Svun Mateo 21

Ja' li' yaloj ti ich'bil ta muc' i'och ta Jerusalén ti Jesuse

(Mc 11.1-11; Lc 19.28-40; Jn 12.12-19)

1Ti c'alal po'ot xa'ox xc'otic ta Jerusalene, tey ic'otic ta Betfagé ta yoc vits Olivotic. Ti Jesuse istac ech'el cha'vo' yajchanc'optac, 2ja' yech iyalbe ech'el chac li:

—Batanic le' ta parajele. Tey chucul chataic jcot me' burro xchi'uc jcot c'ox tot burro. Jitunic, ic'becon tal. 3Mi oy much'u cha sjac'beic c'u yu'un ti chajitunique, albeic ti ja' ta xtun yu'un ti Cajvaltique, pero chtal no'ox jsutesticotic ta ora —xavutic.

4Ja' ic'ot ti c'usi iyal ti yaj'alc'op Riox ti ta vo'nee, ti ja' ono'ox yech iyal chac li'i:

5«Albo li jnaclejetic ta Sione:

“Q'uelavil li Rey avu'une ta xa xtal ta atojol,

Lec yo'on, mu sna' stoy sba, Cajal ta burro ch-och tal,

yol jcot j'icatsnom me' burro.”» —Xi onox ti j'alc'ope.

6Ibat li cha'vo' yajchanc'optaque, ixch'unic ti c'usi i'albatic yu'un ti Jesuse. 7Isnitic tal xchi'uc yol li burroe. Iyac'be stasin spimilc'u'ic. Iscajlebin tal ti Jesuse. 8Ep tajmec li crixchanoetique, oy jlom isq'ui spimilc'u'ic ta be yo' bu i'ech' tal ti Jesuse, li jlome isc'asic yanal te', iyaq'uic ta be. 9Ti much'utic babee xchi'uc ti much'utic tijajtique, i'avan scotolic:

―¡Coltaoticotic smom David! ¡Toj lec ti tacbilotal yu'un ti Cajvaltique! ¡Ich'biluc ta muc' ti Riox ta vinajele! ―Xiic.

10C'alal i'och ta Jerusalén ti Jesuse. Scotol ti much'utic tey ta yutil jteclume xnechetic xa tajmec:

—¿Much'u le'e xiic?

11Itac'avic li yane:

—Ja' li Jesuse, ti yaj'alc'op Riox liquem tal ta Nazaret ta Galileae ―xiic.

Ja' li' yaloj ti isnuts loq'uel jchonolajeletic ta ti' muc'ta templo ti Jesuse

(Mc 11.15-19; Lc 19.45-48; Jn 2.13-22)

12Ti Jesuse i'och ech'el yo' bu li temploe, isnuts loq'uel scotol ti much'utic tey ch-chonolajique xchi'uc ti much'utic tey ch-manolajique; isbutq'uinbe smexaic li jeltaq'uinetique xchi'uc xchonolajebic li jchonpalomaetique; 13ja' yech i'albatic chac li'i:

—Ts'ibabil ta sc'op Riox; “li jnae ja' scuenta chtal ataicon o ta c'oponel”, pero li vo'oxuque snailch'en j'eleq'uetic xacha'leic ―x'utatic.

14Tey ic'otic ta ti' templo ma'satetic xchi'uc coxoetic, ti Jesuse icol yu'un scotol. 15Li totil paleetic xchi'uc ti much'utic ta xchanubtasvanic ta smantaltac Rioxe. Ti c'alal iyilic ti iyac' ta ilel slequilal syu'elal ti Jesuse xchi'uc ti c'alal iya'iic ti tsots i'avanic li c'ox cremotic ta temploe, c'alal ja' yech iyalic chac li'i: «¡Ich'biluc ta muc' li smom Davide!» Ti c'alal xiique, icapic o tajmec, 16yech'o un ja' yech iyalbeic ti Jesuse:

—¿Mi xava'i c'usi chalic li c'ox cremotique? Xutic.

Itac'av ti Jesuse:

―Xca'i lec―xi. ¿Mi muc' bu aq'uelojic ti ja' yech ts'ibabil ta sc'op Rioxe? Ti ja' yech chal chac li'i:

“Ta sc'opojel c'oxetic,

xchi'uc ti ch-chu'unic toe,

ja' ichbil o ta muc' ch-c'ot li ach'ul bie.” Ti xi ono'ox ts'ibabile ―xi ti Jesuse.

