Luk 22

Jesu par na kuru

Mat 26.1-5,14-16; Mrk 14.1-2,10-11

1Pya̰ tɨ mapa bla ham ho̰ni ne a soon ɓə Juyb-a na pya̰ tɨ wag tɨ bayri ɓee a soon ɓə pya̰ tɨ Pak tɨ ndog. 2Bi tɨ hima ɓina na woom la, bi tɨ gṵ hul ɓla la, a taam ul mu tɨ Jesu humna, lɛ a oy gɨ bi. 3La Sidan wur tɨ Judas ne a soon ər ndil ɓə Iskariot hul, ər tɨ wo ɓudu tɨ Jesu na bi tɨ wa̰y edɨ dɔkɔmɛ kar sap daan. 4Judas si, ər ja jaa na bi tɨ hima ɓina na woom la na bi tɨ Ndɨla li jaal mu ɓaw na woom la tuna ul mu ne ər ɓə gɨ a Jesu naa. 5A ndɔ laar a la a naa gɨ ər gṵ tɨ gɨ ər gursu naa la. 6Judas ko mu la ɗolɔ tɨ ul mu jablə tɨ gɨ a Jesu naa na kuru.

Jesu na bi tɨ wa̰y edɨ tər mum tɨ Pak

Mat 26.17-19; Mrk 12.16

7Na lula sul tɨ pya̰ tɨ mapa bla ham ho̰ni kar, ɗa̰y ne bi ɓə ham ɓa̰ humna tɨ tudi tɨ Juyb-a na pya̰ tɨ wag tɨ bayri kar ne a soon ər ɓə Pak an teni. 8Jesu toon Piyɛr a na Ja̰, la ər ja gɨ a: «Yḭ si i tər gɨ i tudi tɨ Pak, ɓə yi wo saal tudi.» 9A duga gɨ ər: «Əm taam ɓə yini kaaw un tɨ ɓay a?» 10Ər ja gɨ a: «Gorne yḭ ɓə wur tɨ lɔr ɗəng hul gɨna, yḭ ɓə ɓər paa ne yəg dong na ndu tina. I si tɨ ər lɔ marway tɨ gḛy. 11La yḭ ja gɨ wo tɨ gə̰y ɓə: “Baali ɓə i hina i ɓiri əm pay kəy li jo yini na ən bi tɨ wa̰y edɨ i ɓə wa̰y tɨ Pak tudi tɨ nin a?” 12Ər ɓə gɨ i li hul ɗəng paa tɨ ndal ɓla. Mum tɨ paa tɨla gun wo tɨ hul. Yḭ ɓə wa̰y tudi tɨla tɨ nin.» 13A si, a ten mum gun kuna Jesu ja gɨ a, la a par mum tɨ Pak kar sul tɨ un ne.

Juyb-a na pya̰ tɨ wag tɨ bayri kar ɓaani

Mat 26.26-29; Mrk 14.22-25

14Gorne lula sul lɛm gɨna, Jesu ti tɨ tudi mu na ər bi tɨ wa̰y edɨ. 15Ər ja gɨ a: «Toni barita ən ɓə pɛw tina, ən taam wa̰y tɨ Juyb-a na pya̰ tɨ wag ne a soon Pak ne tudi na i gar gar. 16Kəysul, ən ja gɨ i tɨ bayri, ən ɓə na i wa̰y tɨ Pak tudi cam lo marway nɨ mum gun ɓə tɨba tɨ paa tɨ Ndɨla waan hul.» 17Ər ko kob tɨ ham bḛ yiḭ, gorne ər ka gɨ Ndɨla barka gɨna, ər ja gɨ a: «Yḭ ko i ɓaan gɨ peer. 18Kəysul, ən ja gɨ i tɨ bayri, ən ɓə duga damnar ndu ne yḭḭ na i tɨ nəgri sul le cam lo Marway Ndɨla waan ɓə na hina.»

