Svun Mateo 23

Ja' li' yaloj ti ijambat smulic ti jfariseoetique xchi'uc ti much'utic ta xchanubtasvanic ta smantaltac Rioxe

(Mc 12.38-40; Lc 11.37-54; 20.45-47)

1Ta más ts'acal ti Jesuse, ja' yech iyalbe li crixchanoetique xchi'uc li yajchanc'optaque: 2«Li jchanubtasvanejetic ta smantaltac Rioxe xchi'uc li jfariseoetique, ja' comem ta sbaic ti chalbeic smelol ti c'usitic yaloj ti Moisese. 3Yech'o un tsc'an chach'unic xchi'uc tsc'an chapasic li c'usitic chalique. Pero ja' mu xa chanbeic li stalelique. Yu'un mu spas yu'unic li c'usitic chalique. 4Ja' no'ox ta spech'ic alal icatsil ti mu xlic ta cuchele, ja' no'ox chac'be xcuch li yantique, pero li stuquique, mi jset' mu stic' sc'obic ta stoyel. 5Scotol li c'usitic tspasique ja' no'ox chac'beic yil li crixchanoetique. Li sc'ox'av smantal Riox ti tsnap'an ta stibaique xchi'uc ti ta xchuc ta sc'obique más xa muc'tic spasojic. Toj lec cha'iic noxtoc ti xtolet c'alal to yoquic li slixtonal sne sc'u'ique. 6Ja' toj lec cha'iic ti ta bail ta ch-chotiic c'alal oy ve'el ta jujun qu'ine, xchi'uc ti ja' tey ch-chotiic ta lequil chotlebal yo' bu ch-chotiic ti much'utic ich'bilic ta muc' ta bic'tal temploetique. 7Ja' tsc'anic ti lequil c'oponbilic c'alal oy bu x'ileic ta ch'ivite, xchi'uc ti “jchanubtasvanej” x'utatique.

8»Li vo'oxuque mu me ja'uc xac'anic ti “jchanubtasvanej” xa'utatique, yu'un jun no'ox lavajchanubtasvanejique, li vo'oxuque achi'il no'ox abaic acotolic. 9Mu me much'u xap'is ta atotic li' ta sba balamile, yu'un jun no'ox la totique, ja' no'ox ti Riox ta vinajele. 10Mu me ja'uc xac'anic ti jnitvanej xa uteique, yu'un jun no'ox li jnitvanej avu'unique ja' no'ox ti Cristoe. 11Ti much'u más ich'bil ta muc' ch-c'ote, ja' ti much'u sjunul yo'on ch-ch'un pasel ta mantal yu'un li yan xchi'iltaque. 12Ti much'u tstoy sbae ch-aq'ue ta q'uexlal. Yan ti much'u biq'uit chac' sbae, ch-aq'ue ta ich'el ta muc'.

13»¡Toj abol abaic vo'oxuc ti chachanubtasvanic ta smantaltac Rioxe, xchi'uc li vo'oxuc uque jfariseoetic, jlo'lovanejoxuc!, yu'un chamacbeic li cuentainel yu'un Riox li yantique, mu xa vaq'uic ochuc li much'utic oy ta yo'on ch-ochique, Pero mi ja'uc li vo'oxuque, mu ono'ox xa'ochic uc.

15»¡Toj abol abaic vo'oxuc ti chachanubtasvanic ta smantaltac Rioxe, xchi'uc li vo'oxuc uque jfariseoetic, jlo'lovanejoxuc!, yu'un ta yalel ta muyel cha sa' lavajchanc'opique, chaxanic nabetic xchi'uc balamil, pero c'alal chataique, más to chba yich' castico avu'unic chac c'u cha'al li vo'oxuque.

16»¡Toj abol abaic li vo'oxuque, jnitvanejetic yu'un ma'satoxuc!, yu'un ja' yech chavalic chac li'i: “Ti much'u chac' ta rextico li muc'ta temploe, mu persauc spas li c'usi chale. Yan ti much'u chac' ta rextico li oro tey ta muc'ta temploe, ja' persa tspas li c'usi chale.” —Xachiic. 17¡Sonso crixchanooxuc, ma'satoxuc! ¿C'usi ti más tsots sc'oplale: Mi ja' li oroe o mi ja' li templo yo' bu lecubtasbil chc'ot li oroe? 18Ja' yech chavalic noxtoc: “Ti much'u chac' ta rextico li scajleb smoton Rioxe, mu persauc tspas li c'usi chale. Yan ti much'u chac' ta rextico li smoton Riox ti tey cajal ta scajlebe, persa tspas li c'usi chale.” —Xachiic. 19¡Sonso crixchanooxuc, ma'satoxuc! ¿C'usi ti más tsots sc'oplale? ¿Mi ja' li smoton Rioxe o mi ja' li sc'ajleb yo' bu lecubtasbil ch-c'ot li matanale? 20Ti much'u tsva'an ta rextico li scajleb smoton Rioxe, ma'uc no'ox stuc chac' ta rextico, yu'un ja yajrextico ch-c'ot noxtoc scotol li c'usitic tey cajajtique; 21Ti much'u tsva'an ta rextico li temploe, ja' xa yajrextico ch-c'ot noxtoc ti Rioxe yu'un tey nacal. 22Ti much'u tsva'an ta rextico li vinajele, ja' tsva'an ta rextico noxtoc li smuc'ta chotleb ti Rioxe, xchi'uc ti Riox stuque, yu'un ja' tey chotol.