17Iloc' ech'el ta Jerusalén ti Jesuse, ibat ta Betania. Tey ivay.

Ja' li' yaloj ti istaquijes te'el ic'ux ti Jesuse

(Mc 11.12-14,20-25)

18Sob ta yoc'omal c'alal isut tal noxtoc li' ta Jerusalén ti Jesuse, ivi'naj ta be. 19Iyil jtec' ic'ux ta ti'il be, ba sq'uel mi oy sat, pero ch'abal; naca no'ox yanal oy. Ti Jesuse iyalbe li te'el ic'uxe:

—¡Mu xa bu cha satin o ta jmoj! —Xut.

Ora itaquij li te'el ic'uxe. 20C'alal iyilic ti c'usi ic'ot ta pasel li yajchanc'optaque, toj jch'ayel ic'ot yo'onic. Isjac'beic ti Jesuse:

―¿C'uxi itaquij ta ora li te'el ic'uxe? ―Xutic.

21Itac'av ti Jesuse:

—Ta melel chacalbeic, mi ach'unojique, mi mu xchibetuc avo'onique; mu c'ajomuc no'ox tspas avu'unic chac c'u cha'al ijcha'le li ic'uxe. Xu' avu'unic chavalbeic noxtoc li vits li'i: “Loc'an ech'el teyo'e, ba t'ubaba ta mar”, mi xavutique, ta spas avu'unic. 22Scotol ti c'usi chac'anbeic ti Rioxe, mi j'ech'el ach'unojic ti chayac'beique, ta onox xavich'ic ―x'utatic yu'un ti Jesuse.

Ja' li' yaloj ti ijac'bat ti Jesuse ti much'u i'albon ti x'elan tspase

(Mc 11.27-33; Lc 20.1-8)

23Ti Jesuse i'och ta templo. Ti c'alal yolel ch-chanubtasvane, tey ic'ot jayvo' totil paleetic xchi'uc jayvo' moletic ti ochemic ta meltsanej c'op tey ta jteclume. Isjac'beic ti Jesuse:

―¿Much'u layac'be orten ti x'elan chapase? ¿Much'u layac'be avabtel? ―Xutic.

24—Li vo'one oy c'usi chajac'beic uc, —xi ti Jesuse.

—Mi chavalbecon ti c'usi chajac'beique, chacalbeic ti much'u liyac'be cabtel ti x'elan ta jpase.

25¿Much'u ta smantal ti iyac' ich'vo' ti Juane? ¿Mi Riox, o mi crixchano? —X'utatic yu'un ti Jesuse.

Xalxalbe xa sbaic: «Mi chcaltic ti ta smantal Rioxe, “¿C'u yu'un ti muc' xa ch'unique che'e?” Xi yutotic bi'a. 26Mi chcaltic ti ta smantal crixchanoe, xi'el sba. Yu'un li crixchanoetique xch'unoj scotolic ti ja' yaj'alc'op Riox ti Juane.» ―Xut sbaic. 27Yech'o un istac'beic ti Jesuse:

—Mu jna'ticotic ―xutic.

Itac'batic yu'un ti Jesuse:

—Ja' yechon uc, mu xacalbeic much'u liyac'be cabtel ti x'elan ta jpase —xi.

Lo'il scuenta jun vinic ti oy cha'vo' scremotique

28Ijac'batic yu'un ti Jesuse:

—¿C'usi chanopic ti c'alal oy jun vinic ti oy cha'vo' scremotique. “Iyalbe li banquilale, crem, batan ta abtel ta uvatic”, xut. 29Itac'av li creme: “¡Mu jc'an xibat!” Xi. Pero ts'acal to isnop ti chbate, ibat ono'ox. 30Iyalbe li jun screm noxtoque. Ja' no'ox yech iyalbe chac c'u cha'al iyalbe li june. “Yechuc tot, chibat”, xi. Pero ja' muc' xbat. 31¿Much'u junucal ti ixch'unbe smantal li stotique? ―X'utatic yu'un ti Jesuse.

―Ja' li much'u ba'yi iyich' albele ―xiic.

Itac'av ti Jesuse:

—Ta melel chacalbeic, li jc'an-loc'-c'usiticuc yu'un Romae xchi'uc li jchonbail antsetique, ja' ba'yi ch-ochic yo' bu tspas mantal ti Rioxe, ja' ts'acalto li vo'oxuque. 32Ti Juan j'ac'-ich'vo'e ja' tal yalboxuc ti c'usitic lec tsc'an chapasique, pero muc' xa ch'unic. Li jc'an-loc'-c'usiticuque xchi'uc li jchonbail antsetique, ja' ixch'unic. Li vo'oxuque avilic pero muc' xavictaic o spasel li c'usitic chopole, yu'un muc' xa ch'unbeic ―x'utatic yu'un ti Jesuse.

Lo'il scuenta jchabiej uva ti i'ilbajinvanique

(Mc 12.1-12; Lc 20.9-19)

33»A'yic me, chacalbeic otro jun lo'il: Oy jun vinic ists'un uva ta yosil. Isjoy ta moc. Ixch'oj ton scuenta spits'obil ya'lel li uvae. Ismeltsan jp'ej toyol q'uelob osil. Iyac'be comel ta loq'uel ti much'utic sna' xabtelan li uvae. Ibat ta nom li yajvale. 34Ti c'alal ista yora chich' tuch'bel sate, istac tal jayvo' yaj'abteltac yo' bu li jloc' osiletique, yu'un tal sc'anic ech'el ti c'u yepal yaloj chich'e. 35Li j'abteletic ta uvae, istsaquic li yaj'abteltac yajval osile. Li june ismajic, li june ismilic, li june iyac'beic ton. 36Li yajval osile istac tal yan yaj'abteltac noxtoc, más to ep istac tal. Ja' no'ox yech icha'leatic uc chac c'u cha'al icha'leatic li much'utic ba'yi itaqueic tale.

37»Slajeb xa istac tal screm li yajval osile. “Spatoj yo'on ti ja' xa ch-ichbat ta muq'ue.” 38C'alal iyilic ti ja' xa screm yajval osil ti ic'ote, “le'e ja' xa chich'be comel yosil li stote. Más lec jmiltic yo' xquich'betic o comel vo'otic li yosile, xut sbaic li j'abteletic ta uvae.” 39Yech'o un, istsaquic, isquilic loq'uel ta ti' uvatic, tey ismilic.

40»Ti c'alal isut tal li yajval uvae, ¿c'usi chul cha'leaticuc xana'ic li j'abteletic ta uvae? ―X'utatic yu'un ti Jesuse.

41Ja' yech itac'avic chac li'i:

—Jp'el sc'oplal ch-mileic, yu'un toj chopol li c'usitic ispasique. Yan xa o much'u chac'be sloc' li uvatic sts'unoje. Ja' ti much'utic lec ts'acal chaq'uic entrucal ti c'u yepal sc'oplal chich' li yajval uva c'alal sta yora chich' tuch'ele, ―xiic.

42I'albatic yu'un ti Jesuse:

—¿Mi muc bu aq'uelojic ya'el ta jmoj li sc'op Rioxe, yo' bu chal:

“ti ton isp'ajic li jmeltsanej naetique,

ti ja' xa ba'yi i'och ta chiquin na ta ts'acale?

Taje ja' yabtel stuc ti Cajvaltique,

xch'ayet o co'ontic ti x'elan tspase, mu no'ox c'u yech o co'ontic —xi tsibabil.

43Yech'o un chacalbeic, ti chapojbatic loq'uel li cuentainel yu'un ti Rioxe. Yan xa o much'u chich'ic. Ja xa ch-ac'batic ti much'utic lec sna' stuc'ulanele, ti tsatin yu'unique. 44Ti much'u ch-jach' ta sba li tone toj c'asel chc'ot, pero mi ja' ip'aj tal ta sba li tone, toj voch'el ch-c'ot sjunlej ―x'utatic yu'un ti Jesuse.

45Ti totil paleetique xchi'uc ti jfariseoetique, c'alal iya'iic c'u x'elan ilo'ilaj ti Jesuse, iyul ta sjolic ti ja' sc'oplalique. 46Isnopic c'uxi ta staic ta tsaquel, pero ixi'ic. Yu'un li crixchanoetique, xch'unojic ti ja' yaj'alc'op Riox ti Jesuse.

Currently Selected:

Svun Mateo 21: LeqAC

Highlight

Copy