Svun Mateo 22
22
Lo'il scuenta nupunel
(Lc 14.15-24)
1Ti Jesuse iyal otro jun lo'il noxtoc:
2«Chacalbeic c'u x'elan tspas mantal ti Rioxe. Ja' c'u cha'al jun rey ti tspas q'uin c'alal chnupun li screme. 3Istac ech'el smozotac, ba yiq'uic tal ti much'utic yalojbe xa onox ti chtal ta nupunele. Pero muc' xtalic. 4Istac ech'el yan smozotac noxtoc, “ja' yech xavalbeic ti much'utic ic'bilic cu'un ta nupunele: Batanic, chapal xa li ve'lile. Milbil xa li vacaxetique xchi'uc li yan sts'unubtac ti lec jup'emique, chapal xa scotol, ba ve'anic ta q'uin nupunele xavutic c'otel.” —Xut ech'el li smozotaque. 5Pero ti much'utic tacbilic ta iq'uele, muc' xch'unic tal. Ibat ta yabtelic. Li june ba sq'uel c'usitic sts'unoj ta yosil. Li otro june ba chonolajuc. 6Li jlome istsacbeic smozotac li reye, ilbaj iyilic, ismilic ta jmoj. 7Ti c'alal iya'i li reye, icap o tajmec. Istac ech'el yajsoltarotac, iyal ech'el mantal ti ac'u ba smilic li much'utic imilvanique xchi'uc ti ac'u xchic'beic comel li steclumalique. 8Li reye iyalbe li smozotaque: “Li ve'lil scuenta nupunele chapal xa, pero ti much'utic jtacoj ta iq'uele, yu'un mu ono'ox xc'otic o ti chtalique. 9Batanic yo' bu tsnup sba beetique, iq'uic tal ta ve'el scotol ti much'utic chataique.” 10Iloc' ech'el li smozotaque ibatic ta bebetic, iyiq'uic tal ti much'utic istaic ta bee. Tey capal italic li much'utic chopolique xchi'uc li much'utic lequique; noj ic'ot li na yo' bu tsobolic ta nupunele.
11»C'alal och sq'uel much'utic yic'anoj c'otel li smozotac li reye. Iyac' cuenta ti oy jun vinic ti muc'bu slapoj c'otel li sc'u'ulal nupunele. 12Xi iyalbee: “Li vo'ote, ¿C'uxi la'och tal li'toe, ti muc'bu alapojbe tal sc'u'ulal li nupunele?” —Xut. Li vinique muc' xtac'av. 13Yech'o un, li reye iyalbe ti much'utic scuentainojic li mexae: “Chucbeic yoc sc'ob, jipic loq'uel, aq'uic ech'el ta ic' osil yo' bu choq'uita sbae, yo' bu xc'uxuxet o yee.” —Xi ti reye. 14Yu'un ep ti much'utic ic'bilique, pero ja jutuc ti much'utic t'ujbilique.» ―X'utatic yu'un ti Jesuse.
Ja' li' yaloj ti isjac'beic ti Jesuse mi xu' chac'beic tojel aq'uel ti Césare
(Mc 12.13-17; Lc 20.20-26)
15Yech'o un ti jfariseoetique ba snopic c'usi tsjac'beic ti Jesuse yo' xa'iic o c'u x'elan chtac'ave, yo' stabeic o smul ti yalojique. 16Istaquic ech'el jayvo' yajchanc'opic xchi'uc jayvo' svinictac ti Erodese. Ja' yech iyalbeic chac li'i:
―Jchanubtasvanej, jna'ojticotic ti yech scotol li c'usi chavale xchi'uc jamal chaval c'usi tsc'an Riox ta jpasticotique. Yu'un mu c'u acuenta o c'usi chalic o crixchanoetic ti c'u x'elan chachanubtasbane, yu'un ma'uc no'ox chac'an ti lec chayilic oe. 17Albon ca'iticotic c'usi chanop: ¿Mi lec ti ta jtojbe jpatanticotic li Cesare o mi chopol? ―Xutic ti Jesuse.
18Ti Jesuse sna'oj ti ma'uc ta slequil yo'onic ti c'usi tsjaq'uique. Yech'o un ja' yech i'albatic chac li'i:
—Jlo'lovanejetic lec xa yilel li c'usi chajac'becone. ¿C'u yu'un ti cha sa'becon jmule? 19Ac'becon quil jsepuc li taq'uin chcac'tic ta tojel aq'uele ―x'utatic.
Iyac'beic yil jun denario, 20ijac'batic yu'un ti Jesuse:
—¿Much'u sloc'ol xchi'uc much'u sbi li'i? ―X'utatic.
21Itac'avic:
—Ja' li Césare ―xiic.
Ja' yech i'albatic yu'un ti Jesuse:
—Ac'beic César ti bu ja' yu'un Césare, ja' no'ox yech noxtoc ac'beic Riox ti bu ja' yu'un Rioxe —x'utatic yu'un ti Jesuse.
22Ti c'alal iya'iic ti x'elan itac'batic yu'un ti Jesuse, xch'ayet xa yo'onic, tey iscomtsanic isutic ech'el.
Ja' li' yaloj ti isjac'beic sc'oplal cha'cuxiel ti jsaduceoetique
(Mc 12.18-27; Lc 20.27-40)
23Ta jliquel oe, tey ic'otic jayvo' jsaduceoetic yo' bu ti Jesuse; ja' ti much'utic chalic ti ch'abal cha'cuxesele, ja' yech c'ot yalbeic chac li'i:
24―Jchanubtasvanej, ti Moisese yaloj ti mi icham junuc vinique, mi ch'abal screm icome, li its'inale ac'u yic'be yajnil ti anima sbanquile yo' mu xch'ay o sts'unubal li banquilale —xi. 25Yu'un oy to'ox vucvo' ti sbanquil yits'in no'ox sbaic ti li' to'ox jchi'ucticotique. Inupun li banquilale, pero icham. Li its'inale ja' iyic'be li yajnil anima sbanquile yu'un ch'abal xch'amal icom. 26Ti its'inal iyic'be yajnil ti anima sbanquile icham uc. Ch'abal xch'amal icom uc. Ja' no'ox yech ispas ti yoxva'al its'inale. Svucva'alic iyiq'uic ti antse pero muc x'ayan xch'amalic junuc ti c'alal ichamique. 27Ts'acal to icham ti ants uque. 28Yech'o un mi icha'cuxiique, ¿Much'u onovan junucal ti ja' bats'i yajnil ch-c'ote yu'un iyic' svuc'va'alic? ―Xutic ti Jesuse.
29Itac'av ti Jesuse:
―¡Li vo'oxuque mu xana'ic li c'usi chavalique, yu'un mu xana'ic c'usi chal li sc'op Rioxe, mi ja'uc xana'ic c'u x'elan syu'el ti Rioxe! 30Ti c'alal xcha'cuxiic ti much'utic chamemic xae, mu xa bu chnupunic, mu xa much'u chac' ta nupunel screm stsebic. Co'olic xa xchi'uc angeletic ta vinajel. 31Ta scuenta sc'oplal li cha'cuxesele, ¿mi muc' bu aq'uelojic ya'el ti c'u x'elan yalojboxuc ti Rioxe ti c'alal iyal chac li'i: 32“Vo'on Rioxon yu'unic ti Abraame, ti Isaaque, xchi'uc ti Jacobe”? —Xi. ¡Li stuque ma'uc Riox yu'un ti much'utic chamemic oe, ja Riox yu'unic ti much'utic cuxulique! —X'utatic yu'un ti Jesuse.
33Ti c'alal iya'iic c'u x'elan ichanubtasvan ti Jesuse, li crixchanoetique, xch'ayet xa o yo'onic.
Ja' li' yaloj c'usi mantalil ti más tsots sc'oplale
(Mc 12.28-34)
34Ti c'alal iya'i ti jfariseoetique, ti mu xa sna'ic c'uxi chtac'avic ti jsaduceoetique, istsob sbaic, 35tey jun jchanubtasvanej ta smantaltac Riox, oy c'usi isjac'be ti Jesuse yo' stabe o smul ti yaloje:
36―Jchanubtasvanej, ¿c'usi mantalil ti más tsots sc'oplal ta scotole? ―Xut.
37Itac'av ti Jesuse:
―“C'ano ta sjunul avo'on ti Rioxe ti ja' Avajvale, xchi'uc ta scotol acuxlejal, xchi'uc ta scotol anopben.” 38Le'e ja' li más tsots sc'oplale yu'un ja' sliqueb li mantaletique. 39Li xchibale ja' co'ol xchi'uc li ta ba'yie: “C'ano me achi'iltac chac c'u cha'al ac'anoj aba atuque.” Xi. 40Ta xchibal li mantaletic li'i, ja' smacoj scotol li smantaltac Rioxe, xchi'uc ti c'usitic iyalic ti yaj'alc'optac Rioxe ―x'utat yu'un ti Jesuse.
Ja' li' yaloj ti ma'uc no'ox smom David ti Cristoe, ja' yajval noxtoc
(Mc 12.35-37; Lc 20.41-44)
41Ti c'alal tey to'ox tsobolic ti jfariseoetique, 42ijac'batic yu'un ti Jesuse:
—Li vo'oxuque, ¿c'usi chanopic ta scuenta ti Cristoe? ¿Bu talem sts'unubal? ―X'utatic.
Istac'beic ti Jesuse:
—Ja' smuc'tatot ti Davide ―xiic.
43Yech'o un, ja' yech i'albatic yu'un ti Jesuse:
—¿C'u ma yu'un ti yech i'ac'bat sna' yu'un Ch'ul Espíritu ti Davide, ti Cajval xute? Yu'un ti Davide ja' yech iyal chac li'e:
44“Ti Rioxe ja' yech iyalbe ti Cajvale:
Chotlan ta jbats'ic'ob,
ja' to mi icac' ta avoc ta ac'ob
scotol la crontataque.” X'utat ti Cajvale —xi ti Davide.
45Mi Cajval xut Cristo ti Davide, ¿c'u ono'ox xi ya'el ti ja' smom un bi? —X'utatic.
46Mi jun muc' xtac'avic, mu xa sna' c'usi chalic, tey xa iyicta o sbaic ta sjac'ulanel li c'usitic tsjaq'uique.
Currently Selected:
Svun Mateo 22: LeqAC
Highlight
Share
Copy
Want to have your highlights saved across all your devices? Sign up or sign in
© Sociedad Biblica de Mexico AC
