MATEUS 26
26
Jesus ta kundathanwa
(Mrk. 14:1-2; Luk. 22:1-2; Joh. 11:45-53)
1Jesus sho a mana okupopya oohapu ndhoka adhihe, okwa ti kaalongwa ye: 2“One omu shi shi, ngele pwa piti omasiku gaali, oku na oshituthi shOpaasa. Nena Omuna gwOmuntu ota ka gandjwa okwaalelwa komushigakano.”
3Nena aayambi aakuluntu naakuluntu yoshigwana oya gongalele megumbo lyomuyambimukuluntu, edhina lye Kajafas. 4Oyo oya kundathana, nkene ye na okukwata Jesus nekoto, ye mu dhipage. 5Ihe oya ti: “Itatu shi ningi pethimbo lyoshituthi, opo evundakano lyaa holoke maantu.”
Jesus ta gwayekwa
(Mrk. 14:3-9; Joh. 12:1-8)
6Jesus sho a li muBetania megumbo lyaSimon omunashilundu, 7omukiintu e na ohanga yu udha omugwayo gwondilo, okwe ya kuye nokwe gu tile komutse gwaJesus, manga a kuutumba poshililo. 8Ihe aalongwa sho ye shi mono, oya geye e taa ti: “Omolwashike omugwayo nguka tagu hepithwa owala? 9Andola gwa landithwa po, ando gwa zi iimaliwa oyindji, yi pewe oohepele.”
10Jesus okwe shi dhimbulula nokwa ti kuyo: “Omolwashike tamu piyaganeke omukiintu? Oye okwa longele ndje oshilonga oshiwanawa. 11Oohepele omu dhi na aluhe pune, ihe ngame kamu na ndje aluhe. 12Oshoka sho a tile omugwayo ngu kolutu lwandje, okwa longekidha efumviko lyandje. 13Ngame otandi mu lombwele: Shaa nkoka muuyuni auhe elaka ndika etoye tali ka uvithwa, oshilonga wo shika e shi ningi, otashi ka dhimbulukiwa.”
Jesus ta landithwa po
(Mrk. 14:10-11; Luk. 22:3-6)
14Nena gumwe gwaamboka omulongo nayaali, edhina lye Judas Iskariot, okwa yi kaayambi aakuluntu 15e ta ti: “Otamu pe ndje shike, opo ndi gandje Jesus miikaha yeni?” Oyo ye mu futu iimaliwa iisiliveli omilongo ndatu. 16Ano okuza mpoka Judas okwa li ta kongo ashike ethimbo lyo opala okugandja Jesus.
Jesus ta li Opaasa pamwe naalongwa ye
(Mrk. 14:12-21; Luk. 22:7-13,21-23; Joh. 13:21-30)
17Mesiku lyotango lyokulya iikwiila inaayi fulikwa, aalongwa oye ya kuJesus e taa ti: “Openi wa hala, tu ke ku longekidhile, u lye uulalelo wOpaasa?”
18Jesus okwa ti kuyo: “Indeni koshilando komuntu gwontumba, mu ke mu lombwele mu tye: ‘Omuhongi ota ti: Ethimbo lyandje olya thikana. Otandi ya, ndi ningile oshituthi shOpaasa megumbo lyoye pamwe naalongwa yandje.’ ”
19Aalongwa oya ningi, ngaashi Jesus e ya lombwele, noya longekidha uulalelo wOpaasa.
20Ongulohi sho ye ya, Jesus okwa kuutumba poshililo pamwe naalongwa ye omulongo nayaali. 21Manga taa li, Jesus okwa ti: “Ngame tandi mu lombwele: Gumwe gwomokati keni ota ka gwaaleka ndje.”
22Aalongwa oya nika uuthigwa noonkondo noye mu pula koogumwe noogumwe ya ti: “Omuwa, hangame ndishi?”
23Jesus okwa yamukula a ti: “Ngoka te elele metemba mumwe nangame, oye ta ka gwaaleka ndje. 24Omuna gwOmuntu ota ka sa, ngaashi kwa nyolwa, ihe yayee omuntu ngoka te ke mu gwaaleka! Omuntu ngoka ando a li inaa valwa, ando ihwepo.”
25NaJudas, ngoka te ke mu gwaaleka, okwa pula a ti: “Muhongi, hangame ndishi?”
Jesus okwa ti kuye: “Ongoye tuu, ngaashi wa ti.”
Edhiko lyUulalelo Uuyapuki
(Mrk. 14:22-26; Luk. 22:15-20; 1 Kor. 11:23-25)
26Sho ya li taa li, Jesus okwa kutha oshikwiila, okwa hambelele, okwe shi pambula nokwe shi pe aalongwa ye e ta ti: “Taambeni, lyeni, shika osho olutu lwandje.”
