Matta 8

Eɗ ma tǝmo nya

1Pa Yeso yǝ fiɗsǝ a yol kawa yǝ ham nwa, ɓeta dem ɓaa ɓǝɗǝ. 2Pa eɗ ke ma tǝmo yǝ wo yǝ kwirsǝ a wii usu, yǝ nkee me, “Ankundi, me ngǝ yauwan, kǝ ngǝ nǝ ti nǝ tom ɗekɗek.” 3Pa Yeso yǝ mal nem isi yaa ntee eɗ kaya, yǝ nkee me, “Nǝ yawan, a tom ɗekɗek.” Nok kǝnso tǝm kawa yaa lee. 4Pa Yeso yaa nkee me, “A sengge, ngǝ kong nkee yaa ke ra. Pa ngo, ko ngǝ weɗa ee nwaago a kuɓ nek mbusa wa ni, ngǝ ɗǝm na mbu Musa nkeesǝ me a na ɓa, me ǝɓǝ weɗa me ngǝ roɓon.”

Na ɓongto nsosa kewa

5Pa Yeso yǝ kansǝ Kafarnahum wa, kuɓ kwang nsosa ke yǝ wo a sanii yǝn kǝnasǝ kwasira. 6Yǝ nkee me, “Ankundi, hoora na yǝ ɗuk ɗuuru, yǝ sǝr sǝra, ɗǝm yaa winee kongsa ya.”

7Yeso yaa nkee me, “Nǝ ko konaa roɓɓo.”

8Pa kuɓ kwang nsosa siya yaa kak me, “Ankundi, nǝ maa ngǝ wo ɗaan a ɗuur nwaano ra, Pa a nkee mara maɗ, hoora na kiyǝ roɓo. 9Me hana nase kǝn na kunda yaake ra, nǝma nsosamse a kunda na. Nǝn nkee eɗ ɗa me, ‘Ngo’ kiyi ko, nǝ nkee ate me, ‘Ngawo’ kiyi wo. Me nǝ nkee hoora na, ‘A tom mbu ɓa’ kiyi tomo.”

10Pa Yeso kurasǝ maaso wa, pa a tom weɗaara, yǝ nkee ɓan ɓǝɗsǝsǝ ɓa me, “Nǝn nkeesǝ ɓongtǝra, nǝ pǝta taa atike ma na ɓongtǝra kwang nwa, nga eɗ ɗa maa a put Isra'ila wa ra. 11Nǝn nkeesǝ me ɓeta dem ɓǝ kǝ fiɗ ma kunda ra ma ɓoti ra, ɗǝm ɓǝ kǝ kaɗ ɓǝ se mbuseya ke ma Ibrahim ma Ishaku ma Yakubu a kuɓsutu a liura wa. 12Pa ɓaa ɓa taa ɓǝsǝ me ɓǝ kaɗ em kuɓsutu ɓa wa, ɓaa kǝ ɓǝ hik ntaandi a ham tikra ɓa, a ham ɓǝka tee ma kǝu ɗǝmta wa.”

13Pa Yeso yǝ nkee winee nsosa si ya me, “Ngo, kǝ ngǝ tom maaso, nga ngǝ nasǝ ɓongto me kǝ tom nwa.” Ɗǝm hoora ira yǝ roɓ nok a fersiso.

Yeso roɓ rǝf Bitrus ya

14Pa Yeso yǝ kansǝ a ɗuur Bitrus wa, yǝ wǝr rǝf isi toone nya, yǝ ɗuk a hantǝra ma songra. 15Yǝ ntee nem isi pa songra kara yaa lee, yǝ nii yǝ tom tinima Yeso.

16Pa ɗikira kansǝ wa, ɓeta dem ɓaa wo Yeso ma ɓaa ɓǝsǝ ma wis nsaamse wa ɓa, yǝɓǝ hik nsaad ma mara maɗ, ɗǝm yǝ roɓ ɓaa ɓǝ sem kwakwa ra ɓa. 17Mbu sǝsa tom me, a kung mbu an nawanto ya Ishaya nkeesǝ ɓa me, “Yǝ too yamyamto nwaando, yǝ haa siyaamse nyaade yǝ ndǝ roɓɓon.”

