2 Corintios 8
8
Pablo 'yijijie'ne papo i'nio' ka iwo ji'wajieta' pa Sinia'
1'Nakayi, i'lijwas, awotajank'iye pet ka 'najanayi paka awonayi siunie Sinia' iyone napo jilis yi' Macedóniaja, ti wuj ti ip'ilisijne'n. 2'Yina ijiate ti istieyi siunie ji'niayi iyo, je iyojliyisi wek ti inkase'n, 'wanjliyi p'ijliusisieta. 'Yina lapakawo ti wuj ti yimi'n ti iyoyisi'ni ji'wajieta' pa Sinia', 'yinit'iyi ka jwajla'a je insetianis. 3Ya'am ti a'we'en, it'imina ti ajwe'el, ti jitienkiujnieye ijwienjlik'i ti iyo 'wajieta' pa Sinia', ni k'ie siunie 'yakajli ti yine. ¡Ajwel'ni 'yaka'm ape'e siunie k'ie ni yinisi! 4Sekyi'i inip'elisints'e'ni ka yinaja 'ate ka noyesieje pet japok Sinia' jilis yi' Judéaja.#Rom 15.26; 1 Co 16.1-4
5'Yina siunie iniwonisi ti wuj ti 'es, kassesi'lietk'i naka, ti jlamis ti 'yiniye ka ininekiajlisi pi Saka'niona ti isimk'iji'n, iniajnatis pi Sinia' sekyi'i ti sama pet, ti iyoyeyisi siunie iyo kanwoyi pi Sinia'. 6It'imina'ne ti kiak awonaja ja Tito ti 'ejejiena'a, “Siunie jiwone ti 'nelanjie'e, ti a'm ti jlot wita'm siojokia yine napo si'lijwas, 'yina kiak wone 'nakayi. Joyi, 'yasane japo si'lijwas, 'esiji ka wakajla'.”
7I'lijwas, asa'am wuj ti jikajlajyi siuniwa wask'i'nelaja isis iyoye 'ate siunie astankiujnieye ti 'es, siu'neje ni as'najankijnieye, siu'neje ti wuj ti je ijnapinayiji siuniwa Sinia' jlamtis ti jijwela', siu'neje na asemijnaye ti sa'am ti jitiajlayits'e ti a'wenkina'ase'm. Siunapo as'lejwas ti jwajla'a je i'wi'in napok kiak jawo'ojyi pet, 'esiji ka wujwa ka p'elisina'.
8Siuti i'lij kiak awone, je awo'ate, “Ya'am aska anechiyask'i'm.” 'Yina nakata jla'am ti awotaja ka 'najanayi siunie iniwone napo 'wenayi ti je niliak, sek jane'yi ka kia' awoyeyeyinie'e pet ti ja'wenkinayi siunie asemijnaye ti ijiatk'i. 9Jlam'ne 'najanayi pi jiwonayi pa Saka'niona Jesús ti Sijwajieti siunie kiak iniwone, ti iniwojwa'n 'ate siunie p'ijliusie, jlam'ne ki iyoyetaja ti jwajla'a je isitia'n. Lapakawo ti ijiateje ti kasp'elisijne'n, 'nakayi ti ja'nesieyi siuti kiak iniwone astepe'e ti iniwojwa'n p'ijliusieja', jawoye pet 'ate siunapo ti ijiate ti jwajla'a je isitia'n.
10Siukia najkap ajwayeje, asampe ti jlotie wita'm siojokia wikiniet'aj k'iye japo Judea jlele. Siuti kiak jiwoyeyi, 'yina je ka jla'm inteliajayi wek, lapakawo ti inkaja'yi ka woyeyi. 'Yenajyi'n pet siunie itienkiujnieye iyo ya'am awo'ate, 11'wena ja ke awonayiji siunie jiwonayiji ti 'nelanjie'e, jlotieyi wita'm. Kiak wonayi pet ja jotiek'i'ni, paj ka enayena'a wita'm, jak'ieye siojopa ja akajlajyi ka ekiajlayi pi Sinia'. 12Jak je iyoyiji siuti ijiatk'i siunie jiwoyeyi siojopa jak'ieye japa jlenayi ti jlekiajle pa Sinia', 'yina janaka pet siojona i'wine'ni ilia'm. Ja ke in'yaseje'n siojona je 'we'en.
