2 Corintios 9
9
1Jlampet siojona jlotie'ni wita'm ti jiwoyeyi ji'wajieta' pa Sinia' ka 'esieyi pet napoka Sinia' jilis, ijiate lajk'ipa ka i'lija' ka ijwi'lase'm ka yiyiji pet naka, 2kajeyepa ti pajk'i ti sitiant'ieje siunie jiniwonayi pet, ti wuj ti jlemina' ti je jinik'iuye. Naka'ne ni siunie ti ajwejla'm japo Macedonia jlele ti awo'ate, “Ateme wat japo si'lijwas Corinto jlele yiji jlaja ajnat Acaya, ti pajk'i ta'a ti initemis, ti iyo ka inoyeje siunapo p'ijliusis ti kia'iyo Sinia' jilis pet yiji jana Judea.”
Jak je iyoyi ti sipe'yayisie ti ajwela, sekyi'i kia'iyoyeyi 'lojwa pet japo kiak iniwone kajeyepa ti itiliajask'i siunie jiniwonayi ti jikimats'iji'n. 3'Nakayi ti ajlo' 'ni Tito siu'neje 'napo times si'lijwas ti 'yunink'i napokaye ti janoye'ase'm, ja 'nakayeyi ti ja lajak'i pa jikiechaye ka intajliye'yi, jla'yi ti jankaj pet ti jlam je awoyi siunie ti ajwela siunie jiniwonayi ti jikimats'iji'n ti jiwoyeyi siunie 'es. 4'Lojwinie'e ka poye papo ka intal Macedóniaja ka ina'm ijyik'i ka nak ijiotaja, jan'wena siuti kiak jawoyeyi janik'iuye. Je jwela' ka je kasts'ajwelanak'i wita'm siuti kiak jawoyeyi. Kajeyepa siuniwa yamtis ti 'yakaje ti ate'mase ti awo'ate, “Wujwat ti 'es siunie iniwonisi napo Corinto jlele.” Siupet ti asa'am, ¿tepat'e jawoyeyi siuti kiak jawoyi?
5'Yina nak it'imina ti awo'ate siunapo najape si'lijwas, 'esiji ka inan'ni ti jajno'wase, ti je akjli'ijyi pet ti jajio'wase, 'nakayi jantemisi ta'a siojopa jijwela' ti jajloyeyi papo Sinia' jilis 'neje, ti jlotie'ni wita'm. Jak je iyoyi siuka i'nista nakaje ja ke itieyiji'ni pa jayoyi kajeyepa ti ja wakajla. Sek jane'yi ti ja ti'wena, asama'yi asa'am ti inteliajayi ti jiwoyeyi naka, 'yina je sam'ne ka ijialaskinayi siunie jiwoyeyi.
Sinia' wuj ti iniuyeje pet siunie ti po' japa yikiajle ti iyo 'wajieta'
6Ataj wunitieyi siunie iyo'ate: Siunie i'nio' ti iliakiyi'i siupa iyo'om, tepa jawo pit ka 'etsakaja paka ila'ne. 'Yina jlampet siunie je iliakiyi'i pa 'yut'isia'm, kia'iyo pit 'etsaka pa jlak ti ilienata'a. 7'Yina siuti po' ni i'nio' yine siojopa iyo 'wajieta' pa Sinia' ti yikiajle, janak janene siojona ti pajk'i ti itime ti i'winakiti pa Saka'niona; ja ke janakaye siojona jijwesiyijni ti ijwil ka nene, siu'neje ti ini'nejie'ne kawoyi. Kajeyepa siunie inka'a siojona yikiajle pa Sinia', nak kia'iyoyi Sinia' wuj ti yimi'n. 8'Yina Sinia' 'yijene pi iyone kanwe'nase'm siuniwa isis wask'i'nelaja ti imp'elisinajyi'n, siuniwa ijwienjli je k'iejliyik'i siu'neje ka inkamata astepe'e, sek jane'yi ja ke ine'ets'ilia'm ti ja'wena' siuniwa jisitiana. Sek jane'yi japoyena'a pet puwa ka 'esieyi ni siunie askijmaye ti 'es. 9Iyo niwa Sinia' jlamtis ti iyo'ate:
“Siunie i'nio' ti ijiate jla'am ti 'es,
inka'a siunie iyone napo p'ijliusis ti iyo 'wajieta',
'yina siunie iyo ti tijnajyi laj jlaja.”#Sal 112.9
10Sinia' iwijna'm ni i'nio' kawijnajnata siojona inseliaki ka 'not'isia'm, siu'neje niwa inkas ti titiuwa. 'Yina kia'iyo naka jla'am ti janwe'nase'm ni siuniwa inseliaki janeyi ts'ijiye ja ke piniye siunapo jantaj'l aswa'm ti ja niwakaye jlaye ti jantaj'l aswa'm, siunie ti ja asama ti jajnayejyi. 11Ja 'nakayi ti ja ke asetiana niwa askijmatis siuniwa janjwanjli ja ke k'iejliyeyik'i, 'yina janoyeyijna'a pet napo as'lejwas siupi isitia'n. Sek jane'yi ka jinikanitieyi inekiajlayinie'e pa Sinia' japo si'lijwas ape'e siojona ji'wenakitayi pa Saka'niona, ka yikiajlajtajanie'e. 12'Yina siunie sikijmaye ti je niliak ti awoki je nakata napo si'lijwas ka inoyeje, 'yina kia'iyo jant'eminajna'a ka jinikanitieyi iwenisi pit pa Sinia'. 13Jak je iyoyiji siuti jan'wenis siunie jiwonayi ti ijiate ti jip'elisina' ti jijliuyeyi siojona jlotie'ni wita'm k'iye, siu'neje napo ijia Sinia' jilis 'neje janwunitis pa Sinia' jla'yi ti jan'wenis ti ijiate ti jiwoyeyi siunie inka'niye ti ijwi'il pi Sijwajieti. 14Jak je iyoyiji siuti jitiej wujwataja siunie Sinia' iyo'nase ti wuj ti 'nama'ase, janakaye'eje ti jitiej ja wujwa'ase pit ti ja 'najlanayi pi Sinia', siu'neje ti wuj ti ja 'nama'ase. 15¡Awo inikanitieyija' pi Sinia' ti jla'am ti iwints'e'm na si'wajiet ti ijiat ti wuj! ¡Ijiate ti samtis je ijniujliji!
Currently Selected:
2 Corintios 9: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.