Kongsa a ɓǝɗ Yeso wa

18Pa Yeso yǝ wǝrsǝ ɓeta kwausǝ dem a kal usu wa, yǝɓǝ nkee me, ɓǝ tal aulaara, ɓǝ ko a kira, a kal war. 19Pa malǝm masaka ko yǝ wo a sani yaa nkee me, “Malǝm, kǝnǝ ngǝ ɓǝɗǝ a ham ngǝ kosǝ ɓa nsaad.”

20Yeso yaa kak me, “tukɗaata ɓǝma npoomse ɓǝn kansǝya ɗǝm rǝmɓa ɓǝ ma hitsa, pa Au Ete ya yǝ sem ma ham ki yaa tǝr ɓa ra.”

21Ate aufǝɗke yaa nkee me, “Ankundi, a lee ko nǝ hok paane nhe.”

22Pa Yeso yaa nkee me, “Ənǝ ɓǝɗǝ, a lee wote ɓǝ hok wote a ɓoso.”

Yeso Nǝɗ yoro

23Pa yǝ kan a kurnyaamo ɗǝm emfǝɗkaa ɓisa ɓaa ɓǝɗǝ. 24Semma maa ɓoso ra, wiine yoro ke a nii a aulaara kara, mbraa ǝn takli a kana kurnyaamo ɗaan. Pa sase Yeso yaa munda. 25Pa emfǝɗkaa ɓisa ɓǝ ko a sanii ɓaa niki, ɓaa nkee me, “Ankundi ǝn ndǝ kono, kǝnɗǝ tumu!”

26Yǝ kak me, “Saa ɓet ma na ɓongto ngeek ɓa, sǝn kura kokto me ǝn mbiu?” Pa yǝ nii kǝɗ, yǝ nkwaakǝ yor kawa ma kokrokto mbraa nwa, handa nsaad a roo nseu.

27Pa paraata ɓǝ saa kurnyaamo ɓa, ɓǝ wǝr mbu weɗara ɓa, ɓǝ taa me, “Unwa ndǝ nkaamǝra ete mbi nwau? Hana yora ma kokrokto mbraa nwa ǝn nasǝsǝ mbartau!”

Yeso yǝ roɓ ɓeta raɓ ɓaa ma siyo nsamse ɓa

28Pa yǝ wosǝ a tale ma lau put Garasinawa nwa, pa ɓaataka raɓ ɓǝ ma siyo nsaamse wa, ɓǝ fiɗ a ham tina ɓa, ɓǝ pam ma Yeso. Ɓǝ nkwaa nkwak ɓeta nkaa ɓǝ ɓǝɗ ma ɗǝɗa sǝra ra. 29Ɓǝ yauli ɓǝ nkee me, “Ngǝn ta mbi ma taseu, ngase Au Kaa ya? Ngǝ wo me ngǝ tǝ na kongsa, si fer usu wo sundu rau?”

30Mǝbmǝb ma ɓosa, kur alautiya kǝn ɓǝn war wanda. 31Nsaamse ka ya, ɓǝ kǝna Yeso me, “Me ngǝ hik tǝn, ǝtǝ tung a kur alautiya wa.”

32Yǝɓǝ nkee me, “So!” Pa ɓǝ fiɗ ɓǝ kan a alautiya ni, pa kur alautiya kasa, ɓǝ nii ma mone ɓǝ ham a aulaara, ɓǝ tum nsaad a mbraa. 33Ɓan war wanda kelngǝta sǝta ɓa, ɓǝ mon ɓǝ ko a uru, ɓǝ nkee mbu tomsǝ ɓa nsaad, ma mbu taasǝ ɓet ma nsaamse sǝ ɓa wa. 34Pa ɓeta nsaad a ur siso ɓǝ fiɗ me ko ɓǝ wo Yeso. Ɓǝ wǝrsǝsǝ nwa, ɓaa nree me yǝɓǝ lee put ɓoso.

Currently Selected:

Matta 8: LLA

Highlight

Copy