19La ər so mapa, gorne ər ka gɨ Ndɨla barka teni gɨna, ər ha̰w ər naa gɨ a la ər ja gɨ a: «Ne tɨ ən ndula ya̰m ne ən ɓə naa kuna wa̰y tɨ hima ɓina yḭ jaa. Yḭ ka yɔd kuna paa ne tɨ i ho̰ni jani tɨ ən sul.» 20Tɨ tudi ɓəgri gɨna, ər so kob tɨ ham bɛ̰ yiḭ, ər ka gɨ Ndɨla barka la, ər naa gɨ a, la ər ja gɨ a: «Damnar ndu ne tɨ kob hul le, tɨ ɛrgɨ ɓaani tɨ ən hima ne ɓə yaal i jaa.»

Jesu sul sula

Mat 26.20-25; Mrk 14.17-21

21Gorne a ti tɨ wa̰y tudi mu gɨna, Jesu ja gɨ a: «Yḭ ləg, wo tɨ ən sul sula wur daa ɓudu na ən tɨ lway hul. 22Kuri, Yin Wo Ɓa̰ ən ɓə ən sul ɗula ən ɓə saal kuna a kya̰ tɨ Ndɨla Maktub hul, lɛ jindemni gɨ wo tɨ ən sul sula.» 23Gɨna, ər bi tɨ wa̰y edɨ ɗolɔ tɨ peer ɓiri, jaa jo tɨ a daan ɓə wa̰y ne kar a?

Jaa jo tɨ wo ɗəng nari ura peer a

Mat 18.1, 20.25-28; Mrk 9.34, 10.42-45

24Paa gaglə ɗəng tɨba tɨ Jesu na bi tɨ wa̰y edɨ daan. A taam una ɓə jaa jo ɓə tɨm wo ɗəng tɨ a daan a? 25Jesu ja gɨ a: «Woom tɨ bi sul twi waan na dwari tɨ a bi sul la, ya̰ ton na dwari tɨ a sul taam ka a soon a “bi tɨ ɓari kar” la. 26Lɛ ɓə tɨm kuna paa ne tɨ i daan lo, ka wo tɨ ɗəng tɨ i daan duga ti ɓa̰ma, la ka ər ka ər ndɔ kuna wo tɨ cida kar. 27Kəysul jajo tɨ wo ɗəng a? Wo ne ti tɨ tudi mu ɓee wo ne wo wa̰y ɓaan a? Tɨ wo ne wo tɨ tudi mu lo a? Lɛ yin ən wo i daan kuna wo tɨ wa̰y ɓaan. 28Lɛ yḭ tɨ bi ton i par i hul sɨgra na yin tɨ mum gun ne sang ən hul. 29La yin, ən ɓə gɨ i ən waan naa, kuna ən ba naa gɨ ən na la. 30Nejo yḭ ɓə tudi la, i ɓə yiḭ la na ən la, tɨ ən waan hul, ta i ɓə tɨm tɨ goblɨ sul tɨ jaa tungni tɨ bi kalɔ dɔkɔmɛ kar sap tɨ Israhel sul la.»

Jesu ja gɨ Piyɛr ɓə ər ɓə ər sul sulɔ

31Baali ja: «Simo̰, Simo̰, əm laa! Sidan ten ul mu tɨ i yurga kuna wo yurga ya. 32Lɛ yin ən soon Ndɨla tɨ əm sul ka əm hul kula ka haam lo. La yim, gorne əm ɓə duga hina gɨna, wur dwari ɗəng tɨ əm ɓungɨ hul.»

33Piyɛr ja gɨ ər: «Baali, ən ti ndog tɨ saal na əm tɨ dangay la tɨ ulu kaw na əm la.» 34Jesu duga gɨ ər: «Piyɛr, ən ja gɨ əm, əm ɓə ja ɓə əm una ən lo lahul tɨ tedi barita twar ɓə tɔgɨm ɗula kakamle.»

