2 Corintios 10
10
Jijweye iyo pa Pablo ti jla'am ti injlojwanik
1Siuti ya'am ti Pablok'i'm wuj ti anip'elisi'niase, 'yina etijnape ki iyo ni Sijwajieti jikap'ijliuskiye ti je yi'n. Po' siunapo sijwe'el ti a'yi aska kiowe'e 'yotale je t'oni paka k'iejliyeyi, jlampet ti sitiojwatajk'i 'yotale t'onie'eje ti ajwe'el pi k'iejliyi. 2Jakajliete, siuka yikta ti jajio'wase, anip'elisi'niase ka je salaskinayi ka 'yotale t'oniejap ka 'yakamtijniene napoka siunapo ti iyo'ate ti kasjwela, “Siojo Pablo najata jla'am iyoyi siunie jitienkiujnieye.”
Jajwi'lase'm ti ya'am pajk'i ti aniwakajlanit k'iye napo ti jatie'yi ilia'm napok ji'lij kiak iyone. 3Ijiatataja wek kiak awoki i'niolatats'e'm, 'yina siunie aniwonaja ti anilanaja'n je awok'iate iyo napoka ti iyoyi siunie itiliaja ka woyisi. 4Siuniwa sikio' jlele akima'ak'i je niwaka niwa jikio' jlele pet napok i'nio' yi'i 'ni ajnat. 'Yina niwaka Sinia' jijweye ti 'yijene pi iyone ka inetiajnate'n niwaka ti jijweye po'o. Niwaka ti akienaja niwak siuniwa inamtis ti je ijiatk'iji'n ti tenats'e'm ti initiajnate'n, 5wikie'eyi 'neje siuniwa ti initoniti ni i'nio', siunie it'imina ti je itiant'ieje ni Sinia'. 'Yina jlampet siunie jitienkiujnieye ni i'nio', nak awoki pet Sijwajieti jikipinikie' ja 'nakayi ti janwoyi siunie iyo ka woyi. 6'Yina anitema siunie jayonaja ti jayoki jitisa' siupi iyoyi pi jane'yi pa siuti ja ke ink'iuyi ti teje ilia'm siunie iyo ka woyi ni Saka'niona, siuti kiak jawo janiwakajlanitieyi ti janipejlanitie ti jak'iuyeyi pi Saka'niona.
7Awo'ate, 'yena niwa siuniwa wask'i'nelaja 'yaka 'nakayi. Siunie i'nio' ijwil ka ijiatayi ka inoyeje pa Sijwajieti, 'esiji ka jitiej inene 'ate ti siuti sa'am, sam'neje ti anokieje ni Sijwajieti. 8Ijiatataja wek ti jwamjla'a ti anikajmat ape'e siunie awo ti anijwe'el siunie ji'lij ni Saka'niona ti yikialk'i, 'yina je ka iyoyi 'yajwejliye paka k'iejliyeyi. Lapakawo siunie jijweye ni Saka'niona iwink'i'm ja ke inetiajnatajyi'n, 'wenajliyi ti janoye'ase'm ka kinieyi siunie asosik ti 'es. 9Je awojonk'iye siukiwa ip'isijna' ajlo'wase'ni ka 'yiniyeyi ka ikelitienayi. 10Po' ni iyo'ate, “A'tisk'iji'n niwa Pablo jlamtis ti yiji niwa jip'esijna', jak je iyoyiji ti jla'am ti yi' saka kiowe'e ka insta wat ti lajk'iyi paka woyi. Siuti iyo jlamtikie', siuniwa jlamtis iyo laj lajaye.”
11'Yina siunie i'nio' ji'lij kiak iyone, 'esiji ka 'najane ti je najata siuti je a'yasap ti i'lij kiak awone ti a'tinitk'i ask'ioye, kajeyepa ti nak ja yiji kiak jayo'ojyi ni awo'nase.
12Ijiate ts'otale je t'oni ka kiak iniwonaja ka inijnojlieteje napoka i'nio' ti iniwunit siu'neje ka ini'yenajap siunie iniwonisi. ¡Ijiate wat ti 'ne'lias, 'yina ti inijwelis ti isis siuniwa wask'i'nelaja iyoyisi! 13Jlam'ne siuti kiak awoki ti anitonitieje pi sikijmaye, 'yina ka kia'iyo jiwek ka 'yajnata ape'e siunie Sinia' kasse'ne pet. 'Yina jla'am tipayiji siunie jlaj yi'i ni siunie sikijmaye, jlam'neje ti iyo si'niayija' ti ajok'iasepi. 14Siut'itie ka wope 'ate ti ijwilts'e'm, “Ká ajoye Coríntojo”, sekyi'i ka ijioye'asepi, nak 'yakajanitta pet ti akama ape'e siunie iyo ka iwoyi. Je 'esiji ti iyo'ate, “Joye Coríntojo”, nak 'yakajanit pet ti je akama ape'e siunie Sinia' iyo ka woyi, ijiate ti sampe ti ananaja ti ajok'iase ti akinieje'ase ni siunie Sinia' jika'niye ti ijwil ni Sijwajieti.
15Siuti kiak awoki ti já akama ape'e siunie Sinia' kasse'ne pet jak je iyoyi je aniwunitieje siunie jikijmaye napo 'wenayi, ka ijwila ka sama ka sikijmayeja'. 'Yina awotajank'iye ka ijiatayiji pet siunie astankiujnieye ti 'es kapoye, jak je iyoyiji janeyi ts'ijiye janjlas pet pijia'm siunie sikijmaye siunie Sinia' iwints'e'm ni yi'ase. 16'Yina nak anejejwiyetaja pet k'iye ka neyi ts'ijiye ka 'yakajlaja ka iyoki samtikie' siunie Sinia' jika'niye siuniwa isi'il tomi 'wechaja jana Corinto yiji jla'am janaka. 'Yina ja ke ijioki siuniwa ajnatis ti pajk'i ti po' ta'a napo ijioyi, kajeyepa ti je awoki ka iniwunitieje ka ijwila ka sama ka sikijmayeja' siuniwa ti wakal ta'a jikijmaye napo 'wenayi.#Rom 15.20-21
17Siuniwa Saka'niona jlamtis iyo'ate, “Siupa iyo ka iniwunit, 'esiji ka iniwuniti jla'am pa Saka'niona.”#Jer 9.24 18Ke iwo pa ti siunie i'nio' ti jle' po', Saka'niona jla'am ti iyunit, 'yina je ka jlama jla'am ka iniwunit kant'emina ka jle' poye.
Currently Selected:
2 Corintios 10: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.