27Oye a kutha wo oshitenga, okwa hambelele nokwe shi ya pe e ta ti: “Nweni mo amuhe; 28shika osho ombinzi yandje, ombinzi yehangano, tayi tilwahi omolwoyendji oyokudhima po oondjo. 29Otandi mu lombwele: Okuza nena itandi nu we omaviinu sigo esiku ndyoka tandi ke ga nwa omape pamwe nane mOshilongo shaTate.”
30Ano sho yi imbi eimbilo lyehambelelo, oya yi kOndundu yooholivi.
Jesus ta londodha aalongwa ye
(Mrk. 14:27-31; Luk. 22:31-34; Joh. 13:36-38)
31Nena Jesus okwa ti kuyo: “Uusiku wonena one amuhe otamu yi ontuku e tamu etha ndje, oshoka okwa nyolwa taku tiwa: ‘Otandi dhipaga po omusita, noonzi dhuusita otadhi halakana.’ 32Ihe ngame nge nda yumudhwa, otandi ke mu tetekela kuGalilea.”
33Petrus okwa yamukula Jesus a ti: “Nando ayehe oya ye ontuku, ngame itandi yi ontuku.”
34Jesus okwa ti kuye: “Ongame tandi ku lombwele: Uusiku mbu wonena ekondombolo manga inaali iga, ongoye to idhimbike ndje lutatu.”
35Petrus okwa yamukula: “Nando ondi ka se pamwe nangoye, itandi ku idhimbike.”
Naalongwa ooyakwawo ayehe osho ya yamukula.
Jesus ta galikana muGetsemane
(Mrk. 14:32-42; Luk. 22:39-46)
36Opo ihe Jesus okwa yi naalongwa ye keyana, edhina lyalyo Getsemane, e ta ti kuyo: “Kuutumbeni mpaka, manga tandi yi nkwiyaka, ndi galikane.” 37Oye okwa kutha Petrus naana yaali yaSebedeus e ta yi nayo. Okwa tameke okusa oluhodhi nokuuva uuwehame. 38Nokwa ti kuyo: “Oluhodhi momwenyo gwandje olunene, konyala talu nyanyagula ndje. Kaleni mpaka, mu tonate pamwe nangame.”
39Oye okwa humu ko kashona, okwi ihata pevi oshipala she nokwa galikana ta ti: “Tate, ngele tashi vulika, oshitenga shika nashi pitilile ndje po. Ihe hamolwehalo lyandje, ihe ongaashi wa hala.”
40Oye okwa yi kaalongwa nokwe ya adha ya kotha e ta ti kuPetrus: “Ano osho mwa nyengwa okutonata otundi yimwe ayike pamwe nangame? 41Tonateni, mu galikane, mwaa pwile memakelo. Ombepo yomuntu oya hala, ihe onyama onkundi.”
42Natango Jesus okwa shuna ko lutiyali nokwa galikana e ta ti: “Tate, oshitenga shika ngele itashi vulika okupitilila ndje po inaandi shi nwa, ano ehalo lyoye nali gwanithwe.” 43Oye okwa galuka ishewe nokwa adha aalongwa ya kotha, oshoka omeho gawo oga li ge niwe koomposi.
44Natango Jesus okwe ya thigi po e ta shuna ko nokwa galikana olutitatu a popyulula oohapu odho tuu ndhoka. 45Opo ihe okwe ya kaalongwa e ta ti kuyo: “Otamu kotha natango tamu vululukwa? Tala, ethimbo olya thikana, uuna Omuna gwOmuntu ta ka gandjwa miikaha yaalunde. 46Thikameni, tu yeni. Ngoka ta gwaaleke ndje, oku li popepi.”
Jesus ta kwatwa
(Mrk. 14:43-50; Luk. 22:47-53; Joh. 18:3-12)
47Ano manga ta popi, Judas, gumwe gwaamboka omulongo nayaali, okwe ya pamwe nongundu onene yi na omagongamwele noondhimbo, ya tumwa kaayambi aakuluntu nokaakuluntu yoshigwana. 48Omugwaaleki okwa li e ya tsu onyala a ti: “Ngoka tandi thipi komilungu, oye ngoka mwa hala. Mu kwateni!”
49Mbalambala okwe ya kuJesus nokwa ti: “Muhongi, wa tokelwa.” Oye nokwe mu thipi komilungu.
50Jesus okwa ti kuye: “Kuume, shoka wa hala, shi ninga mbala!”