23»¡Toj abol abaic vo'oxuc ti chachanubtasvanic ta smantaltac Rioxe, xchi'uc li vo'oxuc uque jfariseoetic, jlo'lovanejoxuc!, yu'un ja' no'ox más tsots sc'oplal chava'iic ti chavaq'uic li jujun ta lajuneb li alavenae, li anise, xchi'uc li cominoe. Pero ja' mu tsotsuc sc'oplal chava'iic li c'usitic tsotsic sc'oplal chal li mantaletique, ja' ti tsc'an chapasic li c'usitic leque, ti chac'uxubinvanique xchi'uc ti jun avo'onic ta stojol ti Rioxe. Scotol li'i ja' li c'usitic tsots sc'oplal tsc'an chapasique, pero ma'uc ti ja' xa chavicta o abaic ta spasel li yantique. 24¡Ma'sat jnitvanejetic, Li vo'oxuque chamasic loq'uel li c'ox use, mu xa c'an xa bic' ti avalojique, pero li cameyoe ja' chabiq'uic!

25»¡Toj abol abaic ma'sat jfariseoetic, jlo'lovanejoxuc!, yu'un ja' no'ox lec chapocbeic ta spat li vasoe xchi'uc li platoe, pero li ta yute noj ta elec'al xchi'uc ta scotol li c'usitic chpich' avo'onique. 26¡Ma'sat jfariseo, suc'bo ba'yuc ta yut li vasoe xchi'uc li platoe, yo' ti sac ch-com o li spat uque!

27»¡Toj abol abaic vo'oxuc ti chachanubtasvanic ta smantaltac Rioxe, xchi'uc li vo'oxuc uque jfariseoetic, jlo'lovanejoxuc!, ja' yechoxuc chac c'u cha'al muquenal ti lec sac p'ejane ti lec bonbil li spat xocone, pero li ta yute noj ta baquel animaetic xchi'uc ta scotol li c'usitic tey c'a'emique. 28Ja' yechoxuc li vo'oxuque, lec yilel atalelic, pero lavo'onique nojem ta lo'lovanej xchi'uc ta scotol c'usitic chopol.

29»¡Toj abol abaic vo'oxuc ti chachanubtasvanic ta smantaltac Rioxe, xchi'uc li vo'oxuc uque jfariseoetic, jlo'lovanejoxuc!, yu'un vo'oxuc chameltsanbeic lec smuquenal li j'alc'opetique, bats'i leclec sba xacha'lebeic sloc'ol ti much'utic lec yo'onic i'ech'ic ta sba balamile, 30li vo'oxuque ja yech chavalic chac li'i: “Ti li'oticuc xa'ox c'alal i'ech'ic ti jmuc'tatotic ta más vo'onee, muc' bu ijtic'jbatic ta smilel ti j'alc'opetic ti yechuque.” —Xa chiic. 31Ti x'elan chavalique, atuc chavalabaic ti ja' smomoxuc ti much'utic ismilic ti j'alc'opetique. 32¡Lajesbeic xa spasel ta jmoj ti c'usi liquem tal yu'unic li amuc'tatotic ta vo'nee!

33»¡Quiletel chonetic! ¡Sts'unubal ajachonetic! ¿C'uxi chacolic ta castico ta c'oc' ti avalojique? 34Li vo'one chajtacbeic tal j'alc'opetic ti p'ijique, ti lec sna' xchanubtasvanique. Pero li vo'oxuque chamilic, chajoc'anic ta cruz, li yane chamajic ta bic'tal temploetic, chanutsic loq'uel ta jujun jteclum. 35Yech'o un vo'oxuc ta xtal ta atojolic li castico ta scuenta xch'ich'elic ti much'utic ch'abal smulic ti iyich'ic milele. C'alal to ta Abel ti lec yo'one, c'alal to Zacarías ti screm Berequiase, ti amilic ta ti' muc'ta templo yo' bu sts'el xchic'obil smoton Rioxe. 36Ta melel chacalbeic, vo'oxuc ti cuxuloxuc lavie, ja' chcom ta abaic scotol li scasticoale.

Ja' li' yaloj ti iyoq'uita Jerusalén ti Jesuse

(Lc 13.34-35)

37»¡Jerusalén, Jerusalén, vo'ot ti chamil li yaj'alc'optac Rioxe, xchi'uc ti chavac'beic ton ti much'utic lequic cha stacbeic tal ti Rioxe! ¡Ep ta velta ta jc'an ox ta jts'ob li avoltaque, chac c'ucha'al ta stsob yol ta yolon xic' li me'ch'eque, pero muc' xac'an tsobel! 38Lavi une, chich' comtsanel stuc li anaic yo' bu nacaloxuque; 39chacalbeic ti mu xa bu chavilicon oe, ja' to ti mi iloc' ta aveique: “¡Toj lec tajmec li much'u itaque tal yu'un ti Cajvaltique”, mi xachiique, ja' to chavilicon noxtoc!”» ―X'utatic yu'un ti Jesuse.

Currently Selected:

Svun Mateo 23: LeqAC

Highlight

Copy