Matta 9

Yeso roɓ yaa portǝsǝ ya

1Pa Yeso yǝ kana kurnyaamo, yǝ tal yǝ ko a ur usu. 2Pa ɓaataka wosǝsǝ ma yaake natsa sǝrsǝ, yǝ ɗuk a ɗikra. Pa Yeso yǝ wǝrsǝ na ɓongtǝrato ɓoso wa, yǝ nkee yaa sǝrsǝ siya me, “Auwe, a hur kuɗa, ɓaa lee ngǝ tentenato waangon.”

3Pa ɓaata malǝmaa Masakasa ɓǝ kurasǝ maaso wa ɓǝn nkee a kuti ɓose me, “Eɗ ɗa, yǝn nkee mbu kwalakwala ɓa a ɗuura Kaa ra.”

4Pa Yeso yǝ maa mbu ɓǝn sensǝn sen ɓan, yǝɓǝ nkee me, “Tomtomni sǝn sensǝ mbu kwalakwala ɓa a kuti yaa seu? 5Ən u na nwa faɗsǝ papato, a nkee me, ‘Ɓaa lee ngǝ tentenato waangon,’ hana a nkee me, ‘A nii ngǝ sikiu’? 6Pa kǝnǝsǝ weɗa me, Au Ete ya, yǝ ma kwangto kiya lee tentenato a put ntaandi wa ɓa.” Pa yǝ nkee yaa natsa sǝrsǝ siya me, “A nii, ngǝ too ɗikra nga ngǝ faɗ ɗuuru.” 7Pa eɗ kaya yǝ nii, yǝ faɗ ɗuuru. 8Pa ɓeta dem wǝrsǝ mbu sǝsa maaso wa, pa kokto ɓǝ ma, ɗǝm ɓǝ nyoo Kaa, yaa yǝn nasǝ kwangto ɓeta maaso ya.

Ɓaa yar Matta

9Pa Yeso kosǝ a wiiyo wa, yǝ wǝr atike ǝn yarsǝ me Matta, yǝ ɗa a han kon samra ɓa. Yaa nkee me, “Ənǝ ɓǝɗǝ.” Pa Matta yǝ nii yaa ɓǝɗǝ. 10Pa Yeso yǝn sesǝ mbuseyan se a ɗuur Matta wa, ɓan kon samra ɓa dem, ma “ɓan ma tentenato ɓa” ɓǝ wo ɓǝn se mbuseyaa ke ma sase, ma emfǝɗkaa ɓisa. 11Pa ɓaa Farisiyawa ɓa ɓǝ wǝrsǝ maaso wa, ɓǝ taa emfǝɗkaa ɓisa me, “Tomtomni malǝm waaso yǝn sesǝ mbuseyaa ke ma ɓan kon samra ɓa ma ‘ɓan ma tentenato ɓau’?”

12Pa Yeso yǝ kurasǝ maso wa, yǝɓǝ nkee me, “Ɓaa ɓǝsǝ kwakwa ɓa, ɓǝ taa siwi ra, pa ɓaa sem kwakwa ra ɓa. 13Pa so kosǝ fǝɗkǝ mbu mara ra ǝn sensǝ ɓa, u nkeesǝ me, ‘Niina nǝn taa me ɓeta ɓǝ tom ma nyorataara, pa sem nek mbusa wa ra.’ Me nǝ wo me nǝ yar ɓaa ɓǝn tomsǝ mbu keke a wiiyo a Kaa ni ɓa ra, pa nǝ wo me ɓaa ɓǝsǝ ma tentenato ɓa.”

Taawo a ɗuura kwal mbraa ra

14Pa emfǝɗkaa Yohanna an tom baptisma ya ɓǝ wo ɓǝ taa me, “Tomtomni taase ma ɓaa Farisiyawa ɓa tǝn kwal mbraa, pa emfǝɗkaa ɓǝnga ɓǝ kwala mbraa rau?” 15Pa Yeso yǝ ɓǝ kak me, “Kǝ tomtomni sik kere ɓa ɓǝkaa kaɗ ma kuɗa tebteb ra, si kere yǝ ke ma ɓosau? Fer usu kǝ wo, a fer ɓaa ka too kere ǝɓǝ lee wa. Pa a fersiso ɓǝkaa kwal mbraa wa.

16“Yaake sem kǝn kiya mɓoɓ meera luktu ra ma u nfiinfii wa ra, me yǝ tom maaso nfiinfii ra sǝra kiya nkaa meera sǝra a faɗ u ntiiri wa. 17Maaso ɗǝm, ɓeta mɓaɗ ɗaa nfiinfii ra mbraa emngwate inabi ma a meeta ɓukta wa ra.#9:17 Mbraa emngwate inabi ma ɓan taa a emngwate inabi ɓaa hemsǝ wa. A put Isra'ila wa ɓan nsautǝ mbraa emngwate inabi sǝma ma mbraa ɓǝ wee. Me ɓǝ tom maaso, mɓukta sǝta kǝ pamaa, mbraa emngwate inabi ma kǝ tuku, ɗǝm mɓukta sǝta kǝ tǝblǝ. Pa yǝ tom maaso ra, pa ɓǝn mbaɗ mbraa nfiinfii ra emngwate inabi ma a mɓukta nfiinfii ta, me mɓukta ma mbraa emngwate inabi ma ǝn tǝblǝ ra.”

