Matta 10

Yeso yǝ timi emfǝɗkaa ɓisa

1Pa Yeso yǝ yar emfǝɗkaa ɓisa pu nhaa raɓ sǝɓa, yǝ ɓǝ na kwangto me ɓǝ hik wis kwalakwala wa, ɗǝm ɓǝ roɓ hana nkaamǝra siyaa naara, ma ɓaa sem kwakwa ra ɓa.

2U nwa ndǝ Ɗǝnta ɓahona pu nhaa raɓ sǝɓa, ǝn Siman u ǝn yarsǝsǝ me Bitrus ya ma koɓɓisi Andarawus ma Yakubu au Zabadi ya, ma kobɓisi Yohanna, 3ma Filibus ma Bartalamawus, ma Toma ma Matta an kon samra ya, ma Yakubu au Halfa ya, ma Taddawus, 4ma Siman yaa ma rǝmara put usu ya, ma Yahuda Iskariyoti yaa yǝ fangsǝsǝ ya.

5Yeso yǝ timi ɓaa pu nhaa raɓ sǝɓa ɓǝ ma mara me, “Sǝ kong ko ma lau ɓaa ɓǝn Yahudawa ra ɓa, hana sǝ kana ur ko fin a put Samariya wa ra. 6Pa so a ɓaa Isra'ila ɓa ni, ɓaa ɓǝ nfaasǝ nga tǝmnkaa ɓa. 7Me sǝ kon, sǝ ɓǝ nkee mara ra me, ‘Kuɓsutu a liura wa won ngwang.’ 8Sǝ roɓ ɓaa ɓǝ sem kwakwa ra ɓa, sǝ nik ɓaa ɓǝ woɗsǝ ɓa, sǝ roɓ ɓaa ɓǝ ma siyo tǝmo ɓa, sǝ hik nsaamse. Sǝ kon sal, saase kǝn sǝ na sal. 9Sǝ kong too zinariya, hana azurfa, hana koɓaa kǝsa a siɓa waaso ra. 10Sǝ kong too ɓukra a siko siso ra, hana lukta raɓ ra, hana taa ra, hana kwalango ra, an tinima ya pamman me a kwana.

11“Han sǝ kansǝ ɓa, hana a ur kwang wa, hana a ur ngeek wa, sǝ kǝr yaa yǝsǝ ma senda yaɓ ya, sǝ kaɗ a sanii, ndub fer kǝsaa lee hansǝsa wa. 12Me sǝ kana a ɗuur kawan, sǝ tom naupa. 13Me ɗuur kawa yaɓ ɓǝ, a lee hurhurto waaso a kaɗ ke ma ɓosa. Pa me ɗuur siso sem yaɓ ra, a lee hurhurto waaso a kang a sani. 14Me atike konsǝ ra, hana yǝ mbisi kura mara sǝn nkeesǝ ra, sǝ haatǝ tula a natsa sǝsa, me sǝ lee ɗuur kawa, hana ur siso. 15Nǝn nkeesǝ ɓongtǝra, para ɓet put Sidon ɓa ma ɓet Gomora ɓa, a kaa kankiita ɓa a ɗuura ur siso ra. 16Nǝn timisǝ nga tǝmnkaa a ɗaaso kurkutaa wa. Pa me maaso sǝ kaɗ ma kinito nga nsaamse, ɗǝm nga tǝlko u yǝ tǝblaa mbuka ra wa.

17“Pa sǝ nhii nwaa ma ɓeta, me ɓǝ kǝsǝn ko a han kankiita ɓa, ɗǝm ɓǝsǝ hoɓ a hitsa kwau Yahudawa sa. 18Ɓǝ kǝsǝn ko a wii a gwamnamse ni ma kuɓsa a ɗuura na, me sǝ nkee mara kwalari ra a ɗuura na a wii ɓoso ma ɓaa ɓǝn Yahudawa ra ɓa. 19Pa me ɓǝ masǝn, sǝ kong taarǝ mbu kǝsa nkee ɓa ra, hana ɗǝɗa kǝsa nkee ɓa ra. A fer siso ɓaa kǝsǝ na mbu kǝsa nkee ɓa, 20me ǝn saase sǝn kansǝ wa ra, pa ndǝ Wis Paase wa yǝn kan saase ma lau waaso.

21“Tii kiya na koɓe ɓaa toɗɗo, ɗǝm paapa kiya na au isi, emba ɓǝkǝ nik senta paapamse ɓose, ɗǝm ɓǝ na ɓaa ɓǝ toɗɗo. 22Ɓeta nsaad ɓǝ kǝsǝ ɓisi me a ɗǝnda na, pa yaa yǝ nǝɗsǝ kwakwa ko a feɗefeɗe ya, kiyǝ taa kon nkweera wa. 23Me ɓan nasǝ kongsa a ur ko, so a hanka ɓol. Nǝn nkeesǝ ɓongtǝra, sǝ leurǝ put Isra'ila wa sǝ feɗ nsaad ɗa, Au Ete ya kiya wo.