Nena mbeyaka oya hedha kuJesus, ye mu tsu iikaha e taye mu kwata. 51Ano gumwe gwaamboka ya li pamwe naJesus, okwa ganeke oshikaha she, a pweya mo egongamwele lye noku umpile omumati gwomuyambi omukuluntu e te mu fegula okutsi. 52Ihe Jesus okwa ti kuye: “Shuna mo egongamwele lyoye molumpangwa, oshoka ayehe mboka taa longitha egongamwele, oyo otaa ka sa kegongamwele. 53Nenge u shi, kandi vulu okwiindila Tate, a tumine ndje ngashingeyi omatanga omanene gaayengeli ge vule omulongo nagaali? 54Ihe Omanyolo otaga gwanithwa ngiini andola, ngoka taga ti kutya osho shi na okuningwa.”
55Jesus nokwa lombwele ongundu yaantu: “One mwe ya okukwata ndje ongaashi omukolokoshi mu na omagongamwele noondhimbo. Kehe esiku onda li handi kuutumba motempeli tandi longo aantu, ne inamu kwata ndje. 56Ihe ayihe mbika oya ningwa, Omanyolo gaahunganeki opo ga gwanithwe.”
Nena aalongwa ayehe oye mu thigi po e taa yi ontuku.
Jesus e li kiipala yaatokoli
(Mrk. 14:53-65; Luk. 22:54-55,63-71; Joh. 18:13-14,19-24)
57Aakwati yaJesus oye mu fala megumbo lyomuyambimukuluntu Kajafas, moka mwa li mwa gongala aalongimpango naakuluntu. 58Petrus okwe mu landula e li konima kokule sigo omolugumbo lwegumbo lyomuyambi omukuluntu. Okwa yi mo nokwa kuutumba pamwe naalangeli, a mone shoka tashi ka ningwa po. 59Ano aayambi aakuluntu noshigongi ashihe shaatokoli oya kambadhala okukonga omalundilo, ya lundile Jesus, opo ye mu dhipage. 60Ihe inaye ga mona, nando pwa holoka aalundili oyendji. Hugunina opwe ya aalundili yaali 61e taa ti: “Omuntu nguno okwa tile: ‘Otandi vulu okukumuna po otempeli yaKalunga e tandi yi tungulula omasiku gatatu.’ ”
62Omuyambi omukuluntu okwa thikama nokwa pula Jesus ta ti: “Ito yamukula sha komalundilo ngoka taye ku lundile?” 63Ihe Jesus okwa mwena. Nena omuyambi omukuluntu okwa ti kuye: “Otandi ku ganitha kuKalunga omunamwenyo, tu lombwela, ngele ongoye Kristus, Omuna gwaKalunga.”
64Jesus okwa ti kuye: “Eeno, ngaashi wa ti. Ihe otandi mu lombwele: Okuza ngashingeyi otamu ka mona Omuna gwOmuntu a kuutumba kolulyo lwoonkondo lwaKalunga note ke ya te ende kiikogo yokegulu.”
65Omuyambi omukuluntu okwa tuula oonguwo dhe mwene e ta ti: “Okwa tuku Kalunga! Inatu pumbwa we oonzapo! One mu uvu ngashingeyi etukano lye. 66Otamu ti ngiini?”
Oyo ya yamukula taa ti: “Oye okwi ilongele okusa.”
67Oyo ye mu hiyile omayeye moshipala noye mu dhenge noongonyo. Naamboka ye mu dhenge nomalupi 68oya ti: “Kristus, tu hunganekela ngoka e ku dhenge.”
Petrus ti idhimbike Jesus
(Mrk. 14:66-72; Luk. 22:56-62; Joh. 18:15-18,25-27)
69Petrus okwa li a kuutumba pondje molugumbo. Omukadhona gumwe gwomaayakuli okwe ya kuye a ti: “Nangoye wo owa li pamwe naJesus, Omugalilea.”
70Ihe ye okwi idhimbike montaneho yaayehe a ti: “Kandi uvite ko shoka to popi.” 71Ano manga tu uka lwokomweelo, a pite mo, omuyakuli gulwe omukadhona okwe mu mono nokwa lombwele aantu mbeyaka: “Naanguka wo okwa li pamwe naJesus Omunasareti.”
72Petrus okwi idhimbike ishewe nokugana a ti: “Omulumentu ngoka kandi mu shi.”
73Konima yokathimbo okashona mboka ya li ya thikama, oye ya kuPetrus e taa ti: “Kapu na omalimbililo, nangoye wo gumwe gwaambeyaka, oshoka nelaka lyoye olye ku holola.”
74Nena okwa tameke okwiithinga nokugana e ta ti: “Omulumentu ngoka kandi mu shi.”
Ekondombolo nolyi igi. 75Opo Petrus okwa dhimbulukwa oohapu dhaJesus, sho a tile kuye: “Ekondombolo manga inaali iga, ongoye to idhimbike ndje lutatu.” Oye a yi pondje nokwa lili nokulililila.
Currently Selected:
MATEUS 26: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