Autoone woɗsǝ ya ma toone ma siyo ya

18A fer Yeso yǝn kansǝnkan wa, anwii ke yǝ wo yǝ kwirsǝ a wiiyo usu, yaa nkee me, “Auwane autoone woɗ fiino wa, pa ngawo ngǝ ti nem yaange a ɗuura ira, kiya nii.” 19Pa Yeso yǝ nii yǝ ko ke ma sase, ma emfǝɗkaa ɓisa.

20Pa kǝnso, toone ke u yǝsǝ ma siyo tuk monma wa meeta pu nhaa raɓ, yǝ wo ma lau ndiira usu, yǝ ntee kal luktu usu. 21Yǝ nkee a kuɗa ira me, “Hana nǝ ntee luktu usu maɗ, kǝnǝ roɓɓo.”

22Yeso yǝ kǝrtǝ yaa wǝrǝ, yaa nkee me, “Autoone, a hur kuɗa. Na ɓongtǝrato nwaango roɓ ngǝn.” Pa toone kaya yǝ roɓ nok kǝnso.

23Pa Yeso kansǝ a taanda anwii hit kwau Yahudawa ɓa wa, yǝ wǝr ɓan hur tilo ɓa, ma ɓeta dem ɓaa yaulira, 24yǝ ɓǝ nkee me, “Sǝ fǝɗǝ. Autoone nya, yǝ woɗ ɗa, yaa munda.” Pa ɓaa nhuu u binira wa. 25Ndiira ɓaa hiksǝ ɓeta wa, yǝ kana yǝ ma autoone kaya a neme, pa autoone kaya yǝ nii kǝɗ. 26Mara kara yǝ yaasǝ a put siso nsaad.

Yeso roɓ ntaara ma kwaara

27Pa Yeso yǝ faɗsǝ a wiiyo wa, pa ntaata kǝta raɓ ɓaa ɓǝɗǝ, ɓǝn nik kwaro ɓǝn nkee me, “Au Dauda ya, a kura nyorataara ta!”

28Yǝ kansǝ a ɗuuru ko wa, ntaata kata ɓǝ wo a sani, Yeso yǝ ɓǝ taa me, “Sǝ na ɓongton me kǝnǝ nkaa nǝ tom mbu ɓau?”

Ɓǝ kak me, “Ee nwa, Ankundi.”

29Pa yǝ ntee nuuwa ɓosa, yǝ nkee me, “A lee sǝ tom maaso nga sǝ nasǝ ɓongtǝrato wa.” 30Pa nuuwa ɓosa a wili. Yeso yǝ ɓǝ wiin ngwee me, “Sǝ yau atike yǝ maa mbu ɓa ra.” 31Pa ɓǝ faɗ ɓǝn yaasǝ mara a ɗuura ira a put siso nsaad.

32Ɓǝn fiɗsǝn fiɗ wa, yaake ma siyo nsaamse wa ɗǝm yǝ kanaa ra, ɓaa wosǝsǝ a Yeso ni. 33Pa ɓaa hiksǝ nsaa kawa wa, pa kwaara kara, yǝ kana. Ɓet kwausǝ dem ɓa, ɓǝ tom mbu weɗara ɓa, ɓǝ nkee me, “Ɓaa pǝta wǝr mbuka nga nwa kaka nhun a put Isra'ila nwa ra.”

34Pa ɓaa Farisiyawa ɓa, ɓǝ nkee me, “Ma lau kuɓ nsaamse wa, yǝn hiksǝ nsaamse wa.”

Ɓan tinima ɓa tom ngeek

35Yeso ɓaɗ a ura ngeek ngeek sa ma u kwang kwang wa nsaad, yǝn fǝɗkǝ a hitsa kwau Yahudawa sa, yǝn nkee mara kwalari kuɓsutu wa, ɗǝm yǝn roɓ hana nkaamǝra siyaa naara ma ɓaa sem kwakwa ra ɓa. 36Pa yǝ wǝrsǝ ɓeta kwausǝ dem wa, yǝ kura nyorataara ɓora, me ɓaa kongsa, ɓǝ sem ma yaa kiyǝ ɓǝn kwasi ya ra, ɓǝ nga tǝmnkaa an wanda semra ya. 37Pa yǝ nkee emfǝɗkaa ɓisa me, “Tinima heren, pa ɓan tinima ɓa ngeek. 38Sǝ kǝna Ankundi tinima ya, yǝ tung ɓan tinima ɓa a nyaanyo.”

Currently Selected:

Matta 9: LLA

Highlight

Copy