24“Aufǝɗke yǝ faɗ malǝm usu ra, ɗǝm hoora yǝ faɗ an taanda isi ra. 25Kǝ tom keke aufǝɗke yǝ pǝr nga malǝm usu, ɗǝm hoora yǝ nga an taanda isi. Me ɓaa yar an taanda ya me Baˈalzabul, yaa ɓaa kǝ nkee em taanda ɓosa me miniu?

26“Me maaso sǝ kura kokto ɓoso ra. Mbukake sem kǝn a nhuukǝra u a hik ntaandi wa ra, hana mbu likisǝ ɓa u a wil wa ra. 27Mbu nǝ nkeesǝsǝ a ham tebteb ɓa, sǝ kan a talte, mbu ɓaa nseusǝsǝ a ngwee ɗaan ɓa, sǝ na ee a talte. 28Sǝ kong kura kokto ɓaa ɓǝn toɗsǝ maabiri ɓa, pa ɓǝ nkaa ɓǝ toɗ huurtu ra. Me maaso sǝ kura kokto Kaa wa yaa kiya nkaa yǝ toɗ kong maabiri ma huurtu a ara ya. 29Ɓaa fanga muktaa raɓ a koɓo fin dau? Yaa hana maaso fin a ɗaaso ɓoso a roo a putu ra, me semma yauwo Paase wa ra. 30Hana nhiinyo a ɗuura sawa nsaad ɓaa wee kawan. 31Me maaso sǝ kong kura kokto ra, sǝ faɗ muktaa dem mɓartan.

32“Yaa yǝ weɗasǝ me yǝ maa nǝn a wiiyo a ɓeta ni nya, niina kǝn kǝ na weɗa me nǝ maasǝn a wiiyo a Paane ni a liura. 33Pa yaa yǝ weɗasǝ me yǝ maanǝ ra a wiiyo a ɓeta ni nya, niina kǝn kǝ na weɗa me nǝ maasǝ ra a wiiyo a Paane ni a liura.

34“Sǝ kong sen me nǝ wo ma hurhurto a kaɗo put ntaandi wa ra. Nǝ wo ma hurhurto ra, pa nǝ wo ma songgom. 35Pa nǝ wo me nǝ tǝmɓa rǝmara

“ ‘ete ma papisi,

ɗǝm autoone ma maasi,

ɗǝm maa toone ya kiyǝ simba maa toone au isi ya.

36Ɓaataker ete ya, kǝ tom emtaanda ɓisa.’

37“Yaa yǝ yausǝ papisi hana maasi a faɗa a niina nya, yǝ maa yǝ tom eɗ ɓǝɗɗe yaane ra. Hana yamni yaa yǝ yausǝ au isi parara hana autoone a faɗa a niina nya, yǝ maa yǝ tom eɗ ɓǝɗɗe yaane ra. 38Ɗǝm hana yamni yaa yǝ toosǝ kwaakǝra ira yǝ nǝ ɓǝɗ ɗa ya, yǝ maa yǝ tom eɗ ɓǝɗɗe yaane ra. 39Hana yamni yaa yǝn yausǝ huurtu usu ya, kaa leetǝ, ɗǝm hana yamni yaa yǝ leetǝsǝ huurtu usu a ɗuura na nya kiya taa.

40“Yaa yǝ konsǝsǝ ya, yǝ konaa niina, ɗǝm yaa yǝ konnǝsǝ ya, yǝ kon yaa yǝ tungnǝsǝ ya. 41Hana yamni yaa yǝ konsǝ an nawanto ya me yǝn an nawanto ya, kiyǝ taa nsaa an nawanto ya. Ɗǝm hana yamni yaa yǝ konsǝ yaa yǝn tomsǝ mbu yǝsǝ keke a wiiyo a Kaa ni ɓa me yǝn tom mbu yǝsǝ keke a wiiyo a Kaa ni ɓa, kiyǝ taa nsaa u yaa yǝn tomsǝ mbu yǝsǝ keke a wiiyo a Kaa ni ɓa. 42Ɗǝm hana yamni yaa yǝ nasǝsǝ nkoo wee nɗǝlnɗǝl mbraa wa fin maɗ a ɗaaso em ngeek ngeek ɓa, me ɓǝn emfǝɗkaa ɓǝna nya, nǝn nkeesǝ ɓongtǝra, yǝ pǝta ntaa nsaa usu ra.”

Currently Selected:

Matta 10: LLA

Highlight

Copy