Gursu la ɓɔg la bardole la

35La Jesu ja gɨ a: «Gorne toni yin toon i bla gursu la, bla bɔg la bla kungu la, pay wa̰y paa haam i a?» A duga gɨ ər: «Wa̰y in haam i lo.» 36Gɨna ər ja gɨ a: «Ndogle, ka wo ne na gursu, ər so la, ka wo ne na bɔg, ər so la, ka wo ne na bardole lo, ər so ər ngɔmi ər ka na kingɨ, ər huna na bardole la. 37Kəysul ən ja gɨ i tɨ bayri, jaa ne a kya̰ tuna ən sul an kuri: A ɓra ər tɨ bi tɨ ɓijim kar daan. Kuna ne, jaa ne a jaa tɨ ən sul ɓə an la.»#22.37 Esa 53.12 38Ər bi tɨ wa̰y edɨ ja ɓə: «Baali, bardole tɨ ndidi wo le.» La ər ja gɨ a: «Ka lɛm.»

Jesu soon Ndɨla tɨ nan tɨ olibe sul

Mat 26.36-41; Mrk 14.32-38

39Jesu wag, ər si tɨ nan tɨ olibe sul kuna ər ka na ɗa̰y tapeer sul. La ər bi tɨ wa̰y edɨ si tɨ ər lɔ. 40Gorne ər an tɨ un ne gɨna, ər ja gɨ a: «Yḭ soon Ndɨla nɨ i ka tɨba tɨ mum tɨ sangni ne ɓə i wur tɨ ɓijim hul lo.» 41La ər si ɓag ɓa̰ndḛ lɛm bag dug-mika la ər ha̰w ər ɗa̰y ndurmu ər soon Ndɨla. 42Ər ja ɓə: «Ən ba, jo əm taam a, jul kob tɨ pɛw ne ɓag na ən. Wa̰y ne ən hul taam lɛ əm ka wa̰y ne yin hul taam kar lo!» 43Gɨna malayka paa tɨ ndɨla sul ɓla ər ndɔ tɨ gɨ ər dwari naa. 44Jesu par ngɨnɨm nari, ər soon Ndɨla na dwari la ər lɔr tɨbɨn kuna hima tɨ nəgri sul. 45Gorne ər soon Ndɨla tong gɨna, ər o̰, ər duga tɨ ər bi tɨ wa̰y edɨ ndɔ. Ər ten a, na ley loom, na jindemni. 46La ər ja gɨ a: «Kəyjaa jo yḭ ley loom a? Yḭ o̰ ndal, yḭ soon Ndɨla nɨ yi ka tɨba tɨ mum tɨ sangni hul lo!»

A par Jesu

Mat 26.47-55; Mrk 14.43-49

47Gorne Jesu wo ja jaa ɗang, bi dɨbla hina. Judas ɓudu tɨ ər bi tɨ wa̰y edɨ tɨ dɔkɔmɛ kar sap daan tɨba tɨ a kwi: Ər kori tɨ Jesu ndɔ tɨ ər mu njum. 48Jesu ja gɨ ər: «Judas, na mu njum jo əm ɓə na Yin, Wo Ɓa̰ sul sula a?» 49Gorne bi ne yeri Jesu sul ləg wa̰y ne ka paa gɨna, a ja gɨ ər: «Baali, pay yini ɓə a jənɨng na bardole a?» 50Wo ɓudu tɨ a daan jani wo tɨ hima ɓina ɗəng na wo tɨ cida, ər tḭ ər tulɔ tɨ lɨma. 51Lɛ Jesu so jaa ər ja: «Yḭ nɨm-a ka a ka! Ka lɛm teni!» La ər do ɓər ne na tulɔ la ər nen ər la. 52La Jesu ja gɨ bi tɨ hima ɓina na woom la, bi tɨ Ndɨla li jaal ɓaw na woom la, bi nii la a hina tɨ ər par: «Yḭ hina na bardole la, ngurum la kuna yin tɨ wo tɨ suga no̰. 53Na ɗa̰y sul yin wo tɨ i daan tɨ Ndɨla li jaal hul, le kəyjaa yḭ par ən lo a? Ndogle lula sul tɨ yḭ maan la, tɨ dwari tɨ syel maan la.»

