Svun Juan 17

Ja' li' yaloj ti isc'oponbe Riox yajchanc'optac ti Jesuse

1Ti c'alal laj yal yech scotol chac taje: Ti Jesuse isq'uel muyel vinajel ja' yech iyal chac li'i: «Tot, lavie ista xa yora: Ac'o ta ich'el ta muc' Lach'amale, yo' ti xa yac' o ta ich'el ta muc' uque. 2Yu'un vo'ot avac'be syu'el ta scuenta scotol crixchanoetic Lach'amale, yu'un ja' chac'be xcuxlejal ta sbatel osil scotol ti much'utic avac'bee. 3Ti chcuxiic ta sbatel osile, ja' ti chayojtiquinic ti atuc no'ox Rioxot ta melele, xchi'uc ti chojtiquinic li Jesucristo ti vo'ot atacoj tale.

4»Li vo'one la cac' xa ta ich'el ta muc' li' ta sba balamile, yu'un ilaj xa cu'un li cabtel ti avac'bon jpase. 5Lavi une Tot, ac'on xa ta ich'el ta muc' noxtoc tey ta atojol chac c'u cha'al ich'bilon ta muc' ti c'alal ch'abal to'ox li balamile.

6»Ti much'utic avac'bon li' ta sba balamile, icalbeic xa much'uot. Ja ono'ox avu'un, yech'o ti vo'ot avac'bone, ixch'unic xa ti c'usi avaloje. 7Lavie sna'ojic xa ti tey liquem tal ta atojol scotol li c'usitic avac'bon jpase. 8Icalbeic xa ti c'usitic avalbone, ixch'unic xa. Iyaq'uic xa cuenta ti ta melel tey liquemon tal ta atojole, xchi'uc ixch'unic xa ti vo'ot atacon tale.

9»Chajc'anbe vocol ta stojolic; pero ma'uc chajc'anbe vocol ta scuenta scotol li crixchanoetic li' ta sba balamile, ja' no'ox ta scuenta ti much'utic avac'ojbone, yu'un ja' avu'un. 10Scotol ti much'utic ja' cu'une, ja' avu'un, ti much'utic ja avu'une, ja' cu'un; ja' chiyaq'uic ta ich'el ta muc'.

11»Li vo'one mu xa bu jal li'on ta balamile, pero li stuquique li' to ta xcomique, li vo'one chisut xa ech'el ta atojol. Tot, Ch'ul Riox, chabibon me ta scuenta syu'el li ach'ul bie, ja' li ach'ul bi avac'ojbone, yo' ti jun no'ox ac'u c'oticuc chac c'u cha'al junotic li vo'otique. 12Ti c'alal li' jchi'uquique, ijq'uelic, ijchabiic ta scuenta syu'el li a bi avac'ojbone. Mi jun muc'bu ich'ay cu'un, ja' no'ox ich'ay li june ti sc'oplal onox ta ch'ayel chbate, yo' xc'ot o ta pasel ti c'u ono'ox x'elan ts'ibabil sc'oplal ta ac'ope.

13»Lavie chisut xa tal, chtal xa jchi'inot; ti x'elan chcale ja' ti li' to jchi'uquic ta sba balamile, yo' spas o ta jun yo'onic chac c'u cha'al jun co'on ta jmec li vo'one. 14Icalbeic xa ti c'usitic avalbone, pero chopol ch-ileic yu'un li crixchanoetic li' ta sba balamile ja' ti mu xa bu tspasic li c'usitic scuenta sba balamile, ja' chac c'u cha'al li vo'one ti ma'uc ta jpas li c'usi scuenta balamile. 15Ma'uc chajc'anbe ti ac'u avic' loq'uel li ta balamile; ja' no'ox chajc'anbe ti ac'u aq'uel achabie, yo' mu spaseic o ta c'anal yu'un li c'usitic chopole. 16Yu'un ma'uc xa scuentaic spasel li c'usitic scuenta sba balamile, ja' chac c'u cha'al ma'uc jcuenta li vo'one. 17Lecubtaso ta scuenta li c'usi melele; yu'un li ac'ope ja' melel. 18Ja' chac c'u cha'al atacon tal ta stojol li crixchanoetic li' ta sba balamile, ja' no'ox yech li vo'on uque ta jtaquic ech'el ta stojol li crixchanoetic li' ta balamile. 19Yu'un ja' ta scuentaic ti ta sjunul co'on ta jpas li c'usitic chac'ane, ja'uc no'ox yech' ta sjunuluc yo'onic ac'u spasic uc.

20»Ma'uc no'ox cha jc'anbe vocol ta stojolic li'i, cha jc'anbe vocol noxtoc ta scuentaic ti much'utic ta to xi xch'unic mi iya'iic li ac'op ti chalic ech'ele. 21Cha jc'anbe vocol ti co'oluc me sjolic scotolique, Tot yechicuc me chac c'u cha'al co'ol joltic li vo'otique, xchi'uc ti co'olajuc joltic jchi'uctique, yo' xch'unic o scotol crixchanoetic ti vo'ot atacon tale. 22Icac'be xa slequil yo'onic chac c'u cha'al lec co'on avu'une, yo' jun xa ac'u c'oticuc chac c'u cha'al junotic li vo'otique. 23Li vo'one ta xco'olaj jol xchi'uquic, li vo'otique co'ol joltic, ja' no'ox yech ta xco'olaj sjolic uc yo' xilic o scotol crixchanoetic ti vo'ot atacon tale, xchi'uc ti ac'anoj scotolique, chac c'u cha'al ac'anojone.

24»Tot, vo'ot avac'bon, ja' ta jc'an ti chi xchi'inic ta naclej yo bu chinaquie, yo' ti ac'u yilic li jlequilale, ja li jlequilal ti avac'ojbone; yu'un ac'anojon ono'ox ti c'alal mu to'ox spas li balamile. 25Tot, li vo'ote lec c'usi chapas, ac'u mi mu xa yojtiquinic li crixchanoetic li' ta sba balamile, pero li vo'one xa cojtiquin, ti jayvo' avac'bon xae, sna'ojic xa ti vo'ot atacon tale. 26Icalbe xa ya'iic much'uot, muc'bu chquicta jba ta yalbelic, yo' ti j'ech'el ac'anoj o chac c'u cha'al ac'anojone, yo' ti vo'on jtuc teyon o ta stojolique» ―Xi ti c'alal isc'opon Riox ti Jesuse.

Currently Selected:

Svun Juan 17: LeqAC

Highlight

Copy