2 Corintios 7
7
1I'lijwas ti yimijna'ase'm, kia'iyo siuniwa ti je niliaja ti Saka'niona ijwilts'e'm ts'ijiye. It'imina ti janisiamaki ti janilejek. Jalijik 'niwa ts'ajwes, jla'yi ki iyo niwa sikiojwa'l. 'Yina janinayeje wita'm ti janilesanaja'n jitieyi'i pi Sinia', jla'yi ti wuj ti ja ijiuskiyeje.
Pablo wuj ti inka'a papo Corinto jlele ti yapilieyi'ijyi siukia 'es
2¡Woye si'wetaje ni askiowe! 'Yina ti lajk'ipa ka sitis ineyi ilia'm, jla'yi ti lajk'ipa ka ikajyina, jla'yi ti lajk'ipa ka ik'emijieta. 3'Yina siuti i'lij kiak awone, je ka poye paka itiajlat'ase'm. Siukia awoniji'ni ti awo'ate, jleyejyi ni isiowe si'wet ijwienjli, ti si'wasankiye po', siu'neje ti jaliki 'ni ajnat. 4'Wanjliyi je sikip'ase'm siunie awoyi ti ajwe'lase'm, jla'yi ti wuj ti ate'mase pet. Ejlowek siunie sijliak'ali ti yits'e, 'yina siuti ya'am jla'm ani'netjli pet siunie inikanitiejeyi lajayi'ni ji'wetayi 'ni isiowe.
5Siuti 'nelanjie'e awakie Macedóniaja, ta'a ti iyo 'ni awoki, ti lajk'i japa ka jlomaye ka 'yakajmak. Awaki pi awaki ti istie' ni si'niayi. Yi'i ti poye siunie iyonts'e napo i'nio' ti teje selia'm, yi'i ti ijiate ti sitiej enaja'ni 'ate siuniwa wask'i'nelaja, sekyi'i ti je kasjweyeyi'iji. 6Ma jejli pet ni Sinia', ti t'otale it'iunit siunapo ti kia'iyoyi ti je ijwijyi'n, 'yina kasnejienk'i pijia'm ti iyo pet jijweyeja' ni Tito ti ijioyetats'e ti iyo sijweyeja'.
7Je nakata siunie ti 'nesa ka iwo sijweyeja', 'yina siuti a'wenaja ti kia'iyo ti t'otale t'o'n ti taj'lase, kiak awokieyi pet kajeyepa ti ijliasatts'e ti ts'otale t'o'n pet. Injwela ti jiwoyeyi ka kas'wena', jla'yi ti astankiujnieye jilianak'i, siu'neje ti asjlak'ali jilianak'i. Ajieyi'ne kiaka ti ijiatayi ti ts'ajkaj'ni.
8Ijiatat'itiejepe wek siukia ip'isinik ti ajlo'wase ti je inkasanitiejyi'n, 'nakayi je pa awoyeyi ijliak'aliye ka itiej yini'ni 'ate. 'Wanjliyi ka iyoyi ijliak'aliye ti 'nelanjie'e, lapakawo ti ts'ajane ta'a pa awone ti ja ke intoyi'i siu'nie iyo ti je inkasajyi'n, 9'nakayi wuj ti ts'ajkaj'ni. 'Yina je tajle siunie ti kiak awone ki ip'isinik, ti je inkasajyi'n, jla'm ijiate wek ti jlekiajlayi'i ti ji'yena siunie iyo ka woyi ni Sinia'. Naka ti it'imina ti po' ni awo, ti anikanit'ni. Ijiatat'itiejepe wek ti je inkasajyi'n, lapakawo ti wuj ti jinilayitieyi, 'yina naka ti Sinia' yimi'n, jak je iyoyiji'ni lajk'ipa ka aswet'ia ka ine selia'm.
10Siuti tinilayitieje ti i'nio' je inkaj'ni, nak Sinia' inka'a pet, it'iminayi pet ni i'nio' ti yikiajlayi'iji ti iyo siunie Sinia' iyotaja ka woyi, sekyi'i ti nakaye pet ti tijwa'a ni i'nio'. 'Yina ja ke iyoki sijliak'aliye, kajeyepa ti ijiate jla'am ti 'es. Jlampet siunie injlak'ali ti tajle pet 'ni ajnat, ijioyiji pet jana 'najlati.
11Ijiate ti jinilayitieyi siunie asjlak'ali iyo, 'yina Sinia' nak yimink'i. ¡Ataj ene 'ate siuniwa wask'i'nelaja isis tajle naka! Inia'an siunie ti ijiate ti jikima'yi siukia awo'nase ti ip'isinik atate'ase, siu'neje ti ji'yena. Je wekie'e siunie jiwoyeyi ti jinilayitieyi, ti nak ikajanit ti je asa'am ka astesa', pak it'imina siuti kiak jiwoyeyi, siu'neje ti ine'wajayi niwaka ti inkajyina, kajeyepa ti jloskiyeyi pa Sinia', ka kia'iwo ka jwesieja pet. 'Yina yam'niji kiaka ti jiwoyeyetajank'iye ka si'wena, naka 'neje ti jini'netie ti jlotkinayi siunie jitis iyo ni i'nio' ti iyo ni je 'es, kajeyepa ti jlam je woyeyi ti jlam jla'am ti jitis. Jak je iyoyiji 'yakaja pet ti wikie'eyi niwaka, je asa'am ka intaj'lase, laj astesa', 'yina jlam ti jikimet ti siupa ti iyo ni je 'es.
12Ijiate, ip'isinik atate'asepi, 'yina je ka nakaye siunie iyoyi ni je 'es kant'emina ti kiak awo'nase, ni'ne ka nakaye siunie ti inilayiti siunie ti tiwonaja ti je 'es. 'Wenajliyi ti awoktajank'iye ka ijiatayiji pet ka 'najanayi paka awonayi jitieyi'i pi Sinia', siuti jiwoye asjlak'aliye sitipe'e, 'yina Sinia' 'yijene pi iyone naka. 13'Yina nak wuj ti kasts'esi kajeyepa ti iyo sijweyeja'. Jak je iyoyiji ti Tito ijioyets'e nak ijiatayiji ti kaskask'i wita'm, ti a'wena ti kia'iyo ti po' siunie jinikanitiejeye ti yiyi, tepa jawo ka kiak je iwo ti asa'am ti taj'lase naka ti yiyi ti jinijiena pijia'm ni jlosik. 14Pajk'ipe ti ajwejla'm ja Tito ti ya'am wuj ti ate'mase, 'yina i'wi'in ti jlam je awoyi. Ijiatk'i siu'nie awoyi, mejla'a ka je 'najanayi paka awonayi siunie awoyi ti ijiatk'i jla'am ni ajwe'lase'm. 'Yina kiak iyoyiyi pet siukia awonepi ja Tito, ti awone 'ate, “'Wanjliyi jlosik po' siojopo si'lijwas Corinto jlele”, 'yina 'yakaja'a ti ijiatk'i naka. 15'Nakayi Tito je jlase' ni iyo ti 'nama'ase, kajeyepa ti itienkiunk'i ti jik'iuyeyi siupi iyo ka woyi, siu'neje ti jikima'yi ilia'm. Je jikama'yi ape'e, 'wenajliyi jla'm ti je injweyeyi. 16¡Wuj ti ts'ajka'ase'm, ti a'we'en ti jepa sikiwita'ase'm!
Currently Selected:
2 Corintios 7: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.