Piyɛr ja ɓə ər una Jesu lo

Mat 26.57

54A par Jesu la, a si na ər la, a wur na ər tɨ wo tɨ hima ɓina ɗəng na jaal hul la. Piyɛr si tɨ Jesu lɔ, a daan gə̰y ɓag ɓa̰ndḛni. 55A kay laa tɨ jaal daan la Piyɛr ti na a tɨ laa mu la. 56Ii wo tɨ cida paa ləg ər tɨ laa mu. Ər ləg ər ɓari la ər ja: «Wo ne le kaw tɨ Jesu wo la.» 57Lɛ Piyɛr sula ər sul la ər ja gɨ ər: «Ii, ən una ər lo.» 58Dabra ɓa̰ndḛni, wo paa jag ləg Piyɛr la ər ja gɨ ər: «Yim kaw əm wo tɨ a daan la!» Lɛ Piyɛr duga gɨ ɓər ne: «M-m, yin wo tɨ a daan lo.» 59Na lula sul ɓudu tɨ plaa, wo paa jak hina ər ja na dwari ɓə: «Tɨ kuri, ɓər ne tɨ ər wo, kəysul yḭr tɨ wo tɨ nəgri sul tɨ Galile la.» 60Lɛ Piyɛr duga gɨ ər: «Ən una əm jaa ne əm wo ja le ji lo.» Tɨ daamu twar ɗo tɔgɨm. 61Baali yiga ji la ləg Piyɛr ɓari la. Gɨna Piyɛr ho̰ni jani tɨ jaa ne Baali ja gɨ ər toni ɓə: «Kakam le, toni barita twar ɓə tɔgɨm ɗula, əm ɓə ja laahul tɨ tedi ɓə əm una ən lo.» 62Piyɛr wag la, ər cḛy nari la.

63Bi ne ɓaw Jesu, a ka ər siri la, a ɗɨb ər la. 64A ɓəw ər ji na sər la a ɓiri ər ɓə: «Yim ne tɨ nebi, ja gɨ yi, jaa jo ɗɨb əm!» 65La a ɓurum ər ndoni dɨbla cam.

Jesu o tɨ Juyb-a na bi nii tɨ jaa tungni kwi

Mat 26.67-68; Mrk 14.65

66Un ndoy teni. Juyb-a na bi nii tɨ jaa tungni kwi la, bi tɨ hima ɓina na woom la, bi tɨ gṵ hul ɓla la tay peer, a hina na Jesu tɨ un tɨ jaa tungni. 67La a ɓiri ər: «Əm ja gɨ i pay yim tɨ Krist wo ne Ndɨla ɛr ər a?» Jesu duga gɨ a: «Jo ən ja gɨ i kaw, yḭ ɓə ən hul kula lo, 68la jo ən ɓiri i jaa a, yḭ ɓə gɨ ən na duga lo la. 69Lɛ ɗolɔ kakamle, Yin, Wo Ɓa̰ ɓə tɨm tɨ Ndɨla, Wo tɨ dwari ɗəng nari na lɨma sul.» 70Gorne a laa jaa ne gɨna, a ji gun a jaa: «Pay Yim tɨ Ndɨla ɓa̰ a?» La Jesu duga gɨ a: «Jo yḭ may ja tɨ i mu ɗay.» 71Gɨna a ja: «Pay yi taam timo̰ jak cam a? Kəysul yi may laa jaa ne wag tɨ ər mu teni, lɛm!»

Currently Selected:

Luk 22: nie

Highlight

Copy