesar wa̰y ne tɨ Sesar maan la yḭ naa gɨ Ndɨla wa̰y ne tɨ Ndɨla maan la.» 26A lɛm ər par tɨ jaa ɓijim ɓa̰ in ne ər ja tɨ bi daan lo, lɛ ər jaa tɨ ja duga ɓɔr a ji la, a ti a mu guni la.

Jaa ɓiri tuna duga tɨm jili sul

Mat 22.23; Mrk 12.18

27Sadusḛ-a tapeer kori tɨ Jesu ndɔ. Tɨ Sadusḛ-a jo a ja ɓə bi tɨ ulu ɓə duga tɨm jili lo. A ɓiri ər jaa ne: 28«Wo tɨ wa̰y ɓla, gṵ hul ne Moys kya̰ gɨ yi jo le: Jo wo na ɓungɨ le ər uy ən nɨm ii bla ɓa̰ gɨna, ər ɓun ɓə ii ne kula nɨ ka ər ka lɔ si na tɨ kwi. 29Peer ɓungɨ kili wo nin, ne toni mani ko ii lɛ ər uy bla ɓa̰. 30Ne tɨ ndidi mani 31la tɨ tedi mani la ko ii tɨ ndirimu. Tɨ in tɨ a ji tɨ kili gun sul, a uy bla ɓimi. 32Mu tɨ tong a ii kaw uy la. 33Ii ne ɓə tɨm jaa maan na ɗa̰y ne bi tɨ ulu ɓə wag tɨ ngalɨm a? Kəysul a ji kili gun a ko ii ne.»

34Jesu duga gɨ a: «Tɨ dunya̰ ne hul bi ɓərgɨ la aa la a ko peer. 35Lɛ bi ton Ndɨla ləg a kuna bi tugla ne a ɓə wag tɨ ngalɨm na ɗa̰y lɔ tɨ tong, bi ɓərgɨ ɓə aa kula lo la, aa ɓə ɓərgɨ kula lo la. 36A ɓə ulu cam lo la, kəysul a wag malayka-a la, a tɨ Ndɨla na ɓimi la, ta a wag tɨ bi tɨ ulu daan, a ti jili la. 37Bi tɨ ulu ɓə wag tɨ ngalɨm, Moys kaw kya̰ ja tɨ maktub hul gorne ər ja jaa tuna ɔri ne laa ndila wag tɨ daan le ko ər lo. Tɨ un ne ər soon Baali Ndɨla tɨ Abraham maan la, Ndɨla tɨ Isak maan la, Ndɨla tɨ Jakob maan la.#20.37 Exo 3.6 38Ndɨla tɨ bi tɨ ulu maan lo, lɛ Ndɨla ti bi tɨ tɨm jili maan, kəysul bi tɨ ulu la bi tɨ tɨm jili la gun ti jili tɨ ər kwi.» 39Bi tɨ gṵ hul ɓla tapeer so jaa ja gɨ ər: «Wo tɨ wa̰y ɓla, əm ja jaa ndinimani.» 40Kəysul a lɛm ər jaa jak ɓiri cam lo.

Mesi Dabid na ɓa̰ kaa ne Ndɨla ɛr

Mat 22.41; Mrk 12.35

41Gɨna Jesu ja gɨ a: «Ka waa ta bi ɓə ja ɓə Krist, wo ne Ndɨla ɛr ər tɨ Dabid na ka lɔ a? 42Kəysul Dabid may ja tɨ maktub tɨ kwan sula hul ɓə Baali Ndɨla ja gɨ ən Baali:

“Hina, əm ti tɨ ən lɨma sul marway,

43ən ɓə əm peer tɨ peni kay tɨ əm ɗa̰y lɔ.”#20.43 Psa 110.1

44Jo Dabid may soon ər “Baali gɨna, ka waa ta Krist ɓə tɨm ər ɓa̰ ngoy a?»

Jesu peer bi tuna bi tɨ gṵ hul ɓla sul

Mat 23.1; Mrk 12.38

45Gorne bi wo ər jaa laa gɨna, Jesu ja gɨ ər bi tɨ wa̰y edɨ ɓə: 46«Yḭ kay jicina tɨ i ndɔ sul tuna bi tɨ gṵ hul ɓla. A kakum tɨ sərgɨ nii wurum la a taam ɓə ka bi ka gɨ a lapya tɨ un tɨ paa tina na hormo̰ la, ta a taam tɨm tɨ bi kwi tɨ Juyb-a na li tɨ paa tina hul la tɨm tɨ wa̰y tudi mu la. 47A ko mum dɨbla tɨ aa tɨ ndirimu daa, la a soon Ndɨla na jaa ɓududu tɨ a mu. Ndɨla ɓə jaa tungni tɨ a sul na sɨgra.»

Currently Selected:

Luk 20: nie

Highlight

Copy