MATEUS 27
27
Jesus ta gandjwa miikaha yaPilatus
(Mrk. 15:1; Luk. 23:1-2; Joh. 18:28-32)
1Ongula sho kwa shi aayambi aakuluntu naakuluntu yoshigwana ayehe oya gongala noya kundathana, ya dhipage Jesus. 2Oyo ye mu manga, ye mu kutha noye mu gandja kuPilatus, omuleli gwaRoma.
Judas ti idhipaga
(Iil. 1:18-19)
3Ano Judas, ngoka e mu gwaaleke, sho a mono, Jesus a tokolwa, okwi itedhulula nokwa shunitha iimaliwa iisiliveli mbiyaka omilongo ndatu kaayambi aakuluntu nokaakuluntu 4e ta ti: “Onda yona, sho nda gwaaleke omulumentu kee na oondjo, a ka dhipagwe.”
Oyo oye mu yamukula ya ti: “Otu na shike nasho? Tala mwene sho to ningi.”
5Judas okwe ekelehi iimaliwa iisiliveli motempeli, okwa zi mo, a yi e ti imangeleke.
6Aayambi aakuluntu oya kutha iimaliwa iisiliveli e taa ti: “Mbika itayi wapa okutulwa miimaliwa yotempeli, oshoka oyo ofuto yombinzi.” 7Ano sho ya kundathana, oye yi landa epya lyomuhongi gwiiyuma yeloya, li ninge eyendo lyokufumvika aakwiilongo. 8Epya ohali ithanwa sigo onena Epya lyombinzi.
9Nena odha gwanithwa ndhoka dha popiwa komuhunganeki Jeremia, ngoka ta ti: “Oyo ya taamba iimaliwa iisiliveli omilongo ndatu, ofuto yomulumentu ngoka gwomaana yaIsrael. 10Iimaliwa noye yi landa epya lyomuhongi gwiiyuma yeloya, ngaashi Omuwa a lombwele ndje.”
Jesus ta tamanekwa
(Mrk. 15:2-5; Luk. 23:3-5; Joh. 18:33-38)
11Jesus okwa thikama koshipala shomuleli. Omuleli okwe mu pula e ta ti: “Ongoye omukwaniilwa gwAajuda?”
Jesus okwa ti: “Eeno, ongame tuu, ngaashi to ti.” 12Ano aayambi aakuluntu naakuluntu sho ye mu tamaneke, oye ina yamukula sha.
13Nena Pilatus okwa ti kuye: “Ku uvite ko, sho taye ku popi odhindjidhindji?”
14Ihe Jesus ine mu yamukula nando ohapu yimwe, opo omuleli okwa kumwa unene.
Jesus ta pangulilwa eso
(Mrk. 15:6-15; Luk. 23:13-25; Joh. 18:39—19:16)
15Pethimbo lyoshituthi shOpaasa okwa li ku na omukalo, omuleli ha mangululile aantu onkwatwa yimwe, ndjoka yo yene ye yi hala. 16Pomasiku ngeyaka okwa li ku na onkwatwa ya tseyika nawa, edhina lyayo Barabbas. 17Aantu sho ya gongala, Pilatus okwe ya pula ta ti: “Oguni po mwa hala, ndi mu mangululile, oBarabbas nenge oJesus, haku tiwa Kristus?” 18Oshoka okwa li e shi shi kutya oya gandja Jesus omolwefupa.
19Ano Pilatus manga a li a kuutumba koshipundi shepangulo, omukiintu gwe okwe mu tumine elaka ta ti: “Omulumentu nguka ke na ondjo, onkee ino mu ningila uuwinayi, oshoka uusiku wonena onde mu ehamenwa mondjodhi.”
20Ihe aayambi aakuluntu naakuluntu oya thiminike aantu okwiindila Barabbas nokudhipagitha Jesus. 21Omuleli okwe ya pula e ta ti: “Oguni po mwaamboka yaali mwa hala, ndi mu mangululile?”
Oyo ya ti: “oBarabbas!”
22Pilatus okwe ya pula ta ti: “Jesus, nguka haku tiwa Kristus, otandi mu ningi ngiini?”
Oyo ayehe oya yamukula: “Na alelwe komushigakano!”
23Omuleli okwa ti: “Okwa yono shike ano?”
Ihe oya dhiginine owala okwiigidha pombanda taa ti: “Na alelwe komushigakano!”
24Pilatus sho a mono kee na we sho ta vulu okuninga, nombuyagano ya lundu pombanda, okwa kutha omeya nokwi iyogo kiikaha montaneho yaantu e ta ti: “Ngame kandi na oondjo dhombinzi yomulumentu nguka. Taleni sho tamu ningi.”
25Aantu ayehe oya yamukula ya ti: “Ombinzi ye natu yi pulwe, otse naana yetu!”
26Nena Pilatus okwe ya mangululile Barabbas nokwa dhengitha Jesus e te mu gandja, a ka alelwe komushigakano.
Jesus ta shekwa
(Mrk. 15:16-20; Joh. 19:2-3)
27Nena aakwiita yomuleli Pilatus oya fala Jesus megumbo. Aakwiita ayehe oya gongalele Jesus ye mu kundukidha. 28Oyo ye mu hula oonguwo dhe noye mu zaleke onguwo onene ontiligane. 29Opo ihe oya tungu oshishani shomakwega noye shi mu zaleke komutse, oye mu pe oshihenguti moshikaha she shokolulyo noye mu tsile oongolo, ongotaye mu simaneke. Oyo ye mu nyekelele ya ti: “We ya po, omukwaniilwa gwAajuda!” 30Oyo ye mu hiyile omayeye, ya kutha oshihenguti noye mu dhenge momutse. 31Ano sho ye mu nyekelele ngeyi, oye mu hula onguwo ontiligane noye mu zaleke oonguwo dhe mwene e taye mu fala, a ka alelwe komushigakano.
Jesus ta alelwa komushigakano
(Mrk. 15:21-32; Luk. 23:26-43; Joh. 19:17-27)
32Mokweenda kwawo oya tsakaneke omulumentu Omukireni, edhina lye Simon naakwiita oye mu thiminike a humbate omushigakano gwaJesus. 33Sho ya thiki kehala lyi ithanwa Golgata, tali ti Oshala sholukwe, 34oye mu pe omaviinu ga vongakanithwa nonyango. Jesus sho e ga makele, ina hala oku ga nwa.
35Sho ye mu alele komushigakano, oya topolelathana oonguwo dhe pamukalo gwokuumba oshihogololitho. 36Opo ihe oya kuutumba noye mu langele nkoka. 37Kombanda yomutse gwe oya mbambalele ko ondjo ye ya nyolwa ngeyi: “Nguno oJesus, omukwaniilwa gwAajuda.” 38Aakolokoshi yaali oya alelwa pamwe naJesus komishigakano dhawo, gumwe okolulyo lwe nomukwawo okolumoho lwe.
39Mboka ya piti po, oya sheke Jesus nokupukapuka komitse 40ya ti: “Ongoye tuu nguka to kumuna po otempeli e to yi tungulula omasiku gatatu? Ihupitha ano, ngele ongoye Omuna gwaKalunga, u ze ko komushigakano!”
41Aayambi aakuluntu, aalongimpango naakuluntu osho tuu wo ye mu sheke ya ti: 42“Okwa li ha hupitha aantu yalwe, ihe ngashingeyi okwa nyengwa okwiihupitha. Ano ngele oye omukwaniilwa gwAaisraeli, na ze ngashingeyi komushigakano, tse notatu mu itaale. 43Oye i inekela Kalunga, Kalunga ne mu hupithe ano ngashingeyi, ngele okwe mu hokwa. Oshoka okwa tile, kutya oye Omuna gwaKalunga.”
44Osho wo aakolokoshi mboka ya alelwa pamwe naye, oye mu sheke.
Jesus ta si
(Mrk. 15:33-41; Luk. 23:44-49; Joh. 19:28-30)
45Pokati komutenya okwa ningi omilema moshilongo ashihe ndhoka dha kwata ootundi ndatu. 46Potundi oyo tuu ndjoka ontintatu Jesus okwi igidha mokule ta ti: “Eli, Eli, lama sabaktani?” Otashi ti: Kalunga kandje, Kalunga kandje, omolwashike we ekelehi ndje?
47Nena yamwe yomwaamboka ya thikama mpoka sho ye dhi uvu, oya ti: “Oti ithana Elia.” 48Nena gumwe gwawo okwa matuka nokwa kutha oshiyayo, okwe shi yaya momaviinu omalulu nokwe shi tula koshihenguti e te shi tsike komilungu dhe.
49Ihe ooyakwawo oya ti: “Etha, u tale, Elia ngele ote ya oku mu hupitha.”
50Jesus okwi igidha ishewe pombanda nokwa si.
51Etopolitho lyotempeli olya tuuka okuza pombanda sigo opevi. Evi olya kakama, nomamanya oga tanduka; 52oombila odha suukuluka, nomidhimba odhindji dhoonakusa aayapuki odha yumuka. 53Oya zi mo moombila noye ya kOshilando oshiyapuki, Jesus sho a yumuka noya monika koyendji.
54Ano omukuluntu gwaakwiita naambeyaka ya langele Jesus pamwe naye, sho ya mono ekakamo lyevi naayihe mbyoka ya ningwa po, oya tila nokutililila ya ti: “Kapu na omalimbililo, nguka okwa li Omuna gwaKalunga.”
55Kokuma nkoka okwa li ku na aakiintu oyendji ya zile kuGalilea ya landula Jesus noye mu yakulile. Oyo ya thikama kokule noye mu tala. 56Mokati kawo omwa li Maria Magdalena naMaria, yina yaJakob naJosef nayina yaana yaSebedeus.
Jesus ta fumvikwa
(Mrk. 15:42-47; Luk. 23:50-56; Joh. 19:38-42)
57Ano sho kwa ningi ongulohi, omulumentu omuyamba a zi kuArimatia, edhina lye Josef, okwe ya po. Oye okwa li wo omulongwa gwaJesus. 58Okwa yi kuPilatus nokwe mu indile omudhimba gwaJesus. Pilatus okwa zimine, e gu pewe. 59Josef okwa kutha omudhimba e te gu dhingile moshiyata oshitokele, 60e te gu langeke mombila ye mwene ompe, a li e yi ihokela memanya. Okwa galangatithile posheelo shombila emanya enene e ta zi po. 61Maria Magdalena naMaria mukwawo oya kuutumba ya taalela kombila.
Ombila tayi langelwa
62Ano mesiku ndyoka lya landula kEtitano, aayambi aakuluntu naafarisayi oya gongala puPilatus 63ya ti: “Tatekulu, otwa dhimbulukwa kutya omukotokeli ngwiyaka manga a li e na omwenyo, okwa tile: ‘Ngele pwa piti omasiku gatatu, otandi ka yumuka.’ 64Lombwela ano aantu, ya langele nawa ombila sigo esiku etitatu, aalongwa ye opo kaaye mu yake mo; yo ya lombwele aantu kutya okwa yumudhwa kuusi. Nena epukitho lyahungunina otali ningi ewinayi noonkondo li vule lyotango.”
65Pilatus okwa ti kuyo: “Aalangeli oyo mbaka, indeni, mu ke yi langele nawa, ngaashi mu shi shi.”
66Oyo ya yi noye edhilitha po emanya e taye li hotele po noshihotekitho e taa langeke aalangeli pombila.
Currently Selected:
MATEUS 27: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
