Gimpuunan 35

Pinapaladan Diyus si Hakub sa Bitil

1Magkun ti Diyus sa kan Hakub, “Pag-alistu kawu, pag-ati kawu sa Bitil ag ati pag pangulian. Pagbuwat kawu ati harandugan para sa kangku, ti Diyus imaw ti nagpakakit sa kanmu katpung nalagiw kawu sa kanmu patar-ari sa kan Isaw.”

2Nakan magkun si Hakub sa kay magtal-anakan hanggan sa tanan kaibahan niya, “Yamtan yi niyu kanyu manga diyus-diyusan. Lumpiyuha kanyu sadili ag ilisi kanyu manga rutay bilang tanda bag-u ag malumpiyu pag buhi. 3Atabug kita sa Bitil, ag bumuwat aku ati harandugan para sa Diyus imaw ti nag-awat sa kangku katpung sa udas niku kakurian, ag siya diman kang kaibahan una naan tabug aku.” 4Nakan ipinakaun nida sa kan Hakub ti manga diyus-diyusan nida hanggan kanda manga aritus paggamitun bilang anting-anting. Ilinubung inda tanan ni Hakub sa sirung puun kayu insina arani sa Sikim. 5Igu magginan yi sida ni Hakub, dinurnan kadalaan ginan sa Diyus ti manga tawu sa palibut manga banwa, nakan unman nida linagas sida ni Hakub.

6Rinmas-ug si Hakub hanggan kay manga kaibahan sa Lus (pag-ingarnan diman Bitil) ati sa Kanaan. 7Nagbuwat siya harandugan ati. Iningarnan niya Il Bitil#35:7 Il Bitil: Kay ibug sabihun, ti Diyus Bitil. tunda pag rugar dahil nagpakakit sa kanya ati ti Diyus katpung kay nalagiw sa kay patar-ari sa kan Isaw.

8Taynguna, namatay si Dibura ti manug-alaga ni Ribika. Nakan ilinbung siya sa sirung puun insina ati sa may lawud Bitil. Iningarnan tunda pag puun insina Allun Bakut.#35:8 Allun Bakut: Kay ibug sabihun, linumian pag insina.

9Igu nuli si Hakub ginan sa Padan Aram, napakakit maan ti Diyus sa kanya ag pinapaladan siya. 10Magkun ti Diyus sa kanya, “Hakub kanmu ngaran, dapat kainda ginan balaw yi kawu ingarnan Hakub nu unman Israil yi.” Nakan Israil yi kay ngaran ni Hakub.

11Magkun waya gid ti Diyus sa kanya, “Aku ti Makamaskihan pag Diyus. Magkaimaw kawu mayamu pag anak. Bumaliw kawu ama nasyun Israil hanggan iba waya pag nasyun, ag bumaliw hari ti iba sa kanmu manga linahi. 12Ti inayaw niku pag daga sa kan Abraham hanggan sa kan Isaak kang diman ipakaun sa kanmu ag sa kanmu manga linahi.” 13-14Bag-u nighit ti Diyus siyun ginan pag rugar nu naan siya pag naghampang sa kan Hakub, ag ati nagpatindug si Hakub alaala pag batu. Binuhusan rargu niya lana ulibu hanggan pin-gis ubas ti batu hampay bumaliw banal. 15Iningarnan niya Bitil#35:15 Bitil: Kay ibug sabihun, ulian Diyus. tunda pag rugar.

Ti Kamatayan ni Rakil

16Nighit si Hakub hanggan kay magtal-anakan sa Bitil. Magkaanak yi tunda katpung si Rakil. Arayu waya sida sa banwa Iprata, magpanamdam yi si Rakil. 17Igu masyadu yi masakit, magkun ti manughilut sa kanya, “Danga kawu magkadala Rakil, lalaki yi maan kanmu anak.” 18Ainanak ti lapsag dapat hirimatyanun yi si Rakil. Bag-u siya naugtasan arup, iningarnan niya Bin Uni#35:18 Bin Uni: Kay ibug sabihun, ti ainanak sa kakurian pag anak. ti lapsag. Dapat iningarnan ni Hakub ti lapsag Binhamin.#35:18 Binhamin: Kay ibug sabihun, mapalad pag anak. 19Namatay si Rakil ag ilinbung sa saruy dalan atabug sa Iprata (pag-ingarnan taynguna Bitlihim). 20Pinaulian ni Hakub batu ti lubung ni Rakil bilang tanda, tugka taynguna asan di tunda pag tanda.

21Nagparargu sida ni Hakub sa kanda lakaw. Igu rinmas-ug sida sa baliw dipay Migdal Idir,#35:21 Migdal Idir: Kay ibug sabihun, barantayan manga karanidu. nagpatindug sida ati kanda manga turda. 22Habang ati di waya sida ni Hakub mag-uli, nag-ulid si Rubin sa kan Bilha sa usa ka asawa niya ama. Igu naalaman tunda ni Hakub, magkaisug gid siya.#35:22 magkaisug gid siya: Balaw inda sa Hibriyu, dapat makitan sa Septuagint.

Kay manga Anak Lalaki ni Hakub

(1 Kru. 2:1-2)

May 12 ka anak lalaki si Hakub.

23Kay manga anak niya sa kan Liya sida ni Rubin (ti panganay), si Simyun, si Libi, si Huda, si Isakar, ag si Sabulun.

24Kay manga anak niya sa kan Rakil sida ni Husi ni Binhamin.

25Kay manga anak niya sa kan Bilha sa suruguun ni Rakil sida ni Dan ni Niptali.

26Kay manga anak niya sa kan Silpa sa suruguun ni Liya sida ni Gad ni Asir.

Sida tanan kay anak lalaki ni Hakub ti manga ainanak sa Padan Aram.

Ti Kamatayan ni Isaak

27Nag-ati si Hakub sa kay ama sa kan Isaak sa Mamri, arani sa Kiryat Arba (pag-ingarnan diman Hibrun). Inda pag rugar ti inulianan ni Isaak imaw diman ti inulianan kaybi ni Abraham. 28Nabuhi si Isaak 180 ka timpu. 29Namatay siya gurangun yi, may marig-un pag buhi ag kaibahan yi siya niya manga katawuhan namatay yi. Ilinbung siya niya manga anak ni Isaw ag ni Hakub.

Currently Selected:

Gimpuunan 35: HNN

Highlight

Copy