13'Yina je ajwel'ne ka as'lejwas jwajla'a je insetia'n ts'ijiye siuti kiak jawoyeyi janoyeyeje napo as'lejwas, jla'yi ka awayeyi ts'ijiye ka lajak'iyi pet paka insisieyi. 14Siunie ajwe'el naka ti, 'esiji ka ijnol wita'm napo i'nio'. 'Nakayi lajk'iyi pet paka in'wenis siuti asa'am ji'wena' ni jwamjla'a wenayi pit napo as'lejwas 'yina ti nak isitia'n ni yi'ase. 'Yina jane'yi japa jloma ja asama pet ti ja lajak'ipa ka 'wena, sek jane'yi ka inoyeye'asemna'a pet pi k'iejliyi pet pi jan'wenis. Siuti kiak jawo jajnol wita'm napo i'nio'. 15Iyo niwa Sinia' jlamtis ti iyo'ate, “Tiwet'ianaja ka jwamjla'aja paka 'wanjliye jikiojyi siunie ti je jlasiyeta ni ijiut'ni wita'm, jlampet siunie ti je 'loj puwa ka ijnot'ni wita'm jwajla'a je insetianana'aja pet.”#Ex 16.18
Pablo ijliu' Coríntojo pa Tito siu'neje papo iniuyeje'ni
16Inikanitieyi ekiajle pa Sinia', ti yijni ni Tito jlosik ti wuj ti in'yenajyi'n, iyo'ate awo siu'nie yik'i. 17Jak je iyoyiji siuti ajloyeyi ka ijno'wase its'iuk'i'm, siu'neje ti a'we'en ti jla'am ti jitienkiujnieye ti iyo ka inek lapakawo ti ijiate ti iyo ka inoye'ase'm.
18'Yina po' ni sikiecha ajlok'i ni Tito ka 'nonink'i, siunie ti Sinia' jilis i'winis ti jla'm ijiate'ni jiwek jla'am ti 'es jitieyi'i pi Sinia' ti iniuyeje, siu'neje ti iyo jlamtikie' niwa Sinia' jlamtis. 19'Naka 'neje 'na ti Sinia' jilis isi'me ka nam sek'i ti akinieje siujlie'e ijiut wita'm napo i'nio' ti yikiajlisi pi Sinia'. Sa'am ti aniwojwana jiwosa' naka 'nakayeyi napo Sinia' jilis ja inkasaje'n, siu'neje ti janwunit pa Saka'niona, siu'neje kan'we'en napo i'nio' siunie awonaja ti ijiate ti awoki ka iniukieje pa Sinia' iyo ni jikijmaye. 20Kia'iyo siunie aniwonaja, 'nakayi ja ke inets'e paka inwo'ate, “Siunie iyone na Pablo jana wikiniet'aj awet'ianaja.”
21Tempi it'imina ti kasjwesieje'n pet k'iye ka iyoki siunie 'es jitieyi'i pa Saka'niona; je najata, jitieyi'i 'neje napo i'nio'.
22'Yina po'neje ni sikiecha ajloki napo si'lijwas, naka ni siunie ti ti'wena ti je paj jiwek kanleyi ti iniuyeje ni Sinia', siu'neje ti nakata 'neje wek ti 'yu'we ti iyoyi kejli kat'ajayi siuti in'wena ti ijiate wek siunie jiwoyeyi.
23Siuti japoye pa jan'yasajyi'n, ti iyojonk'iye ka 'najane paka iwone pi jikijmaye iyo ni Tito, ká ajwekie ti nak ya'yij'ni ti iniuyijk'im'ni ni isijmaye iyo ask'ioye. Siu'neje ti jan'yasayiji'n siunapo si'lijwas times ti 'yunink'i ni Tito, kia'iyojliyi jwelajia'm ti Sinia' jilis ijliu'wase, iyunitis ni Sijwajieti siunie jikijmaye ti iyoyi. 24Nikajanitie k'iye wikie'eyi napo Sinia' jilis ti ijiate ti i'namajayi, siu'neje ka 'najane paka wonisi ti ijiatk'i siunie ti awo'ni 'ate ti ajwela', “Ijiate jlosik po' japo si'lijwas yiji jana Corinto.”
Currently Selected:
2 Corintios 8: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.
