Svun Juan 16

1»Scotol ti c'u x'elan lacalbeique, ja' yo' mu xlaj o li xch'unojel avo'onique. 2Cha nutseic loq'uel ta bic'tal temploetic, ta sta yora ti much'uuc no'ox ti cha smilique, tsnop ti ja' tspasbe yabtel ti Rioxe. 3Ti x'elan tspasique, yu'un mu yojtiquinic ti Jtot xchi'uc mu xi yojtiquinic li vo'one. 4Ti x'elan chacalbeique ja' yo' ti c'alal xc'ot yeche, chul ta ajolic ti ja' onox yech lacalbeic comele.

Ja' li' yaloj ti c'usi yabtel ti Ch'ul Espiritue

»Ta sliquebale, mu to'ox bu yech lacalbeic, ja' ti li' to'ox jchi'ucoxuque. 5Pero lavie chibat, chba xa jchi'in ti much'u stacojon tale, pero mi junuc li vo'oxuque muc'bu chajac'becon ti bu chibate; 6naca no'ox at-o'on batem o ta avo'onic ti x'elan lacalbeique. 7Ta melel chacalbeic: Ja' ta scuenta alequilalic ti chibate. Yu'un ti mi mu xibate mu xtal xchi'inoxuc li much'u chtal spas ta jun avo'onique; pero mi libate, vo'on chajtacbeic tal. 8Ti c'alal xtale, ja' chac'be sna' li crixchanoetic li' ta sba balamile, much'u ti oy smule, much'u ti ch'abal smule xchi'uc much'u ti chich' castico yu'un ti Rioxe. 9Ti much'u oy smule: Ja' ti much'u mu xi xch'une. 10Ti much'u ch'abal smule: ja' li vo'one ti chibat ta stojol ti jtote, li vo'oxuque mu xa bu chavilicon; 11ti much'u ch-ac'bat castico yu'un ti Rioxe: ja' li totil jpasmantal li' ta sba balamile, ti albil xa ono'ox sc'oplal chic' casticoe.

12»Oy to ep c'usi ta jc'an chacalbeic, pero mu to xu' avu'unic ya'ibel smelol lavie. 13Ti c'alal xtal ti Ch'ul Espíritu ti naca yech ti c'usitic chale, ja' cha syulesbe ta ajolic scotol ti c'usitic melele; yu'un muc' bu tsyules ta sjol stuc ti c'usitic chale, naca ja' chal ti c'usitic cha'ie, ja' chayac'be ana'ic scotol ti c'usitic ta to xc'ot ta pasele. 14Ja' chiyac' ta ich'el ta muc', yu'un ti c'usitic chale naca ja' jc'oplal chayalbeic. 15Scotol ti c'usi oy yu'un ti Jtote, ja' cu'un uc; yech'o ti ical ti naca ja' jc'oplal chal ti Espiritue, xchi'uc ti ja chayac'be ava'ibeic smelol li vo'oxuque.

16»Mu xa bu jal chavilicon, pero le' c'alal jayib c'ac'ale ta to xavilicon jayibuc c'ac'al noxtoc.

Ja' li' yaloj ti “muc bu jal chavat avo'onic, ts'acal to jun xa avo'onic”, x'utatic yu'un ti Jesuse

17Oy jayvo' yajchanc'optac tey isjac'ulanbe sbaic:

—¿C'usi smelol ti x'elan chale? Mu xa bu jal li' chavilicone pero le' c'alal jayib c'ac'ale ta to xavilicon jayibuc c'ac'al noxtoc, yu'un ta to xi sut ech'el yo bu ti Jtote, ti xie. 18¿C'usi smelol ti “mu xa bu jal”, xie? Mu xca'ibetic smelol ti c'usi chale ―xut sbaic.

19Ti Jesuse iyac cuenta ti yo'onicuc sjac'beic c'usi smelole, ja'o yech iyal chac li'i:

―Li vo'one la calbeic ti mu xa bu jal li' chavilicone, xchi'uc ti le' c'alal jayib c'ac'ale ta to xavilicon jayibuc c'ac'al noxtoque. ¿Mi ja' li c'usi yolel cha jac'ulanbe abaique? 20Ta melel chacalbeic, li vo'oxuque cha'oq'uic, chavat avo'onic ta jmec, yan li crixchanoetic li' ta sba balamile xmuyubajic xa ta jmec. Ac'u mi ta to xavat avo'onic ta jmec li vo'oxuque, pero ta ts'acal ta xjoyp'ij ta jun avo'onic. 21Ana'ojic c'u x'elan ti c'alal chcol ta alajel li antse, oy svocol yu'un ja' xa yorail ta xcol; mi icole, ta xch'ay ta sjol li svocole, xmuyubaj xa ti c'alal spetoj xa li yole. 22Ja' no'ox yechoxuc uc, lavie ta to xavat avo'onic; pero li vo'one ta to xtal jq'ueloxuc, mu xa c'u yech o avo'onic ti c'alal xavilicone, mu xa much'u xu' cha spojbeic ti jun avo'onique.

23»Ti c'alal xc'ot sc'ac'alil chac taje, mu xa c'usi chajac'becon. Ta melel chacalbeic, ti Jtote chayac'beic scotol ti c'usi cha c'anique ti mi ta jbi chac'anbeique. 24Lavie mu to c'usi ac'anojbeic ta jbi; c'anbeic, chayac'beic, yo' jun o avo'onique, yo' mu xa c'usi xal o avo'onique.

Ja' li' yaloj ti “icuch xa cu'un li c'usitic li' ta sba balamile”, xi ti Jesuse

25»Ti c'usitic la calbeique, oy bu ijtunes lo'il; pero ta sta yora ti ma'uc xa ta lo'il cha calbeique, yu'un jamal xa chacalbeic sc'oplal ti Jtotic Rioxe. 26Ti c'alal sta sc'ac'alile, atuc xa cha c'anbeic ta jbi li c'usitic chac'anbeique; muc' bu chacalbeic ti vo'on ta jc'an vocol ta acuentaic ta stojol ti Jtotic Rioxe, 27yu'un sc'anojoxuc ti Jtotic Rioxe. Ti sc'anojoxuque, ja' ti ac'anojicone, xchi'uc ti ach'unic xa noxtoc ti tey liquemon tal yo' bu ti Rioxe. 28Tey li loc' tal ta stojol Jtotic Riox ti c'alal lital li' ta sba balamile, Lavi une, ta jcomtsan li balamile, yu'un chisut ech'el yo' bu ti Jtotic Rioxe ―x'utatic yu'un ti Jesuse.

29Ti yajchanc'optaque ja' yech iyalic chac li'i:

—Lavie jamal avalboticotic, ma'uc xa ta lo'il. 30Lavie iquilticotic xa ti ana'oj scotole xchi'uc ti mu persauc ti oy much'u cha sjac'be ba'yuque. Yech'o un ta jch'unticotic ti tey liquemot tal yo' bu ti Rioxe ―xutic.

31Itac'av ti Jesuse:

—¿Ti xcaltique ach'unic xa un bi? 32Q'uelavilic ta xa xc'ot yorail, xchi'uc ja' xa yora lavie ti jujuntal xa chabatique, jtuc xa chacomtsanicon. Pero mu jtucuc chicom, yu'un li' onox xchi'inojon ti Jtotic Rioxe. 33Ti x'elan la calbeique ja' yo' spas o ta jun avo'onic ti jayvo' li' nap'aloxuc ta jtojole. Li' ta sba balamile ta to xa vil avocolic; pero mu me xa xi'ic: yu'un ijpas xa ta canal li c'usitic scuenta sba balamile ―x'utatic yu'un ti Jesuse.

Currently Selected:

Svun Juan 16: LeqAC

Highlight